Okuphawulwa Abafundi Balo Magazini
Isehlukaniso Ngibhala ukuze ngiveze ukwazisa kwami okujulile ngochungechunge oluthi “Uyini Umbono Olinganelisayo Ngokuwinwa Kwabantwana?” (December 8, 1997) Ngemva kokuba ngifake isehlukaniso, kwakunezinkinga ekunqumeni ukuthi umyeni wami wangaphambili wayezoyibona kaningi kangakanani indodakazi yethu. Umyeni wami omusha waba nomuzwa wokuthi kwakumelwe angayiboni nhlobo. Kodwa i-Phaphama! yacacisa le ndaba ngokubeka inhlalakahle yengane kuqala hhayi imizwa yabazali noma osingamzali.
L. C., Wales
Ngathathelwa indodakazi yami, ewukuphela kwengane enginayo, lapho inkantolo inquma ukuthi kufanele ihlale noyise. Ngakho-ke, lesi sihloko sabonakala sibhalelwe mina. Kuyisibusiso ukwazi ukuthi uJehova usinika ‘ukudla kwethu ngesikhathi esifanele.’—Mathewu 24:45.
D. B., Switzerland
Ngabonga uJehova ngikhala lapho ngibona isembozo se-Phaphama!, njengoba sekuyiminyaka emibili ngilwela ukuwina abantwana bami. Kungokuhlangenwe nakho okuthinta umzwelo ngempela. Ngiyazisa ngempela indlela efundisayo, necatshangelwe kahle enayibeka ngayo le ndaba.
A. F., United States
Lapho ngisemncane, abazali bami bahlukana. Ngazizwa ngihlukene phakathi kwabo bobabili. Ngakho ningabona ukuthi ngazijabulela kanjani izihloko ezikhuluma ngale ndaba. Ngikwazisa ngempela ukuthi nasingatha le nkinga ngokombono wezingane.
K. D., Yugoslavia
Izindawo Zokulondoloza Imvelo Ezisezintabeni Ngifisa ukunibonga kakhulu ngesihloko esithi “Ubuhle Bezindawo ZoMbuso Zokulondoloza Imvelo Ezisezintabeni.” (November 22, 1997) Ukukhuluma iqiniso, kuqala ngangizeqa izihloko ezikhuluma ngemvelo. Kodwa ngabona izithombe ezinhle ezikulesi sihloko futhi nganquma ukuba ngisifunde. Lapho ngiqeda, ngabona ukuthi ngangiphuthelwe ukufunda ezinye izihloko eziningi zemvelo ezithakazelisayo.
T. M., Ukraine
Ubungqingili Ngajabula lapho ngithola umagazini i-Phaphama! ka-December 8, 1997, onesihloko esithi “Umbono WeBhayibheli: Ingabe AmaKristu Kufanele Abazonde Ongqingili?” Le ndaba ebucayi yabhalwa kahle nangokulinganisela.
L. W., United States
Ukucobeka Nganika umphathi wami ikhophi yesihloko esithi “Ingabe Umsebenzi Wakho Uyakucoba?” (December 22, 1997) Emsebenzini ngosuku olulandelayo, wangitshela ukuthi isihloko sasisihle kakhulu. Wasidlulisela kwabanye engisebenza nabo futhi washiya ikhophi yalesi sihloko endaweni yethu yokuphumula. Sasifike ngesikhathi ngempela!
V. L., United States
Ngiyabonga ngokwaziswa okuthakazelisayo. Ngineminyaka engu-17 ubudala futhi ngisebenza isikhathi esigcwele. Lesi sihloko sanikeza icebiso elihle ngokuthi ngingawenza kanjani umsebenzi wami ujabulise kakhudlwana. Ngiyabonga!
E. A., Italy
Ngibonga kakhulu ngalesi sihloko. Njengamanje ngisonyakeni wesibili wokuqeqeshelwa umsebenzi futhi bengiba nomzwangedwa, ngingasawujabuleli umsebenzi wami. Lesi sihloko sangisiza ngaphinde ngathola injabulo emsebenzini wami.
I. F., Germany
Ama-rave Ngineminyaka engu-19 ubudala futhi bengikujabulela ngempela ukulalela umculo we-techno. Kodwa ngasijabulela kakhulu isihloko esithi “Intsha Iyabuza . . . Ingabe Ama-rave Awukuzijabulisa Okungenangozi?” (December 22, 1997) Lesi isihloko sokuqala engiye ngasibona esiwuchaza ngokunembile lo mculo. Ngiyabonga ikakhulukazi ngengxenye ethi “Ingabe Ama-rave Akulungele Ngempela?” Ngemibuzo nangemibhalo, ngasizwa ukuba ngifinyelele esiphethweni esilula nesinengqondo.
A. P., Slovenia