Ukujabula ‘Ngokunqoba NeWundlu’
ENCWADINI ayibhala ngo-1971, uCarey W. Barber walandisa ngeminyaka yakhe yokuqala engu-50 ekhonza uNkulunkulu weqiniso: “Iminyaka engiyichithe ngikhonza uJehova iye yaba mnandi ngendlela emangalisayo. Ubudlelwane nabantu bakhe; ukuvikeleka kubenzi bokubi bezwe likaSathane; ithemba lokunqoba neWundlu uJesu Kristu nobufakazi bothando lukaJehova konke kuletha ukuthula okujabulisayo nokwaneliseka kwangaphakathi okulonda inhliziyo futhi kunginikeze ithemba eliqinisekile lokunqoba kokugcina.”
Ngemva kweminyaka eyisithupha ebhale la mazwi, uMfoweth’ uBarber, umKristu ogcotshwe ngomoya, waqala ukukhonza njengelungu leNdikimba Ebusayo YoFakazi BakaJehova. Phakathi neminyaka engu-30 eyalandela ekhonza kuleso sabelo waqhubeka ebheke phambili ‘ekunqobeni neWundlu.’ Wanqoba ngokuhlala ethembekile kwaze kwaba sekufeni kwakhe ngeSonto, ngo-April 8, 2007, eneminyaka engu-101 ubudala.—1 Korinte 15:57.
UCarey Barber wazalwa ngo-1905 eNgilandi, wabhapathizwa ngo-1921 eWinnipeg, eCanada. Ngemva kweminyaka emibili yena newele lakhe, uNorman, baya eBrooklyn, eNew York beyosiza emsebenzini othile omusha. Ngaleso sikhathi, abantu bakaJehova base bezoqala ukuzikhiqizela izincwadi zabo ababezozisebenzisela ukusakaza izindaba ezinhle zoMbuso “emhlabeni wonke owakhiwe.” (Mathewu 24:14) Omunye umsebenzi uMfoweth’ uBarber awenza ekuqaleni kwakuwukunyathelisa ngomshini omncane. Izitatimende ezibhalwe ngamafuphi zamacala ayedluliselwa eNkantolo Ephakeme Yase-United States zaziphakathi kwezinto ezanyatheliswa. Ngokuhamba kwesikhathi uMfoweth’ uBarber wasebenza eMnyango Wenkonzo, wagxila ezindabeni zamabandla nasemsebenzini wokushumayela kulo lonke izwe.
Enalolu lwazi, uMfoweth’ uBarber wayefaneleka kahle lapho ngo-1948 enikwa isabelo sokuba isikhonzi esijikelezayo, ehambela imihlangano namabandla kuyo yonke ingxenye esentshonalanga ye-United States. Wathi wayekujabulela ngokukhethekile ukuchitha isikhathi ngaphandle esemsebenzini wokushumayela. Isabelo sakhe senza abazalwane nodade abaningi bamazi uMfoweth’ uBarber. Ingqondo yakhe ephapheme nentshiseko yakhe ngenkonzo kwaba usizo kakhulu lapho kamuva eba sekilasini lama-26 lase-Watchtower Bible School of Gilead. Phakathi nesikole, wazana nomunye umfundi ovela eCanada, uSydney Lee Brewer. Ngemva kokuthola iziqu bashada futhi izinsuku zabo zokuqala zangemva komshado bazichitha besohambweni olufushane lokuyokhonza amabandla aseChicago, e-Illinois. UDade Barber waba umngane owusizo kakhulu futhi wamsekela njalo umyeni wakhe phakathi neminyaka engaphezu kuka-20 besemsebenzini wokujikeleza.
Abajwayela futhi bazi uMfoweth’ uBarber ngesikhathi ekhonza njengombonisi wesifunda noma wesigodi noma phakathi neminyaka engu-30 ayichitha ekhonza njengelungu leNdikimba Ebusayo futhi ehambela amanye amazwe bayohlale bemkhumbula ngezinkulumo zakhe nangamazwi akhe akhuthazayo. Siyajabula ‘ngokunqoba kwakhe neWundlu.’