Oni Wirikipai Rogo Fugo Mbori Yo

Tipagine Du Mbori Ti Ni na Riigbu Beko?

Gi kekeapai re nasakapai tipa agu asanahe dungu aboro naamakiaha berãyo yo na si nayugobara akaragapai kuti agu asanahe re rogo Ziazia Kekeapai. ADezire Yekova nikadu na ngbarago ka wisigo agi akaragapai re na oni.

1. Tipagine Mbori adungura aYisaraere ti ni kurogo riigbu?

Mbori adungura atita gu nyanyakipa bakumba nangia Abarayama kurogo ringara sa ki fu andiko fuyo. Ko ayambu rimo gu ringara re nga Yisaraere na ki saha ni ba ndikidi irisombori gbiati fugoko nga Ziazia Kekeapai. (Atambuahe 147:19, 20) Mbiko gupai re, rikaaboro dunduko nagbia undo areme.—Oni gedi Bambata Pai 22:18.

Mbori asia aYisaraere tipa i du nigako aDezire. Ho i anidu ni na giasangba, i anaagbia undo ti ga Mbori arugute. (Pa Fu Rugute ni Ue he 4:6) Niwisigo ani pai tipa gu pangbanga nga ga aYisaraere, ani nika ino dungu apai tipa Mbori ngba wene gene.—Oni gedi Yesaya 43:10, 12.

2. Tipagine du ndikidi aKristano ti ni nimbakadimbakadiyo?

Fuo bete regbo kusa, aYisaraere atona kaa manga gupai rago angbanga ti Yekova nani ya, ko ki di gu dungurati nga ga aKristano kubayo. (Matayo 21:43; 23:37, 38) Mbataano, aYisaraere du nangia ga Mbori adezire. Awere tie, ndikidi aKristano du namangasunge ni aDezire Yekova.—Oni gedi Amokedi 15:14, 17.

Yesu adungura gako abawiriki kurogo riigbu tipa i mangi dezirepai tipa Yekova na ki sa rikaaboro dunduko ni abawiriki. (Matayo 10:7, 11; 24:14; 28:19, 20) Gi sunge re nambeda ka digo. Tipa bambata regbo, Yekova dungura dungu amirioni aboro rogo ngbatunga aboro dunduko kurogo ndikidi irisombori. (Yugoti 7:9, 10) Ndikidi aKristano nimbakadimbakadiyo tipa kaa ngarasa tiyo na kini undo tiyo dagbatiyo. Rogo zegino dunduko, i nagbia kina bangisa riahe nga ga toro ti aregbo dunduko ba gayo adunguratise yo.—Oni gedi AEbere 10:24, 25.

3. Rogo gi gaani regbo re, wai gu aDezire Yekova aenge?

Gu riigbu nga ga aDezire Yekova du ti gi gaani regbo re atona rogo agu agarã nangia 1870. Umba rika abawiriki Ziazia Kekeapai atona kaa kusa agu arengo du rogo Ziazia Kekeapai naima inga. I aima ino gupai nga Yesu ambakadi gu dungurati nga ga aKristano tipa i tungusipai. Sidu, i atona ka tungusapai tipa Kindo rogo zegino dunduko. Rogo gu garã nangia 1931, i adi gu rimo kuriyo nga aDezire Yekova.—Oni gedi Amokedi 1:8; 2:1, 4; 5:42.

4. Wai du aDezire Yekova nimbakadimbakadiyo areme?

Rogo bambata sa kama agarã, agu adungurati naadu rogo dungu aba anaagbia gu riahe nga ga toro be gu riigbu bipasunge nga gu naima ida kuti gupai nga Yesu nga Rii dungurati. (Amokedi 16:4, 5) Wakina gure areme a, aDezire Yekova ima ida kuti gupai nga Yesu du nangbe fuyo kumbatayo. (Matayo 23:9, 10) I nagbia undo a be gu nungusa he nga ga gu Riigbu Bipasunge du na agu abaakumba rogoho naima nyaka rogo toro yo nga aguyo nangarasa aboro kini nungusi yó rogo toro yo rogo adungurati bangehe naima susa 100,000. Rogo agu adungurati re naabaha, agu akumba du na wene inohe namangasunge ni abaakumba, watadu ababiapai. Agi akumba re nangerafuo ga Mbori rimbasa akandoro rogo nyemuse yo.—Oni gedi 1 Petero 5:2, 3.

ADezire Yekova nimbakadimbakadiyo tipa ka tungusapai na ka sa aboro ni abawiriki. Tipa ka undo aboro rogo aba dunduko, i nasa abuku kurogo dungu afugo, i nakusaha na kini kparakaha rogo afugo bangehe naima susa 500. Kina wai amokedi anaatungusapai, kinawo a i atungusapai kini tanga nani ti akporo. (Amokedi 20:20) I nafu tiyo tipa kaa yugo Ziazia Kekeapai fu agu aboro duna ndikidi nyemu rengo tiyo. Wa duhe nga ga Yekova aboro nagbe berãyo gbe kuti manga gupai ngba ti Yekova gbiati sunge undo kura aboro, i nga aboro gu riigbu duna ngbarago rogoho.—Oni gedi Atambuahe 33:12; Amokedi 20:35.

Ka oni aida ka ino kura apai tipa gipai re, ono bi kapita 19 nga ga gi buku What Does the Bible Really Teach?, aDezire Yekova akusihe re.