Tipagine si Aida Rago Ngba Tiro ti ni na Ziazia Kekeapai?

Ziazia Kekeapai nga gu buku zegino nabaha naima inoho. Tipagine? Mbiko pai sa nga, si taata tipa ka gbiaha. Si na ndikidi apangbanga rogoho tipa aboro na wai i amangaapai dagba tiyo na Mbori gbiati akurayo. Agi apangbanga re nayugo agu apai rengbe ka undo rani na si rogo taata afugoyo na i ima rengba ka saha ku rogo akama afugo na aboro dunduko ki rengbe arengba ka giarogoyo rogo arago dũ. Agu arugute du rogoho naundo aundo ti aregbo dũ.

Gu nyakipaha gbe nga, anga Ziazia Kekeapai nga gu buku nafura gbua tipa Mbori te, ono si aye beko. Si nayugo rimo Mbori, asinoko, na gu gako ringbisapai du tipa kpotosende na aboro. Si nape gu kuru pangbanga du tipa wai Satana adigi nisovura na Yekova tipa gbanga regbo. Na wai Yekova nika yugo Satana ni iraziree na wai ko nika dia gbegberẽ apai kusayo. Ka ani ageda Ziazia Kekeapai na berã rani ni zakizakihe, si rengbe ka sarani ani du na idapase gbiati maabangirise.

Ani arengbanga ka gbia agu apai du rogo Ziazia Kekeapai rogo gu kura ba te. Ni kpiapai, si nape rengo furani tipa agi apai du re nga:

• Gu ba ani aenge rogoho na ndu gupai ani arungo ti ni

• Gupai Mbori amangihe tipa ka batasa aboro

• Gupai Yesu amangihe furani

• Gupai du ku mbatayo tipa kpotosende na aboro

Si adu ni wenepai ka mo di regbo ka wisigo gu kekeapai naye fuo gere na ki bi agu apangbanga du rogo Ziazia Kekeapai.