Ukuphela Kwencithakalo
Ngumlobeli we-Phaphama! eBrithani
“Ingxenye yomhlaba eyodwa kwezintathu iye yabhujiswa imisebenzi yabantu eminyakeni engu-25 edlule.”
IBIKA kanjalo i-World Wide Fund for Nature. Lesi sibalo esishaqisayo sembulwa lapho kukhululwa uHlu Lwezinto Eziphila Kule Planethi, okuwukuhlaziywa okusha kwezibalo eziphathelene nomhlaba nendalo ephila kuwo.
Abalondolozi bemvelo babika ukuncipha ngamaphesenti ayishumi kwezindawo ezinamahlathi zale planethi. Kodwa lesi sibalo sifihla ukuncipha okukhulu kukho kokubili amahlathi emvula asezindaweni ezishisayo namahlathi asezindaweni ezomile, kungasaphathwa ukulahlekelwa yizinhlobo ezithile zezilwane nezitshalo, mhlawumbe okungaphezu kwamaphesenti ayishumi, kuphawula iphephandaba laseLondon i-Independent. Endalweni ephila emanzini kuye kwalahleka amaphesenti angu-30, okubonakala ngokuncipha kwezinhlobo zezinhlanzi ezinjenge-bluefin tuna e-Atlantic nofudu olunomhlane wesikhumba ezilwandlekazini zase-Asia. Okubi nakakhulu ukuncipha ngamaphesenti angu-50 koHlu Lwesimiso Sezinto Eziphila Emifuleni, okubangelwa ngokuyinhloko ukwanda kokungcola okubangelwa ezolimo nezimboni kanye nokusetshenziswa kakhulu kwamanzi.
“Ukulondolozwa kwezinto eziphilayo nokuzizungezile akuyona into engase yenziwe ngabacebile kuphela,” kuphawula uSir Ghillian Prance, umqondisi we-Royal Botanical Gardens eKew, eLondon, eNgilandi, “kodwa kuyadingeka ukuze kuqinisekiswe ukunakekelwa kwemisebenzi ebalulekile yezinto eziphilayo nokuzizungezile kule planethi yethu njengoba sonke sincike kuyo ukuze sisinde.” Yilowo nalowo ohlala kule planethi uhilelekile. Khona-ke lingatholakala kanjani ikhambi le mbulunga yonke elihlala njalo?
Ngokuthakazelisayo, incwadi yokugcina yeBhayibheli, isAmbulo, ibhekisela kulabo abachitha umhlaba. Ibikezela ngesikhathi lapho abanjalo beyochithwa khona. (IsAmbulo 11:18) Ingabe bakhona abayosinda? Yebo, ngoba lokhu kuyokwenzeka ngokungenela “kukaJehova uNkulunkulu, uMninimandla onke,” okunguyena kuphela ongaxazulula izinkinga zomhlaba nendalo ephila kuwo futhi onamandla okukwenza. (IsAmbulo 11:17) IsAmbulo 21:3 sichaza isikhathi lapho uNkulunkulu ‘eyohlala khona nesintu, futhi sibe abantu bakhe.’
Ungaba kanjani omunye ‘wabantu bakhe’ futhi ube nethemba lokubona lapho kuqedwa ukuwohloka komhlaba nendalo ephila kuwo osukwini lwethu? Sicela uthintane noFakazi BakaJehova endaweni yangakini ngokubhalela kwelinye lamakheli asekhasini 5. Noma uxoxe nabo ngesikhathi esizayo uma bevakashele kini. Bayokujabulela ukukusiza ukuba ufunde okwengeziwe ngalokho ongakwenza khona manje ukuze ube ukulungele lapho uNkulunkulu engenela ngokushesha.