Intsha Iyabuza . . .

Kuthiwani Ngokuthatha Uhambo Nekilasi Lethu?

“UTHOLA isikhathi sokuhlaba ikhefu ungayi esikoleni.” “Ubona okuthile okusha ngandlela-thile.” “Uthola ithuba lokubazi kangcono ofunda nabo ekilasini.”

Abasha abathathu baseJalimane basichaza kanjalo isizathu esenza bajabulele ukuthatha uhambo nekilasi. Emhlabeni wonke intsha iluthanda ngempela uhambo olunjalo.

Nokho, akubona abafundi kuphela abakuthandayo ukuthatha uhambo nekilasi. Omunye uthisha uthi: “Ukuthatha uhambo nekilasi okuhlelwe kahle kumzuzisa ngempela osemusha, kumenze abe nomqondo ovulekile futhi kumsize azimele. Ngaphezu kwalokho, buyaqina ubuhlobo phakathi kukathisha nekilasi.” Akungabazeki ukuthi othisha abathembekile nekilasi eliziphethe kahle kungahlangana kwenze ukuthatha uhambo nekilasi kufundise futhi kujabulise.

Noma kunjalo, kungase kube nezici eziningi ezihilelekile eziyikhathaza ngokufanelekile intsha engamaKristu nabazali bayo. Ngokwesibonelo, eJalimane nakwamanye amazwe aseYurophu, abafundi abangabafana nabangamantombazane ngokuvamile bathatha uhambo olude ndawonye njengekilasi. Lokhu kuvame ukuhilela ukungalali ekhaya ebusuku. Ngokuvamile lokhu kusho inkathazo. U-Anna-Laura oneminyaka engu-14 ubudala uyakhumbula: “Ngemva kwezinsuku ezimbalwa sisohambweni, izinto zamane zangabe zisalawuleka. Ngisho nasebusuku sasingakutholi ukuthula. Abaningi ekilasini baziphatha ngendlela enobugovu nengacabangeli.”

Khona-ke, kufanele wenzeni uma unikezwa ithuba lokuthatha uhambo nekilasi?

Ukubala Izindleko

KuLuka 14:28, uJesu Kristu wathi: “Ngumuphi kini othi efuna ukwakha umbhoshongo, angaqali ahlale phansi, abale izindleko ukuthi unakho okokuwuqeda na?” Ngaphambi kokuba wena nabazali bakho ninqume ukuthi ukuthatha uhambo nekilasi lenu kukulungele yini, hlolisisani konke okuhilelekile. Nansi eminye imibuzo edinga ukucatshangelwa:

Niyovakashelaphi? Ukuthi kuhilela ukuvakashela emnyuziyamu oseduze usuku olulodwa noma uhambo olude okuzolalwa kulo kungenza umehluko omkhulu. Ngaphezu kwalokho, uma izindleko zikhokhwa abazali bakho, bayofuna ukunquma ukuthi bangakwazi yini ukuzikhokha.

Kuyokwenziwani? Uma usuku ngalunye luhlelelwe imisebenzi eyakhayo nethakazelisayo, lokhu kuyogcina ikilasi limatasa futhi kunciphise ingozi yokuba okuthile kungahambi kahle. Ngakho hlolisisa isimiso sokuyokwenziwa ngaphambi kokuba unqume ngokuqondene naloluhambo lwekilasi. Ukuvakashela emnyuziyamu noma ukuya endaweni yezifundo zemvelo kungase kube okufundisayo. Kodwa ukuhlola i-Yoga nezinkolo zase-Asia—njengoba kwake kwahlelelwa elinye ikilasi—akumfanele nakancane umKristu.—1 Korinte 10:21.

Ingabe kuyoba khona ukwengamela okuphumelelayo nokwangaso sonke isikhathi? Intombazane ethile engumKristu eneminyaka engu-15 ubudala okuthiwa uJulia iyakhumbula: “Ngangifunda ekilasini eliziphethe kahle, ngakho umama nobaba abazange bakhathazeke lapho ngihamba. Othisha basigada ngeso elibukhali.” Nokho ukwengamela okunjalo kungase kube ivelakancane kulezizinsuku. Njengoba kuvuma omunye uthisha waseJalimane, ukwengamela ngokucophelela nangokwethembeka “akuqinisekisiwe neze.” Ngempela, omunye osemusha waqhosha ngemva kohambo oluthile nekilasi: “Lapho sesibaphambe bobabili othisha, sazenzela umathanda.”

Abanye abafundi bangabanga inkathazo ngisho nalapho othisha benza konke okusemandleni abo ukuze babalawule. Omunye owayenguthisha uyakhumbula: “Intsha yathola izindlela zobuqili zokungenisa utshwala ngomngunyathi, ngakho kwakungasizi lutho ukuphenya emakamelweni ayo. Ngaqaphela ukuthi yayiphuze utshwala obuningi lapho enye yamantombazane iqala ukuhlanza.” Ngokusobala, kungase kube nzima ukuqiniseka ukuthi uhambo luyokwenganyelwa ngokufanelekile. Kodwa kungase kukuphephise ekukhathazekeni nasekudumazekeni okukhulu uma wena nabazali bakho nihlolisisa amalungiselelo okwengamela aye enziwa. IzAga 22:3 zithi: “Oqondileyo uyabona ububi, acashe, kepha abangenalwazi badlula nje, bahlupheke ngakho.”

Ngokuvamile ofunda nabo esikoleni basabela kanjani eziqondisweni zothisha benu? Lokhu kuyokunikeza umbono omuhle ngendlela abayosabela ngayo ekuthatheni uhambo njengesikole. Ngokombiko, enye isekhondari yaseJalimane kwadingeka ifinyeze uhambo lwekilasi lwezinsuku ezintathu ngoba abafundi abangalawuleki bamane bazishaya indiva ‘iziqondiso zothisha ezicacile nezinesineke.’

Owesifazane othile osemusha waseJalimane okuthiwa uStephanie wathatha uhambo olunjalo nekilasi esikhathini esidlule futhi ngenxa yokuhlangenwe nakho kwakhe utusa ukuba uzibuze lemibuzo elandelayo: ‘Ingabe engifunda nabo ekilasini bayabalalelisisa othisha? Ingabe isikole silwela ukulondoloza idumela elihle? Ingabe othisha baqine ngokwanele ukuba bahole ngokufanelekile? Ingabe leyontsha izibheka ngokungathi sína izindinganiso zokuziphatha okuhle? Ingabe isebenzisa utshwala nezidakamizwa?’ Yiqiniso, uStephanie uyavuma ukuthi okuningi “kuxhomeke kuwe uqobo, ukuthi uyekelela kalula yini noma cha.” Kodwa ungathandaza kanjani ukuthi uJehova ‘angakungenisi ekulingweni’ bese uzibeka ngamabomu esimweni esingakwenza uyekelele?—Mathewu 6:13.

Ngakho uPetra oneminyaka engu-17 ubudala wenqaba ukuthatha uhambo nekilasi. Uyachaza: “Ngangazi ukuthi engifunda nabo ekilasini babezoziphatha kanjani. Ngabona kusengaphambili ukuthi izimo ezihilela utshwala nobulili zaziyowuvivinya ngempela unembeza wami. Kwatholakala ukuthi abafana abahlanu bakhumula intombazane ethile bayithatha izithombe, kamuva ezabukiswa abafundi.”

Ingabe ziyohlonishwa izinkolelo zakho ezingokwenkolo? Ngokwesibonelo, uTimon osemusha waphawula: “Kuvame ukuba nomcimbi wosuku lokuzalwa, okunzima ukuwugwema.” Njengomunye woFakazi BakaJehova, uyenqaba ukuhlanganyela emikhosini enjalo.a Othisha bakho nofunda nabo ekilasini bayowuhlonipha yini umbono wakho uma kwenzeka umkhosi onjalo uba ingxenye yohambo lwekilasi?

Uyochayeka ohlotsheni olunjani lwabangane? AmaKristu ayazi ukuthi uNkulunkulu uyakulahla ukubhema, ukusebenzisa izidakamizwa, ukusebenzisa kabi utshwala, noma ukuzitika ngobulili bangaphambi komshado. (1 Korinte 6:9, 10; 2 Korinte 7:1) Yingakho ekugwema ngokuhlakanipha ukuzihlanganisa nentsha eyenza izinto ezinjalo. (1 Korinte 15:33) IzAga 13:20 ziyaxwayisa: “Umngane weziwula uyakushoshozelwa yizo.” Ohambweni lwekilasi, uchitha isikhathi esiningi kakhulu nentsha enjalo, futhi lesi isimo esiyekelelayo. U-Andreas osemusha wakubeka ngalendlela: “Ohambweni lwekilasi, uchayeka usuku lonke emoyeni wezwe, ogcwele umculo walo nenkulumo engcolile.”

Esinye isici ukuthi kulula ukuba nesizungu uma ungekho ekhaya. Ukuthatha uhambo nekilasi kuye kwabangela ukuhileleka ngokomzwelo kwentsha eningi. Kungenzeka yini uzithole usuthandana nomuntu ongakholwa? Eyoku-1 Korinte 10:12 iyaxwayisa: “Osuka ethi umi, akaqaphele ukuba angawi.” Ngisho noma ubunamandla okumelana nesilingo, ingabe ukuba khona kwakho ohambweni olunjalo kungaba isikhubekiso kwenye intsha engamaKristu?—Qhathanisa neyoku-1 Korinte 8:7-13; 10:28, 29.

UYvonne oneminyaka engu-14 ubudala wenqaba ukuhamba nekilasi elaliyoshibilika eqhweni. Uyachaza: “Bengiyochitha isonto lonke nginentsha yezwe nothisha kuphela. Ngaphezu kwalokho, ubudlelwane nabafowethu, umsebenzi wokushumayela, nemihlangano—lezo izinto ebengiyozikhumbula ngempela. Esinye isizathu indlela intsha eningi eyayiziphatha ngayo lapho ingagadwe muntu.”

Ukujabulisa UNkulunkulu Ngokugcwele

Njengoba ngokuvamile ukuthatha uhambo nekilasi kungahileli ngokuqondile inkolo, ezombangazwe, noma ezinye izinto ezenqatshelwe kumaKristu, umfundi nabazali bakhe kuyodingeka banqume ukuthi uhambo olunjalo luyatuseka yini. (Qhathanisa no-Isaya 2:4; IsAmbulo 18:4.) Izimo ziyahluka izindawo ngezindawo nasemakilasini; ngakho amaKristu akwenye indawo kungadingeka alwisane nezinkinga ezihlukile kwezitholakala kwenye indawo.

UStephan uyaphawula: “Umama wayejwayelene nentsha engangifunda nayo ekilasini futhi wayazi ukuthi uthisha ungumuntu onomthwalo wemfanelo. Ngakho ukuthatha uhambo nekilasi kwaba impumelelo. Kodwa lapho sengikhulile futhi kusondela uhambo lwekilasi lokugcina, indaba yokuhambisana nalo yase yehluke ngokuphelele.” Ngani? Uyaqhubeka: “Eminyakeni emithathu nje ngaphambi kwalokho, engangifunda nabo ekilasini babeziphethe kahle futhi benesizotha. Kodwa kusukela lapho izidakamizwa nokuziphatha okubi kwase kuyingxenye yokuphila kwabo kwansuku zonke. Ngakho angizange ngihambe nabo. Kwenzeka ukuthi loluhambo lokugcina lunqanyulwe ngaphambi kokuba luphele.”

Nokho, ekugcineni wena nabazali bakho kumelwe nihlaziye zonke izici ezihilelekile bese nizinqumela ngokwenu. Qikelelani ukuthi, noma isiphi isinqumo enisenzayo, umgomo wenu ‘ukuhamba ngokufanele iNkosi, niyithokozise ngakho konke.’—Kolose 1:10.

[Umbhalo waphansi]

[Isithombe ekhasini 25]

Hlobo luni lwabangane obuyochayeka kulo uma ubuhambe nekilasi eliyolala ngaphandle?