Ukudlondlobala Nokuwohloka

Kokukhulekelwa KukaSathane

Imicikilisho yobuSathane eyenziwa abapristi abagqoke izingubo ezimnyama emakamelweni amnyama, bephindaphinda imithandazo bengame izisulu eziphezu kwe-altare, namakhandlela alokozayo aphonsa izithunzi ezithusayo ezindongeni njengoba ukukhulekelwa kukankulunkulu wabo, uSathane, kuqhubeka. Njengoba beye bahehwa ulwazi oluyimfihlo lwempicabadala ethile eyaziwa yibo bodwa eneminonjana yalokho okungaphezu kwemvelo, abasha abahlanganyela kuloluhambo olulubangise kwelemimoya bayawuthakasela umuzwa wenjabulo okulendawo. Bayasondela benomuzwa wokukhetheka okungavamile okuyibo bodwa abanawo.

Ingabe kuwumkhuba ongenangozi, odlulayo? Noma ingabe kuwububi bobudemoni obugcwele emphakathini wanamuhla?

KUNINGI okulotshiwe emaphephandabeni, komagazini, nasezincwadini ngokuphathelene nemisebenzi ethe chithi saka yamahlelo obusathane. Imininingwane yokusebenza kwamaqembu obusathane anobudlova obukuyo yonke indawo iye yavezwa kuthelevishini kazwelonke nasemsakazweni. Kuye kwaba inkinga eyinhloko emaphoyiseni kokubili emadolobheni amakhulu nakwamancane eMelika, eCanada, naseYurophu.

Ukukhulekelwa kukaSathane kunehuha elikhethekile entsheni yanamuhla. Umsunguli weSonto LikaSathane uyasichaza isizathu, njengoba kubikwe kumagazini i-’Teen ka-June 1993: “Kunokuba siyale amalungu ukuba acindezele izinkanuko zawo ezingokwemvelo, siwafundisa ukuba azilandele. Lokhu kuhlanganisa inkanuko engokwenyama, isifiso sokuphindisela, ukufuna izinto ezibonakalayo.”

Yeka ukuthi kufanele ukuba uSathane imgculisa kanjani lenkolelo njengoba iphikisana nezimiso zobuKristu eziphefumlelwe uNkulunkulu!

Ukukhulekelwa kukaSathane kuyadlondlobala. Kuyinkinga ekhulayo, kodwa ukunyamalala kwako kuseduze. Unkulunkulu wako ugwetshelwe ukufa. Kungokufanayo nangezwe likaSathane nabasekeli balo, ngoba “izwe lonke limi [emandleni omubi, NW].” (1 Johane 5:19; Roma 6:16) Kubakhulekeli bakaSathane nakubo bonke abanye, kulabo abakhonza izinjongo zikaSathane bazi noma bengazi umyalezo kaJehova uwukuthi: “UNkulunkulu wokuthula uzakumchoboza masinyane uSathane phansi kwezinyawo zenu.”—Roma 16:20.

Yiliphi-ke ikusasa elizokuza esintwini esihluphekayo livela ‘kuNkulunkulu wokuthula’? Izihloko ezintathu ezilandelayo zizobonisa ukudlondlobala nokuwohloka kokukhulekelwa kukaSathane nezimo eziyokuthathela indawo emhlabeni.