Hubelani UJehova!
“Ngizomhubela uNkulunkulu wami uma nje ngisekhona.”—IHU. 146:2.
1. Yini eyashukumisela uDavide osemusha ukuba aqambe amanye amahubo akhe?
LAPHO esemusha, uDavide wachitha amahora amaningi emadlelweni aseduze kwaseBhetlehema elusa umhlambi wezimvu zikayise. Njengoba eqaphe lezi zimvu, uDavide wayekwazi ukubona indalo kaJehova ebabazekayo: amazulu agcwele izinkanyezi, ‘izilwane zasendle nezinyoni zezulu.’ Lokho ayekubona kwamthinta kakhulu waze washukumiseleka ukuba aqambe izingoma ezithinta inhliziyo zokudumisa uMenzi walezi zinto ezimangalisayo. Izingoma eziningi ezaqanjwa uDavide zitholakala encwadini yamaHubo.a—Funda amaHubo 8:3, 4, 7-9.
2. (a) Umculo ungaba naliphi ithonya kumuntu? Nikeza isibonelo. (b) Yini esingayifunda ngobuhlobo bukaDavide noJehova kumaHubo 34:7, 8 nakumaHubo 139:2-8?
2 Cishe kwakungale nkathi ekuphileni kwakhe lapho uDavide awathuthukisa khona amakhono akhe njengomculi. Eqinisweni, wathuthuka kangangokuthi wamenyelwa ukuba ayodlalela iNkosi uSawule ihabhu. (IzAga 22:29) Umculo kaDavide wawuyithoba le nkosi ekhathazekile, njengoba nje umculo omnandi ubathoba abantu ngisho nanamuhla. Kwakuthi njalo lapho uDavide edlala ihabhu lakhe, ‘uSawule athole impumuzo, kumhambele kahle.’ (1 Sam. 16:23) Izingoma ezaqanjwa yilo mculi nombhali wezingoma owesaba uNkulunkulu zisadla ubhedu namanje. Cabanga nje! Namuhla, sekudlule iminyaka engaphezu kuka-3 000 uDavide azalwa, izigidi zabantu ezivela kuzo zonke izizinda nezihlala kuzo zonke izingxenye zomhlaba, ziwafunda njalo amaHubo kaDavide ukuze zithole induduzo nethemba.—2 IziKr. 7:6; funda amaHubo 34:7, 8; 139:2-8; Amose 6:5.
Indima Yomculo Ehloniphekile Ekukhulekeleni Kweqiniso
3, 4. Imaphi amalungiselelo omculo ongcwele enziwa osukwini lukaDavide?
3 UDavide wayenesiphiwo futhi wasisebenzisa ngendlela engcono kakhulu—ukukhazimulisa uJehova. Ngemva kokuba ebe inkosi yakwa-Israyeli, uDavide wahlela ukuba izinkonzo zasetabernakele zihlanganise nomculo omnandi. AmaLevi angaphezu kwengxenye eyodwa eshumini ayesakhonza—angaba ngu-4 000 kuwo—abelwa ukuba ‘adumise’ kanye nabangu-288 “abaqeqeshelwé ukuculela uJehova, bonke bengochwepheshe.”—1 IziKr. 23:3, 5; 25:7.
4 UDavide ngokwakhe waqamba eziningi zezingoma ezaziculwa amaLevi. Ama-Israyeli ayenelungelo lokuba khona lapho kuculwa la maHubo kaDavide kumelwe ukuba ayeshukunyiswa ngokujulile yilokho ayekuzwa. Kamuva, lapho umphongolo wesivumelwano ulethwa eJerusalema, “uDavide wathi ezinduneni zamaLevi mazimise abafowabo abahlabeleli nezinsimbi zomculo, izinsimbi zomculo ezinezintambo namahabhu namasimbali, zibethwa ngokuzwakalayo ukuze zenze ukuba kunyuke umsindo wokujabula.”—1 IziKr. 15:16.
5, 6. (a) Kungani umculo wanakwa kangaka ngesikhathi sokubusa kukaDavide? (b) Sazi kanjani ukuthi umculo wawubhekwa njengonendawo ebalulekile ekukhulekeleni kwa-Israyeli wasendulo?
5 Kungani umculo wawunakwa kangaka osukwini lukaDavide? Ingabe kwakungenxa nje yokuthi inkosi yayingumculi? Cha, kwakunesinye isizathu esembulwa ngemva kwamakhulu eminyaka lapho inkosi elungile uHezekiya ivuselela izinkonzo zasethempelini. Kweyesi-2 IziKronike 29:25, sifunda lokhu: “[UHezekiya] wayemise amaLevi endlini kaJehova, namasimbali, nezinsimbi zomculo ezinezintambo namahabhu, ngomyalo kaDavide nokaGadi umboni wemibono wenkosi nokaNathani umprofethi, ngoba umyalo wawuze ngesandla sikaJehova ukuba unikezwe ngabaprofethi bakhe.”
6 Yebo, ngabaprofethi bakhe, uJehova waqondisa abakhulekeli bakhe ukuba bamdumise ngengoma. Abaculi besizwe sabapristi babeze bakhululwe emisebenzini yabo amanye amaLevi okwakudingeka ayenze ukuze bakwazi ukunikela isikhathi esanele ekuqambeni izingoma, mhlawumbe nasekuziprakthizeni.—1 IziKr. 9:33.
7, 8. Ngokuphathelene nokucula izingoma zethu zoMbuso, yini ebaluleke ngaphezu kwekhono?
7 Ungase uthi, “Mina bandla ngangingeke ngize ngifakwe emculweni kanye nalab’ ochwepheshe ababecula etabernakele.” Kodwa akubona bonke abaculi abangamaLevi ababengochwepheshe. Ngokweyoku-1 IziKronike 25:8, kwakukhona ‘nabafundayo.’ Kubalulekile nokuphawula ukuthi kungenzeka babekhona abaculi nabahlabeleli ababenekhono kakhulu nakwezinye izizwe zakwa-Israyeli, kodwa uJehova wabela amaLevi ukuba anakekele umculo. Singaqiniseka ukuthi kungakhathaliseki ukuthi ‘ayengochwepheshe noma abafundayo,’ wonke amaLevi athembekile asifeza ngokwethembeka isabelo sawo.
8 UDavide wayewuthanda umculo futhi enekhono kuwo. Kodwa ingabe uNkulunkulu unaka isiphiwo sodwa? KumaHubo 33:3, uDavide wabhala: “Khiphani lonke ikhono lenu ekubetheni izintambo nasekumemezeni kwenjabulo.” Iphuzu licacile: Okubalulekile ukuba senze konke esingakwenza ekudumiseni uJehova.
Indima Yomculo Ngemva Kosuku LukaDavide
9. Chaza ukuthi wawungabonani futhi uzweni ukube wawukhona lapho kunikezelwa ithempeli ngesikhathi kubusa uSolomoni.
9 Phakathi nokubusa kukaSolomoni, umculo wasetshenziswa kakhulu ekukhulekeleni okuhlanzekile. Lapho kunikezelwa ithempeli, kwakukhona umculo wezinsimbi owawuhlanganisa iqembu labaculi elalinamadoda angu-120 ayeshaya amacilongo. (Funda eyesi-2 IziKronike 5:12.) IBhayibheli lisitshela ukuthi “abashaya amacilongo [bonke ababengabapristi] nabahlabeleli [babenjengomuntu] oyedwa ekuzwakaliseni umsindo owodwa ekudumiseni nasekubongeni uJehova, . . . ‘ngoba muhle, ngoba umusa wakhe wothando umi kuze kube nini nanini.’” Kwathi nje lapho lowo msindo wokujabula uphakama, “indlu ngokwayo yagcwala ifu,” okwakubonisa ukuthi uJehova wayewujabulela. Yeka ukuthi kumelwe ukuba kwakuvusa amadlingozi nohlevane kanjani ukuzwa umsindo ohlangene kamnandi wawo wonke lawo macilongo kanye nemvunge emnandi yezinkulungwane zabaculi!—2 IziKr. 5:13.
10, 11. Yini ebonisa ukuthi amaKristu okuqala awusebenzisa umculo ekukhulekeleni?
10 AmaKristu okuqala nawo ayewusebenzisa umculo ekukhulekeleni. Yiqiniso, abakhulekeli bangekhulu lokuqala babengahlangani ematabernakele noma emathempelini, kodwa emizini yabantu. Ngenxa yoshushiso nezinye izizathu, izimo ababehlangana kuzo zazivame ukungabi zinhle. Noma kunjalo, lawo maKristu amdumisa uNkulunkulu ngengoma.
11 Umphostoli uPawulu wanxusa abafowabo abangamaKristu eKolose: “Qhubekani . . . niyalana ngamahubo, ngezindumiso zikaNkulunkulu, ngezingoma ezingokomoya ngomusa.” (Kol. 3:16) Ngemva kokuba uPawulu noSila bephonswe etilongweni, baqala ‘ukuthandaza nokudumisa uNkulunkulu ngengoma,’ nakuba babengaphethe culo. (IzE. 16:25) Uma ungavalelwa ejele, zingaki izingoma zoMbuso ongakwazi ukuzicula ngekhanda?
12. Singabonisa kanjani ukuthi siyazazisa izingoma zethu zoMbuso?
12 Njengoba umculo unendawo ehloniphekile ekukhulekeleni kwethu, senza kahle ngokuzibuza: ‘Ingabe ngibonisa ukwazisa okufanele ngawo? Ingabe ngenza konke engingakwenza ukuze ngifike ngesikhathi emihlanganweni yebandla, emihlanganweni emikhulu nemincane ukuze ngihlanganyele nabafowethu nodadewethu engomeni yokuvula, bese ngicula ngenhliziyo yonke? Ingabe ngiyazikhuthaza izingane zami ukuba zingabheki ingoma eculwa phakathi neSikole Senkonzo Esingokwasezulwini noMhlangano Wenkonzo noma ephakathi kwenkulumo yeningi neSifundo Se-Nqabayokulinda njengohlobo oluthile lwekhefu, ithuba lokusuka ezihlalweni ngokungadingekile mhlawumbe ngenjongo nje yokwelula izinyawo?’ Ukucula kuyingxenye yokukhulekela kwethu. Yebo, kungakhathaliseki ukuthi ‘singochwepheshe’ noma ‘singabafundayo,’ sonke singakwazi ukuhlabelela ngobunye sidumise uJehova—futhi kufanele.—Qhathanisa neyesi-2 Korinte 8:12.
Ukushintsha Kwezikhathi Kwenza Kudingeke Izinguquko
13, 14. Kubaluleke ngani ukucula ngenhliziyo yonke phakathi nemihlangano yebandla? Bonisa.
13 Eminyakeni engaphezu kweyikhulu edlule, i-Zion’s Watch Tower yachaza esinye sezizathu ezenza ukuba izingoma zethu zoMbuso zibaluleke kangaka. Yathi: “Ukucula iqiniso kuyindlela enhle yokuligxilisa ezingqondweni nasezinhliziyweni zabantu bakaNkulunkulu.” Amaningi amazwi ezingoma zethu ahlobene namavesi eBhayibheli, ngakho ukwazi amazwi okungenani ezinye zazo kungaba indlela enhle kakhulu yokugxilisa iqiniso ezinhliziyweni zethu. Kaningi izivakashi eziza emihlanganweni yethu yebandla okokuqala ziye zathinteka ngokujulile lapho zizwa sicula ngenhliziyo yonke ebandleni.
14 Ngobunye ubusuku ngo-1869, uC. T. Russell wayebuya emsebenzini eya ekhaya lapho ezwa umculo ovela ehholo eliphansi kwesitezi esithile. Ngaleso sikhathi ekuphileni kwakhe, wayesephelelwe ithemba lokuthi uyoke alithole iqiniso ngoNkulunkulu. Ngakho wayesenqume ukuzinikela ebhizinisini lakhe, ecabanga ukuthi uma engathola imali, okungenani wayeyokwazi ukusiza abantu abaswele ngisho noma ayengenakubasiza ngokomoya. UMfoweth’ uRussell wangena kulelo hholo elimnyama elalinezintuli futhi wathola ukuthi kwakuqhutshelwa khona izinkonzo ezingokwenkolo. Wahlala phansi walalela. Kamuva wabhala ukuthi lokho akuzwa ngalobo busuku “ngesiqondiso sikaNkulunkulu, kwakwanele ukuba kuqinise ukholo lwakhe olwase luntengantenga lokuthi iBhayibheli liphefumulelwe uNkulunkulu.” Phawula ukuthi umculo owadonsela uMfoweth’ uRussell emhlanganweni okokuqala.
15. Ikuphi ukuthuthukiswa ekuqondeni kwethu okwenze kwafaneleka ukuba kubukezwe iculo?
15 Njengoba isikhathi siqhubeka, ukuqonda kwethu imiBhalo kuye kwalungiswa. IzAga 4:18 zithi: “Indlela yabalungileyo injengokukhanya okukhulu okuqhubeka kukhanya ngokwengeziwe kuze kube semini enkulu.” Ukukhanya okwandayo kwenza kudingeke ukuba kwenziwe izinguquko endleleni ‘esihlabelela ngayo iqiniso.’ Sekuyiminyaka engu-25 oFakazi BakaJehova emazweni amaningi bejabulela ukusebenzisa iculo elinesihloko esithi, Hubani Izindumiso zikaJehova.b Kusukela lakhishwa, ukukhanya bekulokhu kukhanya njalo ngokuphathelene nezindaba eziningana futhi ezinye zezinkulumo ezisetshenziswe kulelo culo ziye zaphelelwa isikhathi. Ngokwesibonelo, asisakhulumi “ngohlelo olusha” kodwa “ngezwe elisha.” Ngaphezu kwalokho, sesithi igama likaJehova “liyongcweliswa,” asisathi “liyolwelwa.” Kusobala ukuthi ohlangothini lwezimfundiso kube nesidingo sokuba iculo lethu lihambisane nokuqonda okusha.
16. Iculo lethu elisha liyosisiza kanjani ukuba sisebenzise iseluleko sikaPawulu esikweyabase-Efesu 5:19?
16 Ngenxa yalesi sizathu nezinye, iNdikimba Ebusayo yagunyaza ukuba kukhishwe iculo elisha elithi Hubelani UJehova. Inani lezingoma eculweni lethu elisha lincishisiwe laba ngu-135. Ngenxa yokuthi zimbalwa izingoma okudingeka sizifunde, kufanele sikwazi ukubamba ngekhanda amazwi ezinye zalezi zingoma ezintsha. Lokhu kuvumelana neseluleko sikaPawulu esikweyabase-Efesu 5:19.—Funda.
Ungabonisa Ukwazisa Kwakho
17. Ukucabanga ngani okungasisiza sinqobe ukwesaba ukubhimba lapho sicula nebandla?
17 Ingabe kufanele sivumele ukwesaba ukubhimba kusenze singaculi ngokuzwakalayo emihlanganweni yobuKristu? Kubheke ngale ndlela: Lapho sikhuluma akulona yini iqiniso ukuthi “sonke siyakhubeka izikhathi eziningi”? (Jak. 3:2) Noma kunjalo, asivumi ukuba ulimi lwethu olungaphelele lusivimbele ekudumiseni uJehova endlini ngendlu. Pho-ke, kungani kufanele sivumele ukubhimba kusivimbele ekudumiseni uNkulunkulu ngengoma? UJehova, “owanika umuntu umlomo,” uyakujabuleka ukusilalela lapho sisebenzisa amazwi ethu ukuze sicule izindumiso zakhe.—Eks. 4:11.
18. Nikeza ukusikisela okungasisiza sibambe amazwi ezingoma.
18 Kuye kwenziwa ama-CD athi Sing to Jehovah—Vocal Renditions ngezilimi eziningana. Anomculo omnandi walezi zingoma ezintsha wezinsimbi nowamazwi. Akuve kumnandi ukuwalalela. Walalele njalo; ngaleyo ndlela uyosheshe uwazi amagama, okungenani ezinye zezingoma zethu ezintsha. Amazwi ezingoma eziningi ahlelwe ngendlela yokuthi lapho ucula ivesi lokuqala cishe uyokwazi ukuthi yini ongayilindela kwelilandelayo. Ngakho, lapho udlala la ma-CD, kunganjani ucule kanye nawo? Uma usujwayelene kahle namazwi nomculo ekhaya, nakanjani uyokwazi ukucula ngokuzethemba eHholo loMbuso.
19. Iziphi izinyathelo ezihilelekile ekulungiseleleni umculo wezinsimbi wezingoma zethu zoMbuso?
19 Kulula ukuwuthatha kalula umculo wezinsimbi oqoshelwe ukudlalwa emihlanganweni ekhethekile yosuku olulodwa, yesifunda neyesigodi. Mningi umsebenzi ohilelekile ekuwulungiseleleni. Ngemva kokuba umculo usukhethiwe, kumelwe kubhalwe ngokucophelela ozodlalwa ngezinsimbi yiqembu le-orchestra le-Watchtower elinamalungu angu-64. Abaculi babe sebechitha amahora amaningi befunda umculo obhaliwe abazowuprakthiza futhi ekugcineni bawuqophe ezindlini zethu zokuqopha ePatterson, eNew York. Abayishumi balaba bafowethu nodadewethu abahlali e-United States. Bonke bakubheka njengelungelo ukuhlanganyela ekulungiseleleni lo mculo omnandi osetshenziselwa imibuthano yethu engokwasezulwini. Singabonisa ukwazisa ngokuzikhandla kwabo ngothando. Lapho usihlalo emihlanganweni yethu emincane nemikhulu esicela ukuba sihlale phansi, kumelwe sisabele ngokushesha futhi siwulalele buthule lo mculo oye walungiselelwa ngothando olungaka.
20. Yini ozimisele ukuyenza?
20 UJehova uyazilalela izingoma zethu zokumdumisa. Zibalulekile kuye. Singajabulisa inhliziyo yakhe ngokucula ngenhliziyo yethu yonke noma nini lapho sibuthene ngenjongo yokukhulekela. Yebo, kungakhathaliseki ukuthi singochwepheshe noma singabafundayo, ‘masihubele uJehova’!—IHu. 104:33.
[Imibhalo yaphansi]
a Kuyathakazelisa ukuthi eminyakeni engamakhulu ayishumi ngemva kokufa kukaDavide, uquqaba lwezingelosi lwamemezela ukuzalwa kukaMesiya kubelusi ababeqaphe imihlambi yabo emadlelweni aseduze kwaseBhetlehema.—Luka 2:4, 8, 13, 14.
b Iculo eliphelele lalinezingoma ezingu-225 futhi lalitholakala ngezilimi ezingaphezu kweziyikhulu.
Ucabangani?
• Iziphi izibonelo zezikhathi zeBhayibheli ezibonisa ukuthi umculo unendima ebalulekile ekukhulekeleni kwethu?
• Ikuphi ukuhlobana okubonayo phakathi kokulalela umyalo kaJesu okuMathewu 22:37 nokuhlanganyela ngenhliziyo yonke ekuculeni izingoma zoMbuso?
• Iziphi ezinye izindlela esingabonisa ngazo ukwazisa okufanele ngezingoma zethu zoMbuso?
[Isithombe ekhasini 23]
Uyazikhuza yini izingane zakho ukuba zingasuki ezihlalweni zazo ngokungadingekile ngesikhathi sokucula?
[Isithombe ekhasini 24]
Ingabe niyawafunda amazwi ezingoma zethu ezintsha ekhaya?