IZWE LIGCWELE IZIYALUYALU

4 | Vikela Ithemba Lakho

OKWENZA KUBALULEKE

Ukukhathazeka okubangelwa iziyaluyalu ezigcwele emhlabeni kungenza abantu bacindezeleke emzimbeni nangokomzwelo. Abaningi abacindezeleke ngale ndlela abanathemba. Babe sebenzenjani?

Abanye abafuni nokucabanga ngekusasa.
Abanye bazinikela otshwaleni nasezidakamizweni bezama ukuqeda izinkinga zabo.
Abambalwa bathi kungcono ukufa kunokuphila. Bathi: “Ngisaphilelani nje?”

Okufanele Ukwazi

Ezinye izinkinga onazo kungenzeka ezesikhashana futhi izimo zingaba ngcono kungalindelekile.
Ngisho noma isimo obhekene naso singashintshi, zikhona izinto ongazenza ukuze ukwazi ukusikhuthazelela.
IBhayibheli lisinikeza ithemba langempela—isixazululo sezinkinga zabantu esiyohlala unomphela.

Ongakwenza Manje

IBhayibheli lithi: “Ningalokothi nikhathazeke ngosuku olulandelayo, ngoba usuku olulandelayo luyoba nezalo izinkathazo. Usuku ngalunye lunezalo izinkinga.”—Mathewu 6:34.

Naka izinkinga zosuku ngalunye. Ungakhathazeki kakhulu ngekusasa uze ungabe usakwazi ukwenza izinto okudingeka uzenze namuhla.

Ukukhathazeka ngezinto ezimbi ezingase zenzeke kungakwenza ucindezeleke futhi uphelelwe yithemba lokuthi izimo ziyoke zibe ngcono.

UNGAZIVIKELA KANJANI?—Izinto Ezingakusiza

GXILA KOKUHLE

IBhayibheli lithi: “Zonke izinsuku zohluphekile zimbi, kodwa onenhliziyo ejabulayo uhlale enedili.” (IzAga 15:15) Uma ugxila kakhulu ezinkingeni onazo, ungase ungakwazi ukubona ukuthi sikhona isixazululo. Ngokuphambene nalokho, ukugxila kokuhle kungakusiza ucabange ngezindlela zokulungisa isimo.

Nciphisa isikhathi osichitha ubuka izindaba.
Ekupheleni kosuku ngalunye, bhala phansi okubili noma okuthathu obonga ngakho.
Yenza uhlu lwezinto okumelwe uzenze, ubhale kuphela lokho ozokwenza ngalolo suku. Lapho kunomsebenzi omningi okudingeka uwenze, wuhlukanise uwenze kancane kancane ukuze ukwazi ukubona ukuthi kungakanani okufezile ekupheleni kosuku.

THOLA USIZO KWABANYE

IBhayibheli lithi: “Noma ubani ozihlukanisayo . . . wenqaba konke ukuhlakanipha okuwusizo.” (IzAga 18:1) Angeke ukwazi ukuzikhipha obishini, udinga usizo ukuze ukwazi ukuphuma.

Cela usizo kubangani noma emalungwini omndeni.
Nawe bheka izindlela ongabasiza ngazo. Ukwenzela abanye izinto kungakusiza ungagxili kakhulu ezinkingeni zakho.
Uma usulahle ithemba usufisa nokufa, cabangela ukuthola usizo kodokotela. Ngezinye izikhathi ukukhathazeka kakhulu kuwuphawu lokuthi kukhona okungahambi kahle empilweni yakho, mhlawumbe unesifo sokucindezeleka. Abantu abaningi baye bathola usizo ngokuthola ukwelashwa.a

a Alukho uhlobo lwezokwelashwa olukhuthazwa yile Phaphama!

IBhayibheli Lisinika Ithemba Langempela

Umhubi wasendulo ethandaza kuNkulunkulu wathi: “Izwi lakho liyisibani esiqondisa izinyathelo zami, nokukhanya okukhanyisa indlela yami.” (IHubo 119:105) IZwi likaNkulunkulu—iBhayibheli—liyilokho kanye.

Ebusuku, isibani sisisiza sibone lapho sihamba khona. Ngendlela efanayo, iBhayibheli linokuhlakanipha okungasisiza, kusiqondise lapho senza izinqumo ezinzima.

Isibani singakhanyisa indlela yethu, sisisize sikwazi ukubona ukuthi khonani le phambili. Ngendlela efanayo, iBhayibheli lingasisiza sikwazi ukubona ukuthi ikusasa lisiphatheleni.

IBhayibheli liyincwadi engcwele engagcini nje ngokusitshela ngokuthi abantu bavelaphi kodwa esinika nethemba langempela ngekusasa. Nayi eminye imibuzo eliyiphendulayo:

Kanjani?

Lichaza ukuthi kwaqala kanjani ukuhlupheka, iBhayibheli lithi: “Ngomuntu oyedwa isono sangena ezweni nokufa kwangena ngesono, ngaleyo ndlela ukufa kwasakazekela kubantu bonke ngenxa yokuthi bonke bonile.”—Roma 5:12.

Kungani?

Lichaza ukuthi kungani ukubusa komuntu kuye kwahluleka ukulungisa izinkinga zethu, iBhayibheli lithi: “Akalinikiwe igunya ngisho nelokuqondisa isinyathelo sakhe.” (Jeremiya 10:23) Izinkinga ezigcwele emhlabeni zibonisa ukuthi lokho okwashiwo yilo mbhalo kuyiqiniso.

Yini?

Lichaza ukuthi yini uNkulunkulu azoyenza ukuze alungise umonakalo, iBhayibheli lithi: “Uyosula zonke izinyembezi emehlweni abo, ukufa ngeke kusaba khona, noma ukulila noma ukukhala noma ubuhlungu ngeke kusaba khona.”—IsAmbulo 21:4.