Okuphawulwa Abafundi Balomagazini
Ukunqamuka Kokuya Esikhathini Ngibonga ngokusuka enhliziyweni ngochungechunge oluthi “Ukukuqonda Kangcono Ukunqamuka Kokuya Esikhathini.” (February 22, 1995) Ngineminyaka engu-43 ubudala, futhi nanginikeza izimpendulo ezanelisayo emibuzweni yami. Abesifazane ababili engisebenza nabo bacela amakhophi, kodwa kwadingeka ngibaboleke ikhophi yami. Ayesephelile ebandleni lakithi!
M. H. S., Brazil
Lezi zihloko zavula ingqondo nenhliziyo yami ukuba ngibone ukuthi ushintsho olunjani umama abhekene nalo. Ngiyethemba ukuthi ngizoqhubeka ngiluqonda lolu shintsho ekuphileni kwakhe futhi ngibe usizo ngokwengeziwe.
A. K., United States
Ngineminyaka engu-47 ubudala, futhi ngaphambi kokuba ngithole lowo magazini we-Phaphama!, ngangingayiqondi lendaba, ngisho nangemva kokubonana nodokotela. Niye nangisiza ukuba ngiqonde ukuthi lolu shintsho lungokwemvelo. Manje ngikulungele ukubhekana nezinkinga.
E. M., Sierra Leone
Muva nje ngiye ngaya emhlanganweni wamahora amathathu ophathelene nalendaba. Wawuhlelwe iminyango yezemfundo yezibhedlela ezimbili ezinkulu. Lolu hlelo lwalufundisa kakhulu, kodwa ngafunda okuningi ngemizuzu engu-30 ngokufunda i-Phaphama! kunalokho engakufunda ngamahora amathathu kulomhlangano.
J. B., United States
Izihloko Ezingekho? Ngiyintombazane eneminyaka engu-11 ubudala. Ngaqaphela ukuthi anisalunyathelisi uchungechunge oluthi “Intsha Iyabuza . . .” Kungani kunjalo? Ngangiyijabulela ngempela leyo ngxenye. Eminye imibuzo yayingithinta, futhi ngangithanda ukuyifunda! Ngangibheka yona kuqala lapho sithola i-Phaphama! Ngiyaqiniseka ukuthi ezinye izingane zizizwa ngendlela efanayo. Ingabe nizoyinyathelisa leyo ngxenye esikhathini esizayo?
E. K., United States
Ingxenye ethi “Intsha Iyabuza . . .” iyoqhubeka inyatheliswa kanye ngenyanga. Iyovela kumagazini womhla ka-22 wenyanga ngayinye. Selokhu lolu chungechunge lwaqala ngo-1982, kuye kwanyatheliswa izihloko ezingaphezu kuka-300 kulolu chungechunge. Sikhuthaza abafundi abasebasha balomagazini ukuba babheke ezinye zalezi zihloko ezindala. Nokho, qiniseka ngesithakazelo sethu esiqhubekayo ezinkingeni zentsha.—ED.
Ukuqulwa Kwamacala Ezihlubuki Esihlokweni senu esithi “Ukuqulwa Kwamacala Ezihlubuki EMexico—Kwenzeka Kanjani?” (October 8, 1994), nakhuluma ‘ngenkosi yama-Aztec, uNetzahualcóyotl.’ Nokho, uNetzahualcóyotl wayengeyona inkosi yama-Aztec kodwa wayeyinkosi yamaChichimeca.
E. R. C. L., Mexico
Ngempela uNetzahualcóyotl wayengumChichimeca, hhayi umAztec. Nokho, ngokuthakazelisayo, ezinye izincwadi, njenge-“Nueva Enciclopedia Cultural IEPSA,” ziyabhekisela kuye ngokuthi “inkosi yama-Aztec.” Njengoba kuchaza incwadi ethi “Historia de México,” uNetzahualcóyotl wayebusa “ebambisene nama-Aztec,” kakade ayesebusa abantu abangamaChichimeca.—ED.
Intsha “Yolahleko” Ngiswele amazwi okuchaza ukuvuseleleka okungokomoya engakuthola lapho ngifunda isihloko esithi “Intsha Iyabuza . . . Ngingakulungisa Kanjani Ukuphila Kwami?” (January 8, 1995) Sanginikeza isibindi sokuthandaza kuJehova ngicele intethelelo yakhe ngenxa yezono engazenza esikhathini esidlule. Ngaphambi kokuba ngifunde lesi sihloko, inhliziyo yami yayidabuka ubusuku nemini ngenxa yalezi zono. Kaningi ebusuku ngangicambalala embhedeni nginomuzwa wokuthi ukuzibulala kwakuwukuphela kwekhambi. Manje ngiyazi ukuthi izimiso zikaJehova zingokwenzuzo yethu, futhi ngiyofunda emaphutheni ami angesikhathi esidlule.
Q. B., United States
Njengomuntu osemusha, ngashiya uJehova nenhlangano yakhe. Nakuba sengineminyaka engaba mihlanu ngibuyile, ngezinye izikhathi ngangiba nomuzwa wokuthi uJehova wayengeke angithethelele ngokugcwele. Manje ngiyazi ukuthi nganginephutha; umuzwa wokungabaza ojulile nobeleselayo enganginawo ekugcineni sewuye wadamba.
R. D., Trinidad