Ukuthatha Isithombe—Indlela Yokukwenza Ngokuphumelelayo
Zimbalwa izinto ezaziswa ngaphezu kwezithombe zabangane namalungu omkhaya esiwathandayo. Kakade, isithombe esithathwe kahle sisho okungaphezu nje kwesithombe esithathwe kunganakiwe; siwumfanekiso okuhloswe ukuba ulondoloze lokho ubuntu bomuntu obuyikho!
Inkinga iwukuthi izithombe ezithathwe ochwepheshe zithanda ukumba eqolo—ngaphezu kwalokho abanye bethu abangakufinyelela. Futhi lapho uzama ukuzithathela izithombe, uthola ukuthi kuhileleke okungaphezu nje kokubhekisa ikhamera kumuntu bese uthwebula. Lokhu kungenxa yokuthi isithombe esihle asihlanganisi nje umuntu othathwa isithombe, kodwa futhi nokukhanya, lokho okungemva kwakhe, indawo akuyo, indlela ami ngayo, isimo sobuso, nombala.
Noma kunjalo, uma unekhamera futhi uzimisele ngempela ukufunda amasu ambalwa ayisisekelo, ungathatha izithombe ezinhle. Kanjani? Ukuze siphendule, sizobuza umthwebuli wezithombe onguchwepheshe osenolwazi lweminyaka eyishumi kulomkhakha.
• Okokuqala, iyini imfihlo yokwenza umuntu amomotheke phambi kwekhamera? Qiniseka ukuthi umuntu uyafuna ukuthatha isithombe! Ngokwesibonelo, ake sithi ufuna ukuthatha intombazanyana isithombe. Uma ikhathele noma ilambile, kuyoba nzima ukusebenzelana nayo. Ngaphandle kwalokho, ukukhathala kuyokwenza ubuso namehlo ayo abonakale ekhathele, okuyokona isithombe. Ngakho yikhuthaze ukuba ithathe isihlwathi futhi idle kancane ngaphambi kokuba isikhathi sokuthatha izithombe siqale.
Kuyasiza futhi ukwenza umuntu akhululeke. Yiba oweneme nojabule. Menze akhululeke ngengxoxo, kodwa ungambulali ngensini. Lokhu kwenza kube sengathi ufifiyele kanti kuletha negazi ebusweni. Zama ukuthatha izithombe zezimo zobuso ezihlukahlukene. Lapho ziba ziningi izithombe ozithathayo, ayoba maningi amathuba akho okuthola isimo esimveza kangcono umuntu.
• Kuthiwani ngokugqoka nokuzilungisa? Ezithombeni zeqembu, ukuvumelana kwemibala kuyafiseleka. Ngokwesibonelo, uma uthatha isithombe somkhaya, sikisela ukuba ugqoke imibala ehambisanayo. Noma mhlawumbe uwenze ugqoke imibala efanayo. Nokho, khumbula ukuthi abantu abanomzimba omkhulu babukeka kangcono uma befake imibala engakhanyi kanti abantu abanomzimba omncane babukeka kangcono uma befake imibala ekhanyayo.
Kumelwe futhi ucophelele imininingwane: Ingabe izingubo zihleli kahle, azishwabene kakhulu? Ingabe uthayi uqondile? Ingabe izinwele zikahle? Iso lakho lingase lingaziboni izinwele eziphumile, kodwa ikhamera iyozibona! Uma uthatha owesifazane isithombe, ingabe izimonyo zakhe zigcotshwe ngokufanele?
• Kuthiwani ngabantu abafaka izibuko? Ngenxa yokucwebezela kwengilazi, lokhu kungase kube inkinga. Okokuqala, bheka engilazini yekhamera yakho ukuthi kukhona yini ukucwebezela okungafuneki. Uma kunjalo, tshela lowo muntu ukuba ajikise ikhanda kancane kancane kuze kusuke noma kunyamalale lokho kucwebezela maphakathi neso. Ngezinye izikhathi, ukutshela umuntu ukuba ehlise isilevu kuyosiza—kodwa qikelela ukuba ungamenzi abe nebilo!
• Ingabe kunendaba ukuthi yini ebonakala ngemuva? Ngokuqinisekile! Indawo emahlikilili enezintambo zikagesi, imigwaqo, noma izimoto, iyokona isithombe sakho. Ngakho funa indawo engase ithuthukise noma ithakazelise lowo muntu, njengomuthi, izihlahla eziqhakazile, uthango lwamapulangwe, noma ngisho nohlangothi lwenqolobane endala.
• Kuthiwani uma uthatha isithombe endlini? Kumelwe uzame ukuhlalisa umuntu esihlalweni noma kusofa phambi kodonga olupendwe ngombala okhanyayo noma phambi kwesitshalo sasendlini. Kuthakazelisa ngokukhethekile ukuveza umuntu esebenza noma enza into noma umsebenzi awuthandayo, kukhona itafula lokusebenzela, noma izinto zokuthunga lapho ekhona.
• Kuthiwani uma ungayitholi indawo ebukekayo? Zama ukwenza indawo engemuva ingabonakali kahle. Lokhu kusebenza kangcono ezithombeni zangaphandle lapho ungenza khona umuntu abe kude nendawo engemuva. Lokhu ukwenza ngokushintsha i-f-stop, noma ubukhulu besikhala sengilazi yekhamera. Inombolo encane ye-f-stop, enjengo-f5.6, iyokwenza umuntu omthatha isithombe abonakale kahle kodwa indawo engemuva ingacaci.—Bheka isithombe 1.
• Akhona amacebiso ngokuhlela ukubukeka kwesithombe? Okokuqala, kuyasiza ukumisa ikhamera yakho nge-tripod; khona-ke ungagxila kakhudlwana ekuhleleni ukubukeka kwesithombe. Ngokuvamile, izithombe ziveza umuntu ephelele, (ziveze ukhalo kuya phezulu), noma (ikhanda namahlombe noma ikhanda kuphela). (Bheka isithombe 2.) Uma i-lens yekhamera ingamamilimitha aphakathi kuka-105 no-150 ikulungele ukukhipha izithombe ezinhle. Uma ungenakukwazi ukushintsha i-lens yekhamera yakho, zama ukusondela kumuntu omthathayo noma uhlehle kuze kube yilapho uthola isimo osifunayo. Phela, kuwukuhlakanipha ukuba lapho ukala isithombe ushiye isikhala ngenhla kwekhanda, ezinhlangothini, nangezansi kwezinyawo. Ngalendlela ugwema ukunquma ikhanda, izinyawo, noma ukusala nesidumbu esingenakhanda nemilenze nezingalo uma kwenzeka usikhulisa isithombe. Lapho uqhubeka ukhulisa, yilapho kulahleka khona ingxenye yesithombe, kuxhomeke endleleni isithombe esikalwe ngayo.
Esinye isiqondiso esiwusizo yilokho okubizwa ngokuthi umthetho wezingxenye ezintathu. Lomthetho uhilela ukubeka ubuso bomuntu omthatha isithombe noma amehlo akhe engxenyeni yokuqala kwezintathu ukusuka ngenhla, ngezansi, noma ezinhlangothini zesithombe. (Bheka isithombe 3.) Nokho, ngezinye izikhathi kuyaphumelela ukwenza amehlo abe maphakathi nesithombe.
• Kuthiwani ngokumisa umuntu? Yenza lowo muntu abheke ikhamera ekhululekile, kungakhathaliseki ukuthi uhleli, umile, noma uhleli sakulala, kodwa athi ukutsheka kancane. Uma ubuso bubonakala buyindilinga kakhulu, menze athi ukujikisa ikhanda noma umzimba kancane ukuze kugqame ingxenye eyodwa kuphela yobuso. Ingxenye esethunzini kufanele kube yiyo eseduze kakhulu nekhamera. Lokhu kuyokwenza ubuso bubukeke buthe ukuzaca. Ngakolunye uhlangothi, uma ufuna ukwenza ubuso bubonakale bubukhudlwana, yenza umuntu ajikise ikhanda noma umzimba kuze kube yilapho ukukhanya kukhanyisa bonke ubuso.
Qaphelisisa izandla. Kufanele zibonakale zikhululekile futhi kufanele zibe sesimweni esingokwemvelo kulowo muntu, njengokuzibeka esilevwini noma ngezansana kwesihlathi. Uma umuntu emile, gwema iphutha elivame kakhulu lokumenza alengise izandla ziqonde ngqó. Kungcono ukuba aphathe okuthile noma enze izandla zibe sesimweni esingokwemvelo.
• Akhona amacebiso ngokuthatha imibhangqwana isithombe? Zama ukwenza omunye atshekisele ikhanda kancane ngakomunye. Ngokuvamile kungcono ukugwema ukuba balingane. Ungase uzame ukubamisa ngendlela yokuba amehlo omunye aqondane nekhala lomunye.—Bheka isithombe 4.
• Ake sikhulume ngokukhanya. Yisiphi isikhathi sosuku esingcono kakhulu sokuthatha izithombe ngaphandle? Ntambama kakhulu. Ngokuvamile umoya awumkhulu, futhi ukukhanya akuhlabi. Zama ukumisa umngane wakho ngendlela ezokwenza ukukhanya kwelanga kukhanyise uhlangothi olulodwa lobuso, kube nokukhanya okungunxantathu nje ohlangothini lobuso olusethunzini. Lokhu kuyovimbela umuntu ukuba angafifiyeli. Uma ufuna ukuthatha isithombe esiveza uhlangothi kuphela, ikhamera yakho mayibe sohlangothini lobuso olusethunzini. Okunye, qikelela ukuthi uyayisitha i-lens yekhamera yakho elangeni.
• Kuthiwani uma ukukhanya kukukhulu kakhulu? Zama ukwenza umngane wakho afulathele ilanga.
• Ngeke yini lokho kwenze ubuso bakhe bube sethunzini? Yebo, kodwa ungasebenzisa i-flash yakho ukuze ukhanyise izindawo ezisethunzini. Amanye amakhamera ayazenzela lokhu. Elinye ikhambi liwukuba ube nomngane ozoba umsizi. Angaphakamisa into esasibuko noma uqwembe olukhulu olumhlophe enze ukuba ukukhanya okuvela elangeni kushaye ebusweni bomuntu omthatha isithombe.
• Kuthiwani ngokukhanya kwasendlini? Ungasebenzisa ukukhanya kwemvelo ngokumisa umuntu eceleni kwefasitela. Ikhethini lingasetshenziselwa ukunciphisa ukukhanya. Uma kudingeka, ungasebenzisa i-flash noma uqwembe olumhlophe ukuze ukhanyise izindawo zobuso ezibonakala zinethunzi kakhulu.—Bheka isithombe 5.
• Kuthiwani uma kungekho ukukhanya okwanele? Ezimweni ezinjalo kuyodingeka usebenzise i-flash yakho. Zama ukumisa umuntu endaweni enodonga olumhlophe eceleni kwakhe. Tshekisa i-flash yakho ukuze ukukhanya kushaye odongeni oluseceleni. Njengoba ukukhanya kuvela eceleni, uyokwazi kangcono ukulawula ukuthi ingxenye engakanani yobuso ekhanyisiwe.
Kuyavunywa, kuyindaba yokuzama nokwenza amaphutha ukuze uthole imiphumela emihle. Kodwa izimiso eziyisisekelo zokuthatha isithombe zilula. Ngokuhlela ngokucophelela nangokunakisisa imininingwane, ngisho nangekhamera evame kunawo wonke, ungathatha isithombe esihle—leso wena nabathandekayo bakho eniyosazisa eminyakeni eminingi ezayo!