INDLELA YOKUQEDA UKUZONDANA OKUNGAPHELI

2 | Ungaziphindiseleli

IBhayibheli Lithi:

“Ningabuyiseli muntu okubi ngokubi. . . . Uma kungenzeka, ngokusemandleni enu, yibani nokuthula nabo bonke abantu. Ningaziphindiseleli, . . . ngoba kulotshiwe ukuthi: ‘“Impindiselo ingeyami; ngizobuyisela mina,” kusho uJehova.’”—ROMA 12:17-19.

Lokho Okukushoyo:

Nakuba kungokwemvelo ukucasuka lapho siphathwe kabi, uNkulunkulu akafuni ukuba siziphindiselele. Kunalokho, uyasinxusa ukuba simlinde ngoba maduzane uzoqeda konke ukungabi nabulungisa.—IHubo 37:7, 10.

Lokho Ongakwenza:

Lapho abantu abanesono beziphindiselela, kubhebhezela ukuzondana okungapheli. Ngakho, uma othile ekuphathe kabi noma ekuzwise ubuhlungu, ungaziphindiseleli. Zama ukwehlisa umoya, uphendule ngendlela enokuthula. Kwezinye izimo kungase kube ngcono uvele uyidlulise indaba. (IzAga 19:11) Kuyavunywa, uma kunesizathu esizwakalayo, ungase ukhethe ukuxoxa ngayo inkinga. Ngokwesibonelo, ezimweni lapho ube isisulu sobugebengu, ungase ukhethe ukubika leyo ndaba emaphoyiseni noma eziphathimandleni.

Ukuziphindiselela kuwukuzilimaza

Kuthiwani uma kubonakala ingekho indlela enokuthula yokuxazulula inkinga? Noma kuthiwani uma usuzame konke okusemandleni ukuyilungisa ngendlela enokuthula? Ungaziphindiseleli. Lokho kungase kwenze isimo sibe sibi nakakhulu. Kunalokho, zama ukunqanda ukuzondana okungapheli. Ungafunda ukuthemba indlela kaNkulunkulu yokuxazulula inkinga. “Thembela kuye, yena uyokusiza.”—IHubo 37:3-5.

Indaba Yokuphila—U-ADRIÁN

Wanqoba Imizwa Yokuziphindiselela

Esemusha, u-Adrián wayenobudlova eyisilwi sasemgwaqweni, efuna ukuziphindiselela kunoma ubani omhlukumezayo. Uyalandisa: “Ngangivame ukulwa ngisho nangezibhamu futhi izikhathi eziningi ngangisala ngidindilize emgwaqweni ngigcwele igazi, kucatshangwa ukuthi ngifile.”

U-Adrián waqala ukufunda iBhayibheli lapho eneminyaka engu-16. Uyenezela: “Njengoba ngangithuthuka ekufundeni kwami iBhayibheli, ngabona isidingo sokwenza izinguquko ebuntwini bami.” Kwadingeka ukuba ahlukane nenzondo futhi ayeke ukuba nobudlova. Wakuthanda kakhulu akufunda emBhalweni wabaseRoma 12:17-19 mayelana nokuyeka ukuziphindiselela. Uthi: “Ngaqala ukuqonda ukuthi uJehova uzokulungisa ukungabi nabulungisa ngendlela yakhe nangesikhathi sakhe. Kancane kancane ngayeka ukuphila ngobudlova.”

Ngobunye ubusuku, u-Adrián wahlaselwa yintsha eyayiseqenjini elaliyizitha zakhe zangaphambili. Umholi walelo qembu wamemeza: “Phindisela!” U-Adrián uyavuma: “Nganginesifiso esinamandla sokuziphindiselela.” Kunokuba aziphindiselele, wenza umthandazo omfushane kuJehova wabe esesuka lapho.

U-Adrián uyaqhubeka: “Ngosuku olulandelayo ngahlangana nomholi waleli qembu ehamba yedwa. Ngazizwa ngithukuthela ngifuna ukuziphindiselela, kodwa ngaphinde ngancenga uJehova ngenhliziyo ukuba angisize ngizibambe. Ngamangala kabi lapho lo mfana esondela kimi futhi ethi: ‘Ngicela ungixolele ngokwenzeke izolo. Eqinisweni ngifisa ukufana nawe. Ngifuna ukufunda iBhayibheli.’ Ngajabula ngokuthi ngangikwazile ukuzibamba! Ngenxa yalokho, naye waqala ukufunda iBhayibheli.”