Ukulingisa Imiklamo Yokuphila Emangalisayo
Izingane ezicathulayo ziyawa zishayeke ngamakhanda. Izingane ezindadlana ziwa ezihlahleni nasemabhayisikilini. Abagijimi bashayisana enkundleni yemidlalo. Abashayeli bavelelwa izingozi ezingenakubalwa emigqwaqweni. Nokho, naphezu kwakho konke lokhu kuwa, ukushayeka nokushayisana, sivame ukuphuma singenamyocu. Sivame ukulithatha kancane ikhono lemizimba yethu lokumelana nezimo ezinzima nelokuzivuselela. Kodwa njengoba ososayensi sebeqala ukuthola, kusukela emathanjeni kuya esikhumbeni, siwumkhiqizo womklamo owubuchwepheshe ngempela.
IMVELO ibonisa ukuqina nokukwazi ukumelana nezimo ezinzima—ngezinga elithile. Izithombo ezithambile ziqhekeza ukhonkolo namadwala avuleke njengoba zikhula ziba imithi. Kanti, izihlahla zingamelana nezivunguvungu eziwisa izigxobo zikagesi futhi ziphephule izindlu. Iziqophamithi ziqopha ukhuni futhi amakhanda azo abhekana nezinto ezinamandla kangangokuba bezingabuchoboza ubuchopho obuvamile. Izikhumba zezingwenya nama-alligator azingenwa yimikhonto, imicibisholo ngisho nezinhlamvu zesibhamu. (Qhathanisa noJobe 41:1, 26.) Sekuyizinkulungwane zeminyaka izinto ezinjalo zibamangalisa futhi zibakhungathekisa abantu.
Eminyakeni engu-40 edlule, intuthuko kwezobuchwepheshe iye yenza ukuba ososayensi babe namathuluzi amasha anamandla abangawasebenzisa ekucwaningeni izimfihlakalo zale miklamo, eziningi zazo ezicashé ekujuleni kwengqamuzana ephilayo. Kule nto encane ebonakala ngesibonakhulu, umklamo usezingeni eliphezulu ngendlela emangalisayo neyinkimbinkimbi ngempela. Nokho, inhloso yesayensi akukhona nje kuphela ukwambula izimfihlakalo zezici zemvelo eziphawulekayo kodwa futhi ukuzilingisa—okungenani emithethweni evamile. Lo mkhakha wocwaningo ubonakala uthembisa kangangokuthi uye waholela ekusungulweni kwesayensi entsha ebizwa ngokuthi i-biomimetics, okuyigama elisuselwa kwelesiGreki elithi biʹos, elisho “ukuphila,” nelithi miʹme·sis, elisho “ukulingisa.”
I-biomimetics Ithembisa Izwe Elingcono
“I-biomimetics isifundo sokwakheka kwezinto eziphilayo nemisebenzi yazo,” kuchaza incwadi ethi Biomimetics: Design and Processing of Materials. Inezela ngokuthi lesi sifundo sihloselwe ‘ukusungula imibono emisha bese iyathuthukiswa kwenziwe izimiso ezifana nalezo ezitholakala ezintweni eziphilayo.’
Usosayensi uStephen Wainwright uthi “i-biomimetics izokwedlula isayensi yamangqamuzana ezinto eziphilayo futhi iyithathele isikhundla sokuba isayensi yezinto eziphilayo eyinselele nebaluleké kakhulu eKhulwini Lama-21.” UProfesa Mehmet Sarikaya uthi: “Sisonqenqemeni lwezinguquko zezinto oluzolingana nolwangeNkathi Yensimbi neyeNguquko Yezezimboni. Sithuthukela enkathini entsha yezinto. Ekhulwini leminyaka elizayo, ngicabanga ukuthi i-biomimetics izoyishintsha kakhulu indlela esiphila ngayo.”
Eqinisweni, isiqalile kakade ukushintsha ukuphila kwethu, njengoba sizobona. Kodwa okokuqala, ake sibone kafushane ezimbalwa zezimangaliso ezingakaqondakali ososayensi abasazihlola. Sizohlola nezincazelo ezisangulukisayo zegama elithi “umklamo” futhi sibone ukuthi zisenza kanjani siqonde izinto ezimangalisayo ezisizungezile.