Ubunye Obumangalisa Izwe
IZWE lashaqeka ngokuwa okungalindelekile kobuKhomanisi futhi muva nje ngodlame lobuhlanga olubhebhethekayo. Nokho, ngesikhathi esifanayo, izigidi zaseMpumalanga Yurophu ziye zamangaliswa umsebenzi onobunye wenjabulo, weqembu eliye leqela ngalé kwenzondo yobuhlanga neyobuzwe—oFakazi BakaJehova.
OFakazi BakaJehova baye baphumelela ekulondolozeni ukukhulekela okunobunye ngisho nakuba kwakudlange impi endaweni ebazungezile. Ngo-1991, lapho kuhlangana isixuku sezizwe zonke soFakazi abangu-14 684 eZagreb, eCroatia, iphoyisa elithile lathi: “Bekuyoba kuhle ukubonisa yonke imithombo yezindaba okwenzeka kulenkundla, khona lapha, lapho sibona khona abantu baseSerbia, baseCroatia, eSlovenia, eMontenegro, nabanye behleli ndawonye ngokuthula.”
Ngalowonyaka ofanayo intatheli yezindaba emhlanganweni waseSiberia yabona abantu baseRussia banga umuntu owayesanda kubhapathizwa ongowomdabu waseBuryat. Yazi kahle ukuthi ubuhlobo phakathi kwabantu abahluke kanjalo buyivelakancane, yabuza: “Nikwazé kanjani ukunqoba lemingcele yobuzwe?”
Kulelihlobo oFakazi BakaJehova baba nemihlangano engu-45 eMpumalanga Yurophu nase-Asia, owawuseMoscow naseKiev kungeyezizwe. Sekukonke abangaphezu kuka-368 000 baba khona kulemihlangano engu-45—abangaphezu kuka-112 000 ezweni elaliyiSoviet Union nabangaba ngu-11 000 emadolobheni amane ezwe elaliyiYugoslavia.
Naphezu kwezimpi ezifundazweni zabo, oFakazi abangaba ngu-215 bakwazi ukufinyelela emhlanganweni owawuseBelgrade, eSerbia, ngo-August 19 kuya ku-22. Ababekhona babengu-3 241. Intatheli ethile yaphawula: “Amaqembu avela ngaseSarajevo ngokwayo akwazi ukuba khona. Aqasha ibhasi, futhi kweza abangu-56. Laba babevela eLukavica, ePale, Ilidža, naseVogošća. Kwafika nabantu abayisihlanu bevela eBenkovac. Elinye iphuzu okufanele liqashelwe ukuthi abangu-23 kwabangu-174 ababhapathizwa kulomhlangano babevela kulezifundazwe ezinezimo ezibucayi.”
EMoscow NaseKiev
Ngo-July 28, 1993, ikhasi lokuqala le-New York Times lalinesithombe esikhulu soFakazi BakaJehova eMoscow, namazwi athi: “Inkululeko yenkolo eRussia ilethe amakholwa amasha eNkundleni yaseMoscow iLocomotive ukuze abhapathizwe eyisixuku njengoFakazi BakaJehova.”
I-Times yabika: “Amalungu anezinyembezi ebusweni anga amalungu amasha ayesanda kucwiliswa. Ngokuphambene nokuziphatha okuvamile eLocomotive, akekho obhemayo, akekho othukayo, akekho odakiwe.” Izinsuku ezine oFakazi abavela eRussia nakwamanye amazwe angaphezu kuka-30 bagcwalisa lenkundla ngokukhululeka, inani eliphakeme lababekhona lifinyelela ku-23 743.
Umhlangano omkhulu ngisho nangokwengeziwe wezizwe woFakazi BakaJehova waqhutshelwa eKiev, inhloko-dolobha yase-Ukraine. Kwakuhlangene inani eliphakeme labangu-64 714 eNkundleni iRepublican, engenye yezinkundla ezinkulu kakhulu eMpumalanga Yurophu. Ikhasi lokuqala le-Evening Kiev labika: “OFakazi BakaJehova . . . abahlanganiswa nje kuphela amabheji aluhlaza abhalwe ukuthi ‘Ukufundisa Kwaphezulu’ kodwa nawukholo lweqiniso.”
Indlela Ubunye Obufinyelelwa Ngayo
Ukuthi ubunye obunjalo bufinyelelwa kanjani kwaboniswa kahle uFakazi othile osekhulile wase-Ukraine emhlanganweni waseKiev. Wakhomba phezulu wayesethi, “uJehova.” Khona-ke, elula izingalo zakhe ukuze enze isiyingi, waphakamisa umunwe owodwa. Isigijimi sakhe sasisobala: ‘Sonke simunye, sihlanganiswe ukufundisa kwaphezulu kukaJehova uNkulunkulu.’
Ngokuthakazelisayo, i-Encyclopædia Britannica yabika ngoFakazi BakaJehova ezweni elaliyiSoviet Union, ibonisa isizathu esenza ukuba oFakazi babe nobunye. Yachaza: “Bayazazi izimfundiso zabo [ezisekelwe eBhayibhelini], bangabaguquli babantu abaqotho futhi bahlela konke ukuphila kwabo ngokuvumelana nezinkolelo zabo ezingokwenkolo.” Ngakho-ke, yeka ukuthi kwakufaneleka kanjani ukuthi isihloko semihlangano yalelihlobo yoFakazi BakaJehova sibe “Ukufundisa Kwaphezulu”!
UJesu Kristu, owasekela ukufundisa kwaphezulu, wakhomba isimiso esihlanganisayo lapho ethandaza ngokuphathelene nabalandeli bakhe: “Abasibo abezwe, njengalokhu nami angisiye owezwe.” Yebo, ukuma koFakazi BakaJehova kokungathathi-hlangothi kubenza babe nobunye, njengoba noJesu acela lapho ethandaza: “Ukuba bonke babe-munye, njengalokhu wena-Baba ukimi, nami ngikuwe, ukuba nabo babe-kithina.”—Johane 17:16-21.
Okuhlangenwe nakho kowayehambele umhlangano evela eSpain kubonisa indlela ukungabi ingxenye yezwe okubahlanganisa ngayo abantu bakaNkulunkulu. Lapho esendleleni eya emhlanganweni eMoscow, wahlala eceleni kwendoda evela e-Afghanistan eyachaza ukuthi ngisho nabantu benkolo eyodwa babebulalana empini yombango kulelozwe. Khona-ke yabuza: “Inkolo yenu isekela yiphi inhlangano yezombangazwe?” Impendulo yathi: “Ayikho.” Njengoba oFakazi BakaJehova bengathathi-hlangothi kwezombangazwe, abahilelekile ezimpini zobuhlanga, ezenza abantu balwe.
Izihambeli zomhlangano ezazisohambweni olusuka ezweni elaliyi-republic yaseSoviet iKazakhstan zazibonela mathupha indlela impi engathusa ngayo. Isitimela sazo sazithola siphakathi kwezinhlamvu ezazidutshulwa amabutho alwayo. Yeka indlela ezazijabule ngayo ngokufika eKiev ziphephile futhi zijabulele uthando nobunye phakathi kwezinhlanga eziningi zezizwe eziningi ezazisenkundleni!
Iningana lezihambeli zomhlangano zaseJalimane naseRussia zakwazisa kakhulu lokho ezazikwenzelwe ukufundisa kwaphezulu. Ziseyizinsizwa eminyakeni eminingi edlule, zazizama ukubulalana phakathi neMpi Yezwe II. Kodwa phakathi nomhlangano waseKiev, zazinobunye ekukhulekeleni kweqiniso, njengoba kubonakala ekhasini 7.
Izibukeli Zamangala
IMoscow, eyidolobha elinezakhamuzi ezingaba yizigidi eziyisishiyagalolunye, ngaphambili yayingenalo ithuba lokwazi oFakazi BakaJehova. Yiqiniso, abaningi babeke bezwa ngokushushiswa nokuboshwa kwabo ngaphansi kobuKhomanisi. Futhi, ehlobo lalonyaka, kwase kumiswe amabandla angu-18 eMoscow nangu-13 eKiev ukuze amukele amanani andayo aba khona emihlanganweni yoFakazi. Kodwa manje abantu bendawo babona amashumi ezinkulungwane zezihambeli ezifake amabheji emabaleni omhlangano nakuwo wonke amadolobha abo! Izingqapheli eziningi zahlabeka umxhwele.
Isikhulu esiphethe sezomlilo saseMoscow sathi: “Lomhlangano uhlaba umxhwele kakhulu. Kuyamangalisa ukuthi abantu abaningi kangaka bezizwe ezihlukene bangafunda ulimi olulodwa. Ukuhlanzeka nokuhleleka kwabantu benu kuyangimangalisa. Bengilokhu ngisebenza kulenkundla iminyaka engu-20 futhi angikaze ngikubone okunjengalokhu.”
Omunye umqondisi wezivakashi wathi: “Ngokuvamile lapho ngihola iqembu, ukungezwani kwalo kuba sobala ngokushesha ngemva kokuhamba esikhumulweni sezindiza. Lokhu akuzange kwenzeke ngoFakazi BakaJehova.” Isivakashi emhlanganweni waseKiev sababaza: “Ninobunye ngempela. Yeka indlela izinto ezihluke ngayo ngaphandle kwezindonga zalenkundla!”
Lapho umhlangano waseMoscow uqala ngoLwesine, ngo-July 22, izisebenzi ezimbalwa ezazime phezu kwendawo yokwakha enkulu eseduze zabonakala zimisa umsebenzi wazo okwesikhashana. Ngokusobala zazihlabeke umxhwele ngomsindo wamaphimbo angaphezu kuka-23 000 ayehlabelela. Zaziyomangala ngisho nakakhulu ukuba zazazi ukuthi lezingoma zazihlatshelelwa ngezilimi ezingaphezu kweziyishumi ezihlukene. Ngisho noFakazi abayizithulu abangakwazi ukuhlabelela ngamaphimbo abo “bahlabelela” ngezandla zabo ngendlela yokukhuluma ngezandla.
Indawo yokuhlangana kusihlwa eyayithandeka kwakuyiRed Square enkulu yaseMoscow, ngaphandle kwezindonga zeKremlin. Ngobusuku obungaphambi kokuba umhlangano uqale (kwaze kwashaya ihora leshumi kukhanya), amakhulu amaningi oFakazi bezinhlanga nezizwe ezihlukene ayelapho angana ngenjabulo. Intatheli ye-Moscow Times yaphambukela ngakhona futhi yayinelukuluku lokufuna ukwazi. Yabuza: “Nimelela bani?” Lapho itshelwa, yathi: “Angikaze ngikubone ukuxubana ngenjabulo kwabantu abayizinhlobonhlobo eziningi kangaka eRed Square. Ngokuvamile iqembu elikhulu kangaka liyaye libe lapha ukuze livukele noma libhikishele okuthile.”
Izakhamuzi zaseMoscow naseKiev zazihlabeke umxhwele ngempela ngezinkulungwane zezihambeli zomhlangano ezifake amabheji ezazibingelelana, zangana, futhi zizama ukukhulumisana ngenjabulo. Usomabhizinisi othile wase-Iran owayevakashele eKiev wasondela kuFakazi othile wase-United States futhi wathi: “Ninokuthile okumangalisayo. Bengilokhu nginibhekile ezinsukwini ezimbalwa ezidlule. Ngifuna ezinye zezincwadi zenu ngesiNgisi ukuze ngizifunde.” Wachaza ukuthi ukuba kwakungadingeki ukuba abuyele e-Iran ngakusasa ekuseni, wayezoza emhlanganweni.
Kulo lonke elaseMoscow naseKiev—ikakhulukazi emigwaqweni, ezimpambanweni zezindlela, nasezitimeleni zangaphansi komhlaba—izihambeli zomhlangano zazixoxa nabantu ukuze zibanikeze amapheshana nezincwajana zeBhayibheli. Njalo kusihlwa oFakazi babebonwa bemi phambi kweThuna likaLenin eRed Square bexoxa futhi besakaza amapheshana ngokuthula. Ngokuvamile isipho sasamukelwa kalula, ngokumamatheka okufudumele. Uma isipho sihanjiswa esitimeleni sangaphansi komhlaba, lowomuntu ngokuvamile wayeqala ukufunda ngokushesha. Kwakuvamile ukubona abantu abahlanu noma abayisithupha esitimeleni befunda amapheshana eBhayibheli.
Ngemva kokufunda isigijimi, ngokuvamile umgibeli wayebonisa ukwazisa. “Asikaze sibe nethuba lokufunda ngezinto ezinjena,” kwachaza indoda esikhulile ngesiNgisi esingacacile. “Ngiyabonga kakhulu.” Kwesinye isenzakalo, insizwa ethile nonina babehlabeke umxhwele kakhulu ngesigijimi kangangokuba behla esitimeleni esihamba ngaphansi komhlaba lapho isihambeli somhlangano sehla ukuze baqhube ingxoxo.
IKiev yayigcwele izihambeli zomhlangano ezingoFakazi ezingaphezu kuka-50 000 ezazivela emazweni angaphezu kuka-30, zonke ezazidinga indawo yokulala. Eziningi zahlala emahhotela, emakhaya abantu, nasezikoleni, kodwa ezingaba ngu-1 800 zalaliswa ezikebheni eziyisithupha. Owayengumcoci wesinye salezikebhe washiyela oFakazi incwadi. Wathi: “Kimina kubonakala sengathi nivela kwenye iplanethi. Ninobuhle nokuzwana okukhulu kangangokuba niletha isibusiso. Kungenzeka ukuthi niyizingane zikaNkulunkulu. Ngicabanga ngalokhu ngaso sonke isikhathi.”
Yeka indlela okwakufaneleka ngayo ukuthi oFakazi BakaJehova bakwazi ukuba nemihlangano yabo emikhulu nokuthi izikhulu nabantu ngokufanayo babona izimfanelo ezinhle zobuKristu kanjalo nokuziphatha okudumisa uNkulunkulu! Izikhulu zendawo ezasebenza nalaboFakazi zadumisa kakhulu ikhono, ubungane, nokubambisana kwabo okuhle nabaphathi benkundla neminye iminyango yedolobha.
“Sekuyiminyaka engu-13 lenkundla ingahlanzwa kahle kangaka,” kwasho esinye isikhulu eKiev. Iphoyisa lapho lababaza: “Yeka indlela labantu abamangalisa ngayo! Kunjengokuba sezweni elisha. Angiqondi nje ukuthi kungani nanishushiswa.”
Izici Ezivelele Zomhlangano
KoFakazi baseMoscow naseKiev, isici esivelele esiyinhloko mhlawumbe kwakuyizihambeli zomhlangano eziyizinkulungwane ezazikhona ezazivela kwamanye amazwe amaningi, kuhlanganise namalungu eNdikimba Ebusayo yoFakazi BakaJehova. Injabulo yokuba nje ndawonye, benobunye ekukhulekeleni okunokuthula nezinhlobonhlobo zezizwe eziningi kangaka, yayingachazeki. Lapho isikhulumi esiphethayo eMoscow naseKiev sithi ukubonga kwethu okukhulu kuya kuJehova uNkulunkulu, owenze lomhlangano waba khona, izilaleli zasukuma futhi zashaya ihlombe elinganqamuki imizuzu eminingana kwaze kwaba yilapho isikhulumi siqhubeka nenkulumo yaso.
Ezinye izici ezivelele zomhlangano kwakuyizinkulumo ezazinikezwa usuku ngalunye ngesiNgisi amalungu eNdikimba Ebusayo kanye ne-mibiko emifushane eyanikezwa izihambeli zomhlangano ezivela emazweni ahlukahlukene. Lezinkulumo zesiNgisi zahunyushelwa ezilimini eziningi ngesikhathi esisodwa. Ngokwesibonelo, eKiev, zahunyushelwa kwezingu-16! Ngakho ngokuhlala kulezozindawo ezibekelwe iqembu lolimi oluthile, izihambeli zazikwazi ukuzwa leyongxenye yesimiso ngolimi lwazo.
Esinye futhi isici esivelele somhlangano kwakuwukukhululwa ngesiRussia nangesi-Ukraine kwencwajana entsha ethi Iyini Injongo Yokuphila? Okwaziswa kakhulukazi kwakuwukukhululwa ngesiRussia kwe-Ncwadi Yokuchasisa Isikole SeNkonzo EsingokwaseZulwini, esetshenziselwa ukuhlomisela oFakazi BakaJehova ukwethula amaqiniso eBhayibheli ngokuphumelelayo. Okunye okwakhishwa ngesiRussia kwakuyi-Ncwadi Yami Yezindaba ZeBhayibheli, ewukulandiswa okufingqiwe nokulandelanayo komlando weBhayibheli ebhalelwe intsha ngokukhethekile. Kakade sekunyatheliswe amakhophi angaphezu kwezigidi ezingu-36 alencwadi ngezilimi ezingaphezu kuka-80.
Ukubhapathizwa okukhulu kwabafundi abasha ngempela kwakuyisici esivelele somhlangano. Laqapheleka iqiniso lokuthi iningi lalabo ababhapathizwa kwakuyintsha. Emhlanganweni wabacosheli bezindaba eKiev, umlobeli wephephandaba i-Osvita wabuza: “Okuphawulekayo emhlanganweni wenu inani elikhulu labantu abasha. Banomusa, bayabukeka, futhi baziphatha kahle. Nikwenza kanjani lokhu? Ingabe ninesimiso esikhethekile sentsha? Ngisebenza nentsha, futhi nginesithakazelo esikhulu sokwazi.”
Nakuba ukuzinikezela kuNkulunkulu kumelwe kusekelwe olwazini, hhayi emzwelweni, ukubhapathizwa ngokwakho kuseyisenzakalo esivusa imizwelo, esithinta inhliziyo. EMoscow izilaleli zasukuma futhi zashaya ihlombe kusukela lapho ababezobhapathizwa abangu-1 489 beqala ukusondela ngasemadanyini amathathu okwakubhapathizelwa kuwo kwaze kwaba yilapho bonke sebebhapathiziwe, esikhathini esingaphezu kwehora kamuva.
EKiev, lapho kwakukhona abangaphezu kuka-64 000, kwamiswa amadamu ayisithupha okwakuzobhapathizelwa kuwo ngasohlangothini olulodwa lwenkundla. Njengoba kwakunababhapathizi abayisithupha noma ngaphezulu edanyini ngalinye, kwakubhapathizwa inani labantu abalingana nebandla elikhulu ngempela njalo ngemizuzu emibili. Nakuba kunjalo, ubhapathizo lwaqhubeka isikhathi esingaphezu kwamahora amabili! EMhlanganweni Wezizwe Zonke “Wentando Yaphezulu” ka-1958 eNew York, kwabhapathizwa abangu-7 136. Kodwa eKiev, oFakazi BakaJehova abasanda kumiswa abangu-7 402 abavela e-Ukraine nakwamanye ama-republic ayengawaseSoviet Union benza lolu lwaba ubhapathizo lobuKristu olukhulu kakhulu emlandweni. Laba kwakungabantu abakhuluma isiRussia kuphela abavela ezindaweni lapho oFakazi BakaJehova babevinjelwe khona, futhi base benamashumi eminyaka bevinjelwe kwaze kwaba muva nje!
Isici esivelele somhlangano waseBelgrade kwakuwukuba khona kwezihambeli ezivela ezindaweni ezikhungethwe yimpi, ezihlaselwayo. Isisebenzi esithile sasemhlanganweni sabika: “Lezihambeli kaningi zaveza ukubonga kwazo ngemfudumalo ngelungelo ezilinikeziwe lokuza kulomhlangano. Nokho, sinomuzwa wokuthi abakhuthazwa ngempela kwakuyithina sonke esakwazi ukuhlangana nabo futhi sabona uthando nentshiseko yabo ngeqiniso leBhayibheli.”
EMihlanganweni eminingi ‘Yokufundisa Kwaphezulu,’ kwafundwa incwadi ethinta imizwelo eyabhalwa ngobusika obudlule evela eSarajevo. “Izinga lokushisa cishe lingu-5 degrees Fahrenheit [-15° C],” kusho lomlobi. “Nginomkami namadodana amabili futhi asinawo ugesi nezinkuni ezanele . . . Sizwa ukuqhuma kwezibhamu ezingontuluntulu neziqhumane. Kodwa ezinhliziyweni zethu sizolile futhi sifudumele ngenxa yeqiniso nangenxa yobuhlobo bethu obuhle noJehova. . . . Siyaninxusa ukuba niqhubeke nithandaza kuJehova ukuba asisize siphikelele futhi sikhuthazelele zonke lezizinto ezihlasimulisayo, siqinile okholweni. Siyanithandazela!”
Kwenza Mehluko Muni?
Lapho beqhathaniswa nokungezwani okubonakala phakathi kwezinkolo zezwe, ngokusobala oFakazi bahluke kakhulu. Kodwa bangenza mehluko muni ngempela? Ngokuphathelene nomhlangano woFakazi eminyakeni eminingi edlule, uhlu lomhleli wephephandaba lwathi: “Ngiyaqiniseka ngokuthi ukube izwe lonke beliphila ngezimiso [zeBhayibheli] zoFakazi BakaJehova bekuyophela ukuchitheka kwegazi nenzondo, futhi uthando beluyobusa njengenkosi.”
Nokho, iningi lesintu alikaze lilandele ukufundisa kwaphezulu. Ekhulwini lokuqala, benqaba ngisho nokulalela iNdodana kaNkulunkulu, uJesu Kristu. Ngakho ingabe kuwukweqisa ukulindela ukuthi ngolunye usuku siyobona izwe elinobunye? Ingenzeka kanjani into enjalo?
[Ibhokisi ekhasini 12]
IMIHLANGANO EMPUMALANGA YUROPHU NASE-ASIA
Izwe Inani Lababekhona Ababhapathizwa
E-Albania (umhlangano owodwa) 598 39
EBulgaria (umhlangano owodwa) 704 45
ECzech Republic (imihlangano emibili) 20 025 620
Ezweni ElaliyiSoviet Union
E-Estonia (imihlangano emibili) 4 732 383
ERussia (imihlangano emithathu) 32 582 2 454
E-Ukraine (imihlangano emibili) 69 333 7 797
EKyrgyzstan (umhlangano owodwa) 5 678 604
Ezweni ElaliyiYugoslavia
ECroatia (umhlangano owodwa) 5 003 157
EMacedonia (umhlangano owodwa) 642 27
ESerbia (umhlangano owodwa) 3 241 174
ESlovenia (umhlangano owodwa) 1 961 69
EHungary (imihlangano emihlanu) 22 191 798
EPoland (imihlangano engu-13) 152 371 4 352
ERomania (imihlangano engu-9) 36 615 2 375
ESlovakia (imihlangano emibili) 13 215 473
INGQIKITHI: 368 891 20 367
[Isithombe ekhasini 7]
Abangaphezu kuka-64 000 babehlangene eNkundleni iRepublican, eKiev
[Isithombe ekhasini 7]
Izitha zeMpi Yezwe II ezivela eJalimane nase-Ukraine zihlanganiswa iqiniso leBhayibheli
[Izithombe ekhasini 8, 9]
Abakhulekeli abanobunye abangaphezu kuka-23 000 eNkundleni iLocomotive, eMoscow
Kwabhapathizwa abangu-7 402 eKiev, nabangu-1 489 eMoscow
Izihambeli zomhlangano zakwamanye amazwe zalethela abasweleyo ukudla okuningi
Ngenhla naphakathi: Izinhlanga eziningi zahlangana ngobunye obunokuthula Ngezansi: Ukufakaza eRed Square
[Isithombe ekhasini 10]
Izihambeli zomhlangano zajabula ngokuthola incwadi “Yezindaba ZeBhayibheli,” “INcwadi Yokuchasisa Isikole,” nencwajana entsha ngolimi lwazo