Usizi Lwami Endizeni I-232

Njengoba Ilandiswa Ngowasinda

Ngenkathi iNdiza i-232 yeUnited Airlines iwela ensimini yombila eIowa ngonyaka odlule, kwafa abagibeli abangu-110 nezisebenzi zasendizeni. Kodwa, ngokuphawulekayo abangu-186 basinda.

“SIZOHLALA eDolobheni laseSioux ngenxa yesimo esiphuthumayo,” kuxwayisa umshayeli. “Kuzoba buhlungu.”

KwakunguJuly 19, 1989, futhi mina nomyeni wami sasiya eChicago siyokwethamela umhlangano omkhulu wenkampane yamacomputer leyo umyeni wami, uKevin, ayeyiphethe. Sase sisukile kakade eAlbuquerque saya eDenver, lapho sahlangana khona nomngane wethu owayeya emhlanganweni ofanayo, kodwa owayezogibela enye indiza. Ngikhumbula ukuthi santela ngokuthi obani ababezofika kuqala eChicago. Indiza yethu, iUnited Flight 232, yasuka kuqala; lena enye yayihlelelwe ukuba isuke cishe emizuzwini eyishumi kamuva.

Inkinga Endizeni

Ngokungazelelwe, phakathi nokudla kwethu kwasendizeni, kwaba nomsindo omkhulu, futhi indiza yaqala ukutekezela futhi yehla. Ngokushesha ngemva kwalokho umshayeli wamemezela ukuthi enye injini yayingasasebenzi nokuthi sasizokwephuza ukufika eChicago. Wayezwakala engathukile.

Abalindi basendizeni babekhathazekile kodwa hhayi ngokwedlulele. Wonke umuntu wayekhuluma ngalesimo, kodwa akekho owayeqiwe uvalo. Kamuva, ngathola ukuthi indiza yayikwazi ukundiza iye ngakwesokudla kuphela ngoba izintambo ezisebenza ngomoya zazinqamukile ngenkathi injini ihlakazeka.

Ngokushesha umshayeli wamemezela ukuthi sasizohlala eDolobheni laseSioux, eIowa, futhi sasizohlala kabuhlungu. Wathi kufanele ukuba konke kuzohamba kahle, kodwa wasiyala ukuba sizilungiselele ukuphahlazeka kwayo uma ihlala. Abalindi basendizeni basibonisa indlela yokubopha amabhande ethu asezihlalweni nokubamba amaqakala.

Kusukela ngesikhathi injini ihlukana, ngaqala ukukhala, futhi ngangingakwazi ukuthula. UKevin wangibamba, futhi wenza umthandazo wethu sobabili oya kuJehova uNkulunkulu. Yeka ukuthi sasijabule kanjani ngokuthi amantombazane ethu amabili eneminyaka eyisithupha neneminyaka emibili, ayengahambi nathi kuloluhambo!

Owesifazane owayeseduze kwami, nabafana bakhe ababili, wayamela ngakimi wabamba isandla sami njengoba sasilungiselela ukuhlala. Indiza yehla kahle, futhi ngempela ngacabanga ukuthi sasihlale kahle lapho ngiba nomuzwa wokuthi sase sithintile phansi.

Ukusinda Nokuyiswa Esibhedlela

Ngahlala ngivale amehlo ami futhi ngangizizwa sengathi ngisemotweni yokudlala eshwibekayo, ngibona ukukhanya kwelanga ngamehlo ami acimezile. Into yokugcina engiyikhumbulayo ukuthi izicathulo zami zazidonseka, futhi ngazama ukugobisa izinzwane zami ukuze ngizibambe zingaphumi.

Lapho ngivula amehlo, kwakumnyama, futhi ngangihamba. Umhlengi wayephendula isihlalo sami. Sasisensimini. Yayimnyama futhi iluhlaza, futhi ilanga lalibalele saká. UKevin wayesalokhu ebophekile eduze kwami. Ngabiza igama lakhe kodwa akazange aphendule.

Bangibeka emhlabathini, lapho ngaziphakamisa khona ngezindololwane. Ngabuza ukuthi umyeni wami wayesindile yini. Umhlengi wanikina ikhanda. Ngavele ngaphamazela. Phakathi nohambo ngemoto yeziguli, ngangizwa yonke imisindo kodwa ngangingayilalele ngempela. Ngezwa iso lami livuvukala.

ESikhungweni Sezempilo saseMarion County, abantu babenakekela futhi benosizo, ikakhulukazi umhlengikazi okuthiwa uLori. Ngangiphapheme ngokwanele ukuba ngikwazi ukumnikeza inombolo kadadewethu yocingo eAlbuquerque, futhi washaya ucingo ukuthi azise umkhaya wakithi ukuthi ngangiphila.

Empeleni ngangicabanga ukuthi njengoba ngangiseIowa, akukho muntu owayezoza azongibona. Kodwa ngalobobusuku bokuqala, abadala ababili basebandleni eliseduze loFakazi BakaJehova bangihambela esibhedlela. OFakazi bakuleyondawo baqhubeka bengihambela, bengishayela ucingo, futhi bengibhalela phakathi nokuhlala kwami izinsuku ezine. IUnited Airlines yavula i-akhawunti kwaJ. C. Penney’s, futhi oFakazi bangithengela ukuze ngibe nokokwembatha.

Ngosuku olulandelayo ngaphinde ngamangala lapho umama, udadewethu, nomfowabo kaKevin nabazali bakhe bonke befika ukuze babe nami. Akekho kubo owayefuna ngicabange ukuthi uKevin wayefile, ngakho ngangisalokhu nginenhlansi yethemba lokuthi kwakungenzeka abe phakathi kwabalimele abangaziwa.

Lapho ngibuka izindaba kuthelevishini, angikukholelwanga engakubona. Ngangingazi ngisho nokwazi ukuthi indiza yaphahlazeka! Ngenkathi ngicabanga ukuthi indiza yayisithintile phansi, ngathatha ngokuthi sasesiphephile. Ngangingazange ngizibuze nakancane nje ukuthi kungani sasingaphandle kwendiza. Uhlu lwezihlalo mina noKevin esasikulo lwalungemuva kophiko. Sasisengxenyeni emaphakathi yezihlalo ezinhlanu, futhi ngenkathi indiza ihlukana phakathi izihlalo zethu zawela phansi. UKevin nowesifazane owayeseduze kwami bafa, kodwa abafanyana bakhe ababili kanye nami sasinda.

Omunye umhlengi—okuwukuphela kwakhe engangimkhumbula—wangihambela esibhedlela. Ukuthi abanye baphila futhi abanye bafa kwakumkhathaza. Kwakuyindaba ‘yesikhathi nesenzakalo esingalindelekile okwehlela labo abahilelekile,’ ngichaza. (UmShumayeli 9:11, NW) UNkulunkulu akabelanga abantu abathile ezihlalweni lapho babezokufa khona futhi abanye ezihlalweni lapho babezosinda khona. Ngamnikeza ipheshana leBhayibheli elithi Liyini Ithemba Ngabathandekayo Abafile? nencwajana engangomagazini ethi “Bheka, Ngenza Konke Kube-Kusha.” Sasingathana, futhi ngicabanga ukuthi wayesezizwa engconywana lapho ehamba.

ULori, owayenakekela amanxeba ami ekamelweni labalimele, waqhubeka engihambela kukho konke ukuhlala kwami esibhedlela, ngisho nakuba ngangingekho ohlwini lwakhe lweziguli. Wayewababaza amandla ami angaphakathi, futhi ngazama ukumchazela ukuthi ngangiwathola kuNkulunkulu wami, uJehova, owayengisiza ukuba ngibhekane nesimo.—IHubo 121:1-3.

Ukuqhubeka Ngibhekana Nesimo

NgeSonto, ngoJuly 23, ngase ngikulungele ukuqedela ukusimama kwami ekhaya. Njengoba sasikhwela endizeni, ngangiziduduza ngezinkulumo ezikhuthazayo futhi ngagxila ekuphefumuleni kwami ukuze ngingathuki. Ngenkathi uMercedes wami oneminyaka emibili, engibona ngibhandishiwe yonke indawo futhi nginemihuzuko, wayengafuni nokungibona. Kwathatha izinsuku ezintathu noma ezine ukuba aphinde angemukele futhi. UTarrah wayejabula ngokubuya kukanina, kodwa wayemkhumbula uyise.

Ukuba nalabo ababemazi uKevin futhi ababeyibonile intuthuko yakhe engokomoya (wayezobhapathizwa ngo-October njengomunye woFakazi BakaJehova) kwenza kwaba nzima kakhudlwana ngami ukuba ngibhekane nesimo esingokoqobo sokufa kwakhe. Abanye bathi kwakungakaze kube nomngcwabo omkhulu njengowakhe eSanta Fe. Wayekwazi ukuba umngane futhi wayethinte ukuphila kwabantu abaningi.

Ngaqaphela ukuthi kwakumelwe ngihlale ngimatasa nokuthi awukho umsebenzi ongcono njengenkonzo yobuKristu. NgoApril nangoMay, ngangihlanganyele enkonzweni yobuphayona obusizayo, uhlobo oluthile lwenkonzo yesikhathi esigcwele. Manje ngangizimisele ukuphinda ngenze kanjalo ngoSeptember. Ukuhileleka nabanye abantu nezinkinga zabo kwakuwusizo ngempela. Futhi ngaqala nokwenza izinto zasendlini, njengokufaka okokusitha ilanga emafasiteleni, ukufaka iphepha lasobondeni endlini yami yokudlela nasendlini yokuphumula, nokupenda kabusha itafula lasendlini yokudlela.

Ngenkathi kwenzeka ingozi, ngangiqhuba izifundo zeBhayibheli zasekhaya ezimbili nabantu abanesithakazelo eZwini likaNkulunkulu, futhi ngemva kokuwa kwendiza omunye owayekade engumfundi ngaphambili wafuna ukuphinda aqhubeke nesifundo sakhe. Bonke labafundi abathathu babuza: ‘Kungani uJehova asindisa wena kodwa hhayi uKevin, njengoba naye wayenza konke okusemandleni akhe ukuze ajabulise uNkulunkulu?’

Ngabachazela umehluko ophakathi kwesenzo sikaNkulunkulu nenhlekelele engokwemvelo noma ingozi. Uma kuyisenzo sikaNkulunkulu, sinikezwa isixwayiso saphezulu sokuthi kukhona okuthile okuzokwenzeka. Isibonelo salokho uZamcolo wosuku lukaNowa. Kulesosimo uNkulunkulu watshela uNowa ukuthi enzeni ukuze agweme ingozi. Kwakumelwe akhe umkhumbi. Ngakolunye uhlangothi, izingozi nezinhlekelele ezingokwemvelo zisuke zingalindelekile futhi zithinta noma ubani ngokungakhethi, omuhle nomubi. Akekho owayazi ukuthi kukhona okwakuzokonakala endizeni yethu. Ukube babekwazi lokho, ngabe akekho owayigibela. Ukusinda kwami kwenzeka ngengozi njengoba kwaba njalo nangokufa kukaKevin.

Abantu abangitshela ukuthi “nginamandla” kangakanani abaqapheli ukuthi kukaningi kangakanani ngicishe ngikhala. Kusangithatha isikhathi ukuba ngikhohlwe okuhlangenwe nakho kwami. Ngingakhuluma ngoKevin noma ngibuke izithombe futhi kungenzeki lutho kuze kube yilapho sengingedwa; bese ngiyakhala. Kungizwisa ubuhlungu kakhulu ukuthi ngalahlekelwa umngane wami ngemva kwesikhathi esincane kangaka sindawonye, iminyaka eyisikhombisa nje kuphela.

Amadodakazi ami amancane abonisa isithakazelo esingaphezu kwesivamile kunoma yibaphi abazalwane abangamaKristu abasivakashelayo, ngezinye izikhathi abambe imilenze yabo ukuze bangahambi. UTarrah wathukuthela okwesikhashana futhi ngezinye izikhathi wayekhala ngaphandle kwesizathu sangempela. Nokho, uqhuba kahle esikoleni futhi uzama ukutshela afunda nabo ngovuko.—Johane 5:28, 29.

Sizama ukwenza ukuphila kwethu kube lula futhi senze inkonzo yobuKristu ibe indlela yokuphila. Ngosizo lukaJehova sizokufeza lokho. Cishe esikhathini esingangonyaka esidlule, umngane wangikhuthaza ukuba nginganqikazi ngivele ngiqale ukukhonza njengephayona elivamile. Ngiyajabula ngokuthi ngasemukela lesosikhuthazo. Njengesikhonzi sesikhathi esigcwele, ukusiza abanye ukuba bafunde ngezinjongo zikaNkulunkulu kuye kwangisiza ukuba ngihlale nginombono okhanyayo wenjongo kaNkulunkulu enhle yokudala ipharadesi lasemhlabeni nokuvusa abathandekayo abafile. (Luka 23:43; IsAmbulo 21:3, 4)—Njengoba ilandiswa nguLydia Francis Atwell.

[Isithombe ekhasini 26]

Nginomyeni wami ngaphambi kohambo ngendiza

[Umthombo Wesithombe ekhasini 25]

UPI/Bettmann Newsphotos