Lapho Abazali Nabantwana Belalela Futhi Bafunde Khona Ndawonye
NGUMLOBELI WE-PHAPHAMA! EJAPANE
“NJENGENKAMPANE yokuhlanza, kufanele sibe namahloni, kodwa kubonakala sengathi ihlanzeke kakhudlwana uma nina [niyihlanza].” Indoda ethile eyengamele inkampane ehlanza iFukuoka Dome Stadium, eJapane, yasho lokhu ngehlobo elidlule ngamalungiselelo oMhlangano Wesigodi ‘Wokufundisa Kwaphezulu’ woFakazi BakaJehova. Yayihilelekile futhi eTokyo Dome Stadium onyakeni ongaphambi kwalowo lapho oFakazi BakaJehova baqhubela khona uMhlangano Wesigodi ‘Wabaphathi Bokukhanya,’ futhi yahlabeka umxhwele ngokujulile. Ekupheleni kwalemihlangano, lenkundla yayihlanzeke kakhulu kunangesikhathi iqashiswa. Yaqhubeka yathi: “Bekuvelele ukuziphatha kwabantwana. Ngingathi nje: ‘Bekuyisimangaliso!’”
Ngonyaka odlule, uMhlangano Wesigodi ‘Wokufundisa Kwaphezulu’ waqhutshelwa futhi eTakamatsu City. Indoda ethile esimnkantsh’ ubomvu eyayibukele izihambeli zomhlangano yazibuza, “NingamaKristu?” yase iqhubeka: “Ngonyaka odlule naninomhlangano, akunjalo? Basuke bekuphi abantwana benu phakathi nomhlangano?” Lapho lezizihambeli zomhlangano ziphendula ngokuthi: “Balalela izinkulumo futhi bavule amaBhayibheli abo nabazali babo,” lendoda yathi: “Kuhle! Ngibabona njalo ngonyaka abantu bakini futhi ngaso sonke isikhathi ngihlabeka umxhwele ngokuziphatha kahle kwabantwana benu.” Yabe isiqhubeka ithi nakuba izwa okuningi ngegebe lesizukulwane phakathi kwabazali nabantwana, iyabona nje ngokuziphatha kwabantwana boFakazi BakaJehova ukuthi buhle kakhulu ubuhlobo phakathi kwabantwana nabazali.
Uthisha othile wasesikoleni sabaqalayo, owayekhona emhlanganweni wesigodi woFakazi BakaJehova owawuseMakuhari Messe ngonyaka odlule, wakhexa umlomo lapho ebona isimo sengqondo sabantwana endaweni yomhlangano. Esikoleni, lapho ukufunda kufanele kuthuthuke ngokuthi abafundi balalele abanye abantu bekhuluma, wayebe nomuzwa wokuthi abantwana babengazimisele ukulalela. Nokho, kulomhlangano wabona okuthile okuhlukile. “Labobantwana babehlezi phansi belalele ngokucophelela isikhathi eside. Futhi ngaphezu kwalokho, babebambisise amapeni abo bebhala amaphuzu, bebhala kahle izinhlamvu zamagama naphezu kokuba babebhalela emathangeni abo. Abantwana boFakazi bahlukile kwabanye abantwana, ngisho nasesikoleni, ngendlela yabo yokukhuluma nokulalela nokugqoka nokuzilungisa.” Wabe esenezela: “Ngicabanga ukuthi kungenxa yokuqeqeshwa kwabo kwansuku zonke, ukudumisa kwabo uJehova, nokusebenza ngobunye kwemikhaya yakubo.”
Njengoba ama-Israyeli ayelandela umthetho othi: “Butha abantu, amadoda, nabesifazane, nabantwana, . . . ukuba bezwe, bafunde,” namuhla oFakazi BakaJehova, abadala nabancane, amadoda nabesifazane, bahlangana ndawonye ukuze bathole ukufundiswa okufanayo. Lombhalo ongenhla uyaqhubeka, unikeza isizathu: “[Ukuze] bamesabe uJehova uNkulunkulu wakho, baqaphele ukuwenza onke amazwi alomthetho.”—Duteronomi 31:12.