Ukubhekana Nesimo Esiphuthumayo Sezokwelapha
“ANGIZUKUGWEGWESA; unesimila esibulalayo. Uma singasikhiphi ngokushesha, sizolimaza ezinye izitho ezibalulekile. Kungakho ngitusa ukuba umlenze wakho unqunywe.”
Kwaba sengathi ngibhunyelwa ngebhakede lamanzi abandayo, njengoba sisho kanjalo lapha ePeru, lapho udokotela esho lamazwi. Ngangineminyaka engu-21 kuphela ubudala. Enyangeni eyodwa ngaphambili ngangiqale ukuzwa ubuhlungu edolweni langakwesobunxele futhi ngelashelwa i-rheumatism. Nokho, phakathi nezinsuku ezimbalwa, ngangingakwazi ngisho nokuma.
Ngaleso sikhathi, ngangikhonza njengesikhonzi sesikhathi esigcwele soFakazi BakaJehova e-Andes enkabeni yePeru. Ngemva kokubuyela ekhaya eHuancayo, ngaphelezelwa umama saya edolobheni laseLima elisogwini. Lapho, ngo-July 22, 1994, ngalaliswa esibhedlela somdlavuza esiphambili kulelizwe, lapho ngathola khona ukuthi isifo esasingiphethe sibizwa ngokuthi i-osteosarcoma.
Indaba Kanembeza
Ngokushesha ngatshelwa ukuthi lesi sibhedlela asihlinzi ngaphandle kokusebenzisa igazi. Omunye udokotela waze wathi: “Ngikhetha ukuba uyofela ekhaya kunokuba ufele ezandleni zami.” Kodwa ngasizwa iKomiti Yokubonisana Nezibhedlela (Hospital Liaison Committee [HLC]) yendawo, okuyiqembu loFakazi BakaJehova elikhuthaza ukubambisana kwesibhedlela nesiguli. Ngenxa yalokho, udokotela omkhulu ohlinzayo walesi sibhedlela wavumela noma imuphi udokotela ezisebenzini zakhe ukuba angihlinze uma efuna ukwamukela lenselele. Omunye udokotela wayefuna, futhi ngokushesha ngalungiselelwa ukuhlinzwa.
Ngaba nezivakashi eziningi ngaphambi kokuhlinzwa. Umpristi othile, owayephethe iBhayibheli, weza wazongibona futhi wathi lesi sifo sasiyisijeziso sikaNkulunkulu. Wanginxusa ukuba ngamukele noma ikuphi ukwelashwa okwakungasindisa ukuphila kwami. Ngamtshela ukuthi ngangizimisele ukuvumelana nomyalo weBhayibheli ‘wokudeda egazini.’—IzEnzo 15:19, 20, 28, 29.
Abahlengikazi nabo babeza futhi bavungame bathi: “Ave uyisiwula, ave uyisiwula!” Amaqembu odokotela angivakashela nawo. Ayefuna ukubona lensizwa eyayenqabe ukwamukela ukumpontshelwa igazi ekuhlinzweni ayecabanga ukuthi igazi liyimfuneko. Nokho, izivakashi ezazibaluleke kunazo zonke kimi kwakungamaKristu engikanye nawo nezihlobo. Abahlengikazi bahlatshwa umxhwele kakhulu yilezi zivakashi eziningi ezikhuthazayo.
Ukwelashwa Ngokuphumelelayo Ngaphandle Kwegazi
Emizuzwini embalwa ngaphambi kokuba ngilaliswe, ngezwa esinye sezazi zezibulala-zinzwa sithi: “Ngeke ngibe necala ngokwenzekayo!” Kodwa esinye isazi sezibulala-zinzwa, kanye nodokotela owayengihlinza nabaqondisi basesibhedlela, basihlonipha isicelo sami sokungalamukeli igazi. Kamuva ngezwa isazi sezibulala-zinzwa sithi: “Samuel, vuka. Sewuhlinziwe.”
Nakuba wawunqunywe wonke umlenze wami, ngaqala ukuzwa ubuhlungu obukhulu lapho wawukhona. Ngangifuna ukudambisa ubuhlungu ngokuhlikihla ithanga lami, lelo eqinisweni elalingasekho. Ngangihlaselwe isenzakalo esingavamile esaziwa ngokuthi ubuhlungu obusengqondweni. Ngangizwa ubuhlungu ngempela, futhi babunjunjutha, ngisho noma isitho okwakubonakala sengathi ubuhlungu buvela kuso sasinqunyiwe.
Ngokulandelayo, kwahlelwa ukuba ngelashwe ngamakhemikhali. Umphumela omubi walokhu kwelashwa ukuncipha kwamangqamuzana abomvu namhlophe egazi kanye nezinhlayiyana zalo, okubalulekile ukuze lishube. Lokhu kwasho ukuthi kwakudingeka kwaziswe iqembu elisha lodokotela ngokwenqaba kwami ukwamukela ukumpontshelwa igazi. I-HLC yaphinde yaxhumana nalabo ababehilelekile, futhi odokotela bavuma ukungelapha ngaphandle kwegazi.
Imiphumela emibi evamile yalandela ngemva kokwelashwa ngamakhemikhali—izinwele zami zaqothuka futhi ngangiba nesicanucanu, ngihlanza, futhi ngangicindezeleka. Ngatshelwa nokuthi kwakuzoba nengozi engamaphesenti angu-35 yokophela ebuchosheni. Ngaphoqeleka ukuba ngibuze omunye wodokotela ukuthi yini eyayizongibulala—umdlavuza noma ukwelashwa ngamakhemikhali.
Kamuva, odokotela bathi babengenakungelapha ngamakhemikhali okwesibili ngaphambi kokwenyusa umthamo wegazi lami ngokungimpompela igazi. Omunye udokotela ethukuthele wangitshela ukuthi ukuba ubekwazi, ubezongilalisa abese engifaka igazi. Ngamtshela ukuthi ngaphambi kokuba kwenzeke lokho, ngangizokwenqaba ngokuphelele ukwelashwa ngamakhemikhali. Lodokotela wazwakalisa ukukwazisa ukuma kwami okuqinile.
Ngavuma ukwamukela i-erythropoietin ukuze ngenyuse umthamo wegazi lami. Lapho isetshenziswa, umthamo wegazi lami wenyuka. Ngemva kwalokho, ngelashwa ngamakhemikhali ngokujovwa isikhathi esiyizinsuku eziningana. Ngangilala ngizibuze, ‘Ingabe lokhu kwelashwa yikho okuzongibangela ukophela ebuchosheni?’ Ngokujabulisayo kwaze kwaphela lokhu kwelashwa ngingazange ngivelelwe imiphumela eyinhlekelele.
Ngaphambi kokuba ngihlinzwe kwakuyinkambiso yalesi sibhedlela ukwenqaba ukwelapha abantu uma bengakwamukeli ukumpontshelwa igazi. Kodwa lenkambiso yashintsha. Eqinisweni, kamuva ngalo kanye usuku engahlinzwa ngalo udokotela owayengihlinza wahlinza esinye isiguli ngaphandle kokusebenzisa igazi, futhi kulokhu isiguli sasingeyena omunye woFakazi BakaJehova! Manje odokotela abaningi kuleso sibhedlela bayabambisana ne-HLC, futhi baye bavuma ukwamukela iziguli ezifuna ukuhlinzwa ngaphandle kwegazi.
Ukuvumelana Nokulinganiselwa
Kusukela ngisengumntwana, ngafundiswa izindlela zikaNkulunkulu. Ngiyaqiniseka ukuthi lokhu kwangisiza ukuba nginamathele ezinkolelweni zami ezisekelwe eBhayibhelini kulesi simo esiphuthumayo sezokwelapha. Nokho, muva nje ngiye ngacindezeleka ngoba angisakwazi ukwenza okwengeziwe ngendlela engingathanda ngayo enkonzweni kaNkulunkulu. Ngazisa umalume wami ongumdala ongumKristu indlela engizizwa ngayo. Wangikhumbuza ukuthi ngisho nomphostoli uPawulu wayenalokho ayekubiza ngokuthi ‘iva enyameni yakhe’ nokuthi lokhu kwakumvimbela ekukhonzeni uNkulunkulu ngokugcwele ngendlela ayefuna ngayo. Kodwa uPawulu wenza konke okusemandleni. (2 Korinte 12:7-10) Amazwi kamalume angisiza kakhulu.
Muva nje ngiye ngathola umlenze wokufakelwa. Ngithemba ukuthi lokhu kuzongenza ngikwazi ukunikela inkonzo eyengeziwe kuNkulunkulu wethu, uJehova. Ngiyabonga ngokuthi ngalondoloza unembeza omuhle phakathi nesimo esiphuthumayo sezokwelapha engangibhekene naso. Ngiyaqiniseka ukuthi uma ngiqhubeka ngithembekile, uJehova uyongivuza ngomzimba onempilo nokuphila okumi phakade emhlabeni oyipharadesi, lapho ubuhlungu nokuhlupheka kuyobe kungasekho khona.—IsAmbulo 21:3, 4.—Njengoba ilandiswa uSamuel Vila Ugarte.