Kuthiwani Ngemisebenzi Yokukhangisa Ngengqephu Nemincintiswano Yonobuhle?

“LAPHO sisohambweni oluya eNew York ngonyaka odlule,” kukhumbula uAmy oneminyaka eyi-12 ubudala, “insizwa ephethe ihhotela yatshela umama, ‘Kumelwe ubhalise indodakazi yakho esikoleni sokukhangisa. . . . Yinhle.’”

Intsha eningi ebukekayo iye yaba nokuhlangenwe nakho okufanayo. URacine oneminyaka eyishumi nanhlanu ubudala wathola ucingo luvela endodeni eyazama ukwenza yena nodadewabo omncane ukuba babe nesithakazelo emsebenzini wokukhangisa ngengqephu. Owesifazane osemusha waseNingizimu Afrika wacelwa ukuba abe nengxenye emncintiswaneni wonobuhle. Futhi imisebenzi eholela kahle ayithenjiswa amantombazane kuphela. UJonathan osemusha wathola umsebenzi wokuba umkhangisi wengqephu wesilisa.

Yebo, emhlabeni wonke, abesifazane nabesilisa abasebasha nezingane babo bonke ubudala baqashelwa imisebenzi yokukhangisa ngengqephu, imibukiso yonobuhle, nokunye okufanayo. EUnited States kuphela, kubikwa ukuthi kuba khona amakhulu ezinkulungwane zemincintiswano yonobuhle unyaka ngamunye. Abaphumelelayo bathola izinkulungwane zamarandi, imiklomelo, nemifundaze. Ngabakhethiwe abambalwa, ukuphumelela emibukisweni yonobuhle kuye kwaphumela ekuzilibaziseni okuzuzisayo nasemisebenzini yokukhangisa ngengqephu.

Omunye wesifazane osemusha uthi: “Kukho konke ukuphila kwami bengilokhu ngifuna ukuba umkhangisi wengqephu—komagazini balapha nasemibukisweni yemfashini. Iholo lisukela [ku-R65] kuya [ku-R260] ngehora.” Nokho, kubikwa ukuthi, abakhangisi bengqephu beqophelo eliphezulu bathola iholo elingu-R6 500 ngosuku! Khona-ke, akumangalisi, ukuthi enye intsha engamaKristu iye yalingelwa ukuba izuze ngokubukeka kwayo okuhle. Ubungasabela kanjani uma ubunikezwa ithuba elikhanga kanjalo?

Ubuhle Bungazuzisa

Kuthiwa intokazi engumJuda uEsteri “yayiyinhle, yayibukeka.” (Esteri 2:7) Eqinisweni, ungaze ngisho uthi waphoqelelwa ukuba angenele umncintiswano wonobuhle bamazinga ahlukahlukene. Zaziyini izimo? Inkosikazi yasePheresiya uVashiti yayisusiwe esikhundleni ngenxa yokungalaleli. Ukuze ithole owayezomthathela indawo ofanelekile, inkosi uAhashiveroshi yabutha izintombi ezinhle kakhulu zivela kuyo yonke indawo. Esikhathini esingangezinyanga eziyi-12, yahlela ukuba izintokazi zinikezwe ukudla okukhethekile futhi zihlikihlwe njalo ngamafutha ebhalisamu nemure. Khona-ke intombazane ngayinye yahlolwa. Futhi lapho kufika isikhathi sikaEsteri sokuba ahlolwe, wakhethwa ukuba abe inkosikazi entsha!—Esteri 1:12–2:17.

Phó kungani, uEsteri ahlanganyela? Ingabe wayefuna udumo oluyize? Cha, uEsteri wayelandela isiqondiso sikaJehova, asifuna ngokuphindaphindwe ngomzala wakhe owesaba uNkulunkulu nowayemkhulisile, uMoridekayi. (Esteri 4:5-17) Indoda embi egama layo linguHamani yayihlela ukubhubhisa abantu bakaNkulunkulu, isizwe sakwaIsrayeli. ‘Umncintiswano wonobuhle’ wavumela uJehova ukuba abeke uEsteri esikhundleni esiphakeme lapho ayezokwazi khona ukubhuntshisa lolosongo. Ngaleyondlela ukubukeka okuhle kukaEsteri kwabonakala kuyisibusiso kubo bonke abantu bakaNkulunkulu!

Kuthiwani namuhla? Ngokungathandabuzeki, indlela umuntu abukeka ngayo akuyona into ebaluleke kakhulu ekuphileni.a Nokho, lapho kuhambisana nesizotha nokuzithoba, ukubukeka okukhangayo kungaba imfanelo enhle. Phó, ingabe lokhu kusho ukuthi, ukukhangisa ngengqephu noma ukungenela imibukiso yonobuhle kuyindlela yokuhlakanipha yokusebenzisa lemfanelo? Noma ingabe kukhona izinto ezingalé kokuheha kodumo, noma ingcebo okumelwe zicatshangelwe?

Ngalé Kobukhazikhazi

Ukukhangisa ngengqephu kunabo ubukhazikhazi bakho. Izingubo ezinhle, okokuhloba okubizayo, iholo elihle, amathemba okuhamba izindawo nokuvela kuthelevishini—konke lokhu kuyaheha ngempela. Ngaphezu kwalokho, ukuqeqeshelwa ukukhangisa ngengqephu kuye kwasiza izintombi nezinsizwa eziningi ukuba zihambe zishayele phezulu futhi zikhulume ngokuzethemba nangobuciko. Kodwa ngalé kobukhazikhazi, ubucwebecwebe, nokuvelela kungase kube khona izingozi zangempela kumKristu.

Akukhona ukuthi ukukhangisa ngengqephu ngokwakho kubi. Okunye ukukhangisa kufeza injongo elungile: ukwenza umkhiqizo ubonakale ukhanga. Leso esinye sezizathu ezenza ukuba izandla ezinhle zisetshenziselwe ukukhangisa ngopende wezinzipho komagazini nakuTV. Ngokufanayo, amadoda nabesifazane abakheke kahle basetshenziselwa ukukhangisa ngezimpahla zokugqoka. Uma lezozimpahla zinesizotha, kungase kungabi khona okungalungi-le ngomKristu oqashiwe ukuba azikhangise.

Nakuba kunjalo, ziningi izinkinga ezihlobene nokukhangisa okungelula ngaso sonke isikhathi ukuzigwema. Ngokwesibonelo, ubungasabela kanjani, uma ubucelwa ukuba ugqoke okuthile okungenasizotha noma okungawafanele amaKristu? Noma uma umthwebuli wezithombe esebenzisa ukucindezela kobuqili ukuze ume ngendlela ethile esikiselayo, evusa inkanuko? Ngaphezu kwalokho, umuntu akanakuqiniseka ngazo zonke izikhathi ngendlela izithombe ezizosetshenziswa ngayo. Ngokwesibonelo, izithombe zingase zivele ngendlela ekhuthaza amaholide enkolo yamanga noma leyo esikisela ukuziphatha okubi.

Khona-ke kunomphumela umsebenzi onjalo ongase ube nawo ebuntwini bomuntu, ukuthuthukisa izimfanelo eziphambene. Ukugcizelela okuqhubekayo kokubukeka komuntu kwangaphandle ‘kunakumuntu osithekileyo wenhliziyo’ kuye kwabangela abanye abakhangisi bengqephu ukuba bazithande ngokweqile. (1 Petru 3:4) Futhi, ukusebenza ugqoke izimpahla ezibizayo, okokuzihlobisa, nokunye okufanayo, kungase kubangele ukuba kuhlume umqondo wokuthanda izinto ezibonakalayo.—1 Thimothewu 6:10.

Umsebenzi wokukhangisa ngengqephu futhi unedumela elibi ngokuchaya umuntu kubantu, abesilisa nabesifazane, abaphikelela ekufuneni ubulili ukuze bakuthuthukise emsebenzini. Njengoba owayekade engumkhangisi wengqephu asho: “Ngokusobala, kumelwe uhlanganyele [ngokobulili] ukuze uphumelele.” Abanye baze bathi ubungqingili buthe chithi saká phakathi kwabakhangisi besilisa. Nakuba lokhu kungase kungabi yiqiniso ngaso sonke isikhathi, kungase kube yinkinga kakhulu ekukhangiseni kunakweminye imisebenzi.

Imibukiso Yonobuhle

Okuningi osekukhulunywe ngakho kungashiwo futhi nangemibukiso yonobuhle. Nokho, ngaphezu kwalokho, kukhona futhi nokucindezela kokuncintisana okukhulu. Lokhu kuye kwashoshozela abanye abakulemincintiswano kwaze kwaba sezingeni lokuba bayone ngamabomu impahla yabancintisana nabo. Ngokomunye umbiko, “abanye abancintisanayo bakufuna ngamandla ukunqoba kangangokuthi akuyona into enkulu ngabo ukuba babhixe isigcoba-mlomo empahleni yokubhukuda yababangisana nabo noma ‘ngengozi’ bangcolise izingubo zabo zakusihlwa ngeCoke.”

Futhi, abasekela imibukiso yonobuhle ngezimali balindele ukuzinikela okuphelele emantombazaneni abo njengabameleli babo bezokuthengisa nabenza umphakathi ukuba uyiqonde kangcono inkampane yabo. Ngokuvamile lokhu kudinga ukuzimbandakanya kuze kube sentathakusa. Omunye wesifazane watshelwa ukuthi: “S’thandwa, ungalokothi ukhathale. Khumbula lokho nje. Ungowokuqala ukuba ufike ephathini futhi ungowokugcina ukuba uhambe.” Kokuncane kakhulu, lokhu kungachaya osemusha ongumKristu ukuba ahlangane nabantu abangafiseleki futhi kungase ngisho kuholele umuntu ekubeni ahileleke ngokomzwelo nomuntu ongakholwa.—2 Korinte 6:14.

Okokugcina, kuneqiniso lokuthi imincintiswano yonobuhle ayisinaki isimiso seBhayibheli esikwabaseRoma 1:25, esilahla labo ‘abahlonipha, bakhonze okudaliweyo kunoMdali.’ (Qhathanisa nezEnzo 12:21-23.) Ngokwalesosisekelo sisodwa, umKristu osemusha uyokwenza kahle ukunqaba ukuhlanganyela emincintiswaneni yonobuhle ngisho noma kungemincane yasesikoleni.

Ubuhle Bangempela

Abantu abasebasha okukhulunywe ngabo ekuqaleni kwadingeka bawacabangele ngokujulile lamaqiniso ekwenzeni izinqumo zabo siqu. Nakuba ukufuna umsebenzi njengomkhangisi wengqephu kungase kungabi kubi ngokwakho, uAmy noRacine banquma ukungenzi kanjalo. Ngokufanayo uJonathan wawenqaba umsebenzi wokuba umkhangisi wesilisa wengqephu futhi njengamanje ukhonza endlunkulu yomhlaba wonke yoFakazi BakaJehova, ephishekela umsebenzi wenkonzo yesikhathi esigcwele. Kodwa enye intombazane enhle yangenela futhi yaphumelela emincintiswaneni emibili yonobuhle. Namuhla, ayisayi emihlanganweni yamaKristu. Yeka ukuthi siyiqiniso kanjani isisho sesiNgisi esithi, “Lokho okukhangayo futhi okuhle akukuhle ngaso sonke isikhathi; kodwa okulungile kuhle ngaso sonke isikhathi.”

Futhi sikhunjuzwa ngoEsteri. Ngenxa yobuhle bakhe obungokomzimba, wafakwa ohlwini lokuba inkosikazi yenkosi. Nokho, isizotha, ukuzithoba, ukulalela, nokungabi nabugovu kwakhe okwamenza waba muhle ngempela. (Esteri 2:13, 15-17) Wafaneleka emazwini kaPetru: “Ukuhloba kwenu makungabi-ngokungaphandle, okokwaluka izinwele, nokokufaka igolide, noma okokugqoka izingubo, kepha makube-ngumuntu osithekileyo wenhliziyo ohloba ngokungabhubhiyo komoya omnene onokuthula, okuyigugu phambi kukaNkulunkulu.” (1 Petru 3:3, 4) Ngokuhamba kwesikhathi, ukuhlakulela lezimfanelo zobuKristu kuyoba ngokwenzuzo enkulu kunemiphumela yesikhashana yobuhle obungokomzimba.

[Umbhalo waphansi]

[Izithombe ekhasini 23]

Izimfanelo zobuKristu zingezenzuzo enkulu kunemiphumela yesikhashana yokubukeka okungokomzimba