Basigcina Isithembiso Sabo!

U-ANTONIO, owayenza unyaka wakhe wokugcina esikoleni esiphakeme, wayefuna ukufakaza ngokwethukela kwafunda nabo ekilasini. Ngakho wasikisela ukuba uthisha wakhe wezomlando abonise i-video ethi Jehovah’s Witnesses Stand Firm Against Nazi Assault. Nakuba uthisha ayemanqikanqika, wavuma, wathi uzoyidlala ngakusasa le video.

U-Antonio uyalandisa: “Ekuqaleni, uthisha wayebuka le video ngokunganaki; kodwa lapho eqaphela ukuthi yizazi-mlando ezivelele ezazilandisa umlando woFakazi BakaJehova emakamu okuhlushwa, walalelisisa. Ekuphetheni wangibonga ngokusikisela ukuba sibuke le video.”

Esifundweni esilandelayo, lo thisha wazama ukuchaza umsebenzi wama-Bibelforscher, njengoba babaziwa kanjalo oFakazi BakaJehova eJalimane ngaleso sikhathi; kodwa wabona kungcono ukuba adedele u-Antonio achaze. U-Antonio wachaza indima yoFakazi emphakathini kanye nezinye zezimfundiso zabo. Waphetha ngokuthi: “Kusobala ukuthi abantu ngeke bazuze esigijimini esiyigugu esisiphethe uma bengasilaleli, uma begaklaza izicabha lapho besibona emnyango, noma uma bengazifundi izincwadi zethu.”

Bonke abafundi ekilasini lika-Antonio bavumelana nombono wakhe, futhi uthisha wasikisela ukuba ikilasi lithathe izwi lesinqumo. Uma nje kuvela ithuba, babezobalalela oFakazi bese bethatha izincwadi zabo. Ikilasi laqhubeka lixoxa nge-video isikhathi esithile. Ungacabanga ngokwaneliseka kuka-Antonio ezinsukwini ezimbalwa ezalandela lapho ebona abanye abafundi abaningana befika ekilasini nezincwadi ze-Watchtower futhi ezwa ngamunye wabo esho ngokumomotheka, ethi: “Uyabona, ngisigcinile isithembiso sami!”