WIRIKAPAI 56
Banda Kodatise Rogo Dungurati
Ho du ani ni dagba akuarani aidipase, ani nadu kina wai Bakindo Davide adu naya: “Nga gu wenepai na wenerago a ka awirina sungu sa na berã sa!” (Atambuahe 133:1) Gaani kodatise ayengo wa ikpiro gumba te. Ani dunduko ni basasa si aida ani fu bee sa ni.
1. Ginipai iriwo gbe dagba ga Mbori aboro?
Ka mo ndu tipa adunguratise rogo gu kura aringara, mo arengbanga ka ino gu fugo i apehe te ono rogo dungu agene, mo nika bi tiro nga i nakpinyemu ro akpi. Tipagine? Bambiko ani nawisigo Baibiri nimanga ani sunge na kina bangisa awaraga rogo arago dunduko. Na ani namanga ome ka yugo nyemuse fu kura aboro. Ka ani vura kaa raka kina wari vurũ, ani dunduko ‘nayamba he ti rimo Yekova ki nimangi pako kina ku bani sa.’—Zefania 3:9.
2. Ginipai rengbe mo ka mangaha ka sonosa kodatise?
’Oni kpí nyemu akuaroni akpi kakaka kpotoroni yo.’ (1 Petero 1:22) Waigu rengbe mo ka mangasunge na gi rugute re? Kuba gupai nga kaa gbeberã ro kuti gu zangarengba nga ga kura aboro, mo ngere tipa gu wene asino du tiyo. Kuba gupai nga kaa koda tiro na kina agu aboro du gaoni apai sa na yo, mo asadi ka ino agu awirina du apai tipa yo kia ti gamo. Si naida ani mangi ome nyanyaki ka sovura kuti gu iraira bipai ka du kpotorani yo kuti gu kura aboro.—Mo gedi 1 Petero 2:17.a
3. Ginipai rengbe mo ka mangaha ka mo du na zangagiatise na kuaro Kristano?
Ani ni kodikodi rani, ono ani nga kpakpa aboro a. Kura aregbo, ani naba gberãrago ti boro watadu ka imisa ni. Sidu, Fugo Mbori nape gupai furani nga: Oni ‘nivu akuaroni,’ si kini gbia kurapai kuti ni nga: ‘Wa Gbia avu roni, kina wo oni ka manga.’ (Mo gedi AKorosaio 3:13.) Ani ima imisa Yekova bara dunguhe, na wa vura duhe wo, ko nambupai ambu furani. Sidu, ko naida ani nimbupai fu awirinarani a. Ka mo ini gupai nga mo ima imisa boro, mo mangi diandue ka mbakada gupai re.—Mo gedi Matayo 5:23, 24.b
MO WIRIKI KURA DUNGU APAI
Mo ngere tipa agu agene rengbe mo ka fubee sa kodatise gbiati zereda ngbaha rogo dungurati.
Ginipai rengbe mo ka mangaha ka manga zereda?
4. Diabe iraira bipai tipa kura aboro
Ani naida ka kpinyemu awirinarani dunduko. Ono ani ima rengba kaa sota ka ida na gu boro du kia tirani. Ginipai rengbe ka undo? Mo gedi Amokedi 10:34, 35, na tifuoho, mo ki sakipai tipa agi asanahe re:
Yekova naida ngbatunga aboro dunduko du ni gako aDezire. Waigu rengbe gipai re ka du na maapai kurii gu bipai du mo na ni tipa gu kura aboro du apai tipa yo kia ti gamo?
Gini ngbatunga iraira bipai tipa kura aboro du gbe rogo gu rago mo araka rogoho nga gu mo aida ka nehe?
Mo gedi 2 AKorindo 6:11-13, na tifuoho, mo ki sakipai tipa gi sanahe re:
Mo nabihe nga waigu rengbe mo ka mbeda gbe na agu awirina du apai tipa yo kia ti gamo?
5. Mo mbupai fu kura aboro na kpotoroyo dũ na kini mangi zereda
Yekova nambupai furani kpaima wa vura duhe vurũ nga pai ho si aida ani mbupai fuko ti ni te. Mo gedi Atambuahe 86:5 na tifuoho, mo ki sakipai tipa agi asanahe re:
Bakio waigu du ga Yekova mbupai?
Tipagine du mo na tambuahe ti ni tipa gako mbupai?
Gini apai rengbe ka saha furani ni kpakarakpakaraha ani du wenengai na akuarani?
Waigu rengbe ani ka wirika Yekova na ki nye ni kodikodi rani na awirinarani? Mo gedi Asanza 19:11, na tifuoho, mo ki sakipai tipa gi sanahe re:
Ho boro naba gberãrago ni tiro watadu ka imisa ro, ginipai rengbe mo ka mangaha ka mbakada gupai re?
Ti kura aregbo, ani naaba gberãrago aba ti kura aboro. Ho gipai re amanga ni, ginipai rengbe ani ka mangaha? Mo bi gu VIDIO re, na tifuoho, mo ki sakipai tipa gu sanahe ngbefuoho.
Rogo gu vidio re, ginipai gu wirina re ni mangihe tipa ka manga zereda?
6. Mo ngere tipa gu weneapai du rogo awirinamo yo
Ho ani adu ni mbembedi na awirinarani, ani naye ka inopa gu wene asino du tiyo gbiati gayo arungbura. Waigu rengbe ani ka gbe berãrani kuti gayo wene asino? Mo bi gu VIDIO re, na tifuoho, mo ki sakipai tipa gu sanahe ngbefuoho.
Ginipai rengbe ka undoro mo bi gu wene asino du ti awirinamo?
Yekova nagbeberã ko kuti gaani wene asino. Mo gedi 2 Pekapai 16:9a, na tifuoho, mo ki sakipai tipa gi sanahe re:
Pa ino mo gupai nga Yekova nagbeberã ko kina kuti gamo wene asino nasa ro mo du wai?
Zavura gu mbia fongo du ni bawenehe na kina serõ ti ni, ono si kindi na nyanyakipaha. Wakina gure a, awirinarani nga aira zangarengba, ono i na nyanyaki payo fu Yekova
GU KURA ABORO NAPE GUPAI NGA: “Mbata fu mi mbupai fu boro, ni du wa ka ni ho mbupai.”
Tipagine si aida ani du ti ni na nyemu ka mbupai fu kura aboro?
GINIPAI MO NAWIRIKIHE?
Mo ima rengba ka undo tipa ka banda kodatise rogo dungurati ni mbu mo pai na kini yugu nyemuse fu awirina dunduko.
Fugöpai
Waigu rengbe mo ka diabe iraira bipai tipa kura aboro?
Ginipai rengbe mo ka mangaha ka zangagiatise du dagba ro na kuaro Kristano?
Tipagine mo aida ka wirika ga Yekova kpiapai ti ni nga ga mbupai fu kura aboro?
MO WETEKE GU KURA APAI
Mo bingo wai rengbe kura ga Yesu kpiapai sa ka undo rani tipa ani ne sapangbanga kura aboro.
Ya mo si naida ani ho mbupai ka ani bihe nga gbegberẽpai ho ani namangihe te?
“Hõ Mbupai Nga Gene Tipa Zereda” (Ngbaõbambu Sinziri, Ngbangba 1, 2002)
Mo bingo wai akumba ue nga agu yo nasono rogo gu dagbarago aboro aabi akurayo na payo kusende rogoho agbia ndikidi kodatise.
Mo wiriki wai rengbe mo ka mbakada gu kpakarapai du dagba tiro na boro mbata fu si ye na kpakarapai kurogo dungurati.
“Oni Nyasiriipa Zanga Giatise Rogo Nyemuse Yo” (Ngbaõbambu Sinziri, Merekoko 2016)
a 6 Rukutu Kekeapai du Ti Digido gi Buku Re nasakapai tipa wai nyemuse asa aKristano i zanga gbaraga gu kaza nazio boro ti kurani.
b 7 Rukutu Kekeapai du Ti Digido gi Buku Re nasakipai tipa wai ka mbakada agu apai nabipa sunge bagaahe gbiati agu apai nabipa andiko.