Umbono WeBhayibheli
Izinhlekelele—Izijeziso Ezivela KuNkulunkulu?
EPHILIPPINES, izwe elahlaselwa izinhlekelele ezingokwemvelo ngokuphindelela, abantu abaningi baye bazibuza, ‘Ingabe uNkulunkulu uyamlinga umuntu ngezinhlekelele ezinjalo?’ Ngo-1991, ngemva kokuqhuma kwentaba-mlilo okubhubhisa kakhulu kulelikhulu leminyaka, isihloko esiqhamile selinye iphephandaba lasePhilippines sabuza: “Ukuqhuma: Isijezizo Esivela KuNkulunkulu?”
Umhleli waleliphephandaba uNelly Favis-Villafuerte wazwakalisa umbono onjalo lapho ebhala: “Nokho kumaKristu akholelwa iBhayibheli—kunencazelo eyodwa kuphela: Ukuqhuma kwentaba-mlilo eNtabeni iPinatubo kuwukuhambela kwaphezulu kokusikhumbuza ngokwesibili ukuthi kunoNkulunkulu owesabekayo nophakeme onamandla okubusa izindaba neziphetho zabantu nezizwe.” Ngenxa yalokhu kugomela, siyabuza:
Ingabe UNkulunkulu UMninimandla Onke Uyayahlulela Imiphakathi Namuhla?
Ukuthi uNkulunkulu uye wakwenza lokho esikhathini esidlule akunakuphikwa. Izibonelo ezibhalwe emiBhalweni zikaZamcolo wosuku lukaNowa, ukubhujiswa kweSodoma neGomora, nokubhujiswa kabili kweJerusalema, okwakuyidolobha elihlobene negama lakhe elikhulu, kubonisa ukuthi uNkulunkulu uMninimandla onke angasiletha isahlulelo ngenhloso kulabo abahluleka ngokuphindiwe ukuphakamisa izindinganiso zakhe.—Genesise 7:11, 17-24, 25; 2 IziKronike 36:17-21; noMathewu 24:1, 2.
Kodwa kuthiwani namuhla? Ukuthi kwakuyoba khona isikhathi senhlekelele yomhlaba wonke kwabikezelwa uKristu Jesu kuMathewu isahluko 24, uMarku isahluko 13, nakuLuka isahluko 21. Kulezahluko, wakhipha isixwayiso esingokwesiphrofetho sezehlakalo nezimo ezaziyohlobana nokuphela kwalesimiso sezinto ukuze abantu abacabangayo baqaphele ukuthi wayebusa ngokungabonakali esezulwini. Leziprofetho ziyagcwaliseka namuhla. Nokho, kumelwe kuphawulwe ukuthi kanye nesahlulelo ngasinye esishiwo ngenhla, uJehova uNkulunkulu wayekhipha izixwayiso ezicacile, neziphindaphindiwe ngaphambi kokuba kufike imbubhiso. (Amose 3:7) Nokho, esimweni sezinhlekelele ezingokwemvelo ezenzeka esikhathini sethu, ngokuvamile izixwayiso ezivela ezikhulwini zezwe, zisekelwe ekuhloleni okungokwesayensi.
Ngaphezu kwalokho, esahlukweni sokuqala sencwadi yakhe, ivesi 13 umfundi uJakobe usitshela ukuthi: “UNkulunkulu angeyengwe ngokubi, naye uqobo akayengi-muntu.” Njengoba amanani abantu emhlabeni wonke anda, umuntu uphila eduze kwezingozi eziningi ezingenzeka. Ukufunwa kwendawo yokuhlala neyokutshala ukudla kuphumela ekucatshweni kwezindawo ekuqaleni ezazinamahlathi, ngezinye izikhathi kube ngisho negalelo elibi kwezinye izinhlekelele zemvelo ezibangwa ukuna kakhulu kwemvula nokoma ngokushesha.
Khona-ke, bekungeke kube okulungile ukuthi izinhlekelele ezingokwemvelo zithunyelwa uNkulunkulu uMninimandla onke ngokuqondile njengesijeziso kubantu abahlala ezindaweni ezithintekile. Eqinisweni, kulula ukubona ukuthi abaningi abangenacala, njengezingane ezincane, bahlupheka kakhulu ngezikhathi zosizi. Nokho, ngisho nakuba uNkulunkulu uMninimandla onke engazibangeli izinhlekelele ezinjalo, sisengabuza:
Ingabe Zikhona Izifundo Esingazifunda?
Yebo. Kulabo abahlala ezindaweni ezithintekile, kunovivinyo lokuthi izinto zabo ezibonakalayo zibaluleke kangakanani uma ziqhathaniswa nokuphila ngokwakho. Abantu baye bazifaka ezingozini ezingadingekile, ezisongela ukuphila ngezikhathi ezinjalo, ukuze nje basindise izinto ezimbalwa. Kudingeka sikhumbule ukuthi uJesu wathi: “Ukuphila komuntu akumi ngobuningi bempahla yakhe.” (Luka 12:15) Izinto ezibonakalayo zingabuye zithengwe, kodwa akekho umuntu ongabuye athenge ukuphila kwakhe siqu.—Mathewu 6:19, 20, 25-34.
Izinhlekelele ezingokwemvelo futhi zibangela abantu ukuba bacabange ngendlela abaphila ngayo ukuphila kwabo. Umphostoli uPawulu wanxusa amaKristu ukuba aqaphele indlela aziphatha ngayo: “Bhekisisani ukuthi nihamba kanjani, hhayi njengabangahlakaniphile kodwa njengabahlakaniphile, nikusebenzise kahle lokho okunehlelayo, ngokuba izinsuku zimbi.” (Efesu 5:15, 16, Byington) Ukuvivinywa ngakunye umuntu abhekana nakho ekuphileni kwakhe kuyisikhumbuzo sokuthi kubaluleke kangakanani ukuba nokholo oluqinile.
Isifundo sesithathu esisifunda ezinhlekeleleni ezingokwemvelo siwukuthi sidinga ukuhlakulela ukuba nozwela olukhulu, noma ukuzibeka esimweni sabanye. Endaweni enenhlekelele, kudingeka kuboniswe ukukhathalela kothando ngalabo umuntu ahlupheka nabo kunokuba kuthathwe isimo sokuthi ngamunye kumelwe azizamele. Lokhu kuba yiqiniso ikakhulukazi ngalabo abaphathiswe umthwalo wemfanelo wokunakekela abanye. Umprofethi uIsaya wachaza labo ayebabiza ngokuthi “amakhosi” ‘njengabafana nendawo yokucashela umoya nesivikelo esivunguvungwini, njengemithombo yamanzi ogwadule, njengomthunzi wedwala ezweni eliyethileyo.’—Isaya 32:1, 2.
Ekuboniseni uzwela ngezikhathi zezinhlekelele, kunezikhathi eziningi zokuhlanganyela lokho umuntu anakho nabanye, kokubili ngezwi nangesenzo. Ngokwesibonelo, ukuqhuma kwentaba-mlilo yeNtaba iPinatubo nezinhlekelele zayo ezalandela kwanikeza amathuba amaningi okuhlanganyela ekusizeni labo okwadingeka babalekele inhlekelele. Abaningi babengenazo izindlela zokuba bathole ngisho nokudla kwabo kwansuku zonke. Khona-ke, abantu bakwazi ukubonisa ukungabi nabugovu kwabo ngokunika abanye usizo. Nokho, abaningi basalokhu bezibuza:
Ingabe Kuyoba Khona Ukwahlulelwa Kwesintu Kokugcina?
Yebo, kuyoba khona, njengoba kuboniswe ngokucacile eZwini likaNkulunkulu. (Mathewu 24:37-42; 2 Petru 3:5-7) Ngaphambi kokuba kufike lokho kwahlulelwa, kumelwe kwenziwe umsebenzi wokuxwayisa wembulunga yonke, njengoba uJesu aprofetha ngokuqhubekayo: “Kepha ivangeli limelwe ukushunyayelwa kuqala ezizweni zonke.”—Marku 13:10.
Ngaleyondlela, ngamunye wethu kudingeka azibuze, ‘Yini engiyoyenza?’ Sikunxusa ukuba uzenzele isikhathi sokuhlola lokho iBhayibheli elinxusa ngamunye wethu ukuba akwenze ukuze asinde kuleyonhlekelele yembulunga yonke.