Umbono WeBhayibheli

Ingabe Umhlaba Wethu Uyobhujiswa Yinhlekelele Yembulunga Yonke?

NGO-MARCH 12, 1998, izihloko zamaphephandaba, i-TV nezingosi ze-Internet embulungeni yonke zabikezela lezi zindaba ezesabisayo: “Iplanethi encane enobukhulu obuyikhilomitha nesigamu iyogeja uMhlaba kancane.” Ososayensi nabantu abavamile bashikashikeka behlola ukuthi ingozi iyoba ngakanani. Ngokushesha, izazi zezinkanyezi zaphetha ngokuthi yayingekho ingozi yokuba le planethi encane ishayisane nomhlaba.

Nokho, phakathi naleso sidumo, abantu baye baphaphamela isimo esithile esisha. I-U. S. News & World Report yathi: “Into ephawuleka kakhulu ngalesi simemezelo esiyiphutha kungase kube ukuthi, nakuba sasethusa, abantu abaningi abasishayanga mkhuba. Umbono wokuthi thina lapha eMhlabeni kufanele sigade eziningi zezinto ezinjalo—futhi sihlele ukwenza okuthile ngazo—wawuyobhekwa njengesimanga eminyakeni eyishumi noma ngaphezulu edlule, kodwa manje ososayensi ngisho nezinye izazi zezombangazwe bacabanga ukuthi nakuba lolu songo luluncane, kodwa lungokoqobo.”

Ezinye izazi zezinkanyezi zikholelwa ukuthi kunezinto ezihamba emkhathini ezingaba ngu-2000 ezinkulu ngokwanele ukubangela inhlekelele yembulunga yonke, zihamba emizileni enqamula lapho kuzungeza khona umhlaba noma esondele kuwo. Abacwaningi bathi ngisho noma umhlaba ubungashayisana nencane kunazo zonke, ukuqhuma kwayo bekuyolingana nokwamandla ezikhali eziningi zenuzi eziqhuma kanyekanye. Imiphumela yokushayisana okunjalo ibiyoba yinhlekelele kuyiplanethi yethu nakubantu nezilwane okuhlala kuyo.

Ngokuvamile umbono ongashaywa mkhuba ezibikezelweni nasezibalweni ezinjalo ezikhwantabalisayo owoMdali wendawo yonke, uJehova uNkulunkulu. (IHubo 8:3; IzAga 8:27) EBhayibhelini uyenze yacaca intando nenjongo yakhe ngomhlaba nangohlanga lwesintu. Ingabe uyovumela inhlekelele yembulunga yonke ukuba ibhubhise umhlaba wethu?

Indawo Yonke Engaphansi Kokulawula Kwaphezulu

Njengoba uJehova enguMdali wendawo yonke onamandla onke, kunengqondo ukuphetha ngokuthi unekhono lokuwalawula ngokuphelele amandla aqondisa izinto ezihamba emkhathini. Inkosi ehlakaniphile uSolomoni yathi uJehova uye “wamisa amazulu ngokuqonda.” (IzAga 3:19) Umprofethi uJeremiya wamemezela ukuthi uNkulunkulu ‘waleneka izulu ngokuqonda kwakhe.’—Jeremiya 51:15.

UJehova uye wenza ukuba isebenze imithetho namandla aqondisa izinto ezihamba emazulwini, kuhlanganise nezinkanyezi, amaplanethi, izinkanyezi ezinomsila namaplanethi amancane. (Isaya 40:26) Nokho, kubonakala sengathi uyakuvumela ukuba izinkanyezi namaplanethi kudlule emijikelezweni engokwemvelo yokuvela, ukuphila nokufa okungokomfuziselo ngaphandle kokungenela ngaso sonke isikhathi. Lokhu kuhlanganisa nokushayisana okukhulu kwezinto ezihamba emazulwini. Isibonelo samuva esokushayisana kwezinkanyezi ngo-July 1994 okwenza ukuba izingcezu zenkanyezi enomsila i-Shoemaker-Levy 9 zingqubuzane neplanethi i-Jupiter.

Kunobufakazi obungokwesayensi bokuthi amadwala amakhulu avela emkhathini ashayisana nomhlaba ngaphambi kokuba khona kwabantu kuwo. Kodwa ingabe isenzakalo esinjalo siyokwenzeka kule planethi yethu enabantu? Ngokwesibonelo, bekungenzekani uma iplanethi encane enobukhulu obuyikhilomitha nesigamu ibingashayisana nomhlaba? Isazi sezinkanyezi uJack Hills sibikezela ukuthi lokho kushayisana bekungaba namandla aphindwe izikhathi eziyizigidi kunebhomu elaqothula iHiroshima. Uma leyo planethi encane ibingawela olwandle, amagagasi amakhulu abengasibekela izindawo ezisogwini. UHills uthi: “Amadolobha abengasitshekelwa amanzi kuphela.” Kubikezelwa ukuthi okubi kakhulu kungaba ukuqothulwa kwalo lonke uhlanga lwesintu. Lesi sibikezelo sembubhiso sihlobene kanjani nentando yoMdali wethu ngomhlaba? IBhayibheli libonisa ukuthi le planethi inendawo ekhethekile enjongweni kaJehova.

UMhlaba Wethu—Wadalwa Ngenjongo

Ngokuphathelene neplanethi yethu, umhubi uthi: “Izulu liyizulu likaJehova, kepha umhlaba wawunika abantwana babantu.” (IHubo 115:16) U-Isaya uchaza ukuthi uJehova “owawubumba umhlaba, . . . wawumisa, engawudalelanga ize, wawubumba ukuba kuhlalwe kuwo.” (Isaya 45:18) Umhlaba uyifa uJehova aliphe isintu. Kanti njengoba uMdali wethu egcinele isintu esesaba uNkulunkulu ikusasa laphakade, umhlaba uyoba ikhaya laso laphakade. IHubo 104:5 liyasiqinisekisa: “[UJehova] umisile umhlaba phezu kwezisekelo zawo, ukuze ungazanyazanyiswa kuze kube-phakade naphakade.”

Yiqiniso, uNkulunkulu uye wavumela ukuba kwenzeke izinhlekelele ezinkulu kule planethi yethu, okuye kwaphumela ekufeni kwabantu abaningi. Ezinye zalezi zinhlekelele—njengezimpi, indlala nezifo eziwumshayabhuqe—ziye zabangelwa ukuhaha, ubuwula nonya lwabantu. (UmShumayeli 8:9) Ezinye—njengokuzamazama komhlaba, ukuqhuma kwezintaba-mlilo, izikhukhula neziphepho—ziye zabangelwa imvelo isintu esingayiqondi ngokugcwele. Ngokuphambene nenjongo kaNkulunkulu yokuqala, abantu abasaphelele; banesono. Ngenxa yalokho, thina ngabanye asinakulindela isivikelo saphezulu kulokho okubizwa ngokuthi izinhlekelele ezingokwemvelo.

Nokho, uJehova akakaze avumele ukuba ukuphila kwabantu emhlabeni kusongelwe nganoma iyiphi indlela. Kusukela umuntu adalwa, asikho isenzakalo senhlekelele engokwemvelo eyasongela ukuphila kwaso sonke isintu emlandweni.a

Ukusinda Kohlanga Lwesintu Kuqinisekile

Kusukela ekuqaleni komlando wesintu, injongo yoMdali wethu ibiwukuba abantu ‘bagcwalise umhlaba, bawunqobe.’ (Genesise 1:28; 9:1) Uye wathembisa ukuthi “abalungileyo bazakudla ifa lomhlaba, bahlale kuwo njalonjalo.” (IHubo 37:9, 11, 22, 29) Ngokuphathelene nezithembiso zakhe, uJehova uyaqinisekisa: “Icebo lami liyakuma, ngiyakwenza yonke intando yami.”—Isaya 46:10; 55:11; IHubo 135:6.

IBhayibheli aliphiki ukuthi kungase kwenzeke inhlekelele encane emhlabeni ebangelwa izinto ezihamba emkhathini. Nokho, singaqiniseka ukuthi uJehova ngeke avumele inhlekelele yembulunga yonke ukuba ibhuntshise injongo yakhe engaguquki ngomhlaba nangesintu. Ngesisekelo sezithembiso zeBhayibheli, singaqiniseka ukuthi iplanethi yethu iyohlala inabantu phakade—yebo, iyoba ikhaya lesintu kuze kube phakade naphakade!—UmShumayeli 1:4; 2 Petru 3:13.

[Imibhalo yaphansi]