Okuphawulwa Abafundi Balomagazini
Ukuchitha Iholile Ekhaya Isihloko senu (June 22, 1990) kubonakala sengathi sibhalelwe mina. Konke ukutusa kwakukuhle, njengokwenza izinto nabanye, ukusebenza endlini, ukuthuthukisa ikamelo lami, ukuvakashela izindawo ezikhangayo endaweni, ukufunda iBhayibheli ngokwengeziwe, nokunye. Njengoba ngisesesikoleni, ngineholide lamasonto ayisikhombisa ehlobo. Ngiyalubonga usizo lwenu. Ngizothengisisa lesikhathi ngokuhlakanipha ngokwengeziwe.
M. K., Federal Republic of Germany
Ukulwa Nezinkunzi Isihloko senu esikhuluma ngokulwa nezinkunzi (July 8, 1990) sasivelele ngempela. Intsha eningi eSpain ingaxolela ukuya emdlalweni webhola likanobhutshuzwayo kunokuya enhlokomweni enjalo, kodwa abaphathi bezokuvakasha baphikelela ekucindezeleni izivakashi ukuba ziye emdlalweni wokulwa nezinkunzi. Izinga lokulwa, lapho umjoji ehlasela inkunzi, libi kakhulu kunokuba incazelo yenu ibonisa; njengoba amahhashi asetshenziswa ngokuvamile elimala.
C. M., Federal Republic of Germany
UkuVukela KwaseFrance Ngiyabonga ngesihloko senu esikhuluma ngokuVukela KwaseFrance. (December 22, 1989) Njengoba ngingumMelika owazalelwa eFrance, ngathola isihloko senu sifundisa kakhulu futhi sithakazelisa. Ngiyakwazisa ukwahlukahluka kwezihloko ezivela kuPhaphama!
J. F. S., United States
I“Lupus” Ngase ngigule cishe izinyanga eziyisithupha, futhi odokotela bengazi ukuthi ngiphethwe yini. Izinsuku ezimbalwa ngemva kokufunda ngesihloko senu esikhuluma ngelupus (May 8, 1990), ukuhlola kwaqinisekisa ukuthi nami nginelupus. Uma bekungeve kungenxa yalesihloko, bengingeke ngibe nawo umqondo walokho odokotela ababekhuluma ngakho. Ngenxa yokuthi bengazi okuthile ngalesisifo, ngiye ngakwazi ukubuza imibuzo ebengingeke ngiyibuze ukuba bekungenjalo. Ngiyanibonga kakhulu ngokungikhanyisela.
K. S., England
Izibankwakazi Njengesazi semivubukulo nesayensi yomlando womhlaba, ngiye ngazijabulela ngempela izihloko zePhaphama! ezikhuluma ngezibankwakazi. (February 8, 1990) Ngokuphathelene nesikhathi sokunyamalala kwazo, lezihloko zaphawula ukuthi amathambo abantu amadala atholakala ezingqimbeni zamadwala ngaphezulu kakhulu kwalezo ezinamathambo amadala ezibankwakazi futhi kunezingqimba zamadwala phakathi kwazo. Ezingxenyeni eziningi zomhlaba, lezizingqimba zamadwala eziphakathi nendawo nazo zinamathambo amadala. Izinhlobonhlobo eziningi ezintsha zezilwane zitholakala kulezizingqimba, njengezindlovu, amakati anamazinyo anjengezinsabula, nezinhlobonhlobo ezihlukene zezinyoni ezihamba phansi. Lokhu kungasikisela kakhulu ukuthi uNkulunkulu wayeqhubeka edala izilwane ezintsha ngemva kokunyamalala kwezibankwakazi nokuthi izibankwakazi zanyamalala ngesikhathi sesithupha sokudala.
G. S., Canada
IBhayibheli alisisho ngokuthé ngqo isikhathi sokudalwa noma sokunyamalala kwezibankwakazi. Nokho, amaphuzu kaG. S. ayathakazelisa.—ED.
Ukuphila Nesithuthwane Ngokuphathelene nesithuthwane (June 22, 1990), ngithola ukuthi abantu abaningi abasiqondi. Abantu bangitshela ukuthi ngiyogwinya ulimi lwami, kodwa odokotela bathi akunakwenzeka. Ngiye ngatshelwa futhi ukuthi nginedemoni ngenxa yalokho iBhayibheli elikushoyo kuMathewu 4:24. Ngenxa yokucatshangelwa ngaphambili komuntu, abantu abasivumeli ukuba senze izinto ezithile. Kodwa eqinisweni kuncane kakhulu angenakukwenza umuntu onesithuthwane.
V. E., Australia
Kuye kwaba nokungaqondi okuningi ngokuphathelene noMathewu 4:24, okhuluma ngoJesu ephulukisa “abakhwelwe ngamademoni, nabanesithuthwane, nabafé uhlangothi.” Nokho, ukufundisiswa kahle kombhalo kwembula ukuthi iBhayibheli lenza umahluko phakathi kokukhwelwa amademoni nezifo ezingokomzimba njengesithuthwane.—ED.