Abamemezeli BoMbuso Bayabika
Ukuphikelela Ekuthunyweni Kwabo Kwaphezulu
OFAKAZI BAKAJEHOVA bakuthatha ngokungathi sína ukuthunywa kwabo kwaphezulu kokushumayela izindaba ezinhle zoMbuso kaNkulunkulu. (1 Korinte 9:16; IzEnzo 20:26, 27) Umbhangqwana waseFrance wezwa amandla ashukumisayo alokhu kuthunywa ukuze ufinyelele bonke ngezindaba ezinhle. Ensimini yawo kwakunehostela elaligcina ababaleki bezombangazwe nezisebenzi ezisencane zakwamanye amazwe. Umbhangqwana uyachaza: “Sasingazi ukuthi singangena kanjani ngaphakathi ngaphandle kokuthi simenywe othile owayehlala khona. Ngakho sanquma ukuthintana nabantu ngaphandle futhi mhlawumbe sithole isimemo sokuba sibavakashele ngaphakathi. Insizwa eyabamukela ngentshiseko omagazini yacela futhi ukuba ivakashelwe.
“Sayivakashela lensizwa, futhi kwaqaliswa isifundo ngokushesha. Isikhathi ngasinye umngane wayo wayeba khona, kodwa lomngane wayengasho lutho. Lapho, ekupheleni kwesifundo sesibili, simbuza ukuthi wayengathanda yini naye ukufunda okwengeziwe ngeZwi likaNkulunkulu, waphendula: ‘Ngingavinjwa yini?’ Ngakho kwaqaliswa isifundo sesibili. Sabamemela emhlanganweni zisuka nje, futhi abakaze baphuthe nakowodwa kusukela lapho. Intuthuko yabo yayisobala kakhulu, ikakhulukazi ehostela, lapho ngokushesha baqala ukukhuluma ngezinto ababezifunda, okwaphumela ekuqalisweni kwesifundo sesithathu nombhangqwana othile. Ngolunye usuku lonke iqembu lalimi esangweni, lilungele ukuya emhlanganweni, lapho omunye umngane enquma ukuhamba nalo. Wayehlabeke umxhwele kakhulu futhi wafuna ukuba isoka lakhe lazi konke ngakho. Bobabili baqalisa ukutadisha.
“Kuze kube yilesosikhathi kwase kuqhutshwa izifundo ezinhlanu. Ngasinye sasifana nomhlangano! Bonke babebakhona esifundweni somunye nomunye, futhi kwahlanganyela nabasha. Bonke babekhuluma ngeqiniso, futhi ngenxa yalokho, kwaqaliswa isifundo sesithupha nenye indoda, nayo eyaqala ukuba khona emhlanganweni futhi yafakaza entombini yayo.
“Yebo, konke lokhu kwakuwubufakazi obumangalisayo ehostela. Kwakungelula ngalabantu abasha ukuba bembathe ubuntu obusha. Kwakufanele banqobe ukubhema, ukuluthwa utshwala, ubudlova, ukuziphatha okubi, nabangane ababi. USathane waqikelela ukuba abangane babo bangaphambili bazame ukuphazamisa intuthuko yabo, bebayengela ekubhemeni noma babe namaphathi anokuxokozela. Omunye wamadoda athakazelayo wayethembise enye intombazane eyayingeyenkolo ethile. Yazama ukumsusa eqinisweni. Nokho, kamuva yaqala ukutadisha futhi kusukela ngalesosikhathi iye yathuthuka kahle.
“Ngokwezindaba zamuva nje,” kubika umbhangqwana, “enye yezinsizwa yaya ejele ngenxa yokuma kwayo kokungathathi-hlangothi. Esikhathini esingaphansi konyaka, abanye abayisithupha babhapathizwa, abahlanu babo bangenela ngokushesha inkonzo yamaphayona asizayo. Kulo lonke iqembu, abayisithupha manje bangamaphayona avamile, benomgomo womsebenzi wamaphayona akhethekile.”
Yeka indlela lombhangqwana owavuzwa ngokucebile ngayo ngokuphikelela kwawo ekufezeni ukuthunywa kwawo kwaphezulu kokufuna abanjengezimvu! UJehova ngokuqinisekile wayibusisa imizamo yawo yokwethembeka. Nakuba singenakukwazi ukuba nokuhlangenwe nakho okuvelele kanjalo, ngaso sonke isikhathi sifuna ukufeza ukuthunywa kwethu kwaphezulu kokushumayela izindaba ezinhle zoMbuso.—Mathewu 24:14.
[Isithombe ekhasini 21]
Umbhangqwana wamaphayona avamile ayisithupha eFrance