Kusizungezile!

“Igama elithi ‘inkolo’ nelithi ‘ezombangazwe’ ayehlanganiswa ndawonye ezindabeni kuwo wonke unyaka ka-1984 kuzo zonke izingxenye zomhlaba . . . Umbhishobhi waseSheshi uDesmond Tutu wayewuphawu lokungezwani phakathi kwesonto nohulumeni ngobandlululo . . . Emthandazweni wokuvala emhlanganweni [wezombangazwe], uJerry Falwell, umholi oqotho weMoral Majority, wabhekisela kuReagan nakuGeorge Bush iSekela likaMongameli ‘njengabangamathuluzi kaNkulunkulu okwakha kabusha iMelika.’“—1985 Britannica Book of the Year.

“Ukusuka ePoland kuya ePhilippines . . . kukhona ababhishobhi nabapristi abakhuluma ngokumelene neMibuso abahlala kuyo. Isonto aliyona nje indawo lapho kukhulekelwa khona uNkulunkulu, kodwa yilapho kuqala khona ukwehlukana kwemibono.”—Glasgow Herald, January 3, 1985.

INGABE uke wayifunda imibiko enjalo? Kungenzeka, ngoba abaningi bethu baye baphawula ukuthi inkolo nezombangazwe ngokuvamile kuyahlanganiswa ezindabeni. Ingabe wena unomuzwa wokuthi kulungile ukuxutshaniswa kwenkolo nezombangazwe?

Abanye bangase bathi, Inkolo nezombangazwe izindaba engingakhuluma ngazo.’ Ngisho noma uzizwa ngaleyondlela, kungokwenzuzo yakho engcono kakhulu ukuba wazi ukuthi kwenzekani ngokuqondene nenkolo nezombangazwe nokuthi lokhu kungakuthinta kanjani ukuphila kwakho siqu. Futhi, ngokubheka eBhayibhelini ngalendaba, uzothola ukuthi uNkulunkulu unezinto azishoyo ngokuxubana kwenkolo nezombangazwe nokuthi kuholelaphi.

Ukuxubana Kwenkolo Nezombangazwe Okusemhlabeni Wonke

Okokuqala kuzosiza ukubona ukuthi lokhu kuxubana kwenkolo nezombangazwe kwande kangakanani. Phawula eminye imibiko yamuva.

■ NgoApril 21, 1986: “EPhilippines iSonto lamaKatolika lijabulela idumela elikhulu ngokusiza ekuketuleni owayenguMongameli uFerdinand Marcos. Amasonto aseSheshi, aseWeseli namaKatolika eNingizimu Afrika sekuyiminyaka ekhuluma ngokumelene nezimiso zikahulumeni zobandlululo. Abefundisi bamaKatolika eLatin America, ngaphansi kwesiqubulo sesimiso ‘senkululeko sabefundisi,’ bahileleke ngokujulile ekuzameni ukuketula imibuso okucatshangwa ukuthi icindezela abampofu.”

■ ESeoul, eRepublic of Korea, ngoMarch 9, 1986: “Umbhishobhi omkhulu wamaRoma Katolika waseNingizimu Korea, ustephen Cardinal Kim Sou Hwan, namuhla usekele iqembu eliphikisayo ekufuneni izinguquko zomthethosisekelo ezisheshayo.”

■ NgoAugust 18, 1986: ‘Omele ukhetho ungumfundisi wamaProtestani ogcotshiwe okhuthaza impi, ulwela ukuhlwitha iqembu lakhe ekubanjweni abeqembu lezombangazwe abaklolodelayo. Ubani lona ongamandla ashukumisayo nahlanganisayo kwezombangazwe zaseU.S. eziphathelene nomongameli wezwe? Ngokumangalisayo, incazelo ibafanela kahle ngokulinganayo abefundisi ababili: uPat Robertson wamaRepublican angalufuni uguquko noJesse Jackson weqembu elifuna ukubusa ngentando yeningi elifuna izinguquko.’ ‘Incwadi yokukhuthaza ukuqoqwa kwezimali lapho ibhekisela empumelelweni yabalandeli abangabameleli [bakaRobertson] yaqala kanje “AmaKristu aphumelele!. . . Yeka impumelelo ngoMbuso!”’

■ EBrasilia, eBrazil, ngoJuly 3, 1986: “Isonto selibonakale kakade njengomgxeki onamandla kaHulumeni omusha owakhiwe abantu abavamile. . . . Ngenxa yalokho, ubudlelwane besonto nombuso sebuphinde baba sesimweni esibi, njengoba iziphathimandla zimangalela abapristi ngokufaka umoya wokweqisa kwezombangazwe emaphandleni nababhishobhi abathile bemangalela uHulumeni ngokuphendukela ezindleleni kokushushisa nokuhlambalaza.’”

■ NgoSeptember 25, 1984: “UKhomeini waseIran umelele amandla okunamathela ezimfundisweni nasezinkolelweni zobuShia Muslim nafundisa ukuthi ubuIslam bufanele buqondise ezombangazwe, ezomnotho nezempi.”

■ NgoApril 7, 1985: “NgokweGallup Poll (ukuthathwa kombono womphakathi) eyenzelwa iThe Sunday Telegraph ngokukhethekile, iningi lamaSheshi licabanga ukuthi iSonto laseNgilandi kufanele lingangeni kwezombangazwe.”

■ NgoOctober 4, 1986: “Isonto lamaRoma Katolika laseMexico lizilungiselela ukusekela ukuphikiswa okukhulayo [kweqembu] lezwe elibusayo. Isonto lenze isenzo sesibindi kwezombangazwe ngoJuly. . . . Ababhishobhi bacabangela ukuwaqeda amamisa angeSonto ukuze babonakalise ukungahambisani kwabo nokukhwabaniswa kwamavoti; kodwa uPapa wangenela.”

■ EWashington, D.C, U.S.A., ngoJuly 6, 1986: “Abaholi bobuvangeli abangamaKristu basebenzisa imali yabo, izimfundiso zenkolo nezigidi zamalunga ukuba balwe obala—futhi banendima enethonya elikhulayo kwezombangazwe zaseMelika.”

Kungani Kunjalo?

Yebo, akunakuphikwa ukuthi inkolo ihileleke kakhulu kwezombangazwe. Kodwa yini eshukumisela abaholi benkolo ukuba bazihlanganise ezindabeni zezombangazwe? Ingabe uNkulunkuu uye wakhipha isahlulelo ngalokhu kuxubanisa? Kuqondephi konke lokhu, futhi uyothinteka kanjani wena?

[Ibhokisi ekhasini 22]

“Ukuhileleka kwezombangazwe kusobala eVangelini lobuKristu” kusho [uPeterHans Kolvenbach,] umholi weNhlangano kaJesu, . . . leyo esikhathini esidlule eye yasolwa yiVatican ngokuzihlanganisa kakhulu nezindaba zezombangazwe.”—The Toronto Star, May 31, 1986.