Mbori Amangi Mbakadapai Tipa ka Batasa Aboro

Mbori akido gu ruru kumba nangia Abarayama ki ya gu ‘tita dee’ i pepa ko ko nika ye dagba ngbatungako yo. Rogo koyo du, “arikaaboro zegino dunduko” nika gbia amaku. (Bambata Pai 22:18) Tita Abarayama nangia Yakoba aga ku Ezipeta yo, yo du gako aborokporo adani ni gu rikaaboro nangia aYisaraere.

Kusa Ezipeta yo, gu kere boro nangia Faro asa aYisaraere ni akanga da kinaho Mbori ayeni na gu nebi nangia Moize ko kusi yó kusayo rogo gu ringara re. Ko akusiyo ngba iiriwo gene rogo Zamba Baime. Fuoho, Mbori afu andiko fu aYisaraere nga gu nakoda Agu Andiko Naadu Bawe, tipa si ngbe fuyo ku mbatayo na ki bandayo. Agu andiko re afura a tipa fu agu amotumo si aidaha tipa Mbori mbupai fuyo ti aingapai. Mbori aya fu Moize ko ya fuyo wẽ ko nika keda kura nebi fuyo. Si adunga gu nebi re ni kangia gu ‘tita dee’ i akido pako.

Fuo 400 agarã kusa, Mbori akido Bakindo Davide ki ya gu ‘tita dee’ i apepa ko Edene yo re, nika zogarago kurii gu kindo nika nyeanye kindi. Si adu nga ko ni kangia gu Masiya Mbori asiako ko batasi aboro na ki karaga Paradizo ku auru kpotosende.

Mbori ayugu dungu apai tipa Masiya rogo Davide na kura anebi. I ape gupai nga ko nika du ni boro umbasitise na kidu na weneringise, na rogo gako zogarago gomoro, iraira mangaapai, na avura nika digo adigo. Aboro dunduko nika du na zereda dagbatiyo na anya a. Kaza, rungo, na kpio nika go kusayo mbiko si angianga ga Mbori ringbisapai te, na agu aboro naima kpiko nika zinga be kpio.

Gu nebi nangia Mika ape aya i nika batika Masiya Betereme yo na Daniere ki ya i aimo ko aimo. Ono si adu nga Mbori nika zingisako azingisa be kpio na ki moiko ni Bakindo ngbangbaturũ yo. Daniere abi gupai a nga ga Masiya Kindo nika diaba kura azogarago dunduko nyeanye kindi. Ya mo Masiya aye wa i agumbapai ni sangbanebi?

​—Mburu agi apai re rii Bambata Pai kapita 22-50, kodihe na Gate, Pa Fu Rugute ni Ue he, 2 Samuere, Atambuahe, Yesaya, Daniere, Mika, Zakaraya 9:9.