Gu Regbo Agberango Nikaa Dunga Berewe ti ni Ya!

KA BORO gumba gupai foro nga, “Bara mbeda, agu agberango naye be gu mangapai nga ga ome zegino adunga berewe te,” ginipai ka mo gumbaha? Mo rengbe ka karagapai funi ki yaa, “Musumo du mo araraha. Agu agberango re nga papara raka.” Watadu mo rengbe ka berã gupai ku beraro yo nga, ‘Ko naberãha nga da ka ko nangi ní?’

Wa aboro avura kaa berã gupai nga agu agberango re agonga nigu uru te, wene ndupai kinaho nasa rani ani du na gu maabangirise nga si anyasa anyasa. Ono anga boro auru kpotosende ane nika nyasa riipaha te. Aboro na gu rengba beyo nga ga ino wai nzunzu agu agberango re aru kaa manga te, ka ani agumbanga pa gu tie nga ka nyasa riipaha ya. Bakindo Soromo naraki ti regbo aYisaraere bakuru kusayo aboro aima ino pa gako tatamana wenengai agumba gupai nga: “Boro arengba nga ka ina pa gu mangaapai namangi tii uru no te. Ka boro vura ka asada ka ina pa gu sunge re, nigbata pa ha, ni abi nga ha te; zavura iratatamana naya ni ini pa ha, ni arengba nga ka ina ha a te.”—Batungusipai 8:17.

Ka si du tie nga aboro arengbanga ka nyasa riipa agu agberango re te, da tie rengbe ka nyasa riipaha? Ziazia Kekeapai nagumba gupai nga kina Bakusirani sa nika nyasa riipaha. Ko du nambakadi kpotosende na agu ahe du rogoho dunduko wa gu nga abaime. (Batungusipai 1:7) Na ko wa ani te, gu ome mangaapai du tiko, digidoho ti ni te. Gu nebi nangia Yeremaya aidi kuti gipai re ki gumba gupai nga: “Ako Yekova Mbori! Mo du namangi ngbangbaturũ na kpotosende be ga bakere tandu na be taĩtaĩ bero! A nga pai ho kpakara foro susi te.” (Yeremaya 32:17) Wa duhe nga Mbori nambakadi kpotosende na agu ahe du rogoho dunduko, rẽhe arẽ tie ani gumba gupai nga ko ima ino gupai ka ko mangihe tipa aboro raki rogo zereda na ngbabase.—Atambuahe 37:11; 115:16.

Ono wai gu tie Mbori nika ye na gi ariapai re? Ka si du nga oni natingidaha, gu ue kekeapai du dagba gi tangaratangara kekeapai re agumba gupai nga agi agberango namanga rogo zegino awere re nayugo gupai nga ani rogo “digida rago.” Yesu agumba gupai nga: “Ho oni ka bi agi apai ni re si da, oni ini he ya ga Mbori ngbi mbedi.” (Matayo 24:3; Ruka 21:31) Gu Kindo nga ga Mbori nga gu zogarago du ngbangbaturũ yo kina ko asigiraha nika manga bakere ariapai auru kpotosende, na ki rugusi agu agberango a namanga. Wa vura duhe nga ome kina ti Mbori ka manga gipai re, ko asiaha fu wiriko tipa ko mangihe. Gu nebi nangia Daniere afura tipa gi Wiri Mbori re ki yaa: “I aasia pa zogarago fu ko na taarimo na ngbi, ya aboro dunduko, na arikaaboro, na ngbatunga aboro na afugoyo mangi pa ko.”—Daniere 7:14.

Gu Wiri Mbori nga Yesu Kristo, i ima fu gu ome fuko rengbe ko ka mangasunge nani tipa ka manga ariapai auru kpotosende ki saha niwene ba tipa aboro raki rogoho na ngbarago. Agarã wa akutu ue kusayo, ho Yesu adu ni auru kpotosende, ko ayuguhe nga ko na pagbia beko kurii agu ahe nga ga kpotosende. Ti kura regbo sa ho ko adu ni na gako abawiriki rogo kurungba ri gu Baime nga Gariraya, “bayuge ki niya, ime ki nisungbura ku kurungba yo, si ki du wa kurungba nikahi ahi awere.” Gako abawiriki adu na bakere gunde. Bambiko i aaidanga ka kpi te, i azingisi Yesu. Ginipai ko amangihe fuo zinga ko? Ko “ki za yuge, ki ya fu baime, ‘Mo zéredi, ki ru zaa!’ Yuge ki kiti, rago ki zeredi azereda.” Gako abawiriki agunde agunde gbe, ki ya dagbayo, “Da du re, yuge agia sangbani na baime a?”—Marako 4:37-41.

Natona ti gu regbo Yesu aga ku ngbangbaturũ ka da ku awere, Mbori afu bakere pagbia fuko na ome. Wa du ko ni Bakindo ga Mbori Kindo, ko du du na gu tindiro gbiati rengba beko nga ga manga ariapai nga gu rengbe ka sa aboro i raki rogo zereda zanga gberango ti kuriyo auru kpotosende ane.

Ono tie, a wa ani nabihe, gu dungu fudifudiapai na agberango namanga, bakerehe namanga mbiko gu mangaapai nga ga aira ngbaduse. Ginipai ga Mbori Kindo nika mangaha na ngbatunga agu aboro aidanga ka manga ariapai re ya? Ziazia Kekeapai nafura tipa gupai Yesu nika mangaha niyaa: “Gbia Yesu ngbangbaturũ yo na amaraika gako tandu ni mirã we. Ko aíra bape fu agu yo aina nga Mbori ya, na agu yo agia nga sangba wene pangbanga nga ga gaani Gbia Yesu ya.” Nirengo, ko nika “gbarasa agu yo nagbarasa kpotosende.”—2 ATesaroniko 1:7, 8; Yugoti 11:18.

Tifuoho, gi “Bakindo ri abakindo” re nikadu na ome kurii ahe dunduko auru kpotosende. (Yugoti 19:16) Ko nika sa gupai nga ka agu aboro ko azoga yó mbunga berewe be agu agberango re ya. Ko nika mangasunge na gako ome tipa ka sa gupai nga agu aome nga ga zegino naamangasunge ngba wene gene tipa kaa undo aboro. Sangbana gi gako zogarago re nika ngia gupai Yekova akidoho bakuru kusayo ki yaa: “Si du mi afú gaoni mai ti regbo ho, sende ki nizugasi zuzuhe, angua ati yo azúka zuzuhe.” (Pa Amotumo 26:4) Aboro nika dudua gayo abambu zanga gunde nga gu gberango naye be gu mangaapai nga ga ome zegino nika gbarasaha kusayo, Ziazia Kekeapai nayaa: “I adúdua abambu ki niraki rogo; i arũka bakakue aati yo ki niri zuzuhe.”—Yesaya 65:21.

Ginipai Si Aida Oni Mangihe?

Zanga kapa, oni wakina gu kura aboro nga aguyo naida ka raka rogo gu zegino agu agberango naye be gu mangaapai nga ga ome zegino nikaa dunga rogoyo ya. Ono ginipai tie si aida oni mangihe tipa kadu yo? Wa duhe nga “agu yo aina nga Mbori ya,” na “agu yo agia nga sangba wene pangbanga nga ga gaani Gbia Yesu ya,” i arakanga rogo gu kpotosende re te, si ziazia nga si naida boro wirikipai awere tipa Mbori na ki songodi gako mbakadapai tipa zogarago auru kpotosende. Mbori naida gupai nga ani iniko na ki gisangba gu wene pangbanga nga ga Kindo nga gu ko nasigiraha vurube Wiriko yo.

Gu wene gene rengbe ani ka manga gipai re ngbaha nga wisigo Ziazia Kekeapai. Ziazia Kekeapai nagumba agu apai furani rengbe ani ka mangaha tipa ka rẽ ka raka tii gu zogarago nga ga ga Mbori Kindo. Si angba gbe ka oni sana boro sa dagba aDezire Yekova tipa ní undo roni oni wiriki gupai Ziazia Kekeapai ayugoho. I ti aregbo dunduko tipa ka undo roni oni wirikipai tipa Mbori. Ka oni mangi ome tipa ka ino Mbori na ki gisangba gu wene pangbanga nga ga Kindo, gupai gumba yó ho rogo Asanza 1:33, si daada nirengo furoni, i gumba gupai yo nga: “Ono gu boro nikadega tuni kono du mi ni, ni aráka ni bandabanda ni, ki du zezeredi zanga gunde be gbigbitapai.”