“Oni Rugutironi Naapa Agu Apai Duna Nyanyakipaha Gbe”

1, 2. Gini sangbaanebi tipa yangara areme si awira wa ga Yesu abawiriki aduna nyemu ka inopai tipaha, na tipagine?

PETERO, Yakoba, Yoane na Andarea kparatiyo nisayo na Bairayo. Gupai Yesu apehe mbata kusayo tipa gbarasa yekaru aima iriwo tiyo nikerehe. (Mk. 13:1-4) Sidu, i kini mo ka sanako nga: “Mo gúmba nga ha fu rani, ni gini rago agi apai ka manga re? gine i ka ina pa ga ye ti ni, na pa digida rago?” (Mt. 24:1-3) Yesu atona ka pepa agu apai watadu sino apai nika manga, angianga kina agu apai nika ye na bakere ariapai sa ya ono agu nika yugopa digido gi ga Satana zegino re a. Si nawira wa pai ho sa ga Yesu abawiriki aduna nyemu ka inopai tipaha. Fuo fura Yesu tipa gu ngbatunga gbegberẽ apai duwa avura, angbongi, naapa kio kuondiko kina kumbatayo, ko afura a tipa gu wenepai si adu nga si nika manga ti yangara arame. Ko ayaa: “Gi wene pangbanga nga ga [kindo] re i atungusa ha rogo zegino dunduko mbiko ndika fu arikaaboro dũ; ragoho ki digi adiga.”—Mt. 24:7-14.

² Ga Yesu abawiriki aduna ngbarago ka tungusa gu wene pangbanga nga ga Kindo naako sa. (Rk. 8:1; 9:1, 2) Si nawira wa i aima tingida gupai ko apehe nga: “Kii zuzu ati, ono abamangisunge du ni umba yo; oni kpári ke fu Gbia ati ko kedi abamangisunge ku rogo gako ati.” (Rk. 10:2) Ono waigu ka i arengbe ka tungusapai “rogo zegino dunduko” na ki mangi dezirepai fu rikaaboro dunduko? Wari gu ka abamangisunge arengbe ka ye ni? I arengbe ka inoho sa kina gu ka i angere kumbatayo wagu i asungu na Yesu ti gu regbo re! Nirengo, kina ngbayo ka zere ka bi digisidigisi agu afugo ani agedaha awere rogo Matayo 24:14 re.

3. Waigu Ruka 21:34 adigisotihe areme, na gini ngbatunga wisigotise si aida ani mangihe?

³ Ani naraka tigu regbo ga Yesu sangbaanebi adigisotihe. Amirioni aboro dunguratiyo tipa ka hiiso zegino na tungusa gu wene pangbanga nga ga Kindo. (Yes. 60:22) Wa vura duhe wo, Yesu ape gupai nga kura aboro kinaho si nikadu fuyo nikpakarapai tipa i moiberãyo tipa yangara arame. I nikadu nifudifudiyo be dungu apai. (Oni gedi Ruka 21:34.) Ani nabi wai abi agu afugo re adigisotihe. Kura ga Mbori aboro kinaho tona kadu nifudifudiyo. Gipai re niyuguyuguhe rogo agu adiaberã i amangaha nibipa asunge, bakere wirikapai, agu ahe i aidaha tipa tiyo, gbiati bakio gu regbo i adiaha kuti ambaro na aũngbarago. Ome aguyo nabata be agu asoapai na kpakaraapai nga ga raka. Oni sananga tironi nga: ‘Ginipai du tipa re tigimi? Ginipai gimi adiaberã ayugoho tipa wai mi abi raka?’

4. (a) Ginipai Pauro akpari tipaha tipa agu aKristano naadu Firipoi na tipagine? (b) Ginipai ani nika wisigoho rogo gi kekeapai re na gu ngbefuoho, na gini sásá rirani yo?

⁴ Si aidi agu aKristano naadu rogo bambata sa kama agarã mangi ome tipa ka peresapa agu apai nga ga toro. Gu mokedi nangia Pauro akpari tipa agu aKristano naadu Firipoi yo i ‘rugutiyo naapa agu apai duna nyanyakipaha gbe.’ (Oni gedi AFiripoio 1:9-11.) A wa si adu tipa Pauro, agu aKristano naadu ti gu regbo re, ‘i agumbapa Mbori zukazuka gbe nidunguyo zanga gunde.’ (Frp. 1:12-14) Teketeke a, dungu rani natungusa Fugo Mbori areme na wingbaduse wakina yó. Sidu, ya mo pa wisigo ani wai sunge tungusapai amanga rogo ga Yekova riigbu areme rengbe ka undo rani ani moi berãrani wenengai kuti gu nyanyakii sunge tungusapai namanga? Kina boro rengo du! Rogo gi kekeapai re, ani bingo wai Yekova namangi mbakadapai tipa ka ipiso sangba gupai du rogo Matayo 24:14 digisitihe. Ginipai gi mbakadapai re adigisoho, na wai rengbehe ka undo rani na gaani aborokporo? Rogo gu kekeapai ngbefuo gere, ani nika wisigo gupai rengbe ka undo rani tipa ani hipai na kini ndu sa na ga Yekova riigbu.

GU PAPARA GA YEKOVA RIIGBU DU NGBANGBATURŨ YO NANDU KINA KUMBATAYO

5, 6. (a) Tipagine Yekova afu ayuguyugupai tipa gu gako riigbu du ngbangbaturũ yo ti ni? (b) Ginipai Yezekere abihe rogo yuguyugupai?

⁵ Dungu apai kinaho Yekova aaidanga i rimisihe kurogo Fugoko ya. Nikpiapai, ko afuranga furani tipa gu futufutuapai dunduko du tipa wai berã na wai zegino amangasunge te, wa vura duhe nga ka rago ngbaangba tirani tipa ka ino agu apai du tipaha! Kuba gure, ko ima fu agu apai furani ani aidaha tipa ka rugatirani naapa gako ringbisapai na kini raki gaani raka ringbisihe kina kutini. (2 Tim. 3:16, 17) Nangba wai Ziazia Kekeapai afura furani tipa agu apai namanga rogo gu ga Yekova riigbu du ngbangbaturũ yo re! Ani na ngbarago ka geda wai saki yó pai tipa ga Yekova mbakadapai ngbangbaturũ yo rogo Yesaya, Yezekere, na Daniere na rogo gu yugoti nga ga Yoane. (Yes. 6:1-4; Yeze. 1:4-14, 22-24; Dan. 7:9-14; Yugo. 4:1-11) Gure wa ka i ya Yekova di kpuguru ngbangbaturũ kusayo tipa ani ngana agu apai du yo. Tipagine ko ayugu agi apai re ti ni furani?

⁶ Yekova aidanga bangirani go ti gupai nga ani nga papara gako riigbu te. Dungu apai gudu ho namanga tipa ka songoda ga Yekova ringbisipai susi gu ani abihe. Nikpiapai, Yezekere abi gu ga Yekova riigbu du Ngbangbaturũ yo wa ngbagida. Gi ngbagida re ima rengba ka ora niipo na ki ariatiru wa mabangirise. (Yeze. 1:15-21) Nibi wai gi ngbagida re aora, u ima rengba ka ndu tuturũu. Rogo yuguyugupai yo, Yezekere ade mboimboi gu boro naaora na gu ngbagida re. Ko ayaa: “Nzere sirigi ki tona ti gu pako nadu wa kpia dimoko ki ndu ku riko yo, wa kpia we kirikiri pati ko . . . Were kpia gu taarimo nga ga Yekova adu ni yuguyugu he.” (Yeze. 1:25-28) Nairiwo wai gu yuguyugupai re airiwo bangiri Yezekere! Ko abi Yekova nga ko du na pagbia kurii gi gako riigbu re, na ko naruga wai ko aida si ndu vurube gako ziazia toro. Nairiwo wai gi ngbagida re ayugo wai ga Yekova riigbu nga ga ngbangbaturũ amangasunge!

7. Gu yuguyugupai i afuhe fu Daniere, waigu si afu kido furani?

⁷ Daniere abi gu kura yuguyugupai nafu kido furani. Ko abi Yekova wa “gu ko nga Bakuru Ko du ho kindi” ko nasungu rii gu mbatabakindo du na mirãwe ti ni. Gi mbatabakindo re nandu andu kindi. (Dan. 7:9) Yekova aida Daniere bi gupai nga gako riigbu nandu andu kindi tipa ka digiso Gako ringbisapai. Daniere abi boro “wa wiri boro” nga Yesu i nifu pagbia fuko kurii gu ga Yekova riigbu du auru kpotosende. Ga Kristo rengberengbe zogarago adu nga tipa kina bete agarã gbua te. Kuba gure, si nga “nyenye zogarago, nga gu nikanyasa nga ya, gako ngbi nga gu ka i agbárasa nga ha wa sa ya.” (Dan. 7:13, 14) Gipai re nafõngbaduraniyo ani kido kuti Yekova na gupai ko nika mangaha. Ko ‘aasia pa zogarago na taarimo na ngbi’ fu gu wiriko rẽ nga Yesu. Yekova nakido kuti wiriko. Sidu, ani rengbe kadu naa kido kuti ga Yesu du nibazogo.

8. Sangbana gu yuguyugupai Yekova ayuguhe fu Yezekere na Yesaya angia gine, na gini maapai duhe nani kurirani?

⁸ Waigu si aida gu bipai du ani nani tipa gu ga Yekova riigbu du ngbangbaturũ yo du na ome kurirani? A wa si adu tipa Yezekere, kina kiki nazio rani tipa ka bi gupai Yekova amangaha. (Yeze. 1:28) Ka ani aberãkurii gi ga Yekova riigbu re, si rengbe ka sa rani ani mangipai kina wai si adu tipa Yesaya. Ho ko agbia momu tipa ka fura fu aboro tipa gupai Yekova nika mangaha, ko akánga ha te. (Oni gedi Yesaya 6:5, 8.) Yesaya aduna kido nga, mbiko ga Yekova undo, ko adia adiabe agu akpakarapai ka gbiako. Teketeke a, si naida kpia ga Yekova papara riigbu du ngbangbaturũ yo fõngbaduraniyo ani du na kiki na kini songodihe. Si nipa ngbarago ka ino gupai nga ani nipapara gu riigbu namangasunge ti aregbo dunduko tipa ka manga gupai Mbori akpinyemuhe!

GU PAPARA GA YEKOVA RIIGBU DU AURU KPOTOSENDE

9, 10. Tipagine si aaida ga Yekova riigbu duadu ti ni auru kpotosende ane?

⁹ Yekova amangi mbakadapai vurube Wiriko auru kpotosende ane nga gu namangasunge sa na gu gako riigbu du ngbangbaturũ yo. Tipagine si aaida mbakadapai duadu ti ni auru kpotosende ane tipa ka digiso gu sunge du rogo Matayo 24:14? Ani wisigingo nduapai biata.

¹⁰ Bambataha nga, Yesu ayaa gi sunge tungusapai re nika ndu na gako abawiriki ku “digida sende yo.” (Amo. 1:8) Uehe nga, si adu nga mbakadapai nikadu adu ho tipa gu riahe nga ga toro tipa agu aboro namanga gi sunge re. (Yo. 21:15-17) Biataha nga, si adu nga mbakadapai aduadu kinaho tipa agu aboro natungusa gipai re tipa i naakodatiyo kurogo bangisa ba sa tipa ka iriso Yekova na tipa i yugupai fuyo tipa i ndu na gi sunge re kumbatayo. (Eb. 10:24, 25) Tipa ka digiso gipai re, si arengbanga ka manga wa musumo te. Tipa apefuo Kristo du na diabese, si naida i mbakaditiyo ambakada wenengai.

11. Waigu ani ayugo nani nga ani nasongoda gu mbakadapai du rogo ga Yekova riigbu?

¹¹ Waigu rengbe ani ka songoda gu mbakadapai ga Yekova riigbu namangihe? Gu gene rengbe ani ka mangaha rogoho nga kadu naa kido kuti agu aboro Yekova na Yesu nasia yó i ningbembatayo rogo sunge tungusapai yo. Dungu apai gudu ho rogo zegino areme rengbe ka gbeberã agu awirina nangbembatayo dagbarani ti gayo sunge. Ono wa vura duhe wo, gini banguapai gu ga Yekova riigbu du auru kpotosende amaaberã ha fuoho?

ONI GBEBERÃ RONI KUTI “AGU APAI DUNA NYANYAKIPAHA GBE”

12, 13. Waigu agu abaakumba nga aKristano amanga gayo sunge, na tipagine si angarasa roni ti ni?

¹² Agu aKristano nga abaakumba rogo zegino dunduko du na bakere inohe i asiayo tipa i ningere kurii sunge tungusapa Kindo rogo agu aringara i araka rogoho na kini songodihe. Tipa i nindu sa na ga Yekova riigbu du wakina gu ngbagida nandu andu re, na tipa gupai si aida i nimangihe, gi ruru akumba du na umbasitise re nangera kina kube Yekova na Yesu. Sidu, ho agi awirina re amanga diaberã ni, i nagbata undo vurube Fugo Mbori na kini kpari kakaka tipa ko ngbe fuyo kumbatayo.—Tam. 119:105; Mt. 7:7, 8.

¹³ A wa si adu tipa aguyo naadu rogo bambata sa kama agarã, agu aKristano nangerakurii sunge tungusapai areme i ima fu tiyo tipa sunge “tungusapai.” (Amo. 6:4) I na ngbarago ka bi gu sona kumbatayo namanga rogo sunge tungusapai rogo gayo dagbarago na rogo zegino dunduko. (Amo. 21:19, 20) I arũngo dungu arugute na agene mangasunge te. Kuba gure, i napekafuo gu ngbembatayo nga ga ga Mbori ziazia toro ho i amanga gu mbakadapai ni si aidaha tipa ka undo sunge tungusapai ndu kumbatayo. (Oni gedi Amokedi 15:28.) Nimangayo ho wo, agi awirina re namaa wene kpiapai fu agu aboro dunduko du rogo gayo adungurati.—Ef. 4:11, 12.

14, 15. (a) Gini mbakadapai duho tipa ka songoda sunge tungusapai rogo zegino dunduko? (b) Gini bipai du oni nani tipa gu sunge tungusapai oni amangaha?

¹⁴ Gu kura asunge kinaho dungu aboro abingo ho ya nga ga mbakada gu gaani riahe nga ga toro du rogo gaani awaraga, adunguratise, na kikindigi adungurati. Akutu awirina gudu ho futiyo tipa ka mangasunge kakaka tipa ka sa gu riahe nga ga toro kurogo bete afugo wa 600 tipa dungu aboro wiriki “agu apai du na tandu nga ga Mbori” rogo afugoyo. (Amo. 2:7-11) Paranga aboro nga akumba na adee namangasunge ba kusa gaani awaraga na gu makana na gbingbida ha nikina boro ipo. Fuani, i nakparaka agi awaraga re rogo adungurati dunduko kodihe na agu akisanga du kina boro tuturũu.

¹⁵ Dungu ambakadapai duho tipa ani moiberã rani fuo tungusa wene pangbanga rogo gaani adungurati. Nikpiapai, akutu awirina gudu ho futiyo tipa ka undo sunge dua Bambu Kindo, Bambu Bakere Dunguratise, ka undo agu aboro gberango nati kuriyo, watadu aguyo du na kpakarapai na amunganga, ka mbakadapai tipa kikindigi adunguratise, na ka yugopai rogo gu sukuru nga ga siokrasia, gbiati gu kura dungu apai. Ndu manga agi apai re dunduko nga gine? Si tipa ka ipiso sunge tungusapai, ka nyakasa agu aboro namanga gi sunge re rogo toro yo, na tipa ndikidi irisombori nindu kumbatayo. Ya mo gu ga Yekova riigbu du auru kpotosende namaaberã fuo agu apai nyakipaha gbe? Ii, si namangaha amanga!

ONI PEKEFUO GU KPIAPAI NGA GA GA YEKOVA RIIGBU

16. Ginipai rengbe ka undo roni oni wisigipai tipa Ziazia Kekeapai nisaroni watadu na gaoni aborokporo?

¹⁶ Ya mo ani nadia regbo dedede tipa kaa berãkurii wai ga Yekova riigbu amangasunge? Gu kura aboro sia ka rimiso gipai re kurogo gu gayo mbakadapai du tipa gu irisombori nga ga aborokporo watadu wisigopai nisase tipa ka berãkuriihe. Agu ayugoti Mbori ayuguhe fu Yesaya, Yezekere, Daniere, na Yoane si ngbaangba ka wisigopai tipaha. Gu buku nga Jehovah’s Witnesses—Proclaimers of God’s Kingdom gbiati gu kura awaraga na aDVD, si na dungu weneapai rogoho tipa ga Yekova riigbu.

17, 18. (a) Gini undo gbia mo ho be gi wisigopai re? (b) Gini asanahe si aida ani wisigipai tipaha?

¹⁷ Berã ani kurii gupai Yekova amangaha rogo gako riigbu nga wenepai furani. Wakina gi bawene riigbu re, ani moingo berãrani amaa fuo agu apai nyakipaha gbe. Manga ani he wo nika nyakasa rani ani duwa kina Pauro nayaa: “Wa du ani na gi mangapase re tie, a wa ani arogo inapai, ani arungbura nga te.” (2 Kor. 4:1) Ko angarasi gako abadiasunge ki yaa: “Ka ani mbú nga be manga rurupai ya, bambiko ka he amáka nga rani ya ani aké ahe ho regboho ka da ni.”—Gara. 6:9.

¹⁸ Ya mo apai ho si aida ani mangi ariapai rogoho wangia ani aborokporo watadu wadu ani nibasasa tipa ka ruho ka manga agu apai nyakipaha gbe rogo gaani raka yo? Ya mo ani rengbe ka sa gaani raka si du taata watadu ka mbu agu apai nafuda rani tipa kafu tirani sa tungusapai? Rogo gu kekeapai ngbefuo gere, ani nika wisigo apai yo bisue nga gu rengbe ka undo rani ani nindu sa na ga Yekova riigbu.