Umbono WeBhayibheli
Okumelwe Ukwazi Ngezingelosi
“Abafundi bezenkolo abangaba ngu-3 000 bebehlangene eNew York izinsuku ezine ngesonto elidlule ukuze bezwe imibiko engaphezu kuka-500 ngezihloko ezisukela kwezikhuluma ngendima yamahlaya ezintshumayelweni kuya kwezikhuluma ngokubaluleka kwesimiso sesonto kumalungu asePentecostal. Akekho owathinta izingelosi.”—Daily News, December 26, 1982.
NAMUHLA, eminyakeni eyisishiyagalombili kamuva, abefundisi basasho okuncane ngezingelosi. Kungani? Kungenzeka yini ukuthi lezizithunywa zasezulwini zimane nje zibhekwa njengengxenye yenganekwane yasendulo? Noma ingabe zikhona ngempela? Uma kunjalo, yini okumelwe uyazi ngazo?
Ingabe Zikhona?
Izingelosi aziyona nje “imibuso” noma “izinhlangano zendawo yonke” njengoba kusho ezinye izazi zefilosofi. Zingokoqobo ngokwanele ukuba kukhulunywe ngazo izikhathi eziningi eZwini likaNkulunkulu, iBhayibheli. Ngezilimi zokuqala zeBhayibheli, amagama ahunyushwe ngokuthi “ingelosi” (ngesiHeberu, mal·ʼakhʹ; ngesiGreki, agʹge·los) ngokwezwi nezwi asho “umuntu oletha umyalezo” noma kalula nje “isithunywa.” Lamagama avela izikhathi ezicishe zibe ngama-400 kulo lonke iBhayibheli, ngezinye izikhathi ebhekisela kubantu, kodwa ngokuvamile ebhekisela ezithunyweni zomoya.
Ingelosi eyabonakala kumkaManowa oyinyumba imemezela ukukhulelwa kwakhe indodana yakhe, uSamsoni, yayingokoqobo kuye. Kunjalo nangezingelosi ezintathu ezabonakala kuAbrahama nomkakhe uSara, nezimbili ezakhipha uLoti, neyodwa eyayihleli ngaphansi kwesihlahla esikhulu futhi ikhuluma noGideyoni. (Genesise 18:1-15; 19:1-5; AbAhluleli 6:11-22; 13:3-21) Ngesikhathi sokuzalwa kukaJesu, ingelosi yabonakala kungazelelwe esixukwini sabelusi iphakathi kokukhanya okuxhophayo nokukhazimulayo.—Luka 2:8, 9.
Lezozingelosi zazingokoqobo. Zazingewona umcabango wokuzenzela noma amandla angesiwo umuntu. Zagcwalisa injongo eqondile njengezithunywa ezivela kuNkulunkulu, futhi lemilando yabhalwa ngokufanelekile eBhayibhelini ukuze kuzuze thina namuhla. (2 Thimothewu 3:16) Ngakho iBhayibheli lembula imininingwane ebalulekile ngezingelosi okudingeka uyazi, eminye yayo ephikisana nemiqondo yamasiko emvelo.
Zinjani?
Mhlawumbe ungase ucabange ngezingelosi njengezifana nabesifazane abahle noma njengezidalwa ezikhuluphele ezinjengabantwana ezinezimpiko, ezimoyizela kahle zigqoke izingubo ezimhlophe, zishaya amahabhu amancane futhi zindizela emoyeni. Uma kunjalo, kumelwe wazi ukuthi lena imiqondo edukile eyathathwa emiqondweni yobuhedeni, njengemfundiso yamaGreki yezinganekwane. Noma lemiqondo yemukelwa ngemva kokuba ukubhalwa kweBhayibheli sekuqediwe. Emibonweni engokomfanekiso yeBhayibheli, izidalwa zomoya ezinjengamaserafi namakherubi zinamaphiko.—Isaya 6:2; Hezekeli 10:5; IsAmbulo 14:6.
IZwi likaNkulunkulu lichaza izingelosi njengemimoya enamandla kakhulu, futhi umoya awubonakali. (1 AmaKhosi 22:21; IHubo 34:7; 91:11) ‘Kwakuyingelosi’ kaJehova eyabulala abaseAsiriya abangu-185 000 ekamu lezitha zamaIsrayeli ngobusuku obubodwa nje! (Isaya 37:36) Lapho izingelosi zizibonakalisa kubantu, njalo zazibonakala njengamadoda agqoke ngokuphelele, hhayi njengabesifazane noma abantwana futhi hhayi esimweni esingaphansi kwesomuntu.
Zazivelaphi lezidalwa zomoya ezinamandla? IBhayibheli lithi ‘kwadalelwa kuye [uJesu] konke okusezulwini nasemhlabeni, okubonwayo nokungabonwa.’ (Kolose 1:16) UJehova uNkulunkulu, ngaleNdodana eyizibulo, akazange nje adale izingelosi esikhathini eside ngaphambi komuntu kodwa futhi wazenza zaba sesimweni sokuphila esiphakeme kunesomuntu.—Jobe 38:4, 7; 2 Petru 2:11.
Ingabe Zinabo Ubuntu?
Izingelosi, njengabantu zinemizwa. Emva kokubona ukudalwa komhlaba, sitshelwa ukuthi izingelosi “zahlabelela kanyekanye,” futhi ‘zijabula.’ (Jobe 38:7) Futhi iBhayibheli liveza ukuthi “kukhona ukuthokoza phambi kwezingelosi zikaNkulunkulu ngesoni sisinye esiphendukayo.” (Luka 15:10) Ngokuqinisekile, awekho “amandla” angenabuntu ayengathola injabulo enkulu echazwe kulawomavesi.
Izingelosi nazo zinemingcele. Amanye amaqiniso ngoKristu nekusasa embulwa kubaprofethi abangabantu kodwa hhayi ezingelosini. IZwi likaNkulunkulu lisitshela ukuthi ‘yilezizinto ezizifisayo izingelosi ukuzibona.’ (1 Petru 1:10-12) Mayelana nosuku oluqondile olukhethwe uNkulunkulu lokuza kweNkosi, uJesu wathi: “Kepha lolosuku nalelohora akakho owazi-lutho ngalo nazingelosi zasezulwini, naNdodana, nguBaba kuphela.”—Mathewu 24:36.
Khona-ke futhi kuvela amagama ezingelosi ezimbili eBhayibhelini, uMikayeli noGabriyeli. (Daniyeli 12:1; Luka 1:26) Ingabe lokhu akunezeli ebufakazini bokuthi ngayinye ihlukile? Njengabantu abahlukile, azihlelwanga, njengecomputer noma irobhothi, ukuze zenze ngendlela ethile. Kunalokho, izingelosi ziphiwe amandla okucabanga futhi zinenkululeko yokwenza izinqumo zomuntu siqu ngokuziphatha. Ngakho-ke njengezidalwa ezikhululekile ngokuziphatha, ezinye izingelosi zakhetha ukuhlubuka kuNkulunkulu futhi zaba uSathane namademoni akhe.—Genesise 6:1-4; Juda 6; IsAmbulo 12:7-9.
Ingabe Kumelwe Zikhulekelwe?
Nakuba singavuma ukuba khona kwezingelosi njengokuyiqiniso, hhayi inganekwane, kumelwe sigweme ukweqisa. Ezinye izinhlangano zenkolo ziye zanika izingelosi udumo olungafanele, nakuba ukukhonza izingelosi kulahlwa eBhayibhelini. (Kolose 2:18; IsAmbulo 22:8, 9) ISonto lamaKatolika liye laphakamisa uMikayeli noGabriyeli ukuze lizinikele kubo. Futhi emasontweni aseMpumalanga obuOrthodox, izingelosi zibaluleke kakhulu emthandazweni. Yeka ukuthi kuphambene kanjani nesixwayiso esanikezwa ingelosi kaJehova lapho umphostoli uJohane ewela ezinyaweni zayo: “Musa; ngiyinceku kanye nawe.”—IsAmbulo 19:10.
Kungani kunokudideka okungaka mayelana nezingelosi? USathane, oziveza ‘njengengelosi yokukhanya,’ “uphuphuthekisile ingqondo [yabangakholwayo].” (2 Korinte 4:4; 11:14) Ngakho-ke bekungeke yini kube nengqondo ukulindela ukuthi abaningi namuhla bebezobambelela emibonweni yabo mayelana nokuba khona kwezingelosi nesimo sazo kunokwamukela lokho iZwi likaNkulunkulu elikushoyo? Yebo, nakuba abefundisi namuhla bengase basho okuncane ngezingelosi, sinesiqinisekiso sikaNkulunkulu ngombhalo weBhayibheli ukuthi zikhona ngempela futhi zenza umsebenzi ohloniphekayo njengezithunywa zikaJehova.—Heberu 1:7, 14; 6:18.
[Isithombe ekhasini 20]
Ukufanekiswa kwezingelosi njengezidalwa ezinjengabantwana nezimpiko kuthathwa emiqondweni yobuhedeni
[Umthombo]
Cupid a Captive by François Boucher, c.1754