Ingabe Inkululeko Kanembeza Ethé Xaxa Iyoke Ivunyelwe EMexico?
NGUMLOBELI WE-PHAPHAMA! EMEXICO
INKULULEKO yenkolo eMexico iqinisekiswe umthetho. Noma kunjalo, umthetho usenemigoqo ethile enkululekweni yokukhulekela. Ngokwesibonelo, kuleli zwe abayingeni indaba yokwenqaba ukuhlanganyela enkonzweni yezempi ngenxa kanembeza. Yingakho i-Institute of Legal Investigations, ye-National Autonomous University of Mexico (UNAM), yanquma ukuba kube nomhlangano womhlaba wonke onesihloko esithi “Ukwenqaba Ngenxa Kanembeza EMexico Nasemhlabeni Wonke.” I-Institute of Legal Investigations ye-UNAM kufanele ilandise kuhulumeni, kodwa injongo yayo iwukuhlola imithetho emisiwe nendlela esebenza ngayo. OFakazi BakaJehova eMexico bamenywa ukuba bathumele ummeleli ozonikeza inkulumo ngesihloko esithi “OFakazi BakaJehova Nokwenqaba Ngenxa Kanembeza.”
Oprofesa Bageqa Amagula
Inkulumo ethi “Ukwenqaba Ngenxa Kanembeza Emthethweni Womhlaba Wonke,” eyanikezwa uDkt. Javier Martínez Torrón, onguprofesa eGranada University of Law, eSpain, yabonisa ukuthi inkululeko kanembeza nelungelo lokwenqaba eminye imithetho noma izibopho ngenxa kanembeza kakade sekuyaqashelwa emhlabeni wonke. Wakhuluma ngesimo soFakazi BakaJehova eSpain nendaba kaKokkinakis eGreece.a
UDkt. José Luis Soberanes Fernández, onguprofesa we-Institute of Legal Investigations ye-UNAM, wakhuluma ngesihloko esithi “Okuhlangenwe Nakho Kwabantu BaseMexico Ngale Ndaba.” “Kumelwe sisho ukuthi Umthetho WaseMexico Wezinhlangano Zenkolo Nokukhulekela Obala ukwenqabela ngokuqondile ukwenqaba okuthile ngenxa kanembeza,” esho, ebhekisela eSiphakamisweni Sokuqala, esithi: “Ngaphansi kwanoma yiziphi izimo, izinkolelo zenkolo ngeke zivimbele umuntu ukuba avumelane nemithetho yaleli zwe. Akekho oyobeka izaba ezingokwenkolo ukuze agweme imithwalo yemfanelo nezibopho ezishiwo yimithetho.” Ekuphetheni, uDkt. Soberanes wathi: “Sikholelwa ukuthi kuyaphuthuma ukumisa umthetho endabeni yokwenqaba okuthile ngenxa kanembeza eMexico.”
Wabhekisela eqinisweni lokuthi unyaka ngamunye amakhulu ezingane ezingoFakazi eMexico zibhekana nezinkinga eziphathelene nemfundo ngenxa yokwenqaba kwazo okusekelwe eBhayibhelini ukukhulekela ifulege. Ezinye izingane zoFakazi BakaJehova azivunyelwa ngisho nokubhalisa esikoleni. Nokho, ngenxa yokufaka izicelo ngeKhomishane Yamalungelo Esintu, eziningi zazo ziye zaphinde zathola ilungelo lokufunda. Ezinye izikhulu zezemfundo ziye zathatha izinyathelo zokuvimbela ukuba izingane zingaxoshwa esikoleni, kodwa abanye othisha bayishaya indiva imizamo enjalo. Abasemagunyeni baye bakubekezelela ukuma koFakazi, kodwa ayikho indinganiso ebekiwe ukuze ilandelwe yizikole zaseMexico.
Lo mhlangano wahlanganisa nokwenqaba ngenxa kanembeza kwezinye izinkolo, njengokuphoqelelwa ukusebenza ngezinsuku ezizibheka njengezingcwele, imfuneko yokuba emsebenzini bagqoke ngendlela ephula izinkolelo zabo ezingokwenkolo, nokunye. Kwakhulunywa nangokwenqaba ukuhlanganyela empini nokwenqaba izindlela zokwelashwa ezithile.
OFakazi BakaJehova NoKesari
Ilungu lezisebenzi zehhovisi legatsha loFakazi BakaJehova eMexico lanikeza inkulumo echaza kafushane izinkolelo zabo eziyinhloko. Lachaza ukunamathela kwabo ezimisweni zeBhayibheli ezinjengalesi esikuLuka 20:25 esitshela amaKristu ukuba ‘abuyisele izinto zikaKesari kuKesari.’ Labhekisela nakweyabaseRoma 13:1, ethi amaKristu kufanele ahloniphe amagunya ezwe. Lagcizelela ukuthi oFakazi BakaJehova bayizakhamuzi ezivamile, ezilalela umthetho futhi ezilwela ukukhokha izintela zazo, ziphile ukuphila okuhlelekile, zigcine amakhaya azo ehlanzekile futhi zifundise izingane zazo esikoleni.
Labe seliqokomisa isisekelo esingokomBhalo sokuba oFakazi benqabe ukukhulekela ifulege, esitholakala eMithethweni Eyishumi, ku-Eksodusi 20:3-5: “Ungabi nabanye onkulunkulu ngaphandle kwami. Ungazenzeli izithombe ezibaziweyo, namfanekiso wokusezulwini ngaphezulu, nowokusemhlabeni phansi, nowokusemanzini phansi komhlaba; ungazikhothameli, ungazikhonzi.”
OFakazi BakaJehova bakhulekela uNkulunkulu kuphela, futhi abalokothi bakhulekele isithombe. Kodwa, ngeke nanini benze isenzo sokwedelela ifulege lesizwe noma balijivaze.
Ukuze kugcizelelwe umbono woFakazi BakaJehova kule ndaba, kwaboniswa i-video ethi Purple Triangles. Le video ibonisa indlela oFakazi BakaJehova abama beqinile ngayo ngaphansi kwamaNazi eJalimane (1933-45). Ixoxa ngendaba yabakwaKusserow, umkhaya owama uqinile ezinkolelweni zawo phakathi nokubusa kwamaNazi.b
Kwabe sekunikezwa isizathu esingokomBhalo esenza oFakazi BakaJehova benqabe ukumpontshelwa igazi. (Genesise 9:3, 4; IzEnzo 15:28, 29) Kwachazwa ilungiselelo lamaKomiti Okubonisana Nezibhedlela elisemhlabeni wonke. Ngaphezu kwalokho, kwaqokonyiswa okuye kwafezwa odokotela ababambisana noFakazi BakaJehova, ekubahlinzeni ngaphandle kwegazi.
Usuku ngalunye bayikhulu abantu ababeba khona kulo mhlangano, abaningi babo abameli. Kwakukhona nabameleli beHhovisi Lezindaba Zenkolo eMexico. Bonke labo ababekhona bakwazi ukulalela umbono wochwepheshe mayelana nokuhlonipha abantu abenqaba okuthile ngenxa kanembeza. Amalungu esishaya-mthetho eMexico ayawuqabuka lo mbono, nakuba wamukelwa kabanzi emazweni abuswa ngentando yeningi, njengeFrance, iPortugal, iSpain ne-United States nakwamanye amazwe okwakungawamaKhomanisi, njengeCzechia neSlovakia.
[Imibhalo yaphansi]
a Bheka izihloko ezithi “Inkantolo Ephakeme YaseYurophu Isekela Ilungelo Lokushumayela EGrisi” nesithi “Ukuvikela Izindaba Ezinhle Ngokomthetho,” kuyi-Nqabayokulinda ka-September 1, 1993, neka-December 1, 1998.
b Bheka INqabayokulinda ka-September 1, 1985, “Uthando Lomkhaya Wakithi NgoNkulunkulu Naphezu Kokuboshwa Nokufa.” Bheka neka-January 15, 1994, ikhasi 5.
[Isithombe ekhasini 21]
OFakazi BakaJehova eMexico bayayazisa inkululeko yabo yokushumayela