IZWE LIGCWELE IZIYALUYALU

1 | Vikela Impilo Yakho

OKWENZA KUBALULEKE

Izinhlekelele zingadala umonakalo omkhulu ezimpilweni zabantu ngezindlela ezihlukahlukene.

Ubunzima bushiya abantu abaningi becindezelekile, kanti ukucindezeleka isikhathi eside kungabenza bagule.
Izinhlekelele zenza kube nzima ukuba izibhedlela zinakekele kahle abantu abagulayo ngoba kumelwe zinakekele abantu abaningi abagula ngesikhathi esisodwa futhi ingase ingabi khona imithi eyanele yokubanakekela.
Izinhlekelele zenza abantu bangabi nayo imali yokukhokhela izinto abazidingayo njengokudla okunempilo nemithi.

Okufanele Ukwazi

Ukugula kakhulu nokucindezeleka engqondweni kungakwenza wenze izinqumo ezingahlakaniphile, okungenza kube nzima ukuba uyinakekele kahle impilo yakho. Ekugcineni, ugula nakakhulu.
Uma ungenzi okuthile ukuze unakekele impilo yakho, isimo singaba sibi nakakhulu ngisho nokuphila kwakho kungaba sengozini.
Uma uwumqemane, uyokulungela kangcono ukwenza izinqumo ezinhle lapho kuneziyaluyalu.
Noma ngabe izimo zakho zezomnotho zimi kanjani, kukhona ongakwenza ukuze unakekele impilo yakho.

Ongakwenza Manje

Umuntu ohlakaniphile uyacabanga ngezingozi ezingase zibe khona bese enza okuthile ukuze azigweme. Lokhu kuyasebenza nasekunakekeleni impilo yakho. Ungazinciphisa izifo noma ububi bazo uma uzigcina uhlanzekile wena nomuzi wakho. Kungcono ukusigwema isifo kunokuselapha.

“Uma sizigcina sihlanzekile kanye nendawo esihlala kuyo, sinciphisa izindleko zokuyobona udokotela nezokuthenga imithi.”—U-Andreas.a

a Amanye amagama akulo magazini ashintshiwe.

UNGAZIVIKELA KANJANI?—Izinto Ezingaba Wusizo

Phakathi nezikhathi zeziyaluyalu, vikela impilo yakho ngokwenza lezi zinto

YIBA OHLANZEKILE

Yiba ohlanzekile

IBhayibheli lithi: “Onokuqonda uyayibona ingozi acashe.” (IzAga 22:3) Cabanga ngezinto ezingase zibe wusongo empilweni yakho bese uyazigwema.

Zigeze njalo izindla zakho ngensipho nangamanzi, ikakhulukazi ngaphambi kokuthinta ukudla noma ngemva kokusebenzisa ithoyilethi.
Yihlanze njalo indlu yakho futhi usebenzise isibulala magciwane, ikakhulukazi izindawo nezinto ozithinta njalo.
Gwema ukusondelana nabantu abanesifo esithelelanayo.

YIDLA UKUDLA OKUNEMPILO

Yidla ukudla okunempilo

IBhayibheli lithi: “Akekho umuntu owake wazonda umzimba wakhe, kodwa uyawondla futhi awuphathe kahle.” (Efesu 5:29) Uma sikuqapha lokho esikufaka emizimbeni yethu sisuke sibonisa ukuthi siyazithanda.

Phuza amanzi amaningi.
Yidla izithelo nemifino enhlobonhlobo.
Ungakudli kakhulu ukudla okunosawoti, amafutha noshukela.
Ungawubhemi ugwayi noma izidakamizwa, ungabuphuzi kakhulu utshwala futhi ungawasebenzisi kabi amaphilisi.

“Ukuze sigweme ukugula, sidla ukudla okunempilo; ngale kwalokho, imali yethu encane esiyiholayo ibiyophelela kodokotela. Sibona kungcono ukusebenzisa imali yethu ekuthengeni ukudla okunempilo.”—UCarlos.

ZIVOCAVOCE FUTHI UPHUMULE NGOKWANELE

Zivocavoce

IBhayibheli lithi: “Kungcono ukuphumula okuncane kunomsebenzi onzima omningi nokugijimisa umoya.” (UmShumayeli 4:6) Siyakudinga ukusebenza kodwa futhi siyakudinga nokuphumula.

Vocavoca umzimba njalo. Ungaqala ngokulula izinyawo. Ukunyakazisa umzimba kungenza impilo yakho ibe ngcono ngisho ngabe umdala, ukhubazekile noma unezifo ezingamahlala khona.
Phumula ngokwanele

Phumula ngokwanele. Uma ungaphumuli ngokwanele ungase ucindezeleke kakhulu futhi ungakwazi ukugxilisa ingqondo. Ngokuhamba kwesikhathi, ungaba nezinkinga ezinkulu zempilo.
Nquma ukuthi yisiphi isikhathi ozolala ngaso bese unamathela kuso. Lala ngesikhathi esifanayo futhi uvuke ngesikhathi esifanayo nsuku-zonke.
Gwema ukubukela i-TV noma ukusebenzisa ezobuchwepheshe usembhedeni.
Gwema iziphuzo ezine-caffeine notshwala nokudla kakhulu ngaphambi kokuba uyolala.

“Ngithole ukuthi uma ngingalali ngokwanele ngiyagula. Ngezinye izikhathi ngiphathwa yikhanda, umzimba ube buhlungu. Kodwa uma ngilala ngokwanele ngiba namandla okwenza noma yini edingekayo! Umfutho ubuzwa kimi futhi angigulaguli.”—UJustin.