Okwenza Ngishayele Izindiza Nakuba Yaphahlazeka Nami

INDIZA yethu enenjini eyodwa, ethwala abantu abayisithupha Cessna 210 yayisanda kusuka nje esikhumulweni sezindiza eSweden. Sasindiza phakathi kwenkungu ekhasa phansi yasekuseni lapho ngokuphazima kweso kubonakala into emnyama emamitheni ambalwa ngaphambili. Ngomzuzwana nje, uphiko lwethu lwangakwesokudla, lugcwele uphethiloli, lwahlusuka futhi lwaqhuma. Ngokulandelayo, umnyango ongasohlangothi lwami wandizela kude. Indiza evuthayo yawa ngekhala, yashaya emhlabathini, yagxuma, futhi yakhukhuluza amamitha angu-92 emenweni ngaphambi kokuba ime.

Nakuba ngangisangene futhi ngididekile, kwakunento eyodwa nje engqondweni yami​—⁠ukuphuma kulemvithi evuthayo. Amalangabi akhotha uphiko lwangakwesobunxele, nalo olwalugcwele uphethiloli. Ngaphuthaza ibhande lokuphepha futhi ngalikhumula. Ngiya ngekhanda, ngagxuma nginqamula emlilweni kaphethiloli futhi ngagcina sengisodakeni olwaluqhele ngamamitha ambalwa. Kungalesosikhathi kuphela lapho engaphawula khona ukuthi ingxenye engezansi yomlenze wami wangakwesobunxele yayifahlazekile.

Umngane wami, okunguyena owayekade eshayela lendiza, wayethukile kodwa cishe wayengalimele. Ngammemeza ukuba angisize ukuba ngiqhele ngamanye amamitha ambalwa. Ngemva kokwenzenjalo, wagijima ukuze ayofuna usizo. Nokho ngaqhubeka ngigaqela kude. Njengoba ngase ngicishe ngiwe ngenxa yokukhathala, uphiko lwangakwesobunxele lwandiza lwabheka phezulu futhi lwaqhuma. Izingcezu ezivuthayo zavuthukela kimi nxazonke. Khona-ke kwathuleka, ngaphandle kokuhlohlo-​zela kwemililo emincane eyayokhelwe uphethiloli.

Ngenkathi ngilindele imoto ethwala iziguli, ngilele ngomhlane odakeni, ngaqaphela ukuthi sobabili ngabe sifile. Ngazi ngalesosikhathi kunanini ngaphambili ukuthi ukuphila akufanele neze kuthathwe kalula kodwa kufanele kunakekelwe futhi kusetshenziswe ngokuhlakanipha.

Nokho, ingabe ngangisayophinde ngizishayele izindiza? Abantu abaningi kakade banovalo ngempela ngokugibela izindiza ezincane, futhi imibiko yezingozi enjengalena ithambekele ekukhuliseni uvalo lwabo. Mhlawumbe ukuziqonda ngokunembile izingozi ezihilelekile nokuthi izinsongo ezinjalo zingavinjelwa kanjani kuzosiza ekudambiseni noma ikuphi ukwesaba okungadingekile ongase ube nako ngokugibela indiza encane.

Okwenza Saphahlazeka

Ngayigibela okokuqala indiza encane eminyakeni engu-20 edlule. Ngangimangele ngokujabulisayo. ‘Lena indlela enhle kakhulu yokuhamba,’ ngicabanga. ‘Ingangongela isikhathi esiningi emsebenzini wami njengemenenja yezinto ezithengiswayo.’ Ngokushesha ngafunda ukushayela izindiza, futhi kuze kube namuhla ngiye ngandiza amahora angu-⁠2 000. Isitifiketi sami sibonisa ukuthi ngiyakufanelekela futhi nokushayela ngemishini kuphela, okudingeka lapho kungabonakali kahle ngaphandle.

Nokho, ekuseni ngalolosuku oluvusa amadlingozi, ngangiwumgibeli ongashayeli ngihamba amakhilomitha angaba ngu-500 ngisuka edolobheni lase-Eslöv eningizimu yeSweden ngiya enhloko-dolobha, iStockholm. Kwakumelwe ngithathe indiza entsha futhi ngiyishayele ngibuyele nayo emuva e-Eslöv. Kodwa loluhambo lwaphela emizuzwaneni engu-27 ngemva kokuba sisukile phansi. Kungani? Iphutha lomuntu​—⁠umshayeli wayiqonda ngokungeyikho indawo esasikuyo enkungwini futhi washeshe wawagoqa amachopho ezimpiko. Ngakho-ke, asibange sisakhuphuka, sehla sibheke phansi, futhi sashayisa umbhoshongo.

Ukuphepha emoyeni ngokuyinhloko kuncike ezicini ezintathu​—⁠ukwethembeka kwendiza nokwahlulela nokuhlangenwe nakho komshayeli. Noma kunjalo, kuye kwasungulwa izinqubo eziningi lezo lapho zisetshenziswa, ezenza ukuhamba emoyeni kube okuphephile ngempela.

Ngaphambi Kokusuka

Ngaphambi nje kokusuka emhlabathini, umshayeli ophapheme uyocabangela ngokucophelela izici ezinjengokufaneleka kwakhe siqu nesimo esingokomzimba, indiza, isimo sezulu, abagibeli, nesimo sezikhumulo zezindiza ezisetshenziswayo.

Izindiza zanamuhla zesimanje kuyethukela ukuba ziphahlazeke ngenxa yamaphutha angokomzimba noma angokokwakhiwa kwazo. Noma kunjalo, kunencwadi yamarekhodi kuleyo naleyondiza umshayeli okumelwe agcine kuyo amarekhodi akho konke ukundiza kwakhe kanye nanoma imaphi amaphutha awatholayo. Lamaphutha kumelwe alungiswe abalungisi abagunyaziwe ngaphambi kohambo olulandelayo. Ngaphezu kwalokho, izingxenye zendiza, njengezinjini, ophephela, nezinto eziningi zokuqondisa indiza, zingasetshenziswa isikhathi esimisiwe kuphela ngaphambi kokuba kudingeke ukuba zilungiswe. Lapho isikhathi sokusebenza kwazo siphela, imithetho yezindiza ngokuvamile ifuna ukuba zishintshwe noma zilungiswe kabusha ngokuphelele​—⁠ngisho noma zisasebenza kahle kakhulu! Ngaphambi kohambo ngalunye lokuqala losuku, umshayeli kumelwe ahlole indiza elandela uhlu lokuhlola oluhleliwe. Abashayeli abaningi bakucophelela kakhulu ukunamathela kulezinqubo zokuphepha. Kakade, nokwabo ukuphila kusengozini.

Ngokuthakazelisayo, izingxenye eziningana zezindiza, njengamamagneto enjini nesimiso sokudumisa injini, iwashi elibonisa ukuphakama, kanye namasondo okuhlala, kuhambisana nezingxenye ezilindele isimo esiphuthumayo. Uma isimiso esiyinhloko sihluleka, lezozingxenye zingena esikhundleni sazo, futhi indiza isengehla ngokuphephile. Kuyavunywa, umshayeli akanakukwazi ukubona kusengaphambili konke ukuhluleka okungenzeka endizeni, kodwa ngekhono elanele angayigwema inhlekelele uma umshini othile uhluleka.

Ngaphambi kokundiza umshayeli uyonquma futhi ukuthi uzoshayela ngokweVFR [(visual flight rules) imithetho yokushayela ngaphandle kokusebenzisa imishini] noma ngokweIFR [(instrument flight rules) imithetho yokushayela ngokusebenzisa imishini] yini. Izindiza ezindiza ngeIFR ziphethwe abalawula izinto ezihamba emoyeni besebenzisa iradar. Nokho, abashayeli abaningi bezindiza ezincane abakugunyazelwe ukushayela okunjalo ngemishini.

Ukunqoba Izingozi Zokushayela Ngaphandle Kwemishini

Ukushayela ngokweVFR kungenzeka kuphela lapho kubonakala ngokwanelisayo. Kuthiwani-ke uma isimo sezulu siguquka siba sibi? Umshayeli angehla kancane kancane futhi ahlale engaphansi kwamafu. Lokhu kubizela ukuzithiba kwangempela nokuqapha ngasohlangothini lomshayeli. Kungase kube ngcono ukuphindela emuva futhi ahlale kwesinye isikhumulo sezindiza. Uma enquma ukuqhubeka, angase angene kwezinkulu izinkinga njengoba umsakazo nemishini yokuhamba emoyeni ngokuvamile akusebenzi ezindaweni eziphansi.

Uma kungenakwenzeka ukundizela phansi, umshayeli angasheshe athole usizo kwabalawula izinto ezihamba emoyeni. Nokho, okokuqala kungase kudingeke anyukele ekuphakameni okuphephe kakhudlwana. Ukushayela emafwini kungase kube okudidayo kumshayeli ongaqeqeshelwanga imishini. Ngakho-ke, kumelwe angaphamazeli futhi agxilise ukunakekela ezintweni ezibaluleke kakhulu. Kufanele akhuphuke ngokuthe ngqó ngesivinini esiyiso nokutsheka; ngokushesha ukuxhumana ngomsakazo nemishini yokuhamba emoyeni kungaphinde kwenzeke. Indiza isingabonwa ngeradar futhi kunikezwe nosizo lokwehlela esikhumulweni esifanele.

Kunezinye izingozi phakathi nohambo lokushayela ngaphandle kwemishini. Ukushayela ezindaweni ezinezinto ezihamba emoyeni eziningi ezingalawulwa kudinga ukuhlala uqaphile nxazonke. Ukushayisana ezindaweni ezinjalo kuye kwaba kuningi ngokwengeziwe ngenxa yokwanda kwezinto ezihamba emoyeni nejubane elikhulu. Amaphutha okuqondisa nemimoya enamandla kungase kuholele ekuncipheni kukaphethiloli.

Nokho, eziningi zalezinkinga zigwenywa ngokuhlela ngokucophelela. Umshayeli omuhle uyohlala ehlola indawo akuyo njalo emizuzwini engu-15 noma engu-20 futhi enze ukulungisa kwendlela okudingekile. Uma engakwazi ukuthola ukuthi ukuphi, angathintana nabalawula izinto ezihamba emoyeni. Lapho kungabonakala ukuthi ubhekephi ngeradar noma ngokuthola amaza omsakazo wakhe. Uma lokhu kwehluleka, angalibangisa ngasechibini elikhulu, umfula, noma kunoma iyiphi enye indawo ebonakala kalula. (Umshayeli ongenalo ikhono angase azame ukuzungeza ukuze athole uphawu olumlahlekele. Lokhu ngokuvamile akuphumeleli futhi kudla uphethiloli obalulekile.)

Izinkinga Zeqhwa

Ngaphansi kwezimo ezithile emkhathini, kungase kube nenkinga ngeqhwa. Iningi lezindiza ezincane zinezinto zokuncibilikisa iqhwa ezilinganiselwe noma azikho kwanhlobo. Futhi lapho iqhwa lakhela ezingxenyeni ezihlukahlukene zendiza, ijubane lingase linciphe kancane kancane kuze kube yilapho indiza ilahlekelwa ikhono layo lokundiza. Lapho indiza ezingxenyeni ezingaphezulu zamafu, iqhwa lingaba usongo lwangempela ngisho nangezinsuku ezifudumele zasehlobo!

Nokho, lapho iqhwa kwenzeka lilala, umshayeli angaphuma kalula enkingeni ngokumane ehlele ezingeni elifudumele kakhudlwana. Nokho, kuthiwani uma izinga lokubanda phansi emhlabeni licishe lishubisa umnkantsha? Lokhu kungaba isimo esingathi sína, futhi umshayeli kufanele acabangele ngokucophelela ukuhlakanipha kokuhamba ngendiza. Kodwa uma umoya womile futhi licwathile, ngokuvamile kunengozi encane yokulalelwa iqhwa naphezu kwezinga lokubanda eliphansi.

Ukushayela Emafwini Emvula

Ukushayela emafwini emvula (cumulonimbus) kuhilela nenye futhi ingozi yangempela. Izindiza ezithile ezincane kuhlanganise nezindiza ezinkulu zezentengiselwano ziye zalimala kabi kakhulu emafwini anjalo. Usongo olukhulu lapha akuwona umbani kodwa amandla omoya amakhulu kanye namatshe esichotho angangesibhakela okungase kuhlanganwe nawo ngezinye izikhathi. Ngokuvamile umshayeli angawabona lamafu futhi awagweme. Nokho, uma ingekho indlela yokudlula ngokuphephile ezimweni ezinjalo, liyini ikhambi? Umshayeli ohlakaniphile uyasazi isisho esithi​—⁠ungazami ukuphikisana nesimo sezulu esibi. Hlala emhlabathini.

Lezi ngezinye zezingozi zokushayela izindiza ezincane zomuntu siqu. Futhi eqinisweni, ngeke nhlobo ugibele indiza encane ngaphandle kwanoma iyiphi ingozi. Kodwa ingabe lokhu akulona iqiniso nangazo zonke izindlela zokuhamba? Nokho, uma inezinto zayo ezifanele futhi iphathwa ngokuyikho, indiza encane iphephile ngokuqhathaniswa futhi ikahle. Ngakho uma uhamba njengomgibeli, qiniseka ukuthi uyazi ukuthi umshayeli akafaneleki nje kuphela kodwa uhlakaniphile futhi unokwethenjelwa, umuntu okuhloniphayo ukuphila.

Ngenxa yokuthi ngiyaziqaphela izimo zokuphepha, ngisaqhubeka ngishayela. Njengomshayeli, ngihlala ngizibuza ukuthi kukhona yini okuthile okwengeziwe engingakwenzela ukuphepha nokuthi ngiye ngazihlela ngokwanele yini izindlela engingaphendukela kuzo uma kwenzeka kuba khona okwenzekayo. Ukuba nomthwalo wemfanelo ngokuphila kwabanye kuyindaba engathi sína. Ngakho, ukushayela akumelwe neze kube isenzo sokulinga ngokunganaki. Kufanele kusetshenziswe ngokwenzuzo yomuntu nenjabulo. Futhi ngaphezu kwakho konke kumelwe kwenziwe ngokuphephile!​—⁠Inikelwe.

[Izithombe ekhasini 15]

Akukhona konke ukuphahlazeka okuphumela emonakalweni nasekulimaleni njengoba kwenzeka kimi (ngenhla). Abathathu baphuma bengenamyocu kulokhu kuphahlazeka kwendiza (isithombe esifakiwe)