Ukuthuthukisa Amakhono Ethu Enkonzweni—Ukuqeqesha Izifundo ZeBhayibheli Ukuba Zibe Nemikhuba Emihle Yokutadisha

Okwenza Kubaluleke: Ukuze bathuthukele ekuvuthweni ngokomoya, abafundi beBhayibheli kumelwe benze okungaphezu kokondla izingqondo nezinhliziyo zabo ngezimfundiso eziyisisekelo zeZwi likaNkulunkulu. (Heb. 5:12–6:1) Ukutadisha kudinga umzamo. Kuhlanganisa ukuhlobanisa izinto ezintsha nalezo esesizazi nokuqonda inzuzo yokuzisebenzisa. (IzA. 2:1-6) Ukufunda ukuzicwaningela kuyokwenza umfundi akwazi ukuphendula imibuzo yeBhayibheli esebenzisa izincwadi zethu zobuKristu. Umzamo oqotho wokusebenzisa abakufundayo uyobasiza bamelane nezilingo abayobhekana nazo njengamaKristu.—Luka 6:47, 48.

Indlela Yokukwenza:

Gcizelela ukubaluleka kokuthandazela usizo lukaJehova njalo ngaphambi kokutadisha.—Joh. 14:26; 1 Kor. 2:10.
Zisuka nje, khuthaza umfundi ukuba asilungiselele kusengaphambili isifundo sakhe. Mbonise incwadi yakho umfundise nendlela yokudwebela kuphela amagama noma amabinzana ayinhloko.
Mcele aphendule imibuzo ngamazwi akhe. Gwema ukwenza isifundo sibe indaba yemibuzo nezimpendulo nje kuphela lapho umfundi efunda izimpendulo ezisencwadini njengoba zinjalo.
Khuthaza umfundi ukuba afunde iZwi likaNkulunkulu nsuku zonke. Mbonise isimiso sokufunda iBhayibheli esitholakala ku-jw.org, esibonisa indlela angalifunda ngayo. Ukuba nomkhuba wokufunda iBhayibheli nsuku zonke kuyodinga ukuzimisela, kodwa kuwufanele umzamo.—IHu. 1:2, 3.
Bonisa umfundi indlela angathola ngayo izimpendulo zemibuzo yeBhayibheli esebenzisa i-Watchtower Library noma i-ONLINE LIBRARY YeBhayibheli. Msize akwazi ukubona izinhlamvu eziyizifushaniso zezincwadi ezivame ukusetshenziswa emihlanganweni yebandla.

Zama Lokhu Phakathi Nenyanga:

Ngemva kwesihlokwana noma isahluko, cela umfundi ukuba afingqe lokho asanda kukufunda ngemisho embalwa. Uma ungenaso isifundo, prakthiza ukufingqa ngemisho embalwa okuthile okufunde eBhayibhelini noma kuyi-Nqabayokulinda ukuze uthuthukise elakho ikhono lokuqonda okufundayo.