WIRIKAPAI 59
Mo Ima Rengba ka Hi Arungosiro
Barambeda watadu kusa, aKristano dunduko nika gbiatiyo agbia na sogote zavura arungosiro. Ya mo si naida gipai re gundesi rani?
1. Tipagine ani aberãpa gbiatirani ti ni na arungosiro?
Baibiri nape gupai gbaiga nga: ‘I arúngosi agu yo dunduko ka kpi nyemu ka ka kuti sino Mbori wa du yo ni ungayo rogo Kristo Yesu yo.’ (2 Timoteo 3:12) I arungosi Yesu mbiko ko aadunga ni papara gi ga Satana zegino re te. Ani a nga aboro zegino te, si du si airiwongo tirani ho agu azogarago nga ga gi zegino re watadu ariigbu pambori arungosi rani ni te.—Yoane 15:18, 19.
2. Waigu rengbe ani ka mbakada tirani tipa arungosiro?
Si naida ani nyakasi gaani kido kuti Yekova awere. Ani nidi regbo na auru dũ kaa kpara fuko na kini gedi Fugoko. Ani nindu tipa adunguratise nga ga dungurati dedede. Agi apai re nika fu gu ome foro si aidaha tipa mo hii akpakarapai na wingbaduse, ka si vura du nga si naye kina be aborokporo vurũ. Gu mokedi nangia Pauro i anaarungosi ko dedede akepai nga: ‘[Yekova] nga gimi mounda; mi agúnde nga wa sa te.’—AEbere 13:6.
Ani ima rengba a ka sonosa gaani wingbaduse ni tungusa ani pai dedede. Tungusapai nayugo gupai furani nga ani kido kuti Yekova na ki dibe gunde be aboro. (Asanza 29:25) Ka mo sonosi wingbaduse awere tipa ka tungusapai, si nika mbakada ro mo naatungusapai atungusa kindi ka si vura du nga agbia-ngbii naka na gaani sunge vurũ.—1 ATesaroniko 2:2.
3. Waigu ani agbia undo ho ani ahi arungosiro ni?
Rengo ngaha nga, ani agbianga ngbarago ho i arungosi rani ni te, ono ho ani ahi arungosiro ni ki du na diabese, gaani idapase na nyaka. Ani nambeda na Yekova bambiko ani nika gbia gako undo ho ani abi tirani ni nga ome berewe tirani te. (Mo gedi Yakoba 1:2-4.) Si naimisa Yekova aimisa ka bi rani ani rungo, ono ho ko abi rani ni ani hipai si nasa ngbarago tiko. Baibiri naya: ‘Ka oni mangi wenepai, ki nihi apai mbiko ho, oni ki idi pa ha ni zera, si du ni wenepai ku bangiri Mbori.’ (1 Petero 2:20) Agu amaku Yekova nika fuhe fu agu aboro nika hipai ni ruruyo nga nyenye unga rogo gu zegino i nikaa soga nga ndikidi irisombori rogoho yo ya.—Matayo 24:13.
MO WIRIKI KURA DUNGU APAI
Mo bingo gupai si na rẽarẽ ti ni na ki du ni pa maku ani nye ni ruru rani fu Yekova ka ani vura kaa gbiatirani na arungosiro vurũ.
4. Mo ima rengba ka hi agu arungosiro naye be aborokporo
Yesu aima ino gupai wenengai nga bete gaani aborokporo arengbanga ka songoda gaani diaberã ka iriso Yekova te. Mo gedi Matayo 10:34-36, na tifuoho, mo ki sakipai tipa gi sanahe re:
Ginipai rengbe ka manga ho ka boro sa dagba aborokporo di diberã ni ka iriso Yekova?
Tipa ka bi kpiapai nga ga gipai re, mo bi gu VIDIO re, na tifuoho, mo ki sakipai tipa gu sanahe ngbefuoho.
Ginipai rengbe mo ka mangaha ka si du nga gumero watadu bakureamo naasada ka saro mo mbu iriso Yekova?
Mo gedi Atambuahe 27:10 na Marako 10:29, 30. Tifuo geda mo averesi nibasasa, mo sakipai tipa gi sanahe re:
Waigu rengbe gi kidohe re ka undo ro ka si du nga mo nagbia sogote be gamo aborokporo watadu abakureamo?
5. Mo nairiso Yekova kindi ka mo vura kaa gbiatiro vurũ na arungosiro
Si naida na wingbaduse ka iriso Yekova ho aboro asada ka zarani ni ani mbu irisoko. Mo bi gu VIDIO re, na tifuoho, mo ki sakipai tipa gu sanahe ngbefuoho.
Waigu agu akpiapai nidu rogo gi vidio re nanyakasi ro?
Mo gedi Amokedi 5:27-29 na AEbere 10:24, 25. Tifuo geda mo averesi nibasasa, mo sakipai tipa gi sanahe re:
Tipagine duhe ti ni ni nyanyakipa pai kaa ndu kindi kumbatayo kaa iriso Yekova ka si vura du nga i ima rugusa gaani sunge tungusapai watadu adunguratise vurũ?
6. Yekova nika undo ro aundo mo hipai
ADezire Yekova na garã yo ni bakiakia na rogo arago ni bakiakia nandu kindi kumbatayo kaa iriso Yekova niruru yo zavura ho i agbia tiyo ni na arungosiro vurũ. Tipa ka bi gupai naundo yo, mo bi gu VIDIO re. Tifuoho, mo ki sakipai tipa gu sanahe ngbefuoho.
Rogo gu vidio re, ginipai naundo agi aDezire Yekova re i hipai?
Mo gedi ARomo 8:35, 37-39 na AFiripoio 4:13. Tifuo geda mo averesi nibasasa, mo sakipai tipa gi sanahe re:
Waigu agi averesi re afu gu kido foro nga mo ima rengba ka hii aasada?
Mo gedi Matayo 5:10-12, na tifuoho, mo ki sakipai tipa gi sanahe re:
Tipagine mo narengbe arengba ti ni ka du na ngbarago ka si vura du nga mo nagbia tiro na arungosiro vurũ?
Amirioni airisi Yekova aima hi asogote ki du na diabese. Mo ima rengba a ka hi he!
GU KURA ABORO NAPE GUPAI NGA: “Ka mi hi nga arungosiro te.”
Gini averesi rengbe ka fu gu kido fuyo i aida na ni?
GINIPAI MO NAWIRIKIHE?
Yekova nabi gu ome ani amangaha ka irisoko na nyanyakipaha ani ki vura kaa gbiatirani na arungosiro vurũ. Na gako undo, ani ima rengba ka hipai ki du na diabese!
Fugöpai
Tipagine si aida aKristano naberã gupai aberã ti ni nga i ima rengba ka gbia tiyo na arungosiro?
Ginipai rengbe mo ka mangaha awere kadu regerege tipa ho arungosiro nika ye ni saro?
Ginipai rengbe ka undo ro mo du na gu kido nga mo ima rengba ka iriso Yekova ka mo vura kaa gbiatiro na asada vurũ?
MO WETEKE GU KURA APAI
Mo bingo paranga wirina sa nasakapai tipa wai Yekova aundo ko ko hipai ho i akisiko ni ku bambukiso yo mbiko ko arimisongo tiko kurogo biri-zogarago te.
Oni naahipai ka Oni Vura Kaa Gbiatironi na Arungosiro Vurũ (2:34)
Oni makianga gupai naundo kura arogotise sa i irisi Yekova niruru yo tipa dungu agarã i ki vura kaa gbiatiyo na sogote vurũ.
Mo bingo wai mo narengbe ka mangapai kuti arungosiro na wingbaduse.
“Oni Mbakaditironi Awere Tipa Arungosiro” (Ngbaõbambu Sinziri, Bamburu 2019)
Waigu si aida ani naabi agu asogote naye be aborokporo, na wai rengbe ani ka mangapai na diabese sa agu akpakarapai si aye na ni?
“Rengo Ayengo na ‘Zereda Te, Ono Kina Baso’” (Ngbaõbambu Sinziri, Tanvuo 2017)