Amandla Enhlebo
UKUZIBULALA kowesifazane osemusha kwaletha ukushaqeka edolobheni laseNgilandi elithulile. Okwa-kushaqisa ngisho nangokwengeziwe kwakuyisiphetho sabehluleli ekuhloleni kwamaphoyisa ngokufa kwakhe: ‘Ubulawe ukuhletshwa okungenanjongo!’ Ngokusobala, igama lalona wesifazane osemusha, idumela lakhe, futhi okokugcina ukuphila kwakhe kwakoniwe inkulumo embi engenanjongo yakulelodolobha.—Rumor and Gossip—The Social Psychology of Hearsay, kaRalph L. Rosnow noGary Alan Fine.
Nakuba kungavamile ukuba imiphumela ibe mibi kangako, akungabazeki ukuthi inhlebo inamandla asabekayo. Ngakolunye uhlangothi, ingase yamukelwe njengendlela ejwayelekile yokunikezelana ukwaziswa okuwusizo. Ngakolunye ingase ibekwe icala ngeziphithiphithi zohulumeni, ukuqhekeka kwemikhaya, nokulimala kwemisebenzi.
Inhlebo iye yabekwa icala lokubangela ukuqwasha, isifo senhliziyo, nokungagayeki kahle kokudla. Futhi ngokungangabazeki nawe siqu iye yakubangela ukukhathazeka ngezikhathi ezithile. Eqinisweni, umlobi uWilliam M. Jones uxwayisa ngokuthi emkhakheni wezamabhizinisi, “kumelwe ukwamukele ukuthi kungenzeka ukuba phakathi nesikhathi sakho sokuphila othile uyozama ukona idumela lakho.”
Ukuhleba okubi akuthandwa cishe kuyo yonke indawo. Phakathi kwamaNdiya angamaSeminole aseUnited States, “ukukhuluma kabi nganoma ubani” kubekwe esigabeni esifanayo nokuqamba amanga nokweba. Kwenye indawo yaseNtshonalanga Afrika, izinhlebi zazisengozini yokuba zinqunywe izindebe zazo noma, okubi ngisho nangaphezulu, zazisengozini yokubulawa! Ngempela, kuwo wonke umlando, kuye kwathathwa izinyathelo ukuze kunqandwe inhlebo.
Phakathi kwekhulu le-15 nele-18 leminyaka, okubizwa ngokuthi isihlalo sokucwilisa kwakusetshenziswa kakhulu eNgilandi, eJalimane, futhi, kamuva, naseUnited States ukuze kuzanywe ukuhlaza izinhlebi ukuze ziyeke ukukhuluma kwazo okulimazayo. Umuntu owayetholakala enecala lokuhleba wayeboshelwa esihlalweni bese ecwiliswa emanzini ngokuphindaphindiwe.
Nakuba isihlalo sokucwilisa sesadlulelwa yisikhathi njengepulangwe elibopha izandla kanye nesitokisi, impi yokuqeda ukuhleba ibilokhu ilwiwa ngisho nasezikhathini zamanje. Ngokwesibonelo, phakathi neminyaka yawo-1960, eUnited States kwakhiwa izikhungo okwakuthiwa ezokunqanda amahlebezi ukuze kubhekanwe namahlebezi ayengalimaza imisebenzi kahulumeni. Izinkonzo ezifanayo ziye zenziwa eNyakatho Ireland naseNgilandi. Kuye kwamiswa imithetho ukuze kunqandwe ukuhleba okuhloselwe ukulimaza ezomnotho ezinhlanganweni ezithile zezezimali.
Naphezu kwemizamo enjalo, ukuhleba kusekhona. Kuyaphila futhi kuyachuma. Akukho mthetho noma imizamo yomuntu esaphumelele ukuqeda lamandla aqothulayo. Ukuhleba kukuyo yonke indawo. Kunokuhleba komakhelwane, ukuhleba kwasehhovisi, ukuhleba kwasesitolo, ukuhleba kwasedilini, nokuhleba kwasemkhayeni. Kweqa imingcele yesiko, yohlanga, neyempucuko, futhi kuye kwachuma kuwo wonke amazinga omphakathi. Omunye uchwepheshe wathi: “Ukuhleba kuvame kangangokuthi kucishe kufane nokuphefumula.” Futhi wathi: ‘Kuyimvelo yomuntu ejulile.’
Yiqiniso, ngokuvamile ukuhleba kudalula uhlangothi olubi kakhulu lwemvelo yomuntu, uhlangothi oluthokozela ukuletha isihlamba edumeleni, ukuhlanekezela iqiniso, nokubhubhisa ukuphila. Nokho, ukuhleba akubona ububi esizalwa nabo. Kunohlangothi oluhle lokukhuluma nje. Futhi ukukwazi ukuhlukanisa phakathi kokuhleba okulimazayo nokungalimazi kuyisihluthulelo sokugwema ukwenza abanye izisulu—nokuba yisisulu wena ngokwakho.
[Isithombe ekhasini 4]
Ukusetshenziswa kwesihlalo sokucwilisa kwakungenye indlela ohulumeni bendawo ababezama ngayo ukubhekana nezinhlebi
[Umthombo]
Historical Pictures Service