Phila Ukuphila Okulula Nokokulinganisela
UKUPHILA ukuphila okulula nokokulinganisela kuvuza ngempela. Kodwa kuhilelani? Okokuqala, kungase kudingeke ucabange ngezinto eziza kuqala kuwe. Ungakwenza kanjani lokhu?
Zibuze: ‘Yiziphi izinto esengizifinyelele okwamanje? Yiziphi okusafanele ngizifinyelele? Bhala imigomo yakho eyinhloko ngezansi:
1. ․․․․․
2. ․․․․․
3. ․․․․․
Namuhla abantu abaningi banombono wesikhashana ngokuphila, ngokuthanda izinto ezibonakalayo. Eqinisweni, bathi: “Masidle siphuze, ngoba kusasa sizokufa.” (1 Korinte 15:32) Bakholelwa ukuthi ukusebenzela ukuba nezinto namuhla yikhona okwenza ukuphila kube mnandi. Nokho, iBhayibheli liyaphikisana nalo mbono.
Komunye wemifanekiso yakhe, uJesu wakhuluma ngendoda eyaqongelela izinto kanti izokufa ngaphambi kokuba izijabulele. “Kunjalo ngomuntu oziqongelelela umcebo kodwa engacebile kuNkulunkulu.” (Luka 12:16-21) Ingabe le ndoda yenza kabi ngokusebenza kanzima ukuze izinakekele? Cha akunjalo. Inkinga yayiwukuthi yayigxile kakhulu ezintweni zayo ezibonakalayo. Yamshiya ngaphandle uNkulunkulu ezinhlelweni zayo. Ngenxa yalokho, yonke ingcebo yayo—konke eyayikusebenzele—kwakungeke ngempela kuyizuzise ngokuhamba kwesikhathi. Yeka inhlekelele!—UmShumayeli 2:17-21; Mathewu 16:26.
Ngokuphambene nalokho, uJesu usimema ukuba sisebenzele umvuzo waphakade. Uyanxusa: “Ningasebenzeli ukudla okushabalalayo, kodwa ukudla okuhlalayo kube ukuphila okuphakade.” (Johane 6:27) Ekuqaleni wayethe: “UNkulunkulu walithanda izwe kangangokuba waze wanikela ngeNdodana yakhe ezelwe yodwa, ukuze wonke umuntu obonisa ukholo kuyo angabhubhi kodwa abe nokuphila okuphakade.” (Johane 3:16) Yeka umvuzo omangalisayo!
Ungakunqoba Kanjani Ukukhathazeka?
UJesu wakuqaphela ukuthi umuntu uthambekele ekukhathazekeni ngezinto ezibonakalayo. Ngakho, wakhuthaza abafundi bakhe: “Yekani ukufuna lokho eningakudla nalokho eningakuphuza, futhi yekani ukuhlala nikhathazekile; ngoba konke lokhu kuyizinto izizwe zomhlaba eziziphishekela ngokulangazela, kodwa uYihlo uyazi ukuthi niyazidinga lezi zinto. Noma kunjalo, funani njalo umbuso wakhe, khona-ke lezi zinto niyonezelwa zona.”—Luka 12:29-31.
Lawo mazwi aqinisekisayo aye akhuthaza amaKristu amaningi ukuba enze ukuphila kwawo kube lula. UJuliet ohlala eMalaysia, uyalandisa: “Umsebenzi wami wawungishiya ngikhathele futhi ngikhungathekile. Ngakho mina nomyeni wami sathandaza kuJehova simcela ukuba asisize senze ukuphila kwethu kube lula. Wasiphendula ngokushesha. Ingakapheli nenyanga, ngathola itoho lokufundisa abantwana abakhubazekile.” USteve owayenenkontilaka yokufulela e-Australia, wenza ushintsho emsebenzini wakhe ukuze abe nesikhathi esengeziwe sezinto ezingokomoya nomkhaya wakhe. Umkakhe, uMaureen uyachaza: “Ujabule kakhudlwana manje, nathi ngokufanayo. Izingane ziyakuthanda lokho! Nami futhi! Uma ugcina ukuphila kulula, umkhaya wakho wonke uyojabula.”
Nokho, uma ulahlekelwe umsebenzi futhi sekuseduze ukuba ulahlekelwe yindlu, ukulandela iseluleko sikaJesu kudinga ukholo olukhulu. Noma kunjalo, ngokubeka izinto ezingokomoya kuqala ekuphileni kwakho nokuthembela kuNkulunkulu, ungakwazi ukuphila ukuphila okulula nokokulinganisela. Ukwenza kanjalo kuyokusiza ufinyelele “ukuphila kwangempela”—ukuphila okuphakade ezweni elisha likaNkulunkulu lokulunga, lapho yonke imisebenzi iyobe ijabulisa futhi ungekho umshikashika oyobe uyize.—1 Thimothewu 6:17-19; Isaya 65:21-23.
Ungathanda ukufunda okwengeziwe ‘ngokuphila kwangempela’ okuthenjiswa iBhayibheli? Uma kunjalo, xhumana noFakazi BakaJehova bangakini, noma ubhalele ekhelini elifanele kwasekhasini 5 lalo magazini.
[Amazwi acashunwe esihlokweni ekhasini 9]
Ezweni elisha likaNkulunkulu, wonke umsebenzi uyobe ujabulisa futhi wanelisa
[Ibhokisi ekhasini 8]
UNGAKWAZI YINI UKUVULA UMSEBENZI NGAPHANDLE KWEKHAYA?
Nakhu ukusikisela okungasiza ezingxenyeni ezithile zomhlaba phakathi nenkathi yokuntuleka kwemisebenzi:
● Ukugada indlu (lapho abantu behambe ngomsebenzi noma beseholidini futhi befuna ukugadelwa indlu yabo)
● Ukuhlanza: izitolo; amahhovisi; izindlu namafulethi asanda kwakhiwa, ngemva komlilo, ngemva kokuthutha kwabantu; umsebenzi wasendlini (emizini yabantu); amafasitela (ezindaweni zamabhizinisi nasemakhaya)
● Ukulungisa: amabhayisikili; izinto ezisebenza ngogesi ezinhlobonhlobo (imitapo yezincwadi inezincwadi ezineziqondiso ezilula “zezindlela zokulungisa izinto”)
● Imisebenzi yezandla: ukwakha izindlu zamapulangwe; ukwakha amakhabethe, iminyango, ovulandi; ukupenda; ukubiya; ukufulela
● Umsebenzi wokulima: ukutshala ukudla, ukukha izithelo, ukuvuna
● Ukulungisa nokunakekela izitshalo zasendlini: emahhovisi, emabhange, ezindaweni zokwamukela izivakashi, ezikhungweni zezitolo, nezindawo ezingamaphasishi
● Ukunakekela izakhiwo: ukuzihlanza, ukuba umphathi (ngezinye izikhathi kuhlanganisa nendawo yokuhlala mahhala)
● Ukufaka ukhaphethe namapulangwe aphansi, ukuhlanza
● Ukudiliva iphepha (okungenziwa abadala nabancane) nezinye izinto: izikhangiso, izincwadi zezikweleti zikamasipala
● Ukuthutha impahla, ukuyigcina
● Ukulungisa igceke, ukuncwela izihlahla, ukunakekela utshani, ukugawula imithi
● Ukushayela ibhasi lesikole
● Ukuthatha izithombe (zabantu nezemibuthano yomphakathi)
● Ukuthengisela abadobi ukudla kokudoba
● Ukushintshana ngomsebenzi: ukwenana ukukhandelwa imoto ngokwenza umsebenzi kagesi, ukuthunga ngokulungisa amapayipi amanzi
Ukuze uthole ukwaziswa okwengeziwe ngalokhu, bheka i-Phaphama! ka-March 8, 1996, amakhasi 3-11.
[Ibhokisi/Isithombe ekhasini 9]
IZINDLELA ZOKUVULA UMSEBENZI EKHAYA
Hlola lokho okudingekayo endaweni yakini. Buza omakhelwane. Thatha isinyathelo kuqala.
● Ukuba umzanyana
● Ukuthengisa imifino noma izimbali ezitshalwe ekhaya; iziphuzo ezenziwe ngezithelo
● Ukuthunga, ukulungisa nokuchibiyela izingubo
● Ukubamba amatoho ezimbonini
● Ukubhaka nokupheka ukudla
● Ukuhlobisa izindwangu, ukukhilosha, ukunitha; ukufekethisa, ukubumba; neminye imisebenzi
● Ukuthunga izihlalo
● Ukugcina amabhuku ezimali, ukubhala ngomshini, nemisebenzi ye-computer eyenzelwa ekhaya
● Umsebenzi wokuphendula izingcingo
● Ukucwala izinwele
● Ukuqashisa ngendawo
● Ukubhala amakheli nokufaka izincwadi ezimvilophini zabakhangisi
● Ukugeza nokupholisha izimoto (ikhasimende liletha imoto kwakho)
● Ukucwala nokufundisa izilwane ezifuywayo ukuzivocavoca
● Ukulungisa nokwenza okhiye (usebenzele kwakho)
Phawula: Eminingi yale misebenzi ephawulwe ngenhla izikhangiso zayo zingafakwa mahhala noma ngemali ephansi emaphepheni angezimpelasonto noma emabhodini ezaziso ezitolo ezinkulu.