Ukuvula Imisebenzi Emazweni Asathuthuka

NGUMLOBELI WE-PHAPHAMA! ESENEGAL

UYISE womusha othile wafa lapho yena esengumntwana, eshiya unina nomkhaya omkhulu wabantwana abayisishiyagalombili. Njengoba unina eseguga, lona omusha kumelwe abe nengxenye ekondleni lomkhaya ngokuthola umsebenzi. Lishabalele iphupho lakhe lokuqhubeka nesikole. Kumelwe asebenze, ngisho noma engenamakhono noma imfundo engokomthetho.

Izimo ezinjengalesi zivamile emazweni asathuthuka. Imisebenzi iyivelakancane, ngisho nakulabo abaneziqu zaseyunivesithi. Nakuba kunjalo, ngokuzimisela nangekhono elihle lokusungula izinto, abaningi baye bakwazi ukuziqalela imisebenzi. Imisebenzi enjalo ingase ingamenzi umuntu isicebi, kodwa iBhayibheli kweyoku-1 Thimothewu 6:8 lithi: “Uma sinokudla nezambatho, asaneliswe yikho.”

Sinaleso seluleko esilinganiselayo, ake sicabangele ezinye zezindlela zokuhlakanipha amaKristu asemazweni asathuthuka abephila futhi echuma ngazo.

Ibhizinisi Lokudla—Indlela Yase-Afrika

Ukudla kudingeka ngaso sonke isikhathi. Lapha eNtshonalanga Afrika, abesifazane abazimisele ukusebenza baye bathola izindlela ezihlukahlukene zokwenza inzuzo ngaleliqiniso. Ngokwesibonelo, abanye bakha ishede elincane eduze kwendawo okwakhiwa kuyo baphekele izisebenzi ukudla kwasemini. Abanye baphekela labo abaya emsebenzini ekuseni. Badeka itafula elincane elinamabhentshi, babilise amanzi emlilweni wamalahle, bese bephaka ukudla okulula kwasekuseni—ikhofi elishisayo nesinkwa esigcotshwe ibhotela. Kusihlwa bavula izitolo zabo futhi baphakele izisebenzi ukudla okuncane ekupheleni kosuku. Ukuqhuba loluhlobo lwebhizinisi lokudla kusho ukusebenza kanzima, kodwa kusiza abakhuthele ukuba babe nemali yokuziphilisa.

Kukhona nethuba lokuthengisa ukudla okulula. Abanye besifazane bathola indawo enabantu abaningi eduze kwemakethe bese bethosa amantongomane. I-fataya—uphayi wenyama omncane ophakwa nesobho elishisayo—nayo ithengiseka kalula. Kungokufanayo nangamasemishi enyama anesobho lenyama elinongiwe. Lezi izinto ezithengiseka kalula emazweni ase-Afrika anjengeGambia neMali.

EGuinea-Bissau naseSenegal, intsha eningi engoFakazi BakaJehova izondla enkonzweni yesikhathi esigcwele ngokubhaka nangokuthengisa okunye ukudla okuthandwayo: amakhekhe amancane. UMoses, oyisakhamuzi sasenhloko-dolobha yaseSenegal, iDakar, uyachaza: “Mina nomkami sasikhonza njengamaphayona akhethekile [abashumayeli besikhathi esigcwele] lapho siqala ukuba nabantwana. Kwadingeka ngithole indlela yokubondla, ngakho ngafikelwa umqondo wokwenza nokuthengisa amakhekhe amancane.

“Nganginemali encane kakhulu yokuqala lelibhizinisi, ngakho kwadingeka ngicophelele ukuhlukanisa phakathi imali engangizoyigcina njengenzuzo nemali engangizoyisebenzisa ebhizinisini ukuze ngithenge okudingekayo, njengofulawa namaqanda. Manje ngiyakwazi ukuthengisa amakhekhe anele ukuze nginakekele izidingo eziningi zomkhaya wami omncane.

“Ukuze angixhase, umkami, u-Esther, uthunga izingubo ekhaya. Lokhu kumenza abe sekhaya nabafanyana bethu ababili. Ngakho sisobabili, sikwazi kahle ukunakekela umkhaya wethu, naphezu kweqiniso lokuthi siphila ezikhathini ezinzima.”

Nanti elinye isu lebhizinisi elincane: Njengoba abantu abasebenzayo bematasa futhi ngokuvamile bengenaso isikhathi sokuya emakethe ekude, bayosekela izitendi ezincane eziseduze okuthengiselwa kuzo izithelo noma imifino. Abanye abanikazi bezitendi bayazihambisa izimpahla, bayiyise ngokuqondile imifino eluhlaza emakhaya abathengi. Kungasheshe kwaziwe ukuthi uthembekile futhi uthengisa imikhiqizo emihle. Nokho, qaphela ungabizi kakhulu, kungenjalo abantu bazomane baphindele emakethe evamile.

Ukwenzela Abanye Imisebenzi

Uma ungakuthandi ukuthengisa imikhiqizo, cabangela ukwenzela abanye imisebenzi ehlukahlukene. Udingeka ngaso sonke isikhathi umsebenzi wasendlini, njengokuhlanza, ukupheka, nokuwasha noku-ayina izingubo. Futhi kunamanye amathuba amaningi.

Ngokwesibonelo, ingabe uhlala eduze kolwandle noma eduze nemakethe ethengisa izinhlanzi? Kungani ungaceli ukuhlanza izinhlanzi—ngokushesha futhi ngezindleko eziphansi? Okudingayo nje isigodo nommese wezinhlanzi obukhali. Ukugeza izimoto kungelinye ibhizinisi elinenzuzo. Iziphi izinto zokusebenza ezidingekayo? Ibhakede, amanzi, insipho encane, nendwangu ekahle. EDakar, intsha ethambekele ebhizinisini ingabonakala yenza lomsebenzi cishe kuzo zonke izindawo zokupaka izimoto nasemigwaqweni eminingi eyembozwe izihlahla.

Ingabe amanzi ayingcosana endaweni yakini? Ngezinye izikhathi abesifazane bashaya uhide isikhathi eside emthonjeni owodwa ukuze bagcwalise imigqomo yabo. Khona-ke kudingeka bathwale lemigqomo esindayo ibanga elide bayiyise emakhaya. Ngakho-ke abaningi bazimisele ukukhokhela umuntu ozobalethela amanzi. Isu eliphumelelayo ukufika kusempondozankomo emthonjeni ukuze ugcwalise imigqomo yakho bese uyilayisha enqoleni esunduzwayo noma edonswa imbongolo. Usukulungele-ke ukuhambisa amanzi emakhaya noma ezindaweni zomsebenzi.

Unayo imfundo ethile yezwe? Mhlawumbe ungase ucele ukufundisa abantwana ngezimpelasonto. Ngokuvamile amakilasi ayaminyana emazweni asathuthuka, ngakho abazali bangase bazimisele ukukhokha ukuze ingane yabo ithole ukunakekelwa komuntu siqu.

Elinye ikhono eliwusizo okungenzeka usunalo kakade ubuciko bokweluka izinwele. Njengoba abesifazane boMdabu bezithanda kakhulu izinwele ezilukiwe, kunamathuba okuba abantu abanekhono kulomsebenzi benze imali.

Ukusebenzisa Ukuhlakanipha

Ezikhathini zeBhayibheli, owesifazane okhuthele wayengathola izindlela ezihlakaniphile zokuzuza imali. IzAga 31:24 zithi: “Wenza izingubo zelineni, athengise ngazo, anikele kubathengi amabhande.” Ngokufanayo, abaningi emazweni asathuthuka baye baphumelela ngokuzivulela amabhizinisi emakhaya. Ngokwesibonelo, umbazi angase avule isitolo esincane akhe izitulo ezivamile, amabhentshi, nezinye izinto zasendlini. Kudingeka amathuluzi okubaza ayisisekelo kuphela. Uma unamakhono athile kwezolimo, mhlawumbe ungase uqale ibhizinisi lokuthengisa amaqanda nezinkukhu.

Ukuhlakanipha kuyimfuneko ebalulekile yokuqala amabhizinisi amancane. Abanye abantu baye baphendula amathini aselahliwe bawenza amapotimende namabhokisi amibalabala. Abanye baye benza izimbadada ngamasondo ezimoto. Futhi abanye baye bakha amabhakede ngamashubhu amasondo amadala. Nguwe kuphela ongazinciphisela amathuba.

Emazweni asathuthuka kudingeka kokubili ikhono nokucabanga ukuze uphile, kodwa futhi kudingeka ube nesineke nesimo sengqondo esiqondile. Ungasheshi uhlanze ngedela. Vumelana nezimo, ukulungele ukushintsha imisebenzi uma kudingekile. Uma uqala ibhizinisi noma umsebenzi othile, qikelela ukuba uhlole imithetho nezimiso zendawo. AmaKristu kudingeka ahloniphe umthetho wezwe.—Roma 13:1-7.

Ngaphambi kokuzama ukuthengisa umkhiqizo othile noma ukuqala umsebenzi, zibuze: ‘Ziyini izidingo namasiko endawo? Sinjani isimo somnotho wendawo? Angakwazi yini amakhasimende ukukhokhela engikuthengisayo? Bangaki abanye abathengisa umkhiqizo ofanayo noma abenza umsebenzi ofanayo? Nginawo ngempela yini amakhono, amandla, ikhono lokusungula umsebenzi, ukuzithiba, nokuhleleka okudingekayo ukuze ngiqhube lelibhizinisi? Kuyodingeka imali engakanani? Ingabe kuyodingeka ngiyitsheleke? Ngiyokwazi yini ukukhokha imali engiyitshelekile?’

Ufanelekile umbuzo kaJesu okuLuka 14:28: “Ngumuphi kini othi efuna ukwakha umbhoshongo, angaqali ahlale phansi, abale izindleko ukuthi unakho okokuwuqeda na?”

Yiqiniso, akubona bonke abanamakhono noma ubuntu bokuba nebhizinisi. Kodwa uJehova uNkulunkulu angasibusisa isinyathelo nomzamo wakho wenkuthalo lapho uwenza ngesisusa esihle. (Qhathanisa neyesi-2 Petru 1:5.) Ngakho yenza konke okusemandleni akho ukuze uthole umsebenzi—ngisho noma kudingeka ukuba uwusungule wena ngokwakho!

[Izithombe ekhasini 16, 17]

Ukuthunga izingubo, ukugeza izimoto, ukuthutha amanzi ahlanzekile, nokuhlanza izinhlanzi kungezinye izindlela abantu abaziphilisa ngazo