Oni du na Wingbaduse wa Sadoka

1-2. Da nangia Sadoka? (1 Pekapai 2:22, 26-28)

MO MOINGO kpia gipai re kuriro yo. Bange aboro niima susa 340,000 dunguratiyo ka maa Davide ni bakindo kurii aYisaraere dunduko. Tipa aˈuru biata, agu aboro re sungu rogo gu ringara abaagangara du mbembedi na Eburone. I namoma, kini fura, na kini bi abia ngbarago nga ga sambuohe fu Yekova. (1 Peka 12:39) Paranga gu du dagba gu dungu aboro re du rimoko nga Sadoka. Dungu aboro arengbanga ka bi ko te. Ono tie, Yekova aima bi Sadoka na ko kini idi gupai nga ani ini gupai nga ko adu kina yo. (Oni gedi 1 Pekapai 12:22, 26-28.) Da du nangia Sadoka?

² Sadoka angia boromotumo namangisunge mbembedi na gu Gbiamotumo nangia Abiatara. Mbori afu bakere tatamana a fu Sadoka na gu tandu nga ga rugatiko na gupai Ko akpinyemuhe. (2 Sam. 15:27) Aboro anaasana Sadoka tipa gu wene arugute nga ga tatamana ho i anaaida na undo ni. Ko angia gu kumba a naadu na wingbaduse. Rogo gi kekeapai re, ani nika wirika wai Sadoka ayugu wingbaduse.

3. (a) Tipagine si aida airisi Yekova du ti ni na wingbaduse? (b) Ginipai ani nika sakapai tipaha rogo gi kekeapai re?

³ Rogo gi yangara arame re, Satana namanga bakere asadatise susi gu nidu mbata tipa ka gbarasa gaani idapase kuti Yekova. (1 Pet. 5:8) Si naida ani du na wingbaduse daho Yekova nika dia Satana ni kusayo na gako gbegberẽ sino mangaapai. (Tam. 31:24) Ani bingo agene biata rengbe ani ka wirika ga Sadoka wingbaduse ngbaha.

ONI SONGODI GA MBORI KINDO

4. Tipagine si aida aboro du ti ni na wingbaduse tipa ka songoda ga Mbori Kindo? (Oni bi sura a.)

⁴ Wangia ani ga Yekova aboro, ani nasongoda ga Mbori Kindo na kpotorani yo dunduko, ono dedede, si naaida aida ani du na wingbaduse tipa ka mangaha wo. (Mt. 6:33) Ni kpiapai, rogo gi gbegberẽ zegino re, si naida ani du na wingbaduse tipa ka raka ringbisihe kuti ga Yekova arugute, na kini tungusi gu wene pangbanga nga ga Kindo. (1 Tesa. 2:2) Na berewe a, zegino ima du na bakere kparakaro rogoho mbiko agu apai nga ga birĩ-zogarago. Sidu, ani naida na wingbaduse tipa ka zanga ngbe na kura birĩ-zogarago watadu kaa tikango tipaha. (Yo. 18:36) Dungu ga Yekova aboro ima gbiatiyo na agu akpakarapai nga ga zingo marã, watadu i ima ta yo, watadu ka ba yo ku bambukiso yo mbiko i amanganga agu apai nga ga birĩ-zogarago watadu ka rimo sunge abanzengere te.

5. Tipagine Sadoka aaida na wingbaduse ti ni tipa ka undo Davide?

⁵ Anga gu yangarapai Sadoka andu ti ni ku Eburone yo nga ka manga pumbo pa maa Davide ni bakindo te. Ko adi gako aũvura na kidu regerege tipa ka sovura. (1 Peka 12:38) Ko aima du na nyemu ka ndu na Davide tipa sovura na ka banda aYisaraere be avurayo. Sadoka aarengbanga kadu na inohe tipa sovura wa banzengere te. Ono ko angia gu kumba naadu na bakere wingbaduse.

6. Waigu Davide amoi wene kpiapai nga ga wingbaduse fu Sadoka ko pekefuoho? (Atambuahe 138:3)

⁶ Wari gu boromotumo wa Sadoka awiriki wai ni kadu na bakere wingbaduse? Ko aima ino dungu agu akumba naadu na ome na kidu na wingbaduse. Zanga kapa, ko aima gbia undo ti gayo kpiapai. Ni kpiapai, mbiko gupai nga Davide adu ni gu bangbembatayo nadu na bakere wingbaduse na ki ngia bawene basovura, aYisaraere dunduko naaida ka maa ko ni bakindo. (1 Peka 11:1, 2) Davide anaakido kuti Yekova ti aregbo dunduko tipa undo be avurako. (Tam. 28:7; oni gedi Atambuahe 138:3.) Sadoka aima wirikapai a be gu kura akumba naadu na wingbaduse​—akumba wa Yoyada gbiati wiriko nangia Benaya nangia kere basovura gbiati agu akumba nadu dagba agu angbatunga yo naadu 22 naundo Davide. (1 Peka 11:22-25; 12:26-28) Agi akumba re dunduko aima diaberã tipa ka maa Davide ni gayo bakindo na ka bandako.

7. (a) Gini akpiapai du ti gi gaani regbo re nga ga wingbaduse rengbe ani ka wirikapai ti ni? (b) Ginipai oni awirikaha ti gu kpiapai nga ga Wiriba Nsilu, a wa i nayuguhe rogo vidio?

⁷ Ho ani aberã ni kuriipa wai kura aboro ayugo wingbaduse tipa ka nye ni ruruyo fu Yekova gbiati gako Kindo, si nafõngbadurani yo ani du na wingbaduse a. Ho gaani Bakindo nga Kristo Yesu adu ni auru kpotosende, ko aima ká gupai nyanyaki nga kadu ni papara gu birĩ-zogarago nga ga gi zegino nga ga Satana re. (Mt. 4:8-11; Yo. 6:14, 15) Ko anaakido kuti Yekova ti aregbo dunduko tipa ome. Vuru agi aregbo yo ninaasusa barambeda kusayo re, ani ima du a na dungu akpiapai nga ga agu aparanga akumba ká ka rimo sunge abanzengere watadu ka manga agu apai nga ga birĩ-zogarago. Isoke mo ima rengba ka gedapai tipa gayo akpiapai rogo jw.org.a

ONI UNDO AWIRINARONI

8. Ti gini regbo si narengbe ka ida abaakumba du na wingbaduse tipa ka undo awirinayo?

⁸ Ga Yekova aboro ima kpinyemu undo akurayo. (2 Kor. 8:4) Ono ti kura aregbo, si naida aida na wingbaduse tipa ka mangaha wo. Ni kpiapai, ho du vura ni, agu abaakumba du rogo gu dagbarago re nabi gupai nga awirinayo naida na ngarasaro, undo, isoke gbiati agu ahe nga ga toro na ga borose. Abaakumba ima kpinyemu awirinayo. Si du nga ndu gupai i afu agu ahe ti ni fuyo du yo na zingoho, zavura ho si naima rengba kadu ni ni kere kpakarakpakaraha ka mangaha wo. (Yo. 15:12, 13) Ho i amanga gipai re ni, i nawirika gu kpiapai nga ga wingbaduse nangia ga Sadoka.

9. A wa i napehe rogo 2 Samuere 15:27-29, ginipai Davide aya fu Sadoka ko mangihe? (Oni bi sura a.)

⁹ Ga Davide raka adu ngba kerepai. Wiriko nangia Abisaroma aima diaberã ka dĩ mbatabakindo be ko. (2 Sam. 15:12, 13) Si aaida Davide guari Yerusarema yo niipo! Ko aya fu gako amoyambu wẽ: “Oni gúari, ani óro; bambiko ka si adú nga wo ya ani abáta nga be Abisaroma wa sa te!” (2 Sam. 15:14) Wa ga Davide amoyambu aguari ka ndu, ko abi gupai nga si naida boro nye anye Yerusarema yo tipa ka ino dungu apai tipa gupai Abisaroma aaberãpa mangaha. Sidu, Davide akaraga Sadoka na gu kura aboromotumo ku Yerusarema yo tipa i naamangasunge ni abamoirago. (Oni gedi 2 Samuere 15:27-29.) Si aaida i du na bakere rubangirise. Si aima kpakara ni kerehe tipa kaa maa Abisaroma. Mo berẽnga gupai ka Abisaroma amangi Sadoka gbiati kura aboromotumo na ni nangia gu kumba nangia boro zuu na ni boro gbangbati re ka ko aini gupai nga i angia abamoirago tipa ka banda Davide!

10. Waigu Sadoka na agu aboro ko adu na yo abanda Davide?

¹⁰ Davide asana Sadoka gbiati gu kura ruru bakureako nangia Usai i undo na gupai ka ko mangihe. (2 Sam. 15:32-37) Usai amangi tiko nga ko nasongoda Abisaroma na kini fu rugute fuko tipa wai ka zubo Davide nga gupai naundo Davide ko mbakadi tiko tipa zubohe. Ho Abisaroma adegetuko ni kuti gupai Usai apehe, Usai ape gupai fu Sadoka gbiati Abiatara nga gu namangi. (2 Sam. 17:8-16) Agi akumba naadu ue re adu na rengba ka keda aboro i ndu ka pe gupai re fu Davide. (2 Sam. 17:17) Na ga Yekova aundo, Sadoka gbiati gu kura aboromotumo re aima undo ka banda Davide be kerepai.​—2 Sam. 17:21, 22.

11. Waigu rengbe ani ka wirika ga Sadoka wingbaduse ho ani aundo awirinarani ni?

¹¹ Waigu rengbe ani kadu na wingbaduse wakina Sadoka ho du awirinarani ni rogo kerepai na i kini idi na gaani undo? (1) Ani pekefuo rugapai. Rogo ngbatunga apai wa gure, si naida ani nye ni kodikodi rani. Ani mangipai kuti agu arugapai naye be gu be-basunge du rogo gaani dagbarago. (Eb. 13:17) Si naida abaakumba ninaafugö agu arugapai dedede du tipa wai ka mbakadatise tipa gberãngo na gupai si aida boro mangihe ho du gberãngo ni. (1 Kor. 14:33, 40) (2) Ani du na wingbaduse ono kidu na rubangirise. (Snz. 22:3) Mo berẽ mbata fu mo mangipai. Mo nibanda tiro wa rengbehe. (3) Ani kido kuti Yekova. Mo tingidi gupai nga, Yekova naida gupai nga mo gbiati awirinamo du ni bandabanda roni. Ko ima rengba ka undo ro tipa mo undo awirinamo wenengai.

12-13. Ginipai oni awirikaha ti ga Viktor na Vitalii kpiapai? (Oni bi sura a.)

¹² Oni bingo gu kpiapai nga ga Viktor na Vitalii, nga awirina ue nga ga toro yo namangisunge tipa ka ndu na riahe gbiati ime fu akurayo aidipase ku Ukraine yo. Viktor aya, “Ani angere tipa riahe rogo aba dunduko. Dedede, ani anaagia woro bundu pati rani. Gu kura wirina sa afu riahe ni gamahe rogo gako baigo ahe. Gi gamahe re asa dungu abatungusipai i du na guhe beyo si aaidaha tipa raka tipa bete regbo. Ho ani aamaa ahe ni ku rogo gaani tarambiri, bombu ati baturoho adu gbua na ani nga ametere 20 (dagbandue 66). Rogo gu uru re naabaha, mi azungodi Yekova ko fu gu wingbaduse fere mi aaidaha tipa kaa ndu kindi kumbatayo kaa undo abatungusipai.”

¹³ Vitalii aya, “Si aaida na bakere wingbaduse. Gu bambata nduge mi andu he adi re na asaa nga 12. Mi amangi kparakpee fu Yekova bangirigene rogo gu uru re dunduko.” Vitalii adu na wingbaduse ono ko aima du a na rubangirise. Ko agbia kurapai kuti ni nga: “Mi aandu kindi kumbatayo kaa sana Yekova tipa tatamana gbiati umbasitise. Mi aazubo kina tigu bangiri gene airangbii aidipaha. Gimi idapase anyaki ho mi abi wai ni awirina aamangasunge kina sa. I arogo ahe kusayo bangirigene, kini dungura ariahe, aroko, gbiati kura nyanyakipa ahe na kini moihe ku rogo tarambiri na ki fu riahe fere na Viktor ani rihe gbiati ba tipa ka ongoda rogoho bangirigene.”

ONI NYE NIRURU RONI FU YEKOVA

14. Gini sangbanapai rengbe kadu kurirani ka gu boro ani nakpinyemu ni mbu Yekova?

¹⁴ Asada sa dagba gu kpakarakpakara aasada yo rengbe ani ka gbiatirani na ni nga ho gaani borokporo watadu mbembedi bakurearani ambu Yekova ni. (Tam. 78:40; Snz. 24:10) Ka si du nga ani ima kpinyemu gu boro re gbe, si nika du a ni kere kpakarakpakaraha furani ani hi gupai re. Ga Sadoka kpiapai nga ga du ni ruruse ima rengba ka nyakasa ro.

15. Tipagine Sadoka aaida na wingbaduse ti ni tipa ka nye ni ruruko fu Yekova? (1 Abakindo 1:5-8)

¹⁵ Sadoka anye ni ruruko fu Yekova ho mbembedi bakureako nangia Abiatara asia ka zanga du ni ni ruruko. Gipai re amangi ti digido gu zogarago nangia ga Davide. Ho Davide adu ni ni gbinza ko na kini mbedi ka kpi, wiriko nangia Adoniya aasadi ka maa tiko ni bakindo si ki vura du vurũ nga Yekova aaida Soromo du ni bakindo. (1 Peka 22:9, 10) Abiatara asia ka songoda Adoniya. (Oni gedi 1 Abakindo 1:5-8.) Ni manga Abiatara gipai re, ko aazanganga du sa ni ruruko fu kina Davide te ono zavura fu Yekova a! Mo berẽnga pa wai Sadoka adu na gberãrago. Tipa agarã naima susa 40, ko na Abiatara amangisunge kina sa mbembedi ni aboromotumo. (2 Sam. 8:17) I angerafuo “ga Mbori sanduki” kina sa. (2 Sam. 15:29) I dunduko ue aima songoda Davide ni gayo bakindo na ki mangi dungu kura apai ti ngba ga Yekova sunge.​—2 Sam. 19:11-14.

16. Ginipai narengbe ka undo Sadoka ko nye ni ruruko?

¹⁶ Sadoka anye ni ruruko fu Yekova si ki vura du vurũ nga Abiatara amangi kura siapai kia. Davide aima ino gupai nga ko ima rengba ka kido kuti Sadoka ti aregbo dunduko. Ho ga Adoniya taburo akuru ni ku yangura, Davide asia Sadoka, Natana, na Benaya i moi Soromo ni bakindo. (1 Aba. 1:32-34) Sadoka aima gbia ngarasaro ti agu akpiapai nga ga kura airisi Yekova, be boro wa Natana naadu ni ruruko a fu Yekova na ki songodi Davide. (1 Aba. 1:38, 39) Ho Soromo ada ni ni bakindo, ko “ki moi Sadoka nangia boromotumo ku ba Abiatara.”​—1 Aba. 2:35.

17. Waigu rengbe mo ka wirika Sadoka ka gu boro du mbembedi na mo basasangba Yekova?

¹⁷ Waigu rengbe mo ka wirika Sadoka? Ka si du nga gu boro mo akpinyemu ni sia ka mbu Yekova, mo yugu gupai fu Yekova nga mo sia kadu niruru ro fuko. (Yos. 24:15) Yekova nika fu gu ome na gu wingbaduse foro mo aidaha. Mo kido kutiko rogo kparakpee yo na ki nye mbembedi na agu abakureamo du ni ruruyo fu Yekova. Yekova nabi gamo padu ni ruruse na nyanyakipaha na ko nika fu mosoro afu foro tipaha.​—2 Sam. 22:26.

18. Ginipai mo nawirikihe ti gu kpiapai nga ga Marco na Sidse?

¹⁸ Oni bingo gu kpiapai nga ga Marco na diako nga, Sidse, awiriyo ue ni adegude adiberã ka mbu iriso Yekova. Marco aya: “Ti kina gu uru mo avunga awiro, mo naye ka kpinyemu yo ni bakerehe gbe. Mo rengbe ka manga ai pai tipa ka banda yo be kerepai. Sidu, ho i asia ka mbu Yekova ni, si nga kere pa gberãrago.” Ko andu kumbatayo kindi ka pe gupai nga: “Ono Yekova aima digo ni undo rani ani hipai. Ko aima undo rani ani naanyakasa tirani dagba tirani. Ho du mi ni na gberãrago tipa gupai namangi re, diare ni naafu wasa fere na kini ngarasi re mi mangi gupai du ni ruruhe, na ho du ri ni a na gberãrago, mi namanga kina gu bangisapai re.” Sidse agbia kurapai kuti ni nga: “Ka ani adunga na rengba ka hipai te ka Yekova aafunga gu ome furani ani aaidaha ya. Mi adu na bakere gberãrago na mi kini bihe nga gimi ingahe du ngaha nga awire ambu iriso Yekova. Tingbafuo regbo ngbutuko, wirina si aima dia dungu agarã ka mi abingo ri ya aye fuore, ri aba beri pagore, ki ngere ku bangire yo, na ki pe gupai nga: ‘Sidse, mo tingidi gupai nga, gamo ingahe nga ni te!’ Mbiko ga Yekova undo, mi ima du na rengba ka banda gimi ngbarago ti ngba irisoko.”

19. Ginipai mo nadiberã ka mangaha?

¹⁹ Yekova naida airisiko dunduko du na wingbaduse wakina Sadoka. (2 Tim. 1:7) Ono tie, ko aidanga ani du na kido kina kuti gaani ome te. Ko naida ani kido kutiko. Sidu, ka mo gbiatiro rogo gupai yo nga gu naida mo du na wingbaduse, mo sana Yekova. Mo ima rengba kadu na gu kido nga, ko nika sa gupai asa nga mo du na wingbaduse kina wai Sadoka adu na ni!​—1 Pet. 5:10.