Umbono WeBhayibheli

UNkulunkulu Uthethelela Ngokuphelele Kangakanani?

“Nginomuzwa wokuthi uNkulunkulu akasoze azithethelela izono zami. Uyongilahla ngenxa yalokho engakwenza.”—UGloria.

UGLORIA wayengenabunzima bokutshela abanye ukuthi uJehova wayengazithethelela izono zabo.a Kodwa lapho ecabanga ngamaphutha akhe, uGloria wazizwa elahliwe. Kwakubonakala kungenakwenzeka ukuzuza intethelelo kaJehova.

Ukuqaphela isenzo noma inkambo yokuphila engalungile kungakhathaza unembeza. Ngemva kokona, uDavide wabhala: “Ngakhathala ngenxa yokukhala usuku lonke. Amandla ami amunceka ngokuphelele.” (IHubo 32:3, 4, Today’s English Version; qhathanisa neHubo 51:3.) Ngokujabulisayo, uJehova uyakujabulela ukuthethelela isiphambeko. “Ungothethelelayo.”—IHubo 86:5; Hezekeli 33:11.

Nokho, uJehova ubona inhliziyo. Intethelelo yakhe ayisekelwe nje emizwelweni. (Eksodusi 34:7; 1 Samuweli 16:7) Isoni kumelwe sivume ububi baso obala, sibonise ukuzisola kwangempela, futhi silahle inkambo yaso embi njengokuthile okunengekayo nokuzondekayo. (IHubo 32:5; Roma 12:9; 2 Korinte 7:11) Kungalesosikhathi kuphela lapho umenzi wobubi engathethelelwa khona futhi athole “izikhathi zokuhlunyelelwa” ezivela kuJehova.—IzEnzo 3:20.

Kodwa ngisho nangemva kokuphenduka, abanye basazizwa belahliwe. Ingabe kumelwe bathwale umthwalo womuzwa wecala phakade? Iyiphi induduzo engatholakala eBhayibhelini kulabo abaphendukile ezonweni zabo futhi bazishiya, kodwa abasaqhubeka bekhathazekile?—IHubo 94:19.

Ukususa Umthwalo

Ecindezelekile ngenxa yamaphutha akhe, uDavide wathandaza kuJehova: “Bheka ukuhlupheka kwami nosizi lwami, ungithethelele zonke izono zami.” (IHubo 25:18) Lapha uDavide wacela uJehova ukuba enze okungaphezu kokuxolelwa. Wacela ukuba uJehova ‘athethelele’ izono zakhe, aziphelise noma azibekezelele, azisuse. Isono sinemiphumela emibi kakhulu, futhi ngokungangabazeki kuDavide lokhu kwakuhlanganisa nomthwalo kanembeza okhathazekile.

Unyaka ngamunye ama-Israyeli ayekhunjuzwa ngokubonakalayo ukuthi uJehova wayengasusa izono zesizwe. NgoSuku Lokubuyisana umpristi omkhulu wayebeka izandla zakhe phezu kwekhanda lembuzi, avume izono zesizwe phezu kwayo, bese ethumela lembuzi kude ehlane. Bonke abakhona babengabona ngeso lengqondo ukususwa kwezono zesizwe.—Levitikusi 16:20-22.

Ngakho-ke abantu abaphendukile ezonweni zabo bangathola induduzo. Izinqubo zoSuku Lokubuyisana zazifanekisela ilungiselelo elikhulu kakhulu lokususa isono—umhlatshelo wesihlengo kaJesu Kristu. U-Isaya wabhala ngokwesiprofetho ngoJesu: “Yathwala nokho izono zabaningi.” (Isaya 53:12) Ngakho, izono zangesikhathi esidlule akufanele zikhathaze unembeza. Kodwa ingabe uJehova uzozikhumbula lezizono kamuva?

Ukusula Isikweleti

Emthandazweni wakhe oyisibonelo, uJesu wathi: “Usithethelele amacala ethu.” (Mathewu 6:12) Igama lesiGreki lapha elihunyushwe ngokuthi “thethelela” yisenzo esithile esisho ukuthi “yeka.” Ngakho, ukuthethelelwa kwesono kufaniswa nokuyekwa, noma ukusulwa kwesikweleti.—Qhathanisa noMathewu 18:23-35.

UPetru wenaba kulokhu lapho ethi: “Ngalokhu phendukani, niguquke ukuba kuhlangulwe izono zenu.” (IzEnzo 3:19) Amazwi athi “kuhlangulwe” asho ukubhubhisa, noma ukususa. Asikisela ukusulwa kombhalo olotshiwe, ukusula isikweleti esidlule.—Qhathanisa neyabaseKolose 2:13, 14.

Ngakho-ke, labo abaphendukile akufanele besabe ukuthi uNkulunkulu uyofuna ukuba bakhokhele isikweleti asisulile. Uthi: “Angiyikukhumbula izono zakho.” (Isaya 43:25; Roma 4:7, 8) Kusho ukuthini lokhu ngesoni esiphendukile?

Ukususa Isisihla

Ngomprofethi u-Isaya, uJehova wathi: “Noma izono zenu zibomvu kakhulu, ziyakuba-mhlophe njengeqhwa; noma zibomvu njengokububende, ziyakuba-njengoboya bezimvu.”—Isaya 1:18.

Imizamo yokususa isisihla esinenkani engutsheni ngokuvamile iba yize. Uma kwenziwe umzamo lesosisihla siyaphupha kodwa nakuba kunjalo siyaqapheleka. Yeka indlela okududuza ngayo ukuthi uJehova angaguqula izono ezibomvu klebhu noma njengokububende futhi azenze zibe mhlophe njengeqhwa.—Qhathanisa neHubo 51:7.

Ngakho, isoni esiphendukile akudingekile ukuba sibe nomuzwa wokuthi sithwele isisihla ukuphila kwaso konke. UJehova akamane nje enze iziphambeko zibonakale ziphuphile, abangele umuntu ophendukile ukuba aphile ngokuhlala edumele.—Qhathanisa nezEnzo 22:16.

Ukusekela Kwabanye

Nakuba uJehova ewususa lomthwalo, esula isikweleti, futhi esusa isisihla sesono, ngezinye izikhathi umuntu ophendukile angase azizwe ehlulwa ukuzisola. UPawulu wabhala ngomenzi wobubi ophendukile ebandleni laseKorinte owathethelelwa uNkulunkulu kodwa owayengase “ahlulwe ngukudabuka okukhulu [“adabuke kakhulu kangangokuba adangale ngokuphelele,” TEV].”—2 Korinte 2:7.

Lomuntu wayengasizwa kanjani? UPawulu uyaqhubeka: “Ngiyanincenga ukuba nimphathe [nimqinisekise, NW] ngothando.” (2 Korinte 2:8) Igama uPawulu alisebenzisa elisho “ukuqinisekisa” igama elingokomthetho elisho “ukuqinisa.” Yebo, abantu abaphendukile abathola intethelo kaJehova badinga futhi isiqinisekiso, noma ubufakazi bokuvunyelwa, obuvela kumaKristu abakanye nawo.

Ngokuqondakalayo, lokhu kungase kuthathe isikhathi. Umuntu ophendukile kumelwe aphilele ukususa imiphumela yesihlamba sesono sakhe futhi akhe umlando oqinisekisayo wokulunga. Kumelwe ngesineke akhuthazelele imizwa yanoma ubani oye wathinteka ngokomuntu siqu ngamaphutha akhe angesikhathi esidlule. Okwamanje, angaqiniseka ngentethelo kaJehova ephelele, njengoba uDavide ayenjalo: “Njengokuba impumalanga yahlukene nentshonalanga, [uJehova] udedisile kangaka kithi iziphambeko zethu.”—IHubo 103:12.

[Umbhalo waphansi]

[Umthombo Wesithombe ekhasini 18]

Return of the Prodigal Son by Rembrandt: Scala/Art Resource, N.Y.