Indlela Yokuvimbela Ushevu Womthofu
NAPHEZU kwazo zonke izindaba ezimbi ngokuphathelene noshevu womthofu, isimo asifiphele ngokuphelele. Ngokungafani nezifo eziningi esingakwazi ukuzilawula, lolu olunye usongo lwempilo izikhulu zezempilo ezithi eqinisweni singakwazi ukwenza okuthile ngalo.
INewsweek ibika uNobhala weHealth and Human Services yaseU.S. ethi: “Ushevu womthofu ungavinjelwa ngokuphelele.” Ingozi kashevu womthofu “ingasuswa ngokuphelele phakade,” kwasho esinye isazi esidumile saseyunivesithi sezinto ezinoshevu. “Kwanele manje okwaziwayo ngemithombo nezingozi zomthofu nangezindlela zokuvikela lengozi ukuze kuqaliswe imizamo yokushanela lesifo phakade,” kuphawula iCDC (Centers for Disease Control yaseU.S.). Ekugcineni, iDepartment of Health and Human Services yaseU.S. yanezela umbono wayo: “Siyaziqonda izimbangela zokungenwa ushevu womthofu ebuntwaneni, futhi okubaluleke kakhulu, izindlela zokuziqeda. Umzamo obumbene womphakathi ungasisusa ngokuphelele lesifo eminyakeni engu-20.”
Lokho Ongakwenza
Kungafezwa kanjani lokhu? Okokuqala, izazi ziyavuma ukuthi upende namanzi kuyizisulu eziyinhloko. Ngokwesibonelo, isazi sezinto ezinoshevu esiphawulwe ngenhla sigomela ngokuthi imfuneko eyinhloko yokuqeda ushevu womthofu iwukuba abaninikhaya nabanikazi bezindawo eziqashiswayo kumelwe kube yibona ababona isidingo esiyinhloko sokususa ngokuphelele ushevu womthofu ngokuthatha izinyathelo eziqatha zokushintsha upende omdala namapayipi. Ngakho-ke, abaninikhaya bangase bafune ukwazi ukuthi izindlu zabo zilondekile yini kuloshevu.
“Kodwa ungaphamazeli,” kubhala umagazini i-In Health. “Upende ongasuki awuyona ingozi, nakuba upende oxebukayo nothuli lukapende kuyingozi. . . . Bheka ikhaya lakho ngaphakathi nangaphandle ukuthi awuxebuki yini, ubheke ikakhulukazi esivalweni sepulangwe nasezinsimbini zamafasitela, lapho isimo sezulu nokugudleka kuthambekele ekuxebuleni nasekuchachambiseni izindawo ezipendiwe.” Umnyango wezempilo wesizwe sakini noma kahulumeni ungase ukwazi ukukusiza ukuba uthole ukuthi ikhaya lakho lisengozini yini, mhlawumbe ngokukuqondisa ezindaweni zokwenza ukuhlola eziqeqeshelwe ukuhlola kanye nokususa umthofu. Isixwayiso: Musa ukuzama ukuwususa ngokwakho. Izingane zingase zingenwe ushevu womthofu lapho abazali bazo bexebula futhi bephala upende omdala ezindongeni nasezivalweni, begcwalisa umoya ngothuli olugcwele umthofu.
Amanzi, Amanzi Yonke Indawo
Emakhaya lapho amanzi kuyiwona asolekayo, lenkinga ingase iqale emapayipini axhumanisa indlu nomthombo wamanzi. Indlu endala ingase ibe namapayipi omthofu, umthombo osobala wokungcola. Ngisho namapayipi ethusi nawensimbi angase ahlanganiswe ngomthofu. Kwamanye amazwe kungase kube usizo ukuhlola imithetho yokwakha ukuze wazi ngezindinganiso zokufakelwa kwamapayipi endaweni yakini. Uma unaso isizathu sokukholelwa ukuthi amanzi enu angcolisiwe, ungase unqume ukuba ahlolwe. Emazweni amaningi kunezindawo zokuhlola eziklanyelwe ukwenza lokhu ngemadlana esesilinganisweni.
Kuthiwani uma amanzi enu enesilinganiso esingalondekile somthofu? Yini ongayenza ngakho? Nokho, akuwona wonke umuntu ongase akwazi ukuthatha isinyathelo esiphuthumayo, njengokuvuselela kabusha ukuxhunywa kwamapayipi. Izikhulu zezempilo zinikeza izinqubo ezimbalwa ezilula ukuze kuncishiswe izinga lomthofu. Ngaphambi kokukha amanzi empompini, vulela amanzi abandayo umzuzu owodwa noma emibili, ikakhulukazi uma umpompi ubuvalwe isikhathi esingaphezu kwamahora ayisithupha. Lokhu kuyosiza ekuchitheni noma yimaphi amanzi anoshevu. Futhi ungalokothi usebenzise amanzi ashisayo asempompini ekuphekeni nasekuphuzeni. Cishe kuyoba nomthofu omningi emanzini ompompi ashisayo kunasemanzini ompompi abandayo.
Uma uphuza empompini kagesi esikoleni, ehhovisi, noma efemini, kufanele uvulele amanzi imizuzwana embalwa isikhathi ngasinye ngaphambi kokuwasebenzisa. Abanye ompompi banamapayipi ahlanganiswe ngomthofu.
Umthofu Ekudleni Naseziphuzweni
IFood and Drug Administration yaseMelika (FDA) iye yatusa ukusetshenziswa kwezingilazi ezinomthofu. Umagazini iGood Housekeeping wabika: “Nakuba engekho osikisela ukuba uyeke ngokuphelele ukuzisebenzisa, iFDA isikisela ukuba kugwenywe ukusetshenziswa kwezinto ezenziwe ngomthofu ukuze kugcinwe ukudla neziphuzo isikhathi eside, ikakhulukazi lapho kugcinwa ukudla okuneacid (itomato sauce; amawolintshi, utamatisi, nezinye iziphuzo ezenziwe ngezithelo; iwayini; noviniga) . . . IFDA itusa futhi ukuba izinsana nabantwana bangadliswa ngamabhodlela abantwana anomhlobiso womthofu . . . noma yiziphi ezinye izitsha ezihlotshiswe ngomthofu.”
Kuthiwani ngalawomabhodlela ewayini avalwe phezulu ngocezwana lomthofu? Ezinye izazi zempilo zitusa ukuba ulususe ngokuphelele lolucezwana, futhi ngemva kokudonsa isivalo, umanzise indwangu ngamathonsi ambalwa ewayini bese usula umlomo webhodlela ngayo.
Bomama, ingabe ngokuvamile nizisebenzisa ngokuphindiwe izikhwama zesinkwa zepulasitiki ukuze nigcine ukudla? Abacwaningi baye bathola amazinga aphakeme omthofu kuyinki osetshenziselwa ukubhala lezikhwama, ongaphumela kokunye ukudla. Umthofu awuputshukeli ngaphakathi kupulasitiki futhi ungcolise isinkwa ngaphakathi; nokho, lapho umthengi ephendulela lesikhwama, uyinki onomthofu ungakubangela ukungcola. Uma isikhwama sisetshenziswa futhi, qiniseka ukuthi amagama alotshiwe awathintani nokudla.
Ekugcineni, umagazini iDiscover unikeza lesixwayiso: “Izihambi eziya phesheya kwezilwandle, ikakhulukazi ezivakashela Amazwe Asathuthuka, kumelwe ziqaphele izitsha zokudlela ezenziwe ngobumba; umhlobiso wazo wangaphandle womthofu kungenzeka ukuthi awushiswanga emazingeni aphakeme okushisa adingekile ukuze kuvinjelwe ukuxebuka, ukuvuthuka, nokuphumela kwezinhlayiyana zomthofu ekudleni.”
Yiba Ngolinganiselayo
Esinye isiqondiso esibalulekile sokukhunjulwa lapho kucatshangelwa lokhu cishe nanoma yiziphi izinkinga eziphazamisayo zanamuhla zendawo ezungezile ukuthi: Yiba ngolinganiselayo. Kulula kakhulu ukuphamazela, futhi ukuphamazela akusizi. Iqiniso elidabukisayo liwukuthi indawo yethu ezungezile yonakaliswe izinto eziningi kakhulu ezingcolisayo ngaphandle komthofu. Ukuze siphile ukuphila okungenakho ngokuphelele ukungcola, cishe kuyodingeka ukuba sithuthele kwenye indawo ekude kakhulu. Kodwa ubani ofuna ukuphila njengenkom’ idla yodwa ukuze nje agweme ukungcola? Okuwukuphela kwendlela elinganiselayo yokubhekana nezinkinga ezinjalo iwukuthatha noma yiziphi izinyathelo zokuzivikela ezinengqondo ezidingekayo ukuze sizivikele thina nezingane zethu engozini engathi sína. Isivikelo esiphelele ekusebenziseni komuntu kabi amandla engcebo alomhlaba kumelwe size kamuva.
Futhi siyofika! Ingabe bewazi ukuthi uMdali waleplanethi uthembisa isikhathi lapho isintu siyokwenza umzamo wokuyiguqula ibe yipharadesi? Umuntu akasayikuphinde asakaze ukungcola noshevu obulalayo nomaphi. UIsaya 11:9 uyanezela kulesithembiso: “Abayikwenza [abantu] okubi, bangachithi entabeni yonke yami engcwele, ngokuba umhlaba uyakugcwala ukumazi uJehova njengamanzi asibekela ulwandle.” Akungabazeki ukuthi “ukumazi uJehova” kuyohlanganisa ukuqonda indlela yokusebenzisa insada yamandla engcebo aleplanethi ngendlela engalimazi ezinganeni noma kubantu abadala—kubo bonke.