Uhambo Lwebhasi Lokuya Enkabeni Ye-Australia

Ngumlobeli we-Phaphama! e-Australia

INGABE wake wahamba ngesikebhe emfuleni ogcwele izingwenya? Ingabe wake wakujabulela ukucula njengeqembu ebusuku obukhanyiswe inyanga, usendaweni eqhele ngamakhulu amakhilomitha emadolobheni aphucukile? Ingabe wake wahlanganyela emihlanganweni yobuKristu kuyilapho nihamba ngemoto emgwaqweni omkhulu ngesivinini samakhilomitha ayikhulu ngehora? Okuhlangenwe nakho okunjalo kumane nje kuyisibonelo salokho okwajatshulelwa amakhulu ezihambeli ezivela ezindaweni ezihlukahlukene ezazisohambweni lwebhasi lokuya emhlanganweni wesigodi woFakazi BakaJehova e-Alice Springs enkabeni ye-Australia eshisayo.

“Igama elithi ‘uhambo’ [safari] lalifaneleka,” kwasho esinye isihambeli, “ngoba sasilala ngaphandle ematendeni alalisa abantu ababili. Ngesikhathi sesifika e-Alice Springs, sasesikwazi ukuhloma amatende ethu esikhathini esingaphansi kwemizuzu emithathu! Kwakufana nokubukela i-video esheshayo: Amabhasi ayema, futhi ngokushesha ipaki elingenalutho laligcwala amashumi amatende amancane.”

Niyamukelwa E-“Alice”

I-Alice Springs (ebizwa abantu bendawo ngokuthi yi-“Alice”) iyindawo enhle evundile ezungezwe ugwadule olunesihlabathi esibomvu. Inabantu abangu-23 000 futhi iseningizimu nje yendawo ephakathi yezwekazi i-Australia. Manje iyisikhungo sezivakashi esisebenzisa abantu base-Australia bomdabu ama-Aborigine kanye nobuciko babo obuyingqayizivele njengento evelele.

Nokho, koFakazi, into evelele kulo lonke loluhambo kwakuwumhlangano wezinsuku ezintathu ngokwawo. Kwabathile babo, kwabonakala kuyithuba elijabulisayo lokubonana nabangane abaningi bangaphambili. Inkomishi yetiye eshisayo ingolunye lwezimpawu zomoya wasemaphandleni wokungenisa izihambi e-Australia, futhi umhlangano wagcina lelisiko likhona ngetende leziphuzo eziyingqayizivele zetiye i-billy ne-damper. Itiye i-billy liyitiye nje elibiliswe emlilweni ngekani elifuswe umusi elaziwa ngokuthi i-billy. Ngezinye izikhathi lamanzi abilayo agoqozwa ngothi lwe-eucalyptus noma ugamthilini njengoba izinkambi zithelwa kuyi-billy. Uthi lwe-eucalyptus olubekwe lwavundla phezu kwe-billy luvimbela umusi ukuba ungangeni etiyeni.

I-damper uhlobo oluvamile lwesinkwa. Okuwukuphela kwezithako ezidingekayo ufulawa okhukhumala ngaphandle kwemvubelo kanye namanzi nosawoti. Lapho isashisa, i-damper isikwa ibe izingcezu ezinkulu bese igcotshiswa kakhulu ngebhotela noju. Itende letiye i-billy ne-damper labonakala lingenye yezindawo zokuhlangana ezithandwa kakhulu emabaleni omhlangano.

Ukukhonza Ngokwethembeka Endaweni Engayodwa

IBandla lase-Alice Springs linoFakazi abangu-72 futhi linakekela insimu engamakhilomitha-skwele angu-200 000. Idolobha iDarwin liqhele cishe ngamakhilomitha angu-1 800 ngasenyakatho, futhi i-Adelaide iqhele cishe ngamakhilomitha angu-1 600 ngaseningizimu. Izihambeli ezivakashile zamangala lapho zizibonela ngawazo inselele elethwa ukuphila emaphandleni ngenxa yamabanga amade, ukushisa okungapheli, uthuli, nokuba sendaweni engayodwa.

Isibonelo esivelele idolobhana elinemayini ye-uranium laseJabiru. UFakazi oyedwa kuphela ohlala lapha, futhi uqhele ngamakhilomitha angu-260 ebandleni eliseduze. Nokho, ukuba sendaweni engayodwa akuzange kumenze buthaka ngokomoya. Ukuba khona kwakhe emhlanganweni kwaba isikhuthazo kwabanye abaningi. Futhi, bevela emphakathini oqhelile wama-Aborigine aseJilkmingan, emaphethelweni eZwe lase-Arnhem eNorthern Territory, abafundi abane beBhayibheli beza ukuze babe phakathi kwabangu-26 ababhapathizwa kulomhlangano.

Izihambeli Zenza Ukukhanya Kwazo Kukhanye

Ekupheleni komhlangano, wonke amabhasi akhuphukela enyakatho ngasemaphethelweni ezwekazi lase-Australia. Into evelele kulengxenye yaloluhambo kwakuwuhambo lwesikebhe emanzini ahlanzekile nacwebile eKatherine Gorge endleleni eya eKakadu National Park edumile. Lokhu kwanikeza izihambi ithuba lazo lokuqala lokubona izingwenya endle. Kwakuthakazelisa, kodwa kwethusa ngandlela-thile! Khona-ke, ngemva kobusuku obujabulisayo enhloko-dolobha yaseNorthern Territory, iDarwin, indawo elandelayo lapho lamabhasi ayezoma kuyo kwakuyiSiteshi saseMataranka, esidume ngeziphethu namadamu aso ashisayo anamanzi acwebile azungezwe izihlahla zesundu.

Nokho, ukubona indawo enhle akuzange kuyiminyanise imisebenzi engokomoya. Lamabhasi aba amaHholo OMbuso ahambayo. Kwakuxoxwa ngetekisi lomBhalo nokukhulunyelwa okulotshiwe usuku ngalunye, futhi imihlangano yebandla evamile yamasonto onke yayiqhutshwa endleleni. Omunye wabashayeli bamabhasi owayengeyena uFakazi wahlatshwa umxhwele kangangokuthi, ethatha isinyathelo yena ngokwakhe, wathenga intambo kagesi, i-microphone, kanye ne-plug ukuze kuxhunywe esimisweni sebhasi sokukhuluma neningi ukuze labo abaphendulayo phakathi nalezingxoxo bazwakale ngokucace ngokwengeziwe.

Phakathi naloluhambo, isihambi esesigugile sagula kangangokuthi sasidinga ukuphuthunyiswa esibhedlela sendawo. Sasala nomngane othile, kodwa amabhasi kwakumelwe aqhubeke nohambo. Ezinsukwini ezimbili kamuva, ngemva kokululama kwaso, sona nomngane waso babedangele futhi bedumele kakhulu ngenxa yokuphuthelwa yingxenye yohambo. Kodwa uthando lobuKristu lwanciphisa lokho kudumala kwabo.

OFakazi ababili bendawo ababengabashayeli bezindiza basiqaphela lesosimo. Khona-ke izinto zenzeka ngokushesha. Ngokushesha bobane bagibela indiza encane, beliqondise edolobhaneni lasePort Augusta ukuze bafice amabhasi. Eshukunyisiwe ngokomzwelo omunye wezihambi wababaza ethi: “Sagcwala uthando nokwazisa ngobuzalwane obuhle esiyingxenye yabo!” Kodwa lokho kwakungaphelele. Lapho lendiza ifika, izihambeli ezithile ezazikanye nabo zazikhethela ngokuzithandela ukuhlanganyela ekunikeleni ngemali ukuze kukhokhelwe izindleko zabashayeli bendiza! Umshayeli webhasi washukunyiswa ngokoqobo ngalokubonakaliswa kothando lobuzalwane, ethi wayengakaze abone okuthile okufana nakho ngaphambili.

Omunye wezihambi wathi: “Uma ngicabanga ngamasonto amathathu esawachitha kuloluhambo lwase-Alice Springs, ngakuthola kungokuhlangenwe nakho okuqinisa ukholo nokukhuthaza kakhulu engake ngaba nakho. Okuvelele ngaphezu kwakho konke umoya wobunye esawujabulela sonke. Kwakungeke kusikhathaze ukuthi siyaphi nezwe—igugu langempela kwakuwubunye bethu bengqondo nomoya!”

[Ibalazwe ekhasini 18]

(Ukuze ubone ukuthi indaba ihlelwe kanjani, bheka encwadini)

Indlela yohambo lwamabhasi eya nebuya emhlanganweni wase-Alice Springs

INtshonalanga Australia

INorthern Territory

IQueensland

INew South Wales

INingizimu Australia

IVictoria

ITasmania

IDarwin

IPerth

I-Alice Springs

IBrisbane

ISydney

I-Adelaide

IMelbourne

IHobart

I-Uluru (Ayers Rock)

IPort Augusta

IKakadu National Park

[Isithombe ekhasini 16, 17]

Ama-Aborigine ayephakathi kwababelindele ukubhapathizwa emhlanganweni wesigodi wase-Alice Springs

[Isithombe ekhasini 17]

Umlilo obasiwe okubekwe kuwo itiye i-“billy” ne-“damper”

[Isithombe ekhasini 17]

Ingwenya ithamele ilanga eKakadu National Park

[Izithombe ekhasini 18]

I-Uluru (Ayers Rock) eqhele ngamakhilomitha angu-470 eningizimu-ntshonalanga ye-Alice Springs

Enye yezindawo ezingokoqobo eKakadu National Park yaseNorthern Territory