Ingabe Umhlaba Uyoke Ube Nobunye?

EMINYAKENI yamuva izigidi zabantu eMpumalanga Yurophu nakwezinye izindawo ziye zabhekana nemiphumela yempi ebangela uqhekeko. Nokho, nangesikhathi lezi zingxabano ezinonya kanjalo zisaqhubeka, izinkulungwane zabantu kula mazwe akhungethwe yizimpi zazikwazi ukuhlakulela futhi zilondoloze ubunye beqiniso phakathi kwazo. Cabangela izibonelo ezimbalwa.

Ngo-1991 isixuku esibalelwa ku-15 000 esasivela ezizweni ngezizwe sahlangana eZagreb, eCroatia. Iphoyisa elalikule nkundla lashukumiseleka ukuba liphawule: “Kungaba kuhle ukuba abezindaba bakubone lokhu okwenzeka kule nkundla, khona lapha, lapho sibona khona abantu baseSerbia, eCroatia, eSlovenia, eMontenegro nabanye behleli ndawonye ngokuthula.” Yini ebangela lobu bunye obungajwayelekile?

Ngo-1993 umhlangano wezizwe omkhulu nakakhulu, owawunesihloko esithi “Ukufundisa Kwaphezulu,” wawuseKiev, enhloko-dolobha ye-Ukraine. Inani eliphakeme labantu ababekhona cishe lalingu-65 000. Ikhasi lokuqala le-Evening Kiev labika: “OFakazi BakaJehova . . . abahlanganisiwe nje amabheji aluhlaza kuphela abhalwe ukuthi ‘Ukufundisa Kwaphezulu’ kodwa bahlanganiswé ukholo lweqiniso.”

Ukufundisa Kwaphezulu—Ithonya Lobunye

Ingabe uyazibuza ukuthi kungani oFakazi Ba-kaJehova benobunye kuyilapho bezungezwe ukwahlukana. UProfesa Wojciech Modzelewski wasePoland uchaza isizathu ngokusho lokhu ngoFakazi: “Isici esiyinhloko sesimo sabo sengqondo esinokuthula ukuthi kakade sebelandela izimiso ezembulwe eBhayibhelini.” Ngempela, oFakazi BakaJehova bamunye emhlabeni wonke ngenxa yokufundisa kwaphezulu koMdali, uJehova uNkulunkulu. Yikuphi lokho kufundisa?

UJesu Kristu waphawula isimiso esibalulekile sokwenza abantu babe munye lapho ethi mayelana nabalandeli bakhe: “Abayona ingxenye yezwe, njengoba nje nami ngingeyona ingxenye yezwe.” Yebo, ukuma kokungathathi-hlangothi koFakazi BakaJehova yonke indawo kubenza babe munye. Lokhu kuvumelana namazwi kaJesu lapho ethandaza: ‘Ngenza isicelo . . . ukuze bonke babe munye, njengoba nje wena, Baba, usebunyeni nami futhi nami ngisebunyeni nawe, ukuba nabo babe sebunyeni nathi.’—Johane 17:16-21.

Lokhu kuma kokungathathi hlangothi kuyithonya lobunye ngoba kushukumisela oFakazi kuzo zonke izingxenye zomhlaba ukuba baphile ngokuvumelana nalokho umprofethi u-Isaya akuphawula ngabo bonke labo uNkulunkulu ‘ayakubafundisa izindlela zakhe.’ U-Isaya wathi abanjalo kwakuyodingeka ‘bakhande izinkemba zabo zibe ngamakhuba nemikhonto yabo ibe ngocelemba.’ Lo mprofethi waqhubeka: “Isizwe asiyikuphakamisela isizwe inkemba, zingabe zisafunda ukulwa.”—Isaya 2:2-4.

Ubunye nokuthula obaphawuleka emihlanganweni yoFakazi BakaJehova eMpumalanga Yurophu phakathi neshumi leminyaka elidlule bubonisa ukuthi isiprofetho sika-Isaya sesiyagcwaliseka kakade ngezinga elincane. EYurophu nakwezinye izindawo, oFakazi sebekhande izinkemba zabo zaba amakhuba nemikhonto yabo yaba ocelemba ngomqondo ongokomfanekiso. Ngenxa yalokho, bajabulela ukuthula nobunye namuhla kuleli zwe elihlakazekile. Yingakho nje ingosi yomhleli wephephandaba yake yathi: “Uma lonke izwe beliphila ngezinkolelo [zeBhayibheli] zoFakazi [BakaJehova] bekuyophela ukuchitheka kwegazi nenzondo, futhi bekuyobusa uthando njengenkosi”! Ingabe lokho kuyoke kwenzeke?

Indlela Ubunye Bomhlaba Wonke Obuyokwenzeka Ngayo

Ukuze kube khona ukuthula emhlabeni wonke kudingeka okwengeziwe kuneqembu elincane nje labantu abanezinhloso ezinhle. Kudingeka nohulumeni onamandla okulawula ithonya lalabo abalwisana nobunye nokuthula. Eqinisweni, uJesu wafundisa abalandeli bakhe ukuba bathandazele uhulumeni onjalo: “Umbuso wakho mawuze. Intando yakho mayenzeke nasemhlabeni, njengasezulwini.” (Mathewu 6:10) Yebo, uJesu wabonisa ukuthi uhulumeni kaNkulunkulu kuphela, “umbuso wamazulu,” ongaxazulula izinkinga zomhlaba—kuhlanganise nenkinga yokungabi nabunye.—Mathewu 4:17.

UJesu Kristu uyiNkosi yalo Mbuso wasezulwini. Ngaphansi kokubusa kwakhe, abantu emhlabeni bayoba nesikhathi sokuthula nobunye esingakaze sibe khona. Lobu bunye bomhlaba wonke ngeke bulethwe yizinguquko kwezomnotho ezenziwa abantu. Uhulumeni womhlaba wonke osezandleni ‘zeNkosi Yokuthula’ kuphela ongenza into enjalo.—Isaya 9:6, 7.

INkosi Yokuthula ngeke ikubekezelele ukungabi nabulungisa kwanamuhla okuvame ukubangelwa ubumpofu nokusetshenziswa kabi kwamandla. IBhayibheli liyathembisa: “Onke amakhosi ayakuziwisa phambi kwayo; zonke izizwe ziyakuyikhonza. Ngokuba iyakukhulula ompofu ozikhalela kuyo, nohluphekayo ongenamsizi. Iyakukhulula umphefumulo wabo okhahlweni nasendluzuleni; . . . Kuyakuba khona inala kakolweni ezweni esiqongweni sezintaba.”—IHubo 72:11, 12, 14, 16.

Ukuntuleka kwemisebenzi nakho kuyophela ngaphansi kokubusa kukaKristu. Umprofethi u-Isaya uthi: “Abayikwakha, kuhlale omunye; abayikutshala, kudle omunye, ngokuba izinsuku zabantu bami ziyakuba njengezinsuku zomuthi, nomsebenzi wezandla zabakhethiweyo bami uyakugugela kubo.” (Isaya 65:22) Cabanga nje, wonke umuntu emhlabeni uyokwazi ukwenza umsebenzi owusizo nowanelisayo!

Ubunye Beqiniso—Nini?

Kodwa ukubusa kukaKristu emhlabeni kuyoqala nini? Ekuphenduleni lowo mbuzo uJesu wakhomba isikhathi esibonakala ngezimpi, imibiko yezimpi, izifo, ukuzamazama komhlaba nezinye izenzakalo. Nokho, wakhuluma nangesici esihle—ukushunyayelwa kwezindaba ezinhle zoMbuso kaNkulunkulu emhlabeni wonke. (Mathewu 24:3-14; Luka 21:11) UJesu wathi lezi zenzakalo ziyofinyelela umvuthwandaba wazo ‘osizini olukhulu’ oluyoletha umbuso ohluke ngokuphelele emhlabeni. (Mathewu 24:21) Funda inkulumo yakhe elotshwe kuMathewu isahluko 24 noLuka isahluko 21. Qhathanisa izimo azibikezela nalokho okubonayo namuhla emhlabeni. Uyomane ubone ukuthi siphila esikhathini esandulela ukungenela kukaNkulunkulu ekubuseni komuntu. UMbuso wakhe, noJesu Kristu njengeNkosi, uyothatha izintambo. Izwe elinobunye lisemnyango!

Umbuzo uyasala, Yini okufanele uyenze ukuze ubone lesi sithembiso sigcwaliseka? Njengoba iBhayibheli lifeza indima ebalulekile emathembeni esintu ngekusasa, kuwukuhlakanipha ukwenza umzamo wokwazi iBhayibheli kangcono. Ngakho-ke, oFakazi BakaJehova bangajabula ukukuvakashela bazofunda nawe iBhayibheli ekhaya, mahhala.a Uma ukwamukela lokhu, ngokushesha uzobona ukuthi ubunye bezwe bungafinyeleleka nokuthi nawe ungahlangayela kubo!

[Umbhalo waphansi]

[Izithombe ekhasini 8, 9]

Kuwo wonke umhlaba, oFakazi BakaJehova bajabulela ubunye obumangalisayo

EKiev, e-Ukraine

EZagreb, eCroatia

[Isithombe ekhasini 10]

Injongo kaNkulunkulu iwukuba isintu sibe umkhaya owodwa onobunye embulungeni yonke