Indaba Yokuphila

Sasizimisele Ukufeza Inkonzo Yethu

ILANDISWA ULENA DAVISON

“Angisaboni emehlweni, angisaboni,” kusho umshayeli wendiza ngezwi elinensayo. Ngemva kwesikhashana, sabona izandla zakhe ziyeka izinkinobho zokushayela indiza-mshini encane esasiyigibele, waqulekela esihlalweni sakhe. Umyeni wami, owayengenalo noluncane ulwazi lokushayela indiza, watatazela ezama ukumvusa. Ngaphambi kokuba nginixoxele ngendlela esasinda ngayo kukubi, ake ngiqale nginixoxele ngokwasenza sibe kuleyo ndiza eyayinqamula ePapua New Guinea ecezile.

NGAZALELWA e-Australia ngo-1929 futhi ngakhulela eSydney, idolobha laseNew South Wales. Ubaba, uBill Muscat wayeyiKhomanisi, okuyinto exakayo ngoba wayekholelwa kuNkulunkulu. Ngo-1938 waze wavuma nokusayina isicelo sezwe lonke sokuba uJoseph F. Rutherford, owayevela endlunkulu yoFakazi BakaJehova, avunyelwe ukushumayela eHholo Ledolobha LaseSydney.

Ubaba wathi kithi: “Kumelwe ukuba kukhona okubalulekile asiphathele kona.” Saze sathola ngemva kweminyaka engu-8 ukuthi inkulumo yakhe yayiquketheni ngempela. Ubaba wacela uNorman Bellotti, isikhonzi esiyiphayona lesikhathi esigcwele esinguFakazi kaJehova, ukuba eze ekhaya kuzoxoxwa ngeBhayibheli. Abasekhaya balamukela ngokushesha iqiniso leBhayibheli futhi kungakabiphi baba matasa kakhulu enkonzweni yobuKristu.

Maphakathi nawo-1940, ngayeka esikoleni ukuze ngisize umama ngoba wayexhwalile. Ngangithunga nezingubo zokugqoka ukuze ngithole imali. NgeMigqibelo kusihlwa, mina nodadewethu uRose sasihamba neqembu lamaphayona siyoshumayela emgwaqweni ngaphandle kweHholo Ledolobha LaseSydney. Ngo-1952, umfowethu omdala, uJohn, wathweswa iziqu esikoleni saseGileyadi sezithunywa zevangeli e-United States futhi wabelwa ePakistan. Nami ngangiyithanda inkonzo futhi ngangifuna ukulingisa isibonelo sakhe. Ngakho ngonyaka olandelayo ngaba iphayona elivamile.

Umshado Nenkonzo Yezithunywa Zevangeli

Kungakabiphi, ngahlangana noJohn Davison, owayesebenza ehhovisi legatsha loFakazi BakaJehova lase-Australia. Ukuba kwakhe umuntu othobekile, oziphethe kahle futhi ozimiselayo kodwa ongazigabisi kwangihlaba umxhwele. Phakathi neMpi Yezwe II wayeboshwe izikhathi ezintathu ngenxa yokungathathi-hlangothi njengomKristu. Sanquma ukwenza inkonzo yobuKristu ibe umsebenzi esasizowenza ukuphila kwethu konke.

Mina noJohn sashada ngo-June 1955. Sathenga ibhasi sihlose ukulishintsha libe umahamba-nendlwana wethu. Umgomo wethu kwakuwukulisebenzisela ukushumayela ezindaweni ezicezile zase-Australia. Ngonyaka olandelayo kwakhishwa isicelo sokuba oFakazi abangase bakwazi bathuthele eNew Guinea, ingxenye esenyakatho-mpumalanga yesiqhingi esikhulu esisenyakatho ye-Australia.a Izindaba zoMbuso zazingakaze zishunyayelwe kule ngxenye yomhlaba. Asichithanga sikhathi, savolontiya ukuya lapho.

Ngaleso sikhathi, umuntu wayengangena eNew Guinea kuphela uma ezosebenza isikhathi esigcwele, ngakho uJohn waqala ukufuna umsebenzi. Ngokushesha nje wathola umsebenzi efektri yamapulangwe eNew Britain, isiqhingi esincane nakakhulu esiyingxenye yeNew Guinea. Ngemva kwamasonto ambalwa saya esabelweni sethu esisha, safika eRabaul, eNew Britain, ngo-July 1956. Sahlala lapho izinsuku eziyisithupha silinde umkhumbi ozosiyisa eWaterfall Bay.

Inkonzo Yethu EWaterfall Bay

Ngemva kwezinsukwana sisolwandle olugubhayo, safika eWaterfall Bay, itheku elikhulu eliqhele ngamakhilomitha angu-240 eningizimu yeRabaul. Kwakukhona ifektri enkulu yamapulangwe ehlathini. Kusihlwa ngalolo suku ngesikhathi zonke izisebenzi zidla, ophethe wathi, “Ngingaze ngikhohlwe, Mnumzane nawe Nkosikazi Davison, kuwumthetho wale nkampani ukuba zonke izisebenzi zisho ukuthi zisontaphi.”

Sasiqiniseka ukuthi wawungekho umthetho onjalo, kodwa njengoba sasiwenqabile ugwayi, kusobala ukuthi kukhona ababekusola. Noma kunjalo, uJohn waphendula, “SingoFakazi BakaJehova.” Kwathula du. La madoda ayekade eseMpini Yezwe II futhi ayengabathandi oFakazi ngenxa yokuthi abazange bahlanganyele empini. Kusukela ngaleso sikhathi, la madoda afuna amathuba okwenza ukuphila kwethu kube nzima.

Kwaqala umphathi, wenqaba ukusinikeza isiqandisi nesitofu, nakuba sasinelungelo lokukuthola. Ukudla kwethu kwabola futhi saphoqeleka ukupheka esitofini esingasebenzi kahle esasithola ehlathini. Kwathi sisaxakwe yilokho, abantu bendawo benqatshelwa ukusithengisela izilimo ngakho sasidla noma yiziphi izilimo esasizithola. Sabizwa nangokuthi siyizinhloli futhi sasihlale sigadiwe ukuthi asifundisi muntu yini ngeBhayibheli. Kwathi kusenjalo ngaphathwa umalaleveva.

Naphezu kwalezo zimo, sasizimisele ukufeza inkonzo yethu. Ngakho sacela ezinye izinsizwa zomdabu esasisebenza nazo ezazikwazi ukukhuluma isiNgisi ukuba zisifundise isiPidgin saseMelanesia, ulimi olukhulunywa kulelo zwe. Thina sabe sesizifundisa iBhayibheli. Ngezimpelasonto sasilihamba impela izwe senze sengathi sibuka ubuhle balo. Ngobuhlakani, sasibe sesishumayeza abantu bendawo esasibathola endleleni; abantu esasibafundela iBhayibheli babesihumushela. Sasiwela imifula enemisinga enamandla nenezingwenya ezinkulu owawuzibona zithamele isigcaki osebeni lomfula. Zazingavamile bandla ukusihlupha, ngaphandle kwesikhathi esisodwa, kodwa sakwazi ukubaleka.

Ukwenza Amathuluzi Okufundisa

Njengoba umsebenzi wethu wawanda, sanquma ukubhala ngomshini izintshumayelo zeBhayibheli ezilula sizisakaze kubantu abanesithakazelo. Abantu esasibafundela iBhayibheli efektri basisiza sahumusha ezokuqala. Sasichitha ubusuku obuningi sibhala amapheshana amaningi ngomshini bese siwasakaza kubantu bendawo nakwabasebenza ezikebheni ezazidlula.

Ngo-1957, uJohn Cutforth, isikhonzi esijikelezayo esingumakad’ ebona, wasivakashela futhi wasikhuthaza.b Wasikisela ukuthi ukusebenzisa izithombe kungaba indlela ephumelela kakhulu yokufundisa iqiniso leBhayibheli kubantu abangakwazi ukufunda. Yena nomyeni wami benza izithombe eziningana ezilula futhi badweba imifanekiso yabantu eyayizosisiza ekuchazeni izimfundiso zeBhayibheli eziyisisekelo. Kamuva, sachitha amahora ngamahora sikopisha lezi zithombe ezishumayelayo ezincwadini zesikole zokubhala. Umuntu ngamunye esasimfundela iBhayibheli sasimnikeza ikhophi ayeyisebenzisela ukushumayeza abanye. Le ndlela yokufundisa yagcina isisetshenziswa ezweni lonkana.

Ngemva kokuhlala eWaterfall Bay iminyaka emibili nengxenye savunyelwa ukuba izakhamuzi ngoba sase siyiqedile iminyaka yokusebenza eyimfuneko. Ngakho samukela isicelo senkonzo yamaphayona akhethekile.

Ukubuyela ERabaul

Sangena emkhunjini saya enyakatho eRabaul, futhi salala eWide Bay epulazini le-copra (ukhukhunathi owomisiwe) no-cocoa. Abanikazi balelo pulazi, umbhangqwana osukhulile owawufuna ukuthatha umhlalaphansi bese ubuyela e-Australia, wacela uJohn ukuba aphathe ipulazi. Lo msebenzi wawukhanga kakhulu, kodwa lapho sixoxa ngale ndaba ngalobo busuku savumelana ngokuthi sasingazelanga ukuzogaya imali eNew Guinea. Sasizimisele ukufeza inkonzo yethu njengamaphayona. Ngakho, ngakusasa sazisa lo mbhangqwana ngesinqumo sethu sabe sesingena esikebheni.

Ngemva kokufika eRabaul, sajoyina iqembu elincane loFakazi elalivela kwamanye amazwe elalithuthele kule ndawo. Abantu bendawo babonisa isithakazelo esikhulu esigijimini soMbuso futhi saqala izifundo zeBhayibheli eziningi. Phakathi naleso sikhathi, sasiba nemihlangano yobuKristu ehholo lendawo esasiliqashile futhi kwakuba nabantu abangaba ngu-150. Abaningi babo balamukela iqiniso futhi basiza ekusakazeni izindaba ezinhle zoMbuso kaNkulunkulu kwezinye izingxenye zezwe.—Mathewu 24:14.

Saya naseVunabal, indawo eqhele ngamakhilomitha angaba ngu-50 ukusuka eRabaul, futhi kwaba neqembu labantu ababa nesithakazelo esikhulu eqinisweni leBhayibheli. Kungakabiphi umKatolika othile onethonya waqala ukuliqaphela leli qembu. Weza nabangane bakhe basesontweni, waphazamisa isifundo sethu seBhayibheli samasonto onke futhi wasixosha endaweni. Lapho sizwa ukuthi babezosihlupha nangesonto elilandelayo, sacela amaphoyisa ukuba asiphelezele.

Ngalolo suku ingxenye enkulu yomgwaqo yayikakwe amaKatolika ayesichapha. Amaningi ayezimisele nokusikhanda ngamatshe. Phakathi naleso sikhathi, umfundisi wayeseqoqe izinduna eziningi zendawo. Amaphoyisa asiqinisekisa ukuthi sinelungelo lokuqhuba umhlangano wethu, ngakho avula indlela phakathi kwesixuku. Nokho, kwathi nje lapho siqala umhlangano wethu, umfundisi wafaka isixuku umoya wobuhlanya. Amaphoyisa awakwazanga ukulawula lezi zidlamlilo; ngakho isikhulu samaphoyisa sasicela ukuba sihambe futhi ngokushesha sasiyisa emotweni yethu.

Isixuku sasingunga, sasithuka, sasithimisela futhi sasisikaza ngezinqindi kuyilapho umfundisi egoqe izandla emoyizela. Ngemva kokuba sisindile, isikhulu samaphoyisa savuma ukuthi sasiqala ukubona isimo esibi kanjeya. Nakuba iningi labantu baseVunabal lesatshiswa ubudlova balesiya sixuku, umfundi oyedwa weBhayibheli waba nesibindi wamelela iqiniso loMbuso. Kusukela ngaleso sikhathi, sekunamakhulu abanye abaye benza okufanayo kulo lonke elaseNew Britain.

INew Guinea Yamukela Izindaba Ezinhle

Ngo-November 1960, sashintsha isabelo saya eMadang, idolobha elikhulu elisogwini olusenyakatho yeNew Guinea, isiqhingi esiyinhloko. Kuleyo ndawo mina noJohn sanikezwa amathuba amaningi okusebenza isikhathi esigcwele. Enye inkampani yangincenga ukuba ngibe umphathi wesitolo sezingubo. Enye yayifuna ngilungise izingubo. Abesifazane abathile abayizifiki baze bathi bazongixhasa ngivule esami isitolo sezingubo. Njengoba sasingayikhohliwe imigomo yethu, ngomusa sayibonga yonke le misebenzi.—2 Thimothewu 2:4.

Insimu yaseMadang yayithela futhi kungakabiphi kwase kunebandla elikhulayo. Sasihamba ngezinyawo noma ngesithuthuthu siye ezindaweni ezisemaphandleni siyoshumayela izinsuku eziningana. Sasilala koguqa abangasahlalwa muntu, sendlale utshani esasibusika ehlathini. Ukuphela kwezinto esasiziphatha kwakuwukudla okugcinwe emathinini, amakhekhe angamaqebelengwane kanye nenetha lokuvikela omiyane.

Kolunye uhambo lwethu savakashela iqembu labantu ababenesithakazelo eTalidig, umuzana oqhele ngamakhilomitha angu-50 ukusuka enyakatho yeMadang. Njengoba iqembu lalithuthuka ngokomoya, uthishanhloko wesikole sendawo walenqabela ukutadisha iBhayibheli endaweni yomphakathi. Kamuva, wafaka amaphoyisa umoya omubi wokucekela phansi imizi yaleli qembu futhi alixosha layohlala ehlathini. Nokho, induna yendawo engumakhelwane yalivumela ukuba lihlale endaweni yalo. Ngokuhamba kwesikhathi, le nduna enomusa yamukela iqiniso leBhayibheli futhi kwakhiwa iHholo LoMbuso lesimanje kuleyo ndawo.

Umsebenzi Wokuhumusha Nokujikeleza

Safika eNew Britain ngo-1956, futhi ngemva nje kweminyaka emibili, mina noJohn sacelwa ukuba sihumushele izincwadi zeBhayibheli ezihlukahlukene olimini lwesiPidgin saseMelanesia. Lo msebenzi sawenza iminyaka eminingi. Ngo-1970, samenyelwa ehhovisi legatsha ePort Moresby, inhloko-dolobha yasePapua New Guinea, ukuze siyokhonza njengabahumushi besikhathi esigcwele. Saqhuba namakilasi okufundisa ulimi.

Ngo-1975 sabuyela eNew Britain enkonzweni yokujikeleza. Phakathi neminyaka engu-13 eyalandela sasihamba ngendiza, ngesikebhe, ngemoto noma ngezinyawo siya cishe kuzo zonke izingxenye zezwe. Ziningi izingozi esasinda kuzo, kuhlanganise nalena engiyichaze ekuqaleni kwalesi sihloko. Kuleso senzakalo, umshayeli wendiza esasihamba ngayo waquleka ephethwe isisu esibuhlungu kakhulu sesizofika esikhumulweni sezindiza esincane saseKandrian, eNew Britain. Njengoba indiza yayisiziqondisa sasilokhu sizungeza ngaphezu kwehlathi kuyilapho uJohn etatazela ezama ukuvusa umshayeli owayequlekile. Wagcina ephapheme, futhi amehlo akhe aphinde abona isikhashana. Wakwazi ukuyihlalisa nakuba yahlala kabuhlungu. Wabe esequleka futhi.

Kuvuleka Omunye Umnyango Wenkonzo

Ngo-1988 sabuye sabelwa ehhovisi legatsha ePort Moresby ukuze siyosiza emnyangweni wokuhumusha owawunesidingo esikhulayo. Sasicishe sibe ngu-50 esasihlala futhi sisebenza njengomkhaya egatsheni, futhi saqeqesha abahumushi abasha. Sonke sasihlala ezakhiweni ezinamakamelo amancane. Mina noJohn sanquma ukuba umnyango wekamelo lethu uhlale uvuliwe ukuze sikhuthaze amalungu omkhaya nezivakashi ukuba bangene sibazi kangcono. Ngakho sasondelana kakhulu nomkhaya futhi sakwazi ukubonisana uthando olukhulu futhi sasekelana.

Ngo-1993, uJohn wabulawa isifo senhliziyo. Kwaba sengathi kufe ingxenye ethile yami. Sase sishade iminyaka engu-38, futhi sonke leso sikhathi sasisichithe ndawonye enkonzweni. Noma kunjalo, ngangizimisele ukuqhubeka ngamandla kaJehova. (2 Korinte 4:7) Umnyango wekamelo lami wahlala uvulekile futhi abasebasha baqhubeka bengivakashela. Lobo budlelwane obakhayo bangisiza ukuba ngihlale nginombono oqondile.

Ngenxa yempilo yami eyayiqhubeka iwohloka, ngo-2003 ngabelwa ehhovisi legatsha eSydney, e-Australia. Namuhla ngineminyaka engu-77, futhi ngisasebenza isikhathi esigcwele eMnyangweni Wokuhumusha. Ngisematasa emsebenzini wokushumayela. Abangane nezingane zami ezingokomoya nabazukulu bangilethela injabulo.

Umnyango wekamelo lami eBethel ngisawushiya uvuliwe, futhi ngiba nezivakashi izinsuku eziningi. Empeleni uma umnyango wami uvaliwe, abantu bavame ukungqongqoza babuze ukuthi kwenzenjani. Uma nje ngisaphila, ngizohlala ngizimisele ukufeza inkonzo yami nokukhonza uNkulunkulu wami, uJehova.—2 Thimothewu 4:5.

[Imibhalo yaphansi]

[Ibalazwe ekhasini 18]

(Ukuze ubone ukuthi indaba ihlelwe kanjani, bheka encwadini)

I-NEW GUINEA

I-AUSTRALIA

ISydney

I-INDONESIA

IPAPUA NEW GUINEA

ITalidig

IMadang

IPORT MORESBY

I-NEW BRITAIN

IRabaul

IVunabal

I-Wide Bay

I-Waterfall Bay

[Umthombo]

Map and globe: Based on NASA/Visible Earth imagery

[Isithombe ekhasini 17]

NginoJohn emhlanganweni wesigodi eLae, eNew Guinea, ngo-1973

[Isithombe ekhasini 20]

Ngisegatsheni ePapua New Guinea, ngo-2002