Uyini Umzabalazo WeNkathi Entsha?

AKUYONA inhlangano, kodwa amakhulukhulu ezinhlangano akhuthaza izimfundiso zako. Akunabaholi, kodwa izazi zefilosofi yako nothisha bako cishe babalelwa ezinkulungwaneni. Akunayo incwadi engokomthetho yezimfundiso nezinkolelo, kodwa abalandeli bako bangathuthukisa izinkolelo zabo cishe kunoma imuphi umtapo wezincwadi womphakathi emhlabeni wonke. Akunaye unkulunkulu wako siqu okhulekelwayo, kodwa ngokuvamile kuthuthukisa umqondo kankulunkulu othile ongatholakala kuyo yonke indawo futhi noma kuphi.

Kuyini? Umzabalazo weNkathi Entsha: ingxubevange yemiqondo engokwenkolo, engokwesiko, engokwenhlalo, engokombangazwe, nengokwesayensi, sekuhlangene nethonya lezimfihlakalo zaseMpumalanga, izinto ezingavamile, imilingo, ngisho nemithonselana yezolwazi lwesimanje lokusebenza kwengqondo. Lengxubevange ihlanganisa ukukholelwa ekufundweni kwezinkanyezi, ukuphind’ ukuzalwa, izidalwa eziphila kwamanye amaplanethi, ukuziphendukela kwemvelo, nokuphila ngemva kokufa. Izinhlangano ezivikela indawo ezungezile nezempilo nazo ziyizingxenye ezibalulekile.

Noma ubani angawujoyina lomzabalazo. Akwenziwa mcikilisho wokwamukelwa noma ubhapathizo. Futhi akudingeki ukuba abantu bashiye izinkolo zabo ukuze bangene kuwo. Ngakolunye uhlangothi, abaningi abathandi ukubizwa ngokuthi bangamalungu “eNkathi Entsha” ngenxa nje yokuthi bakholelwa kweminye yemiqondo yomzabalazo weNkathi Entsha noma ukuthi bajabulela okunye kwalokho okuthiwa ubuciko noma umculo weNkathi Entsha.

Akuvamile ukuba abazinikele kuwo bazibize ngokuthi bangamalungu eNkathi Entsha. Empeleni, lenkulumo ethi “iNkathi Entsha” isetshenziswa kakhulu imithombo yezindaba. Kulezizinsuku, izincwadi ezikhuluma ngeNkathi Entsha, izitolo, imihlangano, nezinhlelo zokuqeqesha ngokuvamile ziyaligwema leligama. I-Library Journal ichaza ukuthi “ukudalulwa kakhulu imithombo yezindaba ngasekupheleni kwawo-1980 kwabangela umphumela omubi ezicini ezingajwayelekile zeNkathi Entsha (ama-UFO, ukuxhumana nemimoya, amakristalu, njll.); lokhu kubonakala eqinisweni lokuthi izinkampane ezinkulu zokunyathelisa . . . ngisho nezindawo zokunyathelisa zeNkathi Entsha ziya ngokuya ziliyeka igama elithi iNkathi Entsha.” Ngakho-ke, abantu abaningi bangase babe ngaphansi kwethonya lokucabanga leNkathi Entsha bengaqaphele ngisho nokuqaphela.

Yini Entsha Ngawo?

Abaningi babheka umzabalazo weNkathi Entsha njengento yesimanje. NgokukaProfesa uCarl Raschke wase-University of Denver, ukucabanga kweNkathi Entsha ngokuyinhloko “kuwumphumela wendlela yokuphila ephikisana nevamile [yawo-1960].” Nabanye abahlaziyi bakhomba ko-1960, ekuthungatheni kwama-hippie inkululeko neqiniso, njengokuqala komzabalazo weNkathi Entsha. Abaningi ababekade bengama-hippie, manje asebeneminyaka ephakathi kuka-40 no-50 ubudala, basalithungatha leloqiniso elingenakutholakala. Kodwa ukuthungatha kwabo akusabhekwa njengokuwukuthatheka kwentsha. Abaningi babo bangochwepheshe emikhakheni ehlonishwayo yolwazi, banengxenye ebalulekile kwezombangazwe, futhi manje sebebhekwa njengamalungu ahluzekile omphakathi.

Phakathi neminyaka yawo-1970 nawo-1980, basebenzisa ukuhlakanipha kwabo nomnotho wabo ukuze baqhubeke nokuthungatha kwabo. Yaba yini imiphumela? Ingxubevange yezinkolelo zabo iye yamukelwa futhi yahlonishwa kuyo yonke indawo. Imithombo yezindaba yasheshe yakusakaza lokhu, okwaphumela ekutheni ifilosofi yeNkathi Entsha iqashelwe kabanzi.

Empeleni, kuncane kakhulu okusha ngezinkolelo zeNkathi Entsha. Ngokwesibonelo, ifilosofi yayo ngokuyinhloko isekelwe ezimfihlakalweni zaseMpumalanga, esezineminyaka eyizinkulungwane eziningi zikhona. Cabangela nansi nje imibono embalwa yeNkathi Entsha.

Ithemba LeNkathi Entsha

Njengoba unyaka ka-2000 usondela, umqondo wekusasa elingcono, inkathi engcono, uya ngokuya uthandwa. Inkolelo eyinhloko iwukuthi esikhundleni somphakathi wesimanje esiwaziyo kuyoba khona umphakathi weZwe Lasemaphusheni.a Ngokwabafundisi beNkathi Entsha, lokhu kuyofezwa ngokukushintsha ngokuphelele ukucabanga okuvamile ngokusebenzisa ulwazi oluyimfihlakalo obelulokhu lufihliwe noma lunganakiwe kwaze kwaba kuleminyaka. Bathi lenkathi entsha enokuzwana iyothukulula amakhono esintu futhi iyoletha ukuthula okungokomoya komhlaba wonke.

Lelithemba libonakala lisekelwe ngokuyinhloko ezibikezelweni zabafunda izinkanyezi abakhomba osukwini lwethu njengolusengcupheni yokuphela kwenkathi edlulayo yePisces nokungena kwenkathi ye-Aquarius. Abasekeli balombono bathi uphawu lwezinkanyezi lwePisces seluneminyaka engaba ngu-2 000 lunethonya elibi esintwini. Basola eLobukholwa njengeliyimbangela eyinhloko yokwakheka komphakathi othanda izinto ezibonakalayo nosemuva. ELobukholwa lisolwa ngokubambezela intuthuko yeqiniso. Kodwa namuhla leloqiniso lingatholakala uma lifunwa ekulumbeni futhi liyokwembuleka phakathi nenkathi ezayo ye-Aquarius, inkathi yokukhanyiselwa okungokomoya, inkathi entsha.

Abasekeli beNkathi Entsha bayehlukana uma kuziwa ekutheni lomphakathi omusha uyovezwa amandla angabonakali asemkhathini yini noma ngomzamo wabantu. Omunye umbono uthi “uhlanga oluthile olushintshile lwesintu lweNkathi Entsha, oluvela embewini yofuzo eyahlwanyelwa okhokho ababekhanyiselwe eminyakeni engu-3 500 edlule, luzochuma ngokushesha futhi lusindise izwe ekuhaheni.”—The Wall Street Journal, January 11, 1989.

Nokho, alilisha neze ithemba elinjalo lenkathi yokuchuma, iZwe Lasemaphusheni, noma izwe elisha. Cishe izinganekwane zanoma imuphi umphakathi omkhulu ziyakhuluma ngethemba lomphakathi weZwe Lasemaphusheni lesikhathi esizayo. Izinganekwane zabaseSumer, amaGreki, amaRoma, nabaseScandinavia zazinayo lenkolelo. I-Encyclopedia of Religion iyaphawula: “Ukulangazelela izwe lasemaphusheni lapho umuntu ekhululeke khona ekuhluphekeni nalapho ukuthula nokuchuma kubusa khona bekuyingxenye ebalulekile yenkolo yamaShayina kusukela ezikhathini zangaphambi kuka-Ch‘in (ngaphambi kuka-221 BCE).” Incwadi engcwele endala kunazo zonke, iBhayibheli, iyakhuluma ngeminyaka eyinkulungwane lapho isintu siyolethwa ekupheleleni, futhi impi, ubugebengu, ubuhlungu, nokufa kuyoqedwa khona.—IsAmbulo 21:1-4.

Inkolo Yokuzikhulekela Wena

Esithombeni sakhe sebhayisikobho esikhuluma ngempilo yakhe esithi Out on a Limb, umdlali wamabhayisikobho odumile nomlobi wezincwadi weNkathi Entsha uShirley MacLaine uma ogwini olunomoya echaye izingalo zakhe athi: “NginguNkulunkulu! NginguNkulunkulu!” Njengaye, abasekeli abaningi beNkathi Entsha bagqugquzela ukufuna komuntu ubuyena obuphakeme nomqondo kankulunkulu ongaphakathi. Bafundisa ukuthi abantu kudingeka nje bakhuphule ukuziqaphela kwabo ukuze bathole ukuba kwabo nesimo sobunkulunkulu.

Bathi, lapho nje lokhu sekufinyelelwe, isimo esingokoqobo sokusebenzelana ngobunye endaweni yonke siyoba sobala—yonke into iyoba unkulunkulu, nonkulunkulu abe yiyo yonke into. Lokhu akuwona neze umqondo omusha. Izinkolo zasendulo zaseMesopotamia naseGibithe zazikholelwa ukuthi izilwane, amanzi, umoya, nesibhakabhaka, kungonkulunkulu. Muva nje, u-Adolf Hitler kuthiwa wakhuthaza abanye ukuba bamukele “inkolelo enamandla, yobuqhawe yokukholelwa kuNkulunkulu Wemvelo, uNkulunkulu okubantu bakithi, ekusaseni lethu, egazini lethu.”

Indlela yokuphila yeNkathi Entsha igcwele izincwadi, imihlangano, nezinhlelo zokuqeqesha eziphathelene namakhono nokuzithuthukisa. “Ukuziqonda mina ingaphakathi lami” kuyisiqubulo esithandwayo. Abantu bakhuthazwa ukuba bazame noma yini futhi bazame yonke into engabasiza ukuba bathukulule amakhono abo. Njengoba omunye umbhali akubeka kumagazini i-Wilson Quarterly, “imfundiso eyinhloko yalomzabalazo ‘iwukuthi akunandaba ukuthi yini okholelwa kuyo uma nje ikusiza.’”

UMargot Adler, ongumsekeli weNkathi Entsha, uyachaza ukuthi abesifazane abaningi abangenela imizabalazo yeNkathi Entsha bakwenza lokho “ngezizathu ezingezomuntu siqu. . . . Bayayizonda imizimba yabo, bazizonda bona ngokwabo. Bangena ngokuyisisekelo kulamaqembu athi kuwe, ‘Wena unguNkulunkulukazi, uyamangalisa.’”

Umagazini i-New York uchaza indlela elinye lamaqembu elifuna ngayo ubuyena bomuntu obuphakeme: “Owesifazane othile uthi ngephimbo lokucula ‘Singabafundisi beNkathi Entsha Yokusa. Thina singabeKhethelo.’ Abanye abahlanganyelayo, befake izigqoko ezinezimpondo, izembozo zobuso ezinezimpaphe, nezingubo ezibonisa umzimba, bayasina ehlathini, bebhodla futhi begwincizisa imizimba, belila futhi bequma.”

Ukulumba Okwenziwe Ngcono

Eminye imiqondo yomzabalazo weNkathi Entsha ithuthukisa umbono omusha, owenziwe ngcono wokulumba. Ukukhulekelwa kukaSathane akusahlanganiswa nokulumba ezingqondweni zabasekeli beNkathi Entsha abaningi. Omunye umbhali kumagazini i-Free Inquiry uthi: “Kunenani elikhulayo labathakathi, okungekho kubo onezinkolelo ezihlanganisa ukukhulekelwa kukaSathane.”

Ukuhlola kwamuva nje eJalimane kwabonisa ukuthi kunabathakathi abangu-10 000 kulelozwe. Ngisho nabantwana badonseleka isinyelela ekulumbeni. Incwadi yesiJalimane ethi Der Griff nach unseren Kindern (Okudonsa Abantwana Bethu) ichaza ukuthi “ngamakhasethi edrama abantwana, abantwana bajwayelana nombono omusha wokuthi umthakathi ungowesifazane ovamile osebenzisa umlingo ngezinjongo ezinhle.” Lencwadi iyanezela: “Ngisho nokunakekela kwabantwana abancane kudonseleka ngalendlela endleleni yeNkathi Entsha engabaholela ezintweni eziphathelene namandla angaphezu kwavamile.”

Ezincwadini zakhe, uShirley MacLaine uthuthukisa umbono wokuthi ukulumba kumane nje kuwulwazi olufihlekile nokuthi ukufihleka kwalo akusho ukuthi lungamanga. Lefilosofi iye yayengela abantu abangenakubalwa ekubeni bahlole imikhuba engavamile yokusebenzisa imimoya, njengokubhula, ukufunda izinkanyezi, ukuxhumana ngengqondo, nokuxhumana nemimoya. Lokhu okushiwo kamuva bekwaziwa izinkulungwane eziningi zeminyaka ngokuthi ukusebenzisa izinto zemimoya. Kodwa abasekeli beNkathi Entsha bakubiza ngokuthi ukuxhumana nemimoya. Lombono wabo usikisela ukuthi imimoya yabafileyo ikhetha abantu abathile ukuba babe imizila yayo yokuxhumana nesintu.

Lababantu okuthiwa bayimizila bangaziqulekisa ngokuthanda kwabo futhi bakhulume noma babhale imiyalezo “yokukhanyiselwa,” okuthiwa ivela kwabafileyo noma ezidalweni zakwamanye amaplanethi. Imimoya yabafileyo ibhekwa njengezihlakaniphi ezinkulu ezilindele isikhathi esifanele sokuba ziphinde zizalwe. Okwamanje, kuthiwa isaqondisa isintu enkathini entsha.

Abasekeli abaningi beNkathi Entsha bahlangana njalo ukuze bazolalela ukuthi lezihlakaniphi ezinkulu zithini zisebenzisa imizila yazo. Futhi abakholelwa kuzo bangazikhethela imimoya abangathintana nayo. Phakathi kwemimoya okuthiwa iyakhuluma namuhla kunokaJohn Lennon noka-Elvis Presley, eyabantu bakwamanye amaplanethi abanamagama anjengelithi Attarro nelithi Rakorczy, neqhawe elineminyaka engu-35 000 ubudala lase-Atlantis yasezinganekwaneni okuthiwa uRamtha.

INkathi Entsha Nempilo

Inani elikhulayo lodokotela bezokwelapha likholelwa ukuthi iziguli akumelwe zimane nje zelashwe njengemishini ephukile nokuthi kufanele kucatshangelwe isimo sempilo engokwengqondo nengokomzwelo yomuntu ngamunye. Lendlela yaziwa ngokuthi ukwelapha okuphelele (wholistic medicine), okususelwa egameni elithi “okuphelele (whole),” futhi akusho ukuthi kuxhumene nenkolelo yeNkathi Entsha. Nokho, abasekeli abaningi beNkathi Entsha bakwemukele ngentshiseko ukwelapha okuphelele. Incwadi ethi The Cosmic Self ichaza ukuthi nakuba kungasho ukuthi bayasilahla isimiso sezokwelapha, abasekeli beNkathi Entsha bakhuthaza ukuphatha isiguli njengomuntu ophelele, “isidalwa esiphilayo esiphelele esinomzimba, ingqondo, nomoya.”

Abasekeli beNkathi Entsha bathi impilo enhle ingatholakala ngaphandle komkhakha wezokwelapha okuvamile. “Indawo abantu abaningi abahlangana kuyo okokuqala nemiqondo yeNkathi Entsha kusemkhakheni wezokwelapha ngezindlela ezihlukile,” kusho iphephandaba laseBrithani i-Herald. Futhi kusazanywa imiqondo engavamile ngokuphelele. Ngokwesibonelo, udokotela wezilwane wase-Australia nowumlobi u-Ian Gawler usikisela ukuthi umdlavuza ungase welapheke ngokuzindla. Ezinye izindlela zokwelapha ngokuvamile ezibizwa ngokuthi ezeNkathi Entsha zihlanganisa nokuxilonga ngokufunda izinkanyezi, ukuhlaziya ukukhanya okuphuma emzimbeni womuntu, ukwelapha ngokulutha ingqondo, ukuhlinza kungasetshenziswa izinto zokuhlinza, nokwelapha umuntu ngesisekelo sokuphila ake akuphila ngaphambili. Lezindlela zokwelapha ngokuvamile zigqugquzelwa komagazini abaphathelene nezempilo, amakhambi emvelo, amavithamini, ukuvivinya umzimba, nokudla okunomsoco.

INkathi Entsha Namakristalu

Enye indlela ethandwayo yokwelapha yeNkathi Entsha ihilela ukusetshenziswa kwamakristalu namatshe ayigugu, anjenge-quartz, amethiste, topazi, rubi, opal, nesimaragidu. Umthengisi wezinto eziyigugu ongumsekeli weNkathi Entsha u-Uma Silbey uthi: “Kuwo wonke umlando uzothola izibonelo zemiphakathi eyayikholelwa ukuthi i-quartz ingawakhulisa amandla okugxilisa ingqondo nawokwelapha.” Uyanezela: “AbaseSumer, amaMaya nezinye izizwe zaziwasebenzisa amakristalu e-quartz ngezinjongo zokwelapha.”

Lamakristalu asetshenziswa kanjani? Abelapha ngamakristalu bathi ukugula okungokomzimba nokwengqondo kungelashwa ngokubeka i-quartz namanye amatshe ayigugu ezindaweni ezithile ezikhethekile emzimbeni. UKatrina Raphaell, umsekeli wokwelapha ngamakristalu weNkathi Entsha, uyachaza ukuthi amakristalu “angabekwa ngaphansi komcamelo lapho ulele ukuze alethe amaphupho amahle nayisiprofetho. Angasetshenziswa ezinqubweni zokwelapha ukuze kulungiswe imizwelo engazinzile, kwelashwe izingqondo ezikhathazekile futhi asize ekwelapheni ukungalingani emzimbeni. Angaphathwa phakathi nesikhathi sokusikwa nesokubeletha ukuze kutholakale amandla engeziwe.”

INkathi Entsha Nendawo Ezungezile

Umzabalazo weNkathi Entsha “uhlanzekile, ukhathalela indawo ezungezile, uyilokho okumelwe kubonwe,” kusho i-TSBeat, umagazini wabevé eshumini nambili waseBrithani. Ukuhlanganyela ngentshiseko ekuthuthukiseni ukuqashelwa kwezinto eziphilayo nokuvikelwa kwendawo ezungezile kuye kwanezela edumeleni elihle lomzabalazo weNkathi Entsha, futhi lomyalezo wokuba nomusa endaweni ezungezile uye wadonsela abaningi ezimfundisweni zawo. Nokho, ukukhathalela kweNkathi Entsha indawo ezungezile ngokuvamile kubonakaliswa njengokukhulekelwa kwemvelo okusobala, nemikhuba yokukhulekela efana nemikhosi yasendulo eyayinikezelwa kunkulunkulukazi owumhlaba.

Ingabe lokhu kubonakaliswa kwesimanje kwezimfihlakalo zasendulo kuyikhambi ezinkingeni zethu? Ingabe umhlaba uyosindiswa ukuhlakanipha kwabathakathi nezidalwa zakwamanye amaplanethi? Ingabe inkathi entsha yokuthula nokuchuma iyoke ifike?

[Umbhalo waphansi]

[Ibhokisi ekhasini 6]

UMacLaine, INkathi ENtsha, NoRamtha

“UMKHAKHA wemimoya wawungokoqobo nakuba sasingenakuwubona noma siwulinganise ngezindlela zokulinganisa. Kukhona isimo esingokoqobo esikhulu kunaleso ‘esicabanga’ ukuthi siyasibona. Yilokho okuye kwabizwa ngokuthi inkathi entsha yokucabanga. Inkathi entsha yokuqaphela. . . .

“Ngavakashela abantu abadumile abasebenzisa imimoya ababexhumana nemimoya engabaqondisi evela ezweni lemimoya. Ngakha ubuhlobo ‘naleyomimoya.’ . . . Omunye wawuvelele kakhulu kuneminye. Igama lawo . . . lalinguRamtha Okhanyiselwe. . . . Wathi wayeke waba umuntu phakathi nenkathi ye-Atlantis futhi wayefinyelele ukuqonda okuphelele kulesosikhathi sokuphila. . . . Njengoba ngangimbheke emehlweni uRamtha, ngazizwa sengithi, ‘Ingabe wawungumfowethu yini ngesikhathi ungumuntu e-Atlantis?’

“. . . Izinyembezi zehla emehlweni akhe. ‘Yebo, sithandwa sami,’ esho, ‘futhi wena wawungumfowethu.’”

UMacLaine uqhubeka athi: “Iphuzu elingokomoya angifundisa lona kwakuwukudlulisela iqiniso lokuthi thina sasinguNkulunkulu. Sinamandla okuba nolwazi njengaye.”—Dancing in the Light, kaShirley MacLaine.

Qhathanisa noGenesise 3:5, lapho iNyoka (uSathane) iqamba amanga ithi ku-Eva: “UNkulunkulu uyazi ukuthi mhla nizidla, kuyakuvuleka amehlo enu, nibe-njengoNkulunkulu, nikwazi okuhle nokubi.” Labo abafuna ukuvunyelwa kwaphezulu kumelwe bagweme ukuthintana nezidalwa zomoya ezimbi nezikhohlisayo. UMthetho kaMose wathi: “Ningaphendukeli kwabanamadlozi nakubathakathi, ningabafuni ukuba ningcoliswe yibo; nginguJehova uNkulunkulu wenu.”—Levitikusi 19:31.

[Ibhokisi ekhasini 9]

“Esinye Isidakamizwa Emphakathini Oluthwe Izidakamizwa”?

“UMZABALAZO weNkathi Entsha—ingxenye yamuva emlandweni wethu omude wezinto eziyinqaba ezithandwayo ezingokomoya kanye namakhambi angozifozonke—ubangela izinhlobonhlobo zokugxekwa nokwesaba kwentukuthelo. Akukhona nje kuphela ukuwohloka kokwethembeka kodwa nokufuna kwawo inzuzo okusobala okubangela izinsolo zokuthi uwumgunyathi omkhulu ongokwenkolo. . . .

“Umzabalazo weNkathi Entsha uzama ukuhlanganisa ukuzindla, ukucabanga okuhluzekile, ukwelapha ngokuthandazela, . . . ukukholelwa ezimfihlakalweni, i-yoga, ukwelapha ngamanzi, ukutshopa, impepho, ukufundwa kwezinkanyezi, ukwelapha izifo zengqondo ngendlela kaJung, ukulawula ukusebenza kwengqondo nezitho zomzimba, ukuzwa ngaphandle kwezinzwa zomzimba, ukukholelwa ekuxhumaneni nemimoya, . . . imfundiso yokuziphendukela kwemvelo, ukwelapha ngobulili kukaReich, izinganekwane zasendulo, . . . ukulutha ingqondo, kanye nanoma iliphi inani lezinye izinqubo eziklanyelwe ukuthuthukisa ukuziqaphela, kuhlanganise nezici ezenanwe emasikweni ezinkolo ezinkulu. . . .

“Izinto ezithatha indawo yenkolo eNkathini Entsha ziyawuthoba unembeza kunokuba ziwuhlukumeze. Imfundiso yazo eyinhloko iwukuthi akunandaba ukuthi yini oyikholelwayo uma nje ikuzuzisa. ‘Kuyiqiniso uma ukukholelwa’: isiqubulo seNkathi Entsha. . . .

“Umbuzo awukhona ukuthi izindlela zokwelapha zeNkathi Entsha ziyasebenza yini ngempela kodwa wukuthi inkolo kumelwe yini igcine isiyindlela yokwelapha. Uma kuwukuthi igcina ngokukwenza uzizwa uwumqemane nje kuphela, inkolo iba ngesinye isidakamizwa kulomphakathi oluthwe izidakamizwa.”—“The New Age Movement: No Effort, No Truth, No Solutions, Notes on Gnosticism—Part V,” kaChristopher Lasch, uProfesa Wezomlando WaseWatson eYunivesithi yaseRochester, eNew York, e-U.S.A.

[Isithombe ekhasini 7]

Amahlelo eNkathi Entsha ahlola ngokufunda izinkanyezi, ukuxhumana ngengqondo, ukuzindla, nangamakristalu, phakathi kokunye

[Isithombe ekhasini 8]

Izindlela zokwelapha zeNkathi Entsha zihlanganisa nokusetshenziswa kwamakristalu