Lapho Uhlaselwa Yinkinga Yempilo

“Ngezwa sengathi ngishaywe ngesando ekhanda.”—UJohn, ngemva kokuzwa ukuthi unesifo esikhubazayo.

“Ngangethukile.”—UBeth, ngemva kokuqaphela ububi benkinga yakhe yempilo.

UKUZWA ukuthi unesifo esingalapheki nesibangela ukukhubazeka noma ukuthi amanxeba engozi azokushiya ukhubazeke unomphela kuphakathi kwezinto ezibuhlungu kakhulu ekuphileni. Kungakhathaliseki ukuthi utshelwa ngesifo esikuphethe ngudokotela noma ubhekana nesimo sakho sokukhubazeka egumbini lezimo eziphuthumayo esibhedlela, cishe uyokuthola kunzima ukukukholelwa. Akukho lutho ekuphileni olungakulungiselela ukubhekana nemizwelo enamandla oba nayo lapho uphazanyiswa yisimo sempilo esikhungathekisayo.

Ukuze iqongelele ukwaziswa okungase kube usizo kulabo abaye babhekana nokuwohloka kwesimo sabo sempilo muva nje, i-Phaphama! yakhuluma nedlanzana labantu emazweni ahlukene asebeneminyaka eminingi bebhekene ngokuphumelelayo nesifo esingalapheki esibangela ukukhubazeka. Bacelwa ukuba banikeze umbono wabo emibuzweni enjengokuthi: Wazizwa kanjani? Yini eyakusiza ukuba ubhekane nalesi simo esinzima ukwazi ukululama futhi? Wathatha ziphi izinyathelo zokuqondisa ukuphila kwakho futhi? Ulwazi oluye lwatholakala kulezi zingxoxo kanye neminye imiphumela etholwe abacwaningi abahlola imiphumela yezifo zesikhathi eside kunikezwa ngokwenzuzo yalabo ababhekene nesimo esibucayi sempilo manje.a

[Umbhalo waphansi]