Umbono WeBhayibheli

Ukuvukela Nemibhikisho—Ingabe Kungaliguqula Izwe?

“KUMELWE Sizikhulumele, Kumelwe Sibhikishe Emigwaqweni.” Sasifundeka kanjalo isihloko somhleli kuyi-National Catholic Reporter, iphephandaba lamaRoma Katolika, ngaphambi nje kokugqashuka kwempi yasePersian Gulf ngo-1991. Sinxusa abafundi ukuba bahlanganyele ekumasheni nasemibhikishweni yokuthula kulo lonke elaseUnited States, lesihloko somhleli saqhubeka: “Kuyodingeka izigidi zabantu kanye nemizamo yamandla eqhubekayo yokufinyelela ukuthula ukuze sinqobe ukunganaki nokuqhosha kweziphathimandla. . . . Abantu kumelwe babhikishe emigwaqweni.”

Izimemo ezinjalo ezishukumisela esenzweni zizwakala ngokuphindaphindiwe namuhla. Ngenxa yezinkinga eziningi kangaka zezombangazwe, zezomnotho, nezendawo ezungezile ezisongela inhlalakahle yesintu, abantu bazizwa bephoqelekile ukuba “bamashe ezitaladini” ngokuvukela, ngokulindela, nangokubhikisha. Lezimpikiswano zisukela ekuqedeni ubugebengu bendawo kuya ekumiseni ukuthula kwezwe. Ngokuthakazelisayo, inani elikhulu lalemibhikisho livunyelwa yizinhlangano zamasonto nabaholi bezenkolo.

Nokho, ingabe kufanelekile ngamaKristu ukuhlanganyela emibhikishweni enjalo? Futhi ingabe ukuvukela—kungakhathaliseki ukuthi kwenziwa ngendlela yokumasha okunesiphithiphithi noma ngemilindelo eshubile yokukhanyiswa kwamakhandlela—kungaliguqula libe ngcono ngempela izwe?

Imibhikisho—Umbono WamaKristu

Esinye isazi sezenhlalo siye sachaza imibhikisho ‘njengendlela ephumelela ngokukhethekile yokuzibonakalisa okungokombangazwe . . . yokushukumisela iziphathimandla ezingenzi lutho ekuthatheni izinyathelo ezidingekile.’ Yebo, labo abamasha ekuvukeleni noma ababhikishayo ngokuvamile benza kanjalo benamathemba okuthi imizamo yabo ebumbene ingakulungisa ukungabi nabulungisa nokonakala okubonakala ezimisweni zamanje zezenhlalo nezingokombangazwe.

Nokho, yisiphi isibonelo uJesu Kristu asishiyela abafundi bakhe? UJesu waphila ngesikhathi lapho abantu abangamaJuda bezithola bengaphansi kokubusa ngonya koMbuso WamaRoma. Ngokuqinisekile, abantu babefisa kakhulu ukukhululwa ejokeni elicindezelayo lamaRoma. Nokho, uJesu akazange akhuthaze abalandeli bakhe ukuba babhikishe, bamashe ngokuvukela, noma bahileleke ngokombangazwe nganoma iyiphi enye indlela. Ngokuphambene nalokho, washo ngokuphindaphindiwe ukuthi abafundi bakhe kwakungamelwe babe ‘yingxenye yezwe.’—Johane 15:19; 17:16; bheka futhi uJohane 6:15.

Ngokufanayo, lapho uJesu eboshwa ngokungafanele izikhulu zikahulumeni, akazange azame ukuvusa ukuvukela, nakuba ngokuqinisekile ayengenza kanjalo uma ayethanda. Kunalokho, watshela umbusi ongumRoma: “Umbuso wami awusiwo owalelizwe. Uma umbuso wami ubungowalelizwe, izikhonzi zami zaziyakulwa ukuba nginganikezelwa kubaJuda. Kepha kalokhu umbuso wami awusiwo owalapha.” (Johane 18:33-36) Ebhekene nokuphikiswa, uJesu wazigwema zonke izenzo zokuvukela, eqaphela isidingo sokungathathi-hlangothi ezindabeni zezombangazwe. Futhi wanxusa abalandeli bakhe ukuba benze okufanayo.

Ngakho-ke, ukuhlanganyela emibhikishweni kuyokwephula isimiso esiyisisekelo sokungathathi-hlangothi kwamaKristu esafundiswa uJesu. Ngalé kwalokho, ukuhlanganyela okunjalo kungase ngisho kuholele ekuhilelekeni kokunye ukuziphatha okungekhona okobuKristu. Kanjani? Imibhikisho eyenziwa ngezisusa ezinhle ngokuvamile iba nomoya wokuvukela osobala, labo abanengxenye kuyo beba yizilwi, behlambalaza, noma beba nobudlova. Ukuhlanganyela ezenzweni ezingekho emthethweni nezabantu abadala isiyaluyalu kungase kuthole ukunakwa, kodwa akuvumelani neze nomyalo weBhayibheli ‘wokuzithoba phansi kwamandla ombuso’ ‘nokuhlalisana ngokuthula nabantu bonke.’ (Roma 12:18; 13:1) Kunokuba likhuthaze ukungazilaleli izimiso zikahulumeni, iBhayibheli linxusa amaKristu ukuba alondoloze ukuziphatha kwawo okuhle phakathi kwabezizwe futhi azithobe kohulumeni babantu, ngisho noma labo abaphethe belukhuni noma bengenangqondo.—1 Petru 2:12, 13, 18.

Abanye bangase bathi, ‘kodwa akuyona yonke imibhikisho enokulwa noma enobudlova.’ Yiqiniso, futhi eminye imibhikisho ibonakala iveza imiphumela emihle. Kodwa ingabe ukuvukela—ngisho nakuba kunokuthula futhi kwenziwa ngenjongo enhle—kungaliguqula izwe libe ngcono ngempela?

Ingabe Kungaliguqula Izwe?

AmaKristu abakhathalela ngokujulile omakhelwane bawo futhi afuna ukubasiza. Kodwa ingabe ukuhlanganyela emibhikishweni ngempela kuyindlela engcono kakhulu yokunikeza usizo? Incwadi ethi Demonstration Democracy ithi: “Kuncane kakhulu okungafinyelelwa nganoma yiliphi ithuluzi lokuzibonakalisa okungokombangazwe.” Ngokungenakuphikwa, ukususa omaye ababhekene nesintu kudinga izinguquko ezingenakufezwa nganoma yikuphi ukuvukela noma ukumasha.

UJesu washo okufanayo lapho ekhuluma ngesimiso senkolo sosuku lwakhe esasinamakhulu amaningi eminyaka sikhona. Ngokuphathelene nalesosimiso sokukhulekela kobuzenzisi esasiqhutshwa abaFarisi, wathi: “Akakho obekela isiziba sendwangu engakashukeki engutsheni endala, ngokuba lokhu okubekelwa kuyo kuyaklebhula engutsheni, kwande ukuklebhuka.” (Mathewu 9:16) Laliyini iphuzu likaJesu? Ukuthi ubuKristu beqiniso babungenakuhambisana nezimiso ezimbi nezigugile ezase zilungele ukulahlwa. Waqaphela ukuthi ukuchibiyela isimiso esingenalusizo kwakungenakuphumelela.

Kuyiqiniso elifanayo ngalesimiso sezinto esiye sathobisa isintu emakhulwini eminyaka okungabi nabulungisa, unya, nokucindezela. UmShumayeli 1:15 uchaza ngokungagwegwesi: “Okuyisigwegwe akunakuqondiswa.” Yebo, isimiso sezwe lanamuhla asinakuqondiswa, naphezu kwemizamo ephawuleka ngokuvelele. Kungani lingenakuqondiswa? Ngoba, njengoba eyoku-1 Johane 5:19 isho: “Izwe lonke [lisemandleni omubi],” uSathane uDeveli. UJesu wabhekisela kulowo ‘njengombusi walelizwe.’ (Johane 12:31) Uma nje lesimiso sisasebenza ngaphansi kwethonya likaSathane, asikho isilinganiso sokuchibiyela esiyoletha inkululeko ehlala njalo.

Lokhu akusho ukuthi amaKristu awanandaba nezinkinga zezwe noma awazimisele ukuthatha isinyathelo esiqondile. Eqinisweni, amaKristu atshelwa ukuba ashiseke kakhulu, hhayi ekubhikisheni, kodwa emsebenzini wokushumayela nokufundisa izindaba ezinhle zoMbuso kaNkulunkulu—wona kanye uhulumeni woMbuso uJesu afundisa abalandeli bakhe ukuba bawuthandazele. (Mathewu 6:10; 24:14) IBhayibheli libonisa ukuthi loMbuso ngeke uzame ukusindisa lelizwe elingenakuguquleka; uyobasusa ngokuphelele ohulumeni ababi nezinhlelo ezingokwenhlalo ezicindezela isintu manje futhi uyofaka esikhundleni sakho isimiso esingamisa ubulungisa nokulunga kweqiniso emhlabeni wonke. (Daniyeli 2:44) Ngaphansi kwesimiso esinjalo, akekho okuyodingeka ukuba amashe ngokuvukela ngoba uJehova uNkulunkulu, ‘osuthisa ukufisa kwakho konke okuphilayo,’ uyoqikelela ukuthi zonke izidingo zethu zaneliswa ngokuphelele.—IHubo 145:16.

[Umthombo Wesithombe ekhasini 18]

Labor Strike, Leslie’s