Imibuzo Evela Kubafundi
◼ Yisiphi iseluleko esiyisisekelo esinikezwa yizAga 27:23 kubelusi abangokomoya kanye nakwamanye amaKristu ewonke?
Lelivesi lifundeka kanje: “Yazi nokwazi ukuma kwezimvu zakho, ubeke inhliziyo yakho emihlambini yakho.” (IzAga 27:23) Ngokuvamile lombhalo uye wasetshenziselwa ukukhuthaza abelusi abangokomoya ukuba babonise isithakazelo esimweni samaKristu asebandleni nasezinkingeni zawo futhi bajwayelane nakho. Isikhuthazo esinjalo sifanelekile, ngoba iBhayibheli lifanisa abadala nabelusi bese kuthi ibandla lilifanisa nomhlambi wezimvu. (IzEnzo 20:28, 29; 1 Petru 5:2-4) Nokho, nakuba isimiso esingenhla sisebenza, lelivesi ngokuyisisekelo alikhulumi ngabelusi abangokomoya.
Incwadi yezAga iqukethe amavesi amaningi azimele wodwa njengezinkulumo ezifingqiwe zokweluleka, kodwa IzAga 27:23 ziyingxenye yeqoqo lamavesi athi: “Yazi nokwazi ukuma kwezimvu zakho, ubeke inhliziyo yakho emihlambini yakho. Ngokuba ingcebo ayiyikuhlala kuze kube-phakade; umqhele uyahlala izizukulwane ngezizukulwane na? Lapho utshani bumuka, nohlaza lubonakala, nemifino yezintaba ibuthwa, kukhona izimvu zokuba wembathe, nezimpongo ukuba zibe-yintengo yomhlaba. Kuyakuba-khona ubisi lwezimbuzi olwanele ukudla kwakho nokudla kwendlu yakho, nokuphila kwamantombazana akho.”—IzAga 27:23-27.
Lendima ephefumlelwe itusa ukuba nendlela yokuphila yenkuthalo, elula, nokuqaphela ukuthi sincike kuJehova. Lokhu ikwenza ngokuqokomisa ukuphila kokwelusa komalusi ongumIsrayeli, mhlawumbe ikuqhathanisa nokuphila kokuba matasa okunemicikilisho okusekelwe ekuhwebelaneni kwezebhizinisi nasengcebweni etholakala ngokushesha.
“Ingcebo” ezuzwa ngemisebenzi yebhizinisi esheshayo, kanye nokuvelela (“umqhele”) okuba umphumela, kunganyamalala ngokushesha, njengoba abaningi bengakufakazela lokho. Ngakho kuningi okungashiwo ngokuphila okulula, okunjengalokho okwakuphilwa abelusi basendulo lapho benakekela imfuyo. Leyondlela yokuphila akukhona ukuthi yayilula ngomqondo wokunganaki. Umalusi kwakudingeka awunake umhlambi wakhe, aqiniseke ukuthi izimvu zivikelekile. (IHubo 23:4) Uma, lapho ezinakekela, ethola imvu egulayo noma elimele, wayengase ayigcobe ngamafutha adambisayo. (IHubo 23:5; Hezekeli 34:4; Zakariya 11:16) Ngokuvamile umalusi okhuthele obeka inhliziyo yakhe emhlanjini wakhe wayeyoyibona imizamo yakhe iba nemiphumela—ukwanda kancane kancane komhlambi wakhe.
Umalusi okhuthele nonakekelayo wayenomthombo onokwethenjelwa wosizo—uJehova. Kanjani? Nokho, uNkulunkulu unikeza izinkathi zonyaka nezinguquko zazo ngokuvamile okuphumela ekubeni khona kotshani obuningi obungadliwa umhlambi. (IHubo 145:16) Lapho, ngenxa yokushitsha kwezinkathi zonyaka, utshani obuluhlaza buphela ezindaweni ezisezansi, kungenzeka bube buningi ezindaweni eziphakeme, lapho umalusi onakekelayo engaziyisa khona izilwane zakhe.
IzAga 27:26, 27 zikhuluma ngomunye umphumela womsebenzi onjalo—ukudla nezambatho. Kuyavunywa, akuchazwa ukudla okuyizibiliboco okutholakala kalula noma kwekhethelo, futhi isisebenzi asinikezwa isizathu sokulindela ukugqoka izingubo eziyisitayela samuva esikhangiswa umklami wezingubo odumile noma ezenziwe ngendwangu engcono kunazo zonke. Kodwa uma ayezimisele ukwenza umzamo, umalusi nomkhaya wakhe babengathola ubisi emhlanjini (kanjalo noshizi), kanye noboya bezimvu bokwaluka izingubo eziyinguga.
Ngakho iseluleko esithi: “Yazi nokwazi ukuma kwezimvu zakho” asisona ngokuyinhloko esababonisi abangokomoya; singesawo wonke amaKristu. Sigcizelela ukubaluleka kokuba saneliswe ukudla nezambatho okutholakala ngomsebenzi wokungaphamazeli nowenkuthalo, sinethemba lokuthi uNkulunkulu ngeke asishiye. (IHubo 37:25; 2 Thesalonika 3:8, 12; Heberu 13:5) Uma siqhathanisa IzAga 27:23-27 neseluleko esikuLuka 12:15-21 nesikweyoku-1 Thimothewu 6:6-11, siyabona indlela iseluleko sikaNkulunkulu esiye saba ngesingaguquki ngayo kulendaba. Ngakho ngamunye wethu angafunda IzAga 27:23-27 ephindelela, ezibuza, ‘Ingabe ngiyakulalela lokhu futhi ngiyakusebenzisa ekuphileni kwami kwansuku zonke?’
[Umthombo Wesithombe ekhasini 30]
Pictorial Archive (Near Eastern History) Est.