Incwadi Evela ERussia
Ukufuna Umcebo Ezintabeni Eziyigolide Zase-Altay
KWAKUWUSUKU olucwathile ngo-May eRepublic yase-Altay—isifunda esinobuhle obukushiya ubambe ongezansi echosheni eliseningizimu-ntshonalanga yeSiberia. Uma silunguza ngefasitela sasibona ihlathi lezihlahla ezinde zohlobo lukaphayini emva kwazo kunezintaba ezingabonakali kahle ezilele iqhwa. Leli yizwe elimazombezombe elisemajukujukwini lama-Altaic—abantu bomdabu base-Asia abakhuluma ulimi lwabo bodwa. Bazizwa besekhaya eZintabeni zase-Altay, okuyigama lesiTurkic-Mongolian elisho ukuthi “okuyigolide.”
Sekuphele iminyaka embalwa mina nomkami safunda uLimi Lwezandla LwaseRussia futhi siye savakashela amabandla asebenzisa ulimi lwezandla namaqembu amancane oFakazi BakaJehova abayizithulu. Kuleli zwe, kunamaqembu ezizwe ezingaphezu kwekhulu kanye namasiko ahlukahlukene angu-70, onke akhuluma ulimi olulodwa, isiRussia. Nokho, izithulu eziphakathi kwethu zikhuluma olunye ulimi, uLimi Lwezandla LwaseRussia. Izithulu ziwumphakathi osondelene kakhulu, futhi eziningi esihlangana nazo zimagange ukusixoxela ngokuphila kwazo futhi zisamukela ngazo zombili. Yilokho okwenzekayo e-Altay.
Edolobheni laseGorno-Altaysk, sathola ukuthi kunezithulu ezihlala edolobhaneni eliqhele ngamakhilomitha angu-250. Sasazi ukuthi kunoFakazi abambalwa lapho kodwa akekho kubo olwaziyo ulimi lwezandla. Sacabanga ngalezi zithulu zase-Altay sabe sesinquma ukuyozifuna. Ukuba nogqozi kwethu kwabangela ukuba uYury noTatyana, abashadikazi abayizithulu, bafune ukuhamba nathi. Safaka ama-DVD olimi lwezandla kanye nomshini wokuwadlala evenini encane. Sapakisha nefulaski enkulu, amasemishi esinkwa se-rye, amasoseji, kanye ne-piroshki eyayisanda kubhakwa—uphayi omnandi waseRussia ofakwe iklabishi namazambane. Ekugcineni sazifutha ngomuthi oxosha amazeze, safutha izimpahla nezicathulo zethu ngoba kuleyo ndawo sivamile isifo esibangwa amazeze.
Umgwaqo esahamba kuwo wawuzungeza izintaba ezinhle. Kwakuheleza umoya onephunga elimnandi lezimbali ze-jasmine ne-lilac. Kwakusivuselela lokho! Sajabulela ukubona umhlambi wezindluzele zaseSiberia uklabile emadlelweni. Ama-Altaic ahlala ezindlini ezisondelene ezenziwe ngamapulangwe zase zifulelwa ngothayela olungiswe kahle. Eduze kwezindlu eziningi kunezindawo zokuhlala ezenziwe ngamapulangwe ezibizwa ngokuthi ama-ayyl, ngokuvamile kuba yizindlu ezinamakhona ayisithupha nophahla olucijile. Ezinye zifana namatende ambozwe ngamagxolo omuthi. Iningi lemindeni yama-Altaic ihlala kuma-ayyl kusukela ngo-May kuze kube u-September bese ibuyela ezindlini ekwindla nasebusika.
OFakazi bendawo basamukela ngenkulu imfudumalo, basithatha basiyisa endlini yabashadikazi abayizithulu. Bakujabulela ukusibona futhi bafuna ukwazi ukuthi sivelaphi nokuthi senzani. Sabe sesithola nokuthi bane-computer ngakho lapho sikhipha i-DVD bathi asiyidlale. Ngokushesha ingxoxo yaphela, kwathula kwathi dú endlini. Amehlo abo agqolozela umshini bedamane belingisa lokho abakubonayo banqekuzise namakhanda ngokwazisa. Babengasafuni ukuphazanyiswa ekuyibukeleni le-DVD ngakho sazama kanzima ukubabuyisela esigcawini sokuqala esibonisa ipharadesi elihle lasemhlabeni. Sasiyimisa isigcawu nesigcawu bese sixoxa ngalokho uNkulunkulu ayokwenzela isintu nangokuthi hlobo luni lwabantu abayophila phakade ngaphansi kwalezi zimo esasizibona. Sathinteka ezinhliziyweni lapho sibona ukuthi bajabulile, lapho sesihamba basiyalela kwabanye abashadikazi abayizithulu abahlala kwelinye idolobhana eliqhele ngamahora ambalwa.
Sangena indlela salibhekisa khona, sadlula endaweni anamadwala angumbukwane enqamula ezintabeni, salandela umgwaqo omazombezombe obheke edolobheni elincane nakakhulu. Lapho sifika, sathola umkhaya oyizithulu—indoda, inkosikazi, unina wenkosikazi, kanye nendodana yalaba bashadikazi—owakujabulela ukuba nezivakashi ongazilindele. Sangena ngomnyango omncane we-ayyl, ngaphakathi kwakunephunga elimnandi lokhuni nombhobe. Phezulu ophahleni olucijile kwakunembobo engenisa ukukhanya. Laphaya ekhoneni kunohhavini nesitofu esakhiwe ngezitini ezicakiwe futhi izindonga zembozwe ngomata ababomvu. Laba bashadikazi basiphakela isidlo sase-Altay—amagwinya netiye ezitsheni ezincane zase-Asia. Sababuza ukuthi bake bacabanga yini ukuthi kungenzeka babe abangane bakaNkulunkulu. Bacabanga ngalo mbuzo. Unina wenkosikazi wasitshela ukuthi ngesikhathi eseyingane wake wathatha ukudla wakusa endaweni ethile entabeni eyokwenza umhlatshelo konkulunkulu. Waphakamisa amahlombe emomotheka wathi: “Ukuthi lokho kwakusho ukuthini, nami angazi. Kwakuyisiko lethu.”
Sababonisa i-DVD ekhuluma ngale ndaba, ubuso babo bavele baqhakaza. Babelangazelela ukuba siphinde siqhubeke nale ngxoxo. Kodwa sasizoqhubeka kanjani? Nakuba ukuthumela imilayezo ngomakhalekhukhwini ngokuvamile kwenza kube lula ukuxhumana nezithulu, omakhalekhukhwini abasebenzi kule ndawo. Ngakho sathembisa ukubabhalela incwadi.
Lapho seliyozilahla kunina savalelisana ngemfudumalo, sabe sesithatha uhambo olude silibangise emuva eGorno-Altaysk, nakuba sasikhathele siyingcuba kodwa sasenelisekile. Ngokuhamba kwesikhathi, sabuza oFakazi bendawo ngalo mkhaya, sathola ukuthi njalo umyeni weqisa isonto abese eya edolobheni elikhulu lapho efundelwa khona iBhayibheli aye nasemihlanganweni, usizwa udade wasendaweni owazi ulimi lwezandla. Asive sijabula ngokwazi ukuthi imizamo yethu iye yathela izithelo!
Ukufuna kwethu abantu abayizithulu abanhliziyo ziqotho singakufanisa nokuhlwaya umcebo othukuswe ezintabeni. Amahora amaningi esawachitha sifuna, avuzwa lapho sithola amatshe ayigugu singalindele. Izintaba zase-Altay ziyohlale ziyigolide kithi, zisikhumbuza ngabaqotho esahlangana nabo ezintabeni ezimazombezombe.