Ya mo Agberango Nayugo Gupai Nga Mbori Nga Gbegberẽ Sino Boro?

GUPAI ABORO AGUMBAHA: “Mbori nazoga zegino, ko du nasa agberango si nimangi, sidu, gbegberẽ sino boro nga ko.”

GUPAI ZIAZIA KEKEAPAI AGUMBAHA: “Zegino dunduko du ni zogozogo ho be gbegberẽ ko.” (1 Yoane 5:19) Da nga gu “gbegberẽ ko” re? Ziazia Kekeapai nayaa ko nga Satana. (Matayo 13:19; Marako 4:15) Ya mo ziree du? Oni berẽnga tipa gipai re: Kangia Satana na ome beko kurii zegino, na ko nasa aboro i duna gbegberẽ sino, ngbaduse, na guru bipai tipa apai. Ya mo ani agbianga ti aundo ino ani ndu gupai aboro agbarasa gayo rago ti ni nga kpotosende te? Dungu abangbasia abainipai nazahe nga gu gbarasa rago re rengbe ka ye na agberango, watadu ka saha si mangi, watadu ka saha taata tipa si aboro.

Tipagine Mbori nambugene ti ni fu Satana ko moipai rii aboro wa gure? Ani nagbia karagapai sa gipai re ti gupai namangi ti tonatona ga aboro pangbanga ho bambata avungurani asamungu ni kuti ga Mbori zogarago. Natona ti gu regbo re, dungu aboro aima pekafuo gayo kpiapai. Gu diaberã i amangihe ka ká ga Mbori zogarago re aima sa aboro i du kutiibe vura Mbori nga Satana. Si du Yesu ayambu ko ti ni nga ‘bakindo gi zegino re.’ (Yoane 14:30) Ya mo Satana anye anye kindi kaa zogarago? Oó!

Yekovaa wa Satana nga gbegberẽ boro aberãnga pa gu gbegberẽ apai namanga aboro ya te. Nirengo, ho Mbori abi aboro ni i nirungo, rungoyo nazio ko nikerehe. Nikpiapai, nibi gu gbegberẽpai namangi aYisaraere, Ziazia Kekeapai nayaa tipa Mbori wee: ‘Gayo imisiri dunduko aimisi ko.’ (Yesaya 63:9) Mbori ima manga mbakadapai tipa ka nyasa riipa gu gbegberẽ zogarago nga ga Satana barambeda! Ko ima sia Wiriko nga Yesu Kristo tipa ko duni Bakindo rurupai nyeanye kindi.

GU GENE SI AKODA RANI NGBAHA: Wa vura duhe nga ga Satana zogarago arengbanga ka banda aboro be agberango te, ga Yesu zogarago nika mangaha amanga. Yesu amangipai tigu kura regbo tipa ka banda gako abawiriki be bavugumo. Ziazia Kekeapai nayaa: “Ko. . .ki za yuge, ki ya fu baime, ‘Mo zéredi, ki ru zaa!’ Yuge ki kiti, rago ki zeredi azereda.” Abawiriki ki yaa: “Da du re, yuge agia sangbani na baime a?” (Marako 4:37-41) Gipai re nakido rani nga Yesu nika banda aboro giasangba naabayo ti regbo gako zogarago.—Daniere 7:13, 14.