Ukufuna Kwami Izwe Elingcono

Njengoba ilandiswa owayeyindelakazi engumKatolika

IZWE elingcono—ingabe lokho kwakungenzeka? Ngokuqinisekile izwe eligcwele inzondo, ubudlova, ubugovu, ukonakala, ukungabikho kobulungisa, nokuhlupheka kwakungelona izwe uNkulunkulu ayelihlosile lapho elidala. Kumelwe ukuba likhona izwe elingcono. Uma lokho kwakungenzeka, khona-ke ngangizimisele ukusiza ekuliletheni.

Ngazalelwa futhi ngakhulela esifundazweni saseCorrientes, eArgentina, indawo edumile ngenxa yokukhulekela kwayo iNcasakazi yaseItatí. Abantu bangamaKatolika, bayithanda kakhulu inkolo, futhi unyaka ngamunye bathatha uhambo oluningi bayokhulekela leyoncasakazi. Ngangiphakathi kwabo. Kusukela ebuntwaneni nganginesifiso sokumazi loNkulunkulu okwakukhulunywa ngaye kangaka, kodwa ubaba wangivimbela ukuba ngiye emakilasini ekhathekizimu. Kamuva, phakathi nesikhathi sami sobusha, ngenxa yabangane bakhe abangalungile, ubaba waba isidakwa. Sonke sahlupheka kodwa ikakhulukazi umama, owaba isisulu esiyinhloko sokuxhashazwa ngamazwi nangokomzimba. Ngokomphumela, ngabazonda abantu bobulili obuhlukile, ngibheka bonke abesilisa njengababi nabonakele.

Umgomo Wami—Isibhamu Sokubulala

Nokho, isikole sangenza ngahlakulela izimfanelo ezingcono. Ngatadisha ngentshiseko nangobuqotho, ngithola iziqu ekuthungeni izingubo nasezifundweni zezentengiselwano futhi kamuva ngathola iziqu ngamalengiso njengothisha. Manje izifiso zami ezazithandeka kakhulu zaziqala ukugcwaliseka: ukuthola igama neziqu okwakuzongikhulula ejokeni likababa. Ngesikhathi esifanayo, ngenza amacebo okusebenza kanzima ukuze ngithuthukise isimo sikamama bese—ngithenga isibhamu ukuze ngibulale ubaba!

Yebo, lokhu akungilethelanga intokozo, ukuthula nenjabulo. Kunalokho, ngazizwa njengesilwane esivalelwe. Ngangineminyaka engu-20 ubudala futhi ngazithola ngisemshophini ngingakwazi ukuphuma.

Ukuphila Okungokwenkolo—Amathemba Aqhathaniswa Namaqiniso

Cishe ngalesikhathi ngaqala ukuzihlanganisa nezindelakazi kanye namaKhomanisi. Zombili lezinhlangothi zazama ukungicindezela ngemiqondo yazo. Kodwa umcabango wokusiza abampofu emazweni akude njengeAfrika neAsia wangenza nganquma ukuba indelakazi.

Ngahlala esakhiweni sezindelakazi iminyaka engu-14. Ukuphila kwami esigodlweni kwakunokunethezeka, kunokuthula. Ngangingawazi umehluko phakathi kwezwe thina zindelakazi esasihlala kulo nezwe laso sonke isintu—lelozwe lobuhlungu nelingenabo ubulungisa lapho abantu behlupheka khona ngaphansi kwejoka elicindezelayo labantu abaphakeme, kwaze kwaba yilapho ngiqala ukusebenza nabapristi abanefilosofi egxile ezweni elisathuthuka.

Enkolweni yami, iTheresian Carmelite Missionaries, kwakushiwo okuningi ngobulungisa, kodwa ababengiphethe babebonakala bengabunaki ngokuphelele ekusebenzelaneni kwabo nabanye. Othisha babethola iholo elingaphansi kakhulu kunalelo elalimiswe uhulumeni, zingekho nezinzuzo eziseceleni zabo nemikhaya yabo, futhi babengayekiswa umsebenzi ngaphandle kokwaziswa kusengaphambili nangaphandle kwesinxephezelo. Isimo sabasebenza ezindlini sasisibi kakhulu; ngemva kokusebenza amahora asukela kwayishumi kuya kwangu-12 esikoleni, kwakudingeka bathole omunye umsebenzi ukuze bazondle bona nemikhaya yabo. Ngangifuna ukulungisa lesosimo esingenabulungisa.

Lapho ngikuthinta lokho kowesifazane ophethe izindelakazi, wangitshela ukuthi ngangidinga nje isibhamu ukuze ngibe ivukela! Ngalesosikhathi ngacabanga ukuthi ngingamane ngibe ivukela kunokuba ngingabi nobuntu njengabo. Ngakho-ke, nganquma ukucela ukukhishwa ezifungweni zasikhathi sonke zokuba msulwa, ubumpofu, nokulalela engangizenzile. Ngangifuna ukusiza isonto emkhakheni owengeziwe. Isicelo sokukhishwa sanikezwa ngokushesha.

Umsebenzi Wami Wezombangazwe

Khona-ke ngaqala ngempela ukugcwalisa isifungo sobumpofu. Izikhathi eziningi ngangingeke ngibe nocezu lwesinkwa ukuba babengekho abantu abanezinhliziyo ezinhle ababengizungezile. Ngokokuqala ngqá, ngathola ukuthi ngempela babephila kanjani abantu abavamile. Ngasebenza kanzima nesonto lasendaweni kuyo yonke imikhakha—engokwenkolo, engokwenhlalo, nengokombangazwe. Njengothisha wabantu abadala, nganginamathuba amaningi okukhuluma nabo ngezimo ezisemuva ezaziphoqelelwa kubo umphakathi, izimbangela zazo, namakhambi angase abe khona. Ayeyini lamakhambi? Okokuqala, ukusebenza ngokuthula nokubhikisha; khona-ke, uma kudingeka, ukusebenzisa ubudlova ukuze kufinyelelwe lowomgomo ofiselekayo, ubulungisa.

Inhlangano yenkolo engokwezombangazwe engangikuyo, eyayihlelwa abapristi abangamaKatolika futhi isekelwa amalungu enkolo, iqondisa imisebenzi yayo ezindaweni ezingakathuthuki zeAfrika, eAsia, neLatin America. Isekela ushintsho olusheshayo, oluphawulekayo lwezimiso zezenhlalo nezomnotho ngenqubo yokuvukela, inqaba ngokuphelele zonke izinhlobo zokuzuzwa kwamakoloni ngezinjongo ezingokomnotho, ezingokombangazwe, nezingokwamasiko. Injongo yayo ukwakha isimiso sokusebenzela uhulumeni eLatin America esithuthukisa ukwakhiwa kwehombre nuevo (umuntu omusha), ekhululekile ezibophweni ezimiswe izimiso zezombangazwe zakwamanye amazwe.

Sazinikela ukuba singene ngokwengeziwe emazingeni abantu abampofu, sizifanisa nesimo sabo ekuphileni. Nginalemigomo engqondweni, ngalwela ukusiza wonke umuntu—omncane nosegugile, osemusha nomdala.

Ukuphila Kwami Kwangasese—Ukusanguluka Okukhulu Kakhulu

Emzamweni wami wokuthuthukisa izimo zabampofu, ngakhohlwa ukuthi inhliziyo ingakhohlisa. Ngathandana nobasi wami, umpristi, engahlala naye iminyaka emibili. Ngokuhamba kwesikhathi ngakhulelwa. Lapho umpristi ekuzwa lokho, wayefuna ngisikhiphe isisu, engakwenqaba, njengoba lokho kwakuyoba ukubulala. Ukuze ngibe nalengane, kwadingeka ngiwuyeke umsebenzi wami nompristi futhi ngilishiye idolobha ngoba ngangesaba ukuthi kwakuzotholakala ukuthi ngangihlobonga naye.

Ngalishiya idolobha ngibuhlungu kakhulu futhi ngacabanga ukuzibulala ngokuba ngiziphonse ngaphansi kwesitimela, kodwa okuthile kwangivimbela. Ngabekezela. Abangane, amalungu omkhaya, nabantu abanomusa edolobheni lakithi banginikeza uthando lwabo, uzwela, nokuqonda—okuthile owukuphela kowesilisa engake ngamthanda angazange akwenze. Lapho indodana yami izalwa, laba yibona abasinakekela. Ngangifuna indodana yami ikhule ibe indoda eqinile, enamandla, eqinile ezinkolelweni zayo futhi ezimisele ukufela imibono yayo. Ngibonisa lesifiso, ngayetha igama elithi Ernesto ngicabanga ngoErnesto Che Guevara (umshokobezi owaziwayo waseArgentina), engangimthanda kakhulu.

Lapho uhulumeni waseArgentina ugumbuqelwa amabutho ezempi, amaqembu ayelwela izinguquko nawo aqala ukushushiswa. Abangane bami abaningi baboshwa. Izikhathi eziningana ikhaya lami lalihlaselwa amaencapuchado (abazembozile), abapequlula yonke into futhi bantshontsha cishe yonke impahla yami. Izikhathi eziningi ngangicelwa ukuba ngivele phambi kweziphathimandla ukuze ngembule ukuthi abangane bami babekuphi, kodwa ngahlala ngithembekile kubangane bami, ngikhetha ukufa kunokuba ngibe imbuka.

Isikhathi Soshintsho

Njengoba ngangiphila ngaphansi kokucindezela okunjalo, ngangidinga othile engangingakhuluma naye, othile engangingamethemba futhi ngencike kuye njengomngane weqiniso. Kwakungalesosikhathi lapho ababili boFakazi BakaJehova bengqongqoza emnyango wami. Ngabamukela ngenjabulo, ngiphawula kubo ukuthula okuthile nobungane okwangikhanga. Ngangifuna babuye bazongifundela iBhayibheli. Lapho bebuya, ngabachazela isimo esinzima engangizithola ngikuso futhi ngabatshela ngokungagwegwesi ukuthi ngangingafuni bahileleke njengabahlangene nami. Bangiqinisekisa ngokuthi babengesabi, njengoba iziphathimandla zazibazi ukuthi bangobani.

Isifundo sethu seBhayibheli sasiyinkinga kusukela ekuqaleni. Njengoba ngase ngilahlekelwe ukholo nokuthembela kuNkulunkulu, kwakunzima kakhulu ngami ukuba ngamukele amaphuzu ezimfundiso asencwadini yokutadisha iBhayibheli ethi IQiniso eliholela ekuPhileni okuPhakade. Ngacishe ngasiyeka isifundo, ngibheka iBhayibheli njengeliyinganekwane nokuthi uMarx wayeqinisile lapho ethi inkolo “iyisidakamizwa sabantu.” Lapho ngizwakalisa imizwa yami koFakazi futhi ngibatshela ukuthi bangachithi esinye isikhathi esengeziwe ngami, baphendula ngokuthi babengakubheki njengokuchitha isikhathi ukusiza abantu abadinga usizo.

Ngathola umbono ohlukile lapho ngimenyelwa ukuya eHholo LoMbuso. Ngase ngikhathele imihlangano lapho ingxoxo, ukuhloniphana, nobungane kwakuntuleka ngokuphawuleka kangaka. Nokho, imihlangano yoFakazi BakaJehova yayehlukile. Isekelwe eBhayibhelini iqinisa ukholo, isishukumisela ukuba sithandane futhi sithande ngisho nezitha zethu.

Ubuntu Obusha BobuKristu Bususa Ubudlova

Ekugcineni ngathola indlela yokuthuthukisa izwe. NgoJune 8, 1982, ngabonakalisa ukuzinikezela kwami kuJehova uNkulunkulu ngobhapathizo lwamanzi, futhi ngemva kwalokho kunanini ngaphambili kwaba isifiso sami ukukhumula umuntu omdala, ihombre nuevo yezombangazwe yobudlova, futhi ngembathe umuntu omusha, nezithelo zakhe ezinhle, ezichazwe kwabaseGalathiya 5:22, 23. Manje sengihlanganyela kolunye uhlobo lwempi, impi yobuKristu, ngishumayela izindaba ezinhle zoMbuso futhi ngizinikela ukuba ngifundise abanye iqiniso loMbuso lezwe elingcono elizayo.

Yeka isibusiso okuyiso ukuba ngikwazi ukufundisa indodana yami esencane ukuthi kunokuba ikhule ilingise uErnesto Che Guevara, ihambe ezinyathelweni zikaKristu Jesu, uMholi neSibonelo sethu! Ngithandazela ukuthi mina nendodana yami, kanye nabo bonke abathandi bokulunga, kuhlanganise nabangane bami bakuqala nezihlobo zami, sengathi singangena kulelozwe elingcono laphakade, umhlaba oyipharadesi ogcwele intokozo, ukuthula, injabulo, nobulungisa. Ubudlova abuzuzisi muntu; bumane nje bufaka inzondo, ukwahlukana, ukukhungatheka, nezinkinga ezingapheli. Ngikhuluma kokuhlangenwe nakho, ngoba ngiye ngaluphila lolohlobo lokuphila.—NguEugenia María Monzón.

[Isithombe ekhasini 22]

Ukushumayela endlini ngendlu eArgentina